أخوكم سيف الظفير بحاجة للمساعدة منكم يا الذيابة عطني العلم بخيمة التنهات عااااجل

[سيف الظفير]

السلام عليكم

اخواني الكرام

شريت لي خيمة التنهات المطورة من احد الاخوان في مكشات

والشاهد ما معها عمدانها

وانا احتاج للعمدان يالغالين بأي مكان ومحل

ومع العلم بأني مريت السنيدي وقالي انها ماهي متوفرة بالفترة الحالية

أبي حل او ترهيم او طريقة من اهل المحلات + اهل الخيام

^^ صورة للخيمة من النت ^^


http://center.jeddahbikers.com/do.php?img=398480


اللي عنده علم او خبر

تكفون لا تبخلون علي

والله ولي التوفيق

[الشعله 105]

اخوي سيف مريت برق الحياء ممكن انك تلقى وشوري لك راح للصناعيه وسوي الي انتي تبي وشكر

[wafi4sa]

انا دخلت ابي انصحك بخيمة البيرق
اما هذة النوع لم اجربها ولا اعرف عنها شي
لكن مادامك شريتها الف مبروك عليك
وإن شاء الله تلقى اعمدتها بكرى

[سيف الظفير]

اخوي سيف مريت برق الحياء ممكن انك تلقى وشوري لك راح للصناعيه وسوي الي انتي تبي وشكر


برق الحيا ما عندهم شئ


والصناعية يا اخي مدري وش ارهم لها الحديد ما ينفع

[سيف الظفير]

انا دخلت ابي انصحك بخيمة البيرق
اما هذة النوع لم اجربها ولا اعرف عنها شي
لكن مادامك شريتها الف مبروك عليك
وإن شاء الله تلقى اعمدتها بكرى



وانت ادرا ما بعد الوسم خيام يا الذيب

الله يبارك فيك ولعلني القاها يا الغالي

[محرين باالخير]

اخوي سيف هي اعمدتها تجي فيبر قلاص مثل الأستراليه لأني شايفها اقواس

[لاتكب البيالة]

السلام عليكم
الخيمه هذي وكيله او اللي يصلحه السنيدي راعي الشرع والاقمشة والخيام وليس السنيدي راعي ادوت الرحلات وهم عيال عم اضن وسنيدي الرحلات يشتريهن من سنيدي الخيام والاقمشة
الزبده اذكر واحد اخذه من السنيدي للاقمشة اللي جنوب مقبرة النسيم

[النجم السراي]

اخوي بكم سعرها وكم مقاسها ووين تنباع

[ابولولو]

الله يوفق هاالوجه للحل الطيب
عندي ري بسيط
وراء ماتحول الاعمده من تقويس الي مربعه وانا اشوف الخيمه من بره فيه شدادت
والمواصير موجوده باالسوق الي دخل مع بعض وتصير من فوق الخيمه تمشي مستطيله وتشد
وفيه راي ثاني
انك تجيب مواصير نحاس حقت مكيفات وهي رخيصه وعمليه جدآ وتحط وحده كبيره وصغيره علشان تدخل مع بعض وتمسك وممكن تحط شنكار يمسك المواصير مع بعض
اتمنا اني افتك ولو بشي بسيط

[سيف الظفير]

اخوي سيف هي اعمدتها تجي فيبر قلاص مثل الأستراليه لأني شايفها اقواس



صدقت يالغالي فيبر

[ابوصالح77]

الله ييسر أمرك وكل مسلم

[ابو حسان الجنوبي]

اذا تبي خيمه كاملة بكل عدتها لم تستخدم إلا مره واحدة ومبطنة بكل ملحقاتها بسعر 500 ريال فهي عندي للبيع
وللتواصل ابو حســـــان 0552255514

[ارتست]

انا استعرت نفسها من قريب لي لكن الموديل اللي قبل (موديل تدخل الاقواس في قماش )اهلكتني عشان تدخل
لكن هالنوع اعتقد اسهل بكثير
ورايي فيها انها زينه بس جرب قبل تشتريها تشوف دخول الاقواس سهل ولا لا
هذا رايي البسيط ان شاء الله ينفعك في اختيارك

[الوسم للخيام]

هلا بخوي سيف الله الله يعينك على هالبلوى
الله يصبحكم بالخير جميعاً
انا شفت طلبك واعرف انك ابتحلت بهذه الخيمة الي خسارة فيها لو 100 ريال لاني حضرت مرة مع ثلاثة اشخاص يركبونها وراحت نصف ساعه وما خلصوا والبركه بالاشخاص الي يزينونها بعيون الناس ولو بمخادعة اخوانهم
وترهيمها ليس بالصعب وطبعاً ستضطر لاستخدام الحديد او البلاستيك لانه ليس لدينا صناعة المنيوم ولو وجدت فستكون اسعارهم غالية جداً . وتقديري انها ستحتاج الى 7 انابيب طول كل منها 1 م على الاقل . وكل الخيمة ستحتاج الى 21 عمود توصل بمفصلات وهذا مكلف ويبيله وقت ولكن ممكن تسوي عاشق ومعشوق تدخلهم ببعض ومع ذلك ستكلفك مبلغ قد يتعدى ثمن الخيمة . الله يعوضك خيراً منها
وعندي لك اقتراح
تعمل لها مواسير بلاستيك نص بوصه او اقل ان وجد حقت سباكة المويه في البيوت وتعمل بين كل وصلتين جلبه لتوصيلهما ومع ذلك ستكلفك مبلغ الله يعينك
وهذا برأيي اسهل وسيله يمكن انها تنفعك على شان تتقوس زي الالمنيوم
والله ياخي الكريم اني شايف طلبك ولكن مابيدي حيله
وان شاء الله سيأتي يوم ينتهي فيه الزمان الي يهكون علينا فيه ويبيعوننا بضايع رديئه ومشاكلها ماتخلص
ولو حبيت تاخذ خيام الوسم فسأعطيك عرض حلو عليها تقديراً لخسارتك

[بليزر616]

السلام عليكم ورحمة الله وبركاتة

يالله مسه بالخير تبي العلم عاد ماعاد لها الا نظام خيام الحرس الجحش والحبال تشدها من برا

عمدان بتتعبك الاكان لقيت لك احد يفصل لك حديد بنظام الوصل اللي تصفط ممكن تناسب خيمتك

وفية حل سريع جدا حطها في البر وامش وخلها

تحياتي لك اخوي سيف

[سهاله]

السلام عليكم
أخوي سيف الظفير فيه فكره عندي لك جرب جيب لك بايبات جدد حق تسليك المجاري أجلّكم الله وجربهم لأنهم ينربطون مع بعض ويتشكلون على شكل القوس وتقدر توصلهم مع بعض وتفكهم
هذا اجتهاد مني والسموحه على الفكره ولايهينون الربع×

[سيف الظفير]

ابشركم لقيت العمدان عند ابو صالح محلات البرية مخرج 14


وتوي جاي من عندة

[سيف الظفير]

السلام عليكم
الخيمه هذي وكيله او اللي يصلحه السنيدي راعي الشرع والاقمشة والخيام وليس السنيدي راعي ادوت الرحلات وهم عيال عم اضن وسنيدي الرحلات يشتريهن من سنيدي الخيام والاقمشة
الزبده اذكر واحد اخذه من السنيدي للاقمشة اللي جنوب مقبرة النسيم


ادري يالغالي ولكن للاسف الوكيل ما وفر اي شئ للان

[سيف الظفير]

والله يا تركيبها صعب


بالرغم اني حاولت اركبها في البيت مع احد الشباب الصغار الوكاد يبي لها 3 رجال غلشان تنصب

[عاشق السيل]

والله يا تركيبها صعب


بالرغم اني حاولت اركبها في البيت مع احد الشباب الصغار الوكاد يبي لها 3 رجال غلشان تنصب

أنا قايلك أخوي سيف ،،

عن تجربة : لدامها راكبة أعتبرها من أحلى وأفضل الخيام ،، لكن تركيبها وفكها يخليها من أسوأ الخيام !!!!

المثل يقول ( يامن شراله من حلاله علة ) والله يعينك ههههههههههه

[سيف الظفير]

الشكوى لله

استغفر الله امس لعنــ.......... لين مليت

ضفيتها وقمت عنها

[عين حصنان]

هههههههههههه اّاّاّاّاّه ه ه ه ه ياخيمة التنهااات

وعليكم السلام اخي سيف

والله ياهي مغثه تركيب عمدان الفيبر والفك العن و ادهى

يبيله اقل شي 2 شباب و عضلات

لان العامود مايمشي في المجرى من غير ما تقوس العامود مع المجرى

والله اني ماستخدمته ولا مره .. وحبيت اجرب تركيبه ومقاومة الماء

عجزت اركبه لحالي غير استعنت بالاصدقاء وبعد التجربه عجزت افك واخرج العمدان من المجرى

ورميته بالحوش مثل ماهي عليه وله حول اسبوعين

كان ودي اهديك العمدان .. لكن الحمد لله انك لقيت عمدان وعساهن مبروكات

ودي اهدي هالخيمه ... لكن بصراحه ماتنهدى لأنه ماتبيض الوجه هههههههههه

مشكلة هذي الخيمه هو العمدااان متينه جدا ويصعب تقويسه

مجرى العمدان ضيق بالحيل ويصعب تمرير العمدان من خلاله

بالتوفيق للجميع