لاول مره بجرب تربية الابل وابي اجمع

[سارونة]

اللي عنده ناقه خلفه بكر ملحاء او زرقاء جذعه حليبها حلو تحتها حوار صغير ديسها نظيف في الرياض ويبي يبيعها يخبرني وياليت يحدها ويحط صورتها وانا شرايه ( لازم يكون السعر مناسب ترى عندي خبره)

[ابغى فرس]

بس الابل يشغل الشخص وخاصه اذا صارت حرمه

[سارونة]

انا مابي شي يشغلني انا ابي شي احط فيه راتبي لان يدي ماتمسك الفلوس وابغى شي استفيد منه مستقبلا والابل عطايا الله وتسر من يناظرها

[خيال الشمال]

انا اقول الغنم احسن واسهل تربية وافيد تجاريا

[ابو محمد 888]

والله ونا اخوك انحاشي من الابل مامنها الا الخساير اذا ماكنت منتجه
والبل الي تدورين مامنها الا الخساير راح تاكل راتبك وتبلشين
ولا تهقين ان تربيه البل بسيطه >> انا راعي ابل
شوفي لك مشروع ثاني ابرك لك كان قصدك تمسكين راتبك

[الحصان 1]

[QUOTE=سارونة;7460380]انا مابي شي يشغلني انا ابي شي احط فيه راتبي لان يدي ماتمسك الفلوس وابغى شي استفيد منه مستقبلا والابل عطايا الله وتسر من يناظرها[/QUOTE


الابل اذا كانت ماهيب زينه وابل مزاين وش تبين بها تاكلك بدون فايده
احسن لك مشروع الغنم وبالذات الحرية الحجازية تراها منتجه وماتكلف

[التعـ King ـديل]

نصيحه لك شوفي لك مشروع ثاني .. والمشاريع اللي تمسك الفلوس واجد << صاحب شركه استثمارات

[الضاري]

ينقل الموضوع إلى قسم .. بيع وشراء الإبل والخيل والأغنام ومستلزماتها (http://www.mekshat.com/vb/forumdisplay.php?f=106)

وآمل مستقبلاً العرض والطلب في هذا القسم المخصص لذلك

بالتوفيق

[أبو علوى]

الله يكتب لك اللي فيه الخير

[سيف الاشراف]

نصيحتي لكل من يقني الابل :

شراء الابل العاديه وانتاجها خساره في خساره فوق تعبها

اللي بيشري ابل يشري ابل زيان منتجه ولقاح على ركاب فاخره .. ممكن تجيك بكره تغنيك .. والا يرزقك الله بقعود تحفظه وينتج ويوصل ملايين ..

والنياق الزيان في المجاهيم ابتداء من 30 الف .. واعرف لي شخص في الرياض عنده ناقه ماشاء الله تبارك الله من اطول البل وازينها لقاح على بعير محمد بن راشد الافجح سحاب .. قيمتها زينه وان جابت بكره ففيها المكاسب يعلم الله

[شاعر وحساس]

كانك جاده في الموضوع بخدمك خدمه

احد الزملاء تقاعد ويشتغل في سوق البل بالرياض والرجال عنده خبره ونظر

ارسلي لي مواصفات الناقه اللي تبين مع الميزانيه اللي انتي حاطتها لها

وفالك الخلفه اللي تسر الخاطر مع تحفظي على تجارة الابل للشخص العادي

لانها بكل صراحه ماهي استثمار بل دمار على المال
الابل تاكل اكل هوايل وانتاجها بالسنين خاصه ان لم تكن من المزاين

والله يكتب لنا ولك الخير

[سارونة]

والله انكم صادقين زوجي ماحصل من ورى الابل الا خساير اكلها واللي مخبشه واللي تولد ويطلع رحمها وبلاوي وش كثرها وقيمتها تطيح واذا عالغنم ممكن فيها مكاسب بس غاليه ويبيلها من يهتم فيها ويركز اهتمامه فيها ، مو مثل الابل تحط عندها الرودس وتخليها ، عالعموم الله يكتب اللي فيه الخير. ويعطيكم الف عافيه؛؛×

[ديم الوسم]

هجي يابنت الحلال عن الدبش قصدي لك أرض أحسن لك

[سارونة]

على طاري الاراضي والعقار ،، هل صحيح انها بترخص والا حكي ؟ لاني ناويه اشتري بيت واخاف بعد ما اخذه تنزل الاسعار واتوهق

[ابو محمد السهلي]

العقار مافيه خساره ابدا .... على المدى البعيد والقريب