وش رايكم ؟ اشوف انه موضوع مهم بشان نوعية عدة البر

[بربنجي]

اخواني السلام عليكم ورحمة الله وبركاته ,,
باختصار فيه حاجات مهمه للبر بعد توفيق الله سبحانه وتعالى
مثل بطارية تشحنها بالبيت وتخليها احتياط معك لو لا سمح الله تعطلت بطارية سيارتك
وكذلك منفاخ الهواء الي ينشبك على الولاعة حقت السيارة
وغيرها من الاشياء الصناعية الاخرى من هذا القبيل مثل العفريته او حبل سحب ... الخ
والمهم فيهن انها تكون اصلية عشان لا سمح الله لو احتجتها ما تفشلك بأذن الله تعالى
وسؤالي لو اشتري هذي الاشياء عن طريق مثلا موقع امازون صناعة امريكية تكون اصلية ولها ضمانات هناك انتم عارفين تكون افضل من بعض الصناعات الي تكون عندنا هنا ولا يقصر اخونا العضو بالمنتدى الي عرض مساعدتنا بالتسوق من موقع امازون
لانه ودك بشي صناعة قويه ما تبي زي ما ذكرت لكم لا سمح الله تتعطل بطاريتك سيارة مثلا لما تنسى الانوار وتطفي البطارية وتجي تشحنها بالبطارية الشاحنه لها ما تشتغل ولا تكون ضعيفة ولا تتحمل السيارات مثل الجموس والجيوب وغيره وتكون مخصصه للسيارات الصغيرة
حتى لو السعر غالي ما عندك مشكلة اذا تاخذي شي اصلي تستخدمة خير من تاخذ رخيص وترمية
يهمني رايكم بالفكرة
اسف طولت عليكم والله يحفظكم ويرعاكم

[بدر20]

الله يوفقك

[بربنجي]

شكرا اخوي بدر 20 والله يوفقنا واياك وكل مسلم
وشكرا على ردك في موضوعي
حفظك الله

[عفشك مكمل]

اي غرض مخطط اني اشتريه ادور ترجمته للغة الانجليزية عن طريق قوقل

اتاكد من الترجمة عن طريق استعراضها بالصور من قوقل

اتوجه للامازون واضع العبارة عامة في محرك البحث

استعرض ردود الافعال والتقاييم على الشركة او البائع و المنتج الي ابغاه

بعدما اكون فكرة عن الافضل اتوكل على الله والتوفيق بيده سبحانه

[بربنجي]

اخي الفاضل حفظك الله الي اقصده من ناحية الجوده اتوقع انها افضل من الي عندنا
مثلا لو تشتري زرادية صناعة المانية تقعد عند سنين وسنين ولا تخرب باذن الله
وتسخدمها كاشاكوش او لصيانه سياة او فك اوتركيب وكازرادية وللحفر وغيرها لا شي تتحمل لان الصناعة الالمانية قوية جدا تقعد عند مية سنه ولا شي باذن الله
لكن مثلا لو شريت بضاعة تقليد خلنا نقول زرادية كذلك صح انها ارخص لكن ممكن لما تحتاجها تغدر فيك ولا تستفيد شي خساره فلوس وغير الفلوس الموقف الي احتجتها فيه
والله يحفظنا واياكم وشكرا لكم على ردودكم الطيبه
اخوكم / بربنجي

[ابومحــ م ـــد]

ياخوي نظريك صحيحه لكن ليست على كل شي مثلاً عندك واير السحب عند محلات الرحلات وايرات مجربه وقويه وهي صيني ورخيصه مثلاً عندك بدل ماقلت تشحن بطاريه وتحوسك بموية النار فيه جهاز عند ساكو سعره تقريباً بسعر البطاريه وهو لشحن بطارية الموتروفيها فلشر وحق ولاعه ومجرب المهم فيه ادوات مجربه حتى لو هي تجاريه اذا كانت تفي بالغرض ورخيصه
والله يوفق الجميع

[بربنجي]

اخوي ابو محمد شكرا على مرورك لكن اخالفك في الراي انا ابي شي باذن الله تعالى مضمون ميه بالمية ما فيه شك كل شي بمشيئة الله يعني لو معك افضل شاحن بالعالم واذا الله اراد لن يعمل
انا اقصد بعد توفيق الله وش ابي بالصيني ثم اذا جيت احتاجة اتحسف
ويمكن الله يعزكم ارمية بالبلدية ماله قيمه يعمل يوم او يومين ويخرب لا انا استفدت منه ولا انا وفرت فلوسي
اتمنى ان الصوره وضحت لك وللجميع
وانا ما انكر طبعا فيه حاجات جيده وصناعه ممتازه لكن فيه حاجات مثل الي ذكرتها وغيرها مهمه اكثر من بعض الحاجات
يعني مثلا لو تاخذ صحون صيني او تلفزون صيني او اي حاجه غير ضرورية مره بالبر ما تهتم سواء اشتغلت او ما اشتغلت
ولكن لما تكون الحاجه هذي ضرورية بالبر ذيك اللحظه تقول يا ريت
اتمنى ان فكرتي وصلت
والحافظ والمسهل اولاً واخيراً الله وحده سبحانه وتعالى
والله يحفظكم ويرعاكم

[سياف 606]

اوفقك الراي

[عاشق السيل]

وعليكم السلام ورحمة الله وبركاته ،،

فكرة رائعة ونافعة بيض الله وجهك ،، عن نفسي أحرص أشتري أفضل الموجود بالجودة ولا فكرت إني أشتري من النت أو غيره لأني أجد كل مايلزمني وخاصة إني إذا طلعت في رحلة بعيدة لابد من وجود أكثر من سيارة وبكذا يكون الأمان والاحتياطات أفضل من اللي كاشت على سيارة وحدة وكل أغراضه أصلية !!!!

[ابو لمى A]

تحصل في شارع الرين جميع الماركات

[بربنجي]

سياف 606 وعاشق السيل وابو لمى A شكرا لمروركم بالنسبة لشارع الرين صراحه ما قد رحت له لكن انا خوفي انهم للاسف اقول البعض ما ابي اعمم يغشون في البضاعه مثل يقولك انها المانية او انجليزية او امريكية وهي صناعه رديئة يعني صراحه ما تثق بالبعض
اشكر كل من قام بالرد على موضوعي او قراءة
والله يحفظكم ويرعاكم

[اصيل نجد]

هلا باخوي ومشكور لطرحك هالموضوع للبحث وتجميع الاراء بالنسبه لي انا اشوف انه فيه حاجات ماهي شينه سعر وخدمه بدل ماخذ من براء ويحسب علي نقل وسعر الدولار وشي دايم مافيه خصوصا الاحاجات الاستهلاكيه مثل بطاريات وغيرها من اغراض البر والرحلات لك تحياتي وموضوع يستحق النقاش

[بربنجي]

اخوي اصيل نجد انا عارف انه ولله الحمد كل شي موجود عندنا لكن انا اتكلم عن الجوده
وثانيا انا حددت حاجات هامه وضرورية لاهل البر وقد يوجد غيرها ضرورية لم اذكرها
اما الحاجات الغير ضرورية ما يمنع انك تشتريها من هنا حتى لو خربت ما تفرق معاك لانها غير مهمه على سبيل المثال لا الحصر مثلا لو تشتري كشاف ويطلع خربان بالبر ما اقول انه ما هو ضروري مره لكن اقصد ممكن تولع نار او نور السياره وتسد لكن لو فضيت بطارية سيارتك وجيت تشحنها بشاحن البطارية ما شحنت ما عندك شي تعوض عنه
اتمنى ان فكرتي وصلت والله الموفق
وطبعا ما فيه شك ان كل شي توفيق من الله والله وحده الذي يسهل الامور مهما اخذت من الاحتياطات

[kh3]

موضوع يستحق النقاش ...

ما فهمته من صاحب الموضوع أنه كلما طرح أحد الاخوان فكرة أو راي رجع هو إلى فكرته التي تؤيد الشراء من الخارج!!

عموماً الله يوفقك

[go4z]

ياخوي لاتنسى وزن السلعه هذا اهم شي
ارامكس ياخذون على اول نص باوند او نص كيلو 65 ريال واللي بعده 35
واجهزة شاحن البطارية غالباً تكون شوي ثقيله

[بربنجي]

اخوي go4z كلامك صحيح ما احد يبي الغالي لكن لما تكون حاجه مهمه وضرورية بالبر ذيك اللحظه تعرف انها ما كانت غالية وان سعرها فيها لكن لو لا سمح الله ما اشتغلت معاك ذيك اللحظه تتحسف انك ما شريت الغالي وطبعا كل شي بتوفيق من الله وهو وحده مسهل الامور
الله يسهل امرنا وامرك وكل مسلم

شكرا لمرورك ورايك الطيب
حفظك الله