افضل ام خمس تركيه استفسار

[متعب السليمي]

السلام عليكم ورحمة الله وبركاته
اعضاء مكشات بغيت استفسر عن افضل شوزن ام خمس من نوع التركيات فقط
من ناحية الرمي والعطلات
والسلام عليكم ...

[متعب السليمي]

مع ذكر اسعارهن

[PATROL]

السلام عليكم
اخوي متعب بالنسبه للتركيات هج عنهن!
الا وحده اللي هي ستوقر فهي ممتازه لانه نفس نظام البنلي ماهي غازيه واللي يشرفون على تصنيعها خبراء من شركة بنلي!
بالنسبه للسعر اول كانت رخيصه بس هالحين كل يدور عليها وعساك تحصلها ب 9000 !
ارجو اني افدتو وتقبل تحياتي

[مقلب الشيصان]

اخوووي متعب .. بخصوص التركياات عندك .. ام بطة نظام روسيه بدوون غاز ..

ورميها ابدااع .. وسعرها في حدود 6500 ريال .. واتمنى انى افدتك ..

[زلفاااااوي]

حاليا ام بطة

[شمروخ الود]

يا اخوي اشتر بيكال روسية ابرك لك
وهي نفس قيمه التركيه وتحصلها اخت الجديدة7000 الي 9000

[هآوي مكشات]

ستوقر 2000
بلاك ولف
ريد وولف
ام بطه

[فتكاوي الرياض]

والله حرام تركيه وتوصل اكثر من 6000

العام واحد من العيال ماخذ بيكال روسيه جديده ب 5500

والحين ظنتي طقت ال 9000 مدري وش هالاسعار

اجل البريتا والبنلي شكلها ب قيمت موتر وصلت

بس السؤال هل الاسعار عشان الموسم ولا كيف ؟؟؟

[ابو شجاع]

السلام عليكم وحمة الله وبركاته:

اخوى متعب الكلام عن البنادق التركية كثيييييير ولا له نهاية

1_ اسعارها تبداء من (5500الى 7500) ريال وكل بندق تفرق عن اختها حتى

لو كانت من نفس الشركة ونفس الموديل:mad:

2_ بندق لايعتمد عليها وتطلب تنضيف بعد كل رحلة وربما صيانة:eek:

3_ بندق تمشي الحال للي طلعاته مو كثيره يعنى يمر الموسم مارمى 4 دستات

4_ اذا انت ناوى تملك بندق لك وللزمن وتصرحها ارفع دراهمك وزدها كل فتره وامتلك بندق حتى لو كانت بيكـــال

5_ انا واعوذبالله من كلمة انا جربت اكثر البنادق التركية وماوصلت للمستوى المطلوب

للقناص......؟ هذا الرابط راح يفيدك عن بندق البارديوس

http://www.mekshat.com/vb/showthread.php?t=310621

[طال السكوت]

كرال ارمس - ماغنوم - ام بطة

جودة - حرارة الرمي - وتسوق

بـ 6000 -6500

تيجي معاها ثلاث تشوكات 1و3و4

[بعيد الهقوة]

عندك ترايستار بالدرجة الاولى

خفة وحرارة سوق واللي محليها بسيطة التركيب والقطع

سعرها الحين 8000 وهي اخر مانزل بالتركيات

وعندك الستوقر 2000 وهي ممتازة بس تبي تنظيف ع طول وسعرها وصل 10000

وعندك البلاك وولف ممتازة وتكد ولا عليها

والباقي حسب استخدامك اذا تصونه بيعيش واذا بترمي ولاتنظف بتخرب عليك

اما الاسعار ارتفعت وغالية بالحيل

اجل الروسي الفيبر 30 وصلت 10500

هجاد ليل

الله يعين

[بعيد الهقوة]

شباب

هذي الاسعار حاليا

واللي يقول 6000 و5000 هذا زماااااااااااان

الحين مثل ماقلتلكم جدا غالية

[فرخ قطا]

ام بطه ويجي بعده بريدوس بغض النظر عن الغاليات مثل بلاك ولف وغيرها

[راع الفتك]

وعليك السلام يابوراكان خلك على ام وحده ابركلك من التركيات اخوك ابوزياد الشلهوب

[شمروخ الود]

يا حليلك وصلت الروسيه بيكال 28 انش 10000 ريال و30 الي 11500 الفيبر

[Oskar]

قريت كل الردود وما لقيت احد ذكر الاوسكار

معقوله لذي الدرجه فاشله؟؟

مع اني استخدمها هذا الصيد وما شفت منها خطا

[بيكال وغزال]

ام بطه ممتازه وبالاخص اذا ما كنت تستخدم ضغوط كبيرهزراح يصل قيمتها فوق 6500

[PATROL]

انا شريت اوسكار جديده بزيتها واستخدمها اقل من شهر ومارميت فيها الا ثلاث دستات تقريبا وانكسر معي منظم الغاز! مع اني كنت مستخدم ضغط 36 لاكن الصناعه الرديه رديه!
رحت وصلحتها وبعتها على طول والحمدلله شريت بنلي!

[ربيع مكشات]

استفسار عن الاوسكار الي مجربها يفيدنا وجزاه الله خير

[Oskar]

انا شريتها يوم العيد وللحين معاي وما شفت فيها عيوووب

مدى وحرارة رمي
رميت بــ صندوق فشق ضغط 36
ورميت كم رصاصه ضغط 40

وجاتني نصيحه لا ارمي فيها بضغط اعلى من 50

وسلامتك يالغالي

[PATROL]

انا شفت كذا وحده اوسكار منكسر فيها نظام الغاز!

[ستيفنزالقصيم]

طيب وش افضل نوع ودي اشتري

[Abo gssar]

بلاك وولف وستوقر ورد وولف كلها ممتازات اشتر ولا تتردد

[ابو سفيان]

يخوي اسال مجرب ولا تسال طبيب
استوقر 2000 افضل بندق تركيه على الاطلاق

ماعليش ياخوان تحملوني شوي بقول كلام مختصر وبعدين اسوي موضوع كامل عنها
كل ما نزلت بندق مدحو اهل السوق السوداء في المنتديات من دون تجربه نزلت البلاك ولف واشتريت منها وانفجر مع رجال في الشعيبه وربي انجاه منها بعد اصابه في اصباع يده الخنصر

ستوقر افضلها ولا فيه كلام كل من معاه ستوقر مدحها ولا فيها عذاريب ابد موفق

[متعب السليمي]

بارك الله فيكم
منكم نستفيد

[اعصار نجد]

فيه نوع جديد لايفوتك الصراااااااااااحه طلع بعد ام بطه اسمها ((الكاناس ))canas
هي اللي تجيك خشاااب بس وخفيفه مره ومخزنها مقفل تشيل اربع بس والخامسه ببيت النار
بس الصراحه علاج ومنظر ماتقول انها تركيه ابد ( نفس البنيللي الريفاليو والبريدا ونفس النظام والمكينه بس عيبها غاليه شوي وشف توها نازله وشلون بعدين يمكن ترتفع اكثر

[S3llo]

يا اخوي التركيات واجد وما عليك من اللي يقول لا تاخذهن تراهن ما يتحملن
اخوي صح فيه شي ما يتحمل لاكن مو كلهن خويي بايع روسيه وشاري تركيه ما ادري وش اسمها اول مره اسمع بها ولا قد ذكرها احد بالمنتدى انا جربتها يا عليها رمي هباااااااال سوق وحراره رمي مهوب طبيعي ولا قد شكا منها ما شاء الله
قد ذكرت له روسيه عليها ماصورة بلجيك ب7500 ويقول ما ابيها اللي عندي مافي امل افرط بها



لاكن فيها عيب بسيط موجود باغلب البنادق الغازيه الا وهو التنظيف لازم يبيلك تنظفها كل ثلاث دستات اربع


لاكن ترى التركيات توافيق
انا مجرب ام بطه رميها خيال عاد كلن وتجربه (وترى سعرها ب5500 واللي يقول انه زايد سعرها مو صحيح امس سائل عنها)

انت لا تتستعجل بالشرى شفلك احد معه ام بطه ولا بريدوس ولا رد ولف ولا ستوقر خذها وجربها شف وش اللي يجوزلك وتوكل على الله

[ستيفنزالقصيم]

الله يعطيكم العافيه
والله اني انحست مادري وش اشتري ام بطه ولابلاك ولف
ابي الراي الزين
طيب ام بطه وشي لونها سودء ام موجه
وبلاك ولف وشي سودء ولاموجه

[مقراش]

السلام عليكم يالربع ابي تفيدوني هل فشق فكتوري 32 ,6 طيب والا ردي

[نديم الخيال]

الله يعطيكم العافيه
والله اني انحست مادري وش اشتري ام بطه ولابلاك ولف
ابي الراي الزين
طيب ام بطه وشي لونها سودء ام موجه
وبلاك ولف وشي سودء ولاموجه

البلاك وولف معاد تجي جديده وهي الافضل من بين البنادق التركيه واذا تبيها موجوده عند واحد حادها 8 الاف
ان بغيتها راسلني خاص

[أبوأحمد2006]

البلاك وولف معاد تجي جديده وهي الافضل من بين البنادق التركيه واذا تبيها موجوده عند واحد حادها 8 الاف
ان بغيتها راسلني خاص


لاتكـون بيكــال بـس

هههههههههههههههههههههههههههههههههههه
ههههههههههههههههههههههههه
هههههههههه
هههه
ه

[قناص خلاوي]

كرال ارمس - ماغنوم - ام بطة

جودة - حرارة الرمي - وتسوق

بـ 6000 -6500

تيجي معاها ثلاث تشوكات 1و3و4


صدقت
سواء كانت ام بطة أو ام ذيب
ماقنوم ترمي الى 3 انش
وطول الماصورة 30 إنش
وهذا سعرها بالرياض والقصيم
بالتوفيق

[نديم الخيال]

لاتكـون بيكــال بـس



هههههههههههههههههههههههههههههههههههه
ههههههههههههههههههههههههه
هههههههههه
هههه

ه

لا ماعليك بلاك وولف اصل وفصل :D

[الفرسان2000]

السلام عليكم

ياجماعة الخير ودي اقول كلام بس لاحد ياخذ بخاطره وهو..
اللي ماجرب لايشوه وانا ياخوي متعب مجرب الفرسان 2000
والله اني ارمي بالطلعه الوحده نص صندوق ومن مقناص الجرجس العام
مانظفتها واذا لقيت بــ8000نيظف خذ ولاتشاور وقل غشني
ان بغيت حرارة رمي وان بغيت خفه وان بغيت سوق في كل الامور تعجبك
بس في ناس على الجرجس يرمي ظغوط اكيد السلاح يتأثر ياخي انت منت شاري
من اجل تخرب ..
ارجو اني افدتك

[الخديوى]

التركيات ام خمس فاشله جميعاَ !
واذ بتاخذ تركيه اشتر ام وحده او ام روحين ابركلك لان ام خمس ما نجحت عموماَ.

[دخنآوي]

التركيات ام خمس فاشله جميعاَ !
واذ بتاخذ تركيه اشتر ام وحده او ام روحين ابركلك لان ام خمس ما نجحت عموماَ.
:D ياحبي لك انا معي ستوقر كانت فيها انحراف بماصورتها خلل من مصنعها
وكان مايذكر ومايحتاج تعديل لكن عدلتها بـ 100 ريال والحمد لله من يوم شريتها ماتخسرت الا مخزن 12 طلقة :good:

اخوياي كلهم كانت معاهم بلاك وولف وماامدوحها ابد واحد خرب عنده الضاهر السحاب وواحد انكسرت معه حاجه ببطنها
لكن يمدحون ماصورتها مدح ماتوقع :)



اذا مااجربت تركيه لاتحككككم :)
وانا صراحة اقسم بالله افضلها على البيكال
لان البيكال ثقيله ورميها بارد الا بـ 960 :good: حلوة

وانا مااقولك لااشتر بيكال ولا تركيه ولا شيء
اذا تبي البندق اشتر بنلي بـ 18 وركب ماصورة مونتريال بـ 8 ;)
واذا بغيت تفك المخزن الله لايهينك جهز 4 الاف
:mad: الله يرحمنا برحمته

[ستيفنزالقصيم]

وش رايك بتركيه مموه يقول راعيها مرسوم عليها ام بطه

[راع البنلي]

ما شاء الله تبارك الله
تقرير رائع وجميل
شكرا لك الله يعطيك العافيه

تقبل مروري...

[بواردي تربة]

ام بطة سوق وتطرب راعيها ورخيصة حوالي 5800 الي 6000

[Patrol-350]

ام بطة سوق وتطرب راعيها ورخيصة حوالي 5800 الي 6000

+1

اسأل مجرب

معي فيبر 2011

[قناص خلاوي]

ام بطة سوق وتطرب راعيها ورخيصة حوالي 5800 الي 6000

صادق
سعرها بالرياض من 5900 الى 6200 جديدة ماثارت
وفعلها طيب ومجربة
موفق خير

[وزن بلوف]

اتجربه خير برهان :
معي ام ذيب رجفت فيها من القطا بالفايت
صراحه ماعليها ...ك لا م..
ودمتم سالمين.....

[الشرطه]

في ام بطه فيبر اسود جديده ماثارت اللي له نظر حياه الله

الموقع المجمعه ٦٠٠٠٠ حد

[ابو برتقاله]

ايه والله ارتفعت الاسعرا بي الاسعار المعقوله الحين التركيات
عندك الستوقر 2000 على 9000 وعندك ام بطه ام ثمان مب ام خمس على 5500 وعندك كرال ارمس ام ذيب اسود على 6000 و البلجيكي على 12000 و السوبر بنلي على 22000

( بس انا ابي ادري عن كرال ارمس ام ذيب اسود ) وش رايكم به

[الهيض]

السلام عليكم ورحمة الله وبركاته
مسّاكم الله بالخير جميع .. والله يسعد مساكم بكل خير
اولاً اتمنى من الاخوان اللي ماجربوا التركيات يكتفون بالنظر ولا يكتبون اللي يسمعونه .. لان الموضوع لم يُكتب الا لاخذ الرأي من اصحاب التركيات فـ يا أخوان لا احد يجي يقول انحش عن التركيات بكل انواعها وهو ماعمره جربها بس سمع هالكلام وقام يروجه في هالمنتديات كل ما سأله احد قال انحش عن التركيات هالكلام هذا لا يصح
انا يامحاتسيكم كنت ادور شوزن ايطاليه مهما كان سعرها ولا حصلت وهذا بفضل الله اني مالقيت ولا كان خسرت فلوس على الفاضي ..
وفي احد الايام اتصل علي احد الشباب وقال فيه شوزن تركية ام بطه حفر ام خمس ودخلت منتدى مكشات وقريت عنها وللاسف ماقريت عنها اللي يبيض الوجه اللي يقول تنفجر واللي يقول كل شوي تلك واللي يقول فاشله بالسوق والرمي ومن هالكلام ... فتوكلت على الله واشتريتها والحمد لله اني اشتريتها وصارت خيره
والله العظيم من ناحية السوق والحراره انها تعجبك وتطربك وتقوم بنفس الغرض اللي تقوم فيه اي شوزن ايطاليه
وترا ياخوي الناس تكتب اللي تسمعه وهي ماجربت
وانا اشوف ان ام بطة حفر اللي مكتوب عليها بسم الله الرحمن الرحيم ممتازه جدًا اذا انت شخص تبي تقنص وتنبسط .
والحين والله العظيم لو القى سوبر بنلي بـ 15 الف ما اشتريها لاني لقيت اللي يسد مكانها وبسعر مناسب جدًا جدًا
اجل اشتري سوبر بنلي ولا بريتا بـ 23 الف ؟ وش بصيد فيها يعني ؟
اصلا مافيه صيد هي كلها موسمين في السنه اكثره دخل وصفاري وقمري هاللي انتم تشوفون الطيب يصيد له 30 قمريه ، والرهو شوفت عينكم تشوف وحده والسيارات اللي تحتها 50 سياره
وبالنسبه لام بطه انا مارميت فيها ضغوط لاني بصراحه وانا اقنص مامرني لا غزلان ولا ديناصورات هههه
ولان ارسي الاصفر 32 يرمي الثلاث قماري بالرراحه والجاكور 36 يرمي الاربع بالراحه
لذلك اذا انت رجلن راعي قطا وقمري وصفاري وصيد سنع ماهو صيد هبال اشتر ام بطه حفر اللي مكتوب عليها بسم الله الرحمن الرحيم تراها طيبه بالحيل وممتازه في الرمي وخصوصا الطيار والله مايروح دقيقه جدًا وهالشي انا مجربه بالطيار تطربك فعلا .
وبالنهايه ترا كل الشوازن على حسب الرماي فيه اللي معه تركيه يرمي طيار وموقع ويجيب لك صيد يبيض الوجه وفيه اللي معه بريتا ولا سوبر بنلي ويرمي مع الخلا الخالي ويجيك يلولح يديه مامعه الا وحده ولا ثنتين