هل القهوة لازمة للكشاته

[الوافي.]

قرأت موضوع اخي ابو معاذ على هالرابط (http://www.mekshat.com/vb/showthread.php?t=455218)

والحقيقة ااعجبتني العزبة وفكرت فيها ان الكثير من الناس يرغب بالتخفيف من الاغراض وجلسته كلها نصف ساعة او ساعة بالكثير فهل لابد من القهوة لانها تأخذ وقت كبير لصنعها حسب الطريقة الصحيحة اما الشاهي فقط ما فايح وسكر وشاهي ولا يضره البقاء الوقت الطويل في العزبة اما القهوة فلابد ان تطحنها في وقتها هي والهيل مما يجبرك على اخذ طاحونة او نجر مما يكبر حجم العزبة وخاصة ان الكثير من الشباب لا يميل الى القهوة ولا يعرف صنعها وهو اهل الكشتات العصرية او الى العشاء الاخر
ارجو ردوكم عن هالموضوع لان اخوي الجذع (17سنة) يرغب بعزبة ومحتارين فيه

[ابوفهد225]

انت ومزاجك !

يعني اذا قالوا الشباب لا القهوة لازم في الكشتة تشربها وانت مغصوب عليها يعني !!

اقترح عليك تشتري قهوة نسكافة ثلاثة في واحد وتختصر الوقت ماء فايح ومغلف من القهوة وانتهينا ولا ابريق ولادلة ولاهم يحزنون :)

[نفود الطوقي]

الناس تختلف

[دغيم1]

السلام عليكم ورحمة الله وبركاته
حياك الله أخوي
القهوة كيف
وتقاليد عريقة
وهي تعتمد على الشخص نفسه في رحلته هل يحتاج للقهوة ام لا
وهل يمكن يمر عليه كشاته ويسوي لهم زل قهوة
وغير ذلك
لكن مسالة الحفظ
الشاي والسكر يتأثر باختلال ميزان الحفظ
فإذ كان السكر والشاي بالقرب من أشياء لها مادة عطرية فإنه سيتأثر بالنكهة وكذلك طول مدة الحفظ او تأثرهما بالحرارة او أشعة الشمس .
اما بالنسبة للقهوة والهيل :
القهوة الطريقة المثلى هو حمس القهوة دون الطحن
وعند الحاجة تأخذ الكمية التي تريد وتطحنها حتى تحتفظ القهوة بنكهتها وجودتها
لأنه مالم تطحن فهي لاتتأثر
وكذلك بالنسبة للهيل يجب حفظه في وعاء زجاجي او معدن ذلك ان الوعاء البلاستيكي لايتحمل قهوة الهيل الحارقة وكذلك تتأثر نكهة الهيل بالمواد البلاستيكية والطحن لفترة طويلة
آمل ان اكون قد قدمت بعض الإضافات
تقبل تحياتي
أخوك / ابو فيصل

[السنع كله]

نكشت من اجل ان نتقهوى
وش خانة المكشات بدون قهوة

[Red falcon]

بالعكس القهوة هي الاساس لمزاج الراس
الشاهي اعتبره مشروب هامشي مساعد
والقهوة اساسا تجي معنا للبر مطحونه ولاتحتاج الا تفويح أقل شيء 30 دقيقة
كذلك تجد المتعة في طقوس عملها وطبخها وشم رائحتها وغالبا يتم عملها على النار
ليلا أو في الصباح الباكر أو اثناء أعداد الغداء يعني لاشغل ولامشوار وحاجة


والجلسة في البر ليست نص ساعة وساعة كما تقول الناس ماهي مستعجلة مثلك
أغلبيه الناس تجلس 5 ساعات وزيادة لان حلاة البر في التأمل والهدوء ..


اما أذا كان المشوار مستعجل أي كفي شوب بالطريق يسد اللزوم

[الوافي.]

يا اخوان اذا صرت بالسفر هل تسوي قهوة او بس شاهي

القهوة يبلها على الاقل ربع ساعة طبخ غير الطحن وتطليع الطاحونة من العزبة الكبيرة

رأيي ان الشاهي يغني في بعض الاحيان عن القهوة

اما اللي دائما كشتات ويسوي قهوة فبالامكان انه ياخذ القهوة محطونة لانها لا تطول معه بالكثير يومين فقط ومن ثم يطحن غيرها

هو المهم في طلعات العصر لهالشباب او في السفر شاهي وبس

[Red falcon]

أخوي حنا ناخذ قهوة مطحونة تكفينا للمدة اللي نبي
مافيه أحد ياخذ قهوة غير مطحونة أو طاحونة

أزيدك من الشعر بيت
فية ناس تاخذ البصل مقطع في أكياس ومحطوط في البراد
وشاهدت ناس ماخذين العجين معجون وخالص في أكياس بالبراد
وبهذا العجين ضبطوا قدامي افضل قرص جمر مله ذقتة منذ زمن
كل شيء صار سريع سريع وبعض الاشياء تم الاستعاضة بها
مثل الطماطم بعض الناس تستغني عنه بالطماطم المعلبة والصلصة
شاهدت ناس ماتحب الدوافير وتفضل الطبخ على الجمر بدون توصيخ
الاواني لعدم استهلال الماء تلف قصدير على الآنيه سوا ابريق او دله او قدر

في البر نبحث عن المختصر والمريح
فاذا كانت الرحلة والوقت لايساعده كرحلة المقناص او الرحلة المستعجلة
فماء ساخن يكفي مع الشاي أو المرور على كوفي شوب قبل الذهاب للبر

[عملاق سبيع]

شي غريب كشته بدون قهوه اجل فيه ناس ماتاكل الرز يعني مانشيل رز خذ كل شي معك لاطلعت للبر

[alkenani]

حسب الوقت اللي راح تقضيه في كشتتك و حسب جوك إذا يساعد على تجهيز القهوة و الشاي

[بليزر616]

نكشت من اجل ان نتقهوى
وش خانة المكشات بدون قهوة

هههههههههههههههههه

اجل بعد وش فايدة الرحلة كلها بدون الشاذلية
سوأل مش ممكن
بل مرفوض

[عاشق السيل]

حسب مزاجات أعضاء الطلعة ،،

حسب وقت الطلعة ،،

حسب مدة الطلعة ،،

حسب أعمار المشاركين بالطلعة ،،

اختلافات كثيرة تحدد ضرورة وجود القهوة أو لا ،، اللي يقول وش فايدة الطلعة بدون قهوة أقوله ممكن تطلع مع ناس ولا واحد فيهم يشرب قهوة وكلهم شقردية وراعين وناسة ،، يعني أحرم نفسي أطلع معهم ؟؟

وعن نفسي ممكن أطلع من العصر إلى آخر الليل ماطرت علي القهوة ولا فكرت اسويها رغم إنها موجودة بالعزبة ،، وممكن أطلع نص ساعة ولايمكن أتنازل عن القهوة لأني بوقتها خرمااااااااااااااااان !!!!!!

عموما عندي لك حل رهيب جدا وسهل جدا :

حط لك شنطتين صغار جدا ،، وحدة فيها بريق شاهي وسكر وتلقيمة وبيالات ،، والثانية حط فيها دلة وملقمة وقهوة وهيل وفناجيل ،،،، وكل طلعة تبي تعرف وش تحتاج ممكن شنطة الشاهي بس وممكن تاخذ الشنطتين ويادار مادخلك شر ......

[wafi4sa]

الدلة اللي ما تبهر من الهيل
مثل ...... اللي خبيث نسمها
وانا عندي طلعة مافيها قهوة ومقداع وشاهي ماهي طلعة
متحلو السوالف إلا معي الصيني

[ERIC7]

القهوه كيف ولااتركها لو اطلع لحالي ولا اشوف انها تاخذ حيز كبير دله صغيره والقهوة والهيل عن نفسي قبل كل كشته اطحنها ولها علب واذا رجعت انزلها لقهوة البيت عشان ماتبطي مطحونه وعلى هالحال
مع اني ممنوع منها لدواعي صحيه لاكن لازم اخذها معي ماتدري من يسير عليك حتى لوك لحالك

[ابوصالح77]

هلا بكم يالغالين
كل عام وأنتم بخير
بالنسبة للحجم المناسب للعزبة يحكم فيه إحتياجات الشخص
فتختلف من شخص لآخر بل غالبنا لدية عدة عزب يستخدمها حسب ظروف رحلته
كمل لأخوك ثاية مختصرة الحجم

[ابوعبدالله البدراني]

القهوه والشاهي هي العزبه والا وش معنى عزبه اذا مافيها قهوه وشاهي

[راعي وفى]

الا من زل ثلث الليل الاول=قبست النار وادنيت الدلالــــي
ولا عندي نديم اشتكيلـــــه=سوى نجري وما يطري ببالي
يوسع خاطري فنجال اشقر=الامن زل مربوب وسالـــــــي

[abo-khalid]

السلام عليكم ورحمة الله وبركاته
خذ مني الرد :-------------------------------------
ليتك تشوف ياصاحبي اسفل التوقيع ...علـــم(ن) يسرك مـع جلست الاخوان
مدة الفنجان تغني عـــــن كل تبيليع ...مع فردة(ن)شقراء طعمها من الخلان

[الحر503]

كل واحد ومزاجه ,,
انا عني الطلعه بدون قهوه ماهي طلعه

[ولد روووق]

يرجال انت تجيب لنفسك النقد وانت في غنى عنه القهوة من عاداتنا وتقاليدنا وثقافتنا وكرمنا اللي ماحرمة الاسلام يعني انت تجيب لنفسك الورطة اغلب اهل مكشات من البدو والبدوي يعتز بكرمةو القهوة هي من الكرم الضيف يكرم بالقهوة انت منتشرب قهوة مهب عيب اعرف رجال ابدوي عتيبي ماقد شرب القهوة في حياتة ولاهو عيب لكن العيب يجونك الضيوف وانت متقدملهم القهوة هذي فضيحة عن العرب واتمنى اني اوصلة الفكرة وشكرا

[الإستراتيجي]

اخوي أطحن القهوة في البيت و كل ديرة فيها طاحونه وقهوة طيبه لا تخاف عبر مجرب آخذ معي حق ثلاث أيام وكل ما خلصت أدخل ديرة حولي وآخذ لا مشكلة ...

[ابو سمر]

أنا أسويها وأنا بالطريق أوقف يمين أو يسار واشب على المعاميل واحطها في ترمس وأكمل مشواري ، والعملية ما تأخذ أكثر من 30 دقيقة..

القهوة في البر لها طعم خاص جداً.. والرحلة بدونها ما تسوى ..

[hehehe]

وشوله الواحديكشت اجل لاصار بيشيل هم تزيين القهوه

اصلا الكشته مايجيلها طعم بدون ريحتها

[قلايد الخيل]

اومــــآ محتآرين ؟؟؟

[شلشكو2011]

كل عام وانتم بخير
العام الماضي كنت بجدة ولقيت محل كفي شوب بالكرنيش يبع قهوة عربيه سريعه التحضير
الطريقه ماء مغلي يوضع بالكاس وتضاف اليه المغلف يجي منه ( صغير وكبير ) ويحرك بالملعقه جيداً وبالعافيه
المنتج جيد
اذا ما سبقني احد على ذكرة
احاول انزل صورته بالقريب ان شاء الله

[مبتغي]

العزبة تشمل القهوه والشاهي
لكن اذا تبي تختصر ما يمنع لكن اعطي اخوياك خبر ان عزبتك شاهي فقط
علشان ما يعتمدون على ان العزبه معك ومافيها قهوه بس شاهي
وعن نفسي العزبة لازم تكون مكتملة

[greensky511]

very good.

[ابوسامي 2011]

كل عام وأنتم بخير

[مراسل العيينة]

علمني اخي الفاضل جزاك الله خير واطال الله بعمرك وش قيمة الكشته بدون قهوه؟
يقول الشيخ راكان بن حثلين:

ياماحلا الفنجال مع سيحه البال
في مجلس مافيه نفس ثقيله
هذا ولد عم وهذا ولد خال
وهذا رفيق مالقينا مثيله

[خشم العرمة]

على حسب اذا طلعتنا خفيفة ساعتين ثلاث وراجعين القهوة في ترمس واخذ عزبة الشاهي فقط
اما اذا الدعوة مطولة اخذ العزبة كاملة

انا عندي ثلاث عزب وحدة للشاهي فقط وهي عبارة عن بريقين غضار وسط وصغير وعلبة شاهي ابو جبل وعلبة سكر ودافور صغير اللي الغاز حقة استخدام الين يخلص وغيرة بواحد جديد.

وعزبة كاملة لشاهي والقهوة بريق تفويح موية + ثلاث اباريق كبير ووسط وصغير + دله معدن لطبخ القهوة+ دلتين رسلان وحده للمسمار وحده للهيل ودافور وسط ايطالي مع راس بريموس وعلب الشاهي والسكر والهيل والقهوة والزنجبيل والمسمار والنعناع الناشف وعلبة بيالات وفناجيل هاذي مرة في العزبة الوسط ومرة في العزبة الصغيرة على حسب

وعزبة طبخ قدر ضغط سب 10 لتر + قدور كوفيا اللي تدخل في بعض وملحقات الطبخ كاملة

[أبو هشام راشد]

القهوة مهيب لا زمة لكن متعة الرحلة بدون قهوة وشاي ناقصة عند الكثير

وبالنسبة لموضوع أخوك خله على مزاجه فقد يكون من هوات غلاية السيارة فيكتفي بالكثير مع ليبتون + قهوة سريعة فلا تحتاج إلا اليسير من الأغراض كالفرشة وشيء من الماء لأن البقية حسب الحاجة

[abu-turki2009]

انا أشوف ان العزبه بدون القهوة ... مثل الرز بدون ملح

[الكايف2]

اهم شي القهوه
اللي مامعه قهوه لايروح والناس تختلف في مزاجها
راايي هذا ؟؟؟؟؟؟؟؟؟

[الوافي.]

اخوي يقول خلوا القهوة لكم يالشيبان

وعني انا ما تصلح الكشتة ولو لنصف ساعة بدون قهوة لانها هي علوم الرجال

والاولين يقولون خذ فنجال وعلوم رجال

بس وش اقول لهالاخو تربية الاستراحات

[تركي1]

السلام عليكم

بالنسبة لي لابد من القهوة وما أعتبر معي عزبة إذا لم تكن أدوات القهوة موجودة

حتى في السفر بالسيارة أقف كل بع ساعات وأعد لي القهوة والطريف أنه في أحدى سفراتي وعندما دخلت حدود السعودية قادما من الإمارات أوقفت سيارتي بجانب إحدى المحطات

ووضعت القهوة على النار .. وتفاجأت بأحد الأشخاص يقترب مني ويسأل القهوة على كم؟؟ ظنا منه بأنني أبيع القهوة!

بالتوفيق للجميع

[ساري بليل]

ياخوي لابد من الهياااااااااااااااط هههههههههههههه
ههههههههههههههههههههههههه
ههههههههههههههه
ههههههه
يقول : مجلس من دون كيف العرب كيف اروده
لو معازيبه عيااااال القايد السلطاني

هههههه
امزح معاااااااااك يالغلا بس بالنسبة لي واااااااجبة

[الوافي.]

كنت في مجتمع شبابي بالبر وشاهدت اكثرهم بس شاهي والنادر منهم معه قهوة
يا اخوان انا اتكلم عن الشباب بين 15-25 سنة او 30 في قليل من الاحيان
الشباب اللي ما يبعدون عن الديرة الا في السفر
اما من هم يبعدون عن الديرة ويكشتون ويخيمون لمدة يوم او يومين او اسبوع او راعين صيد فعيب ان لا يكون معهم قهوة
كلامي صحيح يا الربع؟

[أبو خالد ،،]

القهوه ضروريه تعدل الراس

[شمالات نجد]

هالموضوع مع انه قديم شوي لكن ريحة القهوة تفوح منه

يازين القهوة والازين اذا صادتك تخلص الدله لحالك بالراحه وخطير تضبط ثانيه

وفق الله الجميع


Sent from my iPhone using Tapatalk

[طلولي]

نكشت من اجل ان نتقهوى
وش خانة المكشات بدون قهوة

[بيض الله وجهك
ا علوم لرجال SIZE="4"][/SIZE]

[حب لاينتهي]

كل نفس وماتهوي

وليش تشيل طاحونه

انا القوه مطحونه والهيل مطحون بعلبها

ولا فيه اي مشكله

مشكور

[عز نفسك]

السلام عليكم ورحمة الله وبركاتة

والله يالغالي كلن ومزاجة ....
لكن انا ما اطلع الى علشان المعنى والقهوة والشاهي والنار الله يكفينا شرهــ

بعض الشباب يطلعون من غير نار اجلس باالحديقة ازين لك هههه ...

[ألكسنر]

على حسب المزاج فيه ناس ما تتقهوى ولكن انا من الناس الي يدور القهوة :D

[tevo]

موضوع عجيب!!!!

[سيف الشرق]

والله يالغالي
بالنسبة لي طلعة بدون قهوة ماأطلع ماش
واذا مامعك معاميل القهوة ولو انها خفيفة ماأحس أنها طلعة ..
بالتوفيق يالغالي

[ســـبــار ربــعـــه]

السلام عليكم ورحمة الله وبركاته

حياك الله أخوي
القهوة كيف
وتقاليد عريقة
وهي تعتمد على الشخص نفسه في رحلته هل يحتاج للقهوة ام لا
وهل يمكن يمر عليه كشاته ويسوي لهم زل قهوة
وغير ذلك
لكن مسالة الحفظ
الشاي والسكر يتأثر باختلال ميزان الحفظ
فإذ كان السكر والشاي بالقرب من أشياء لها مادة عطرية فإنه سيتأثر بالنكهة وكذلك طول مدة الحفظ او تأثرهما بالحرارة او أشعة الشمس .
اما بالنسبة للقهوة والهيل :
القهوة الطريقة المثلى هو حمس القهوة دون الطحن
وعند الحاجة تأخذ الكمية التي تريد وتطحنها حتى تحتفظ القهوة بنكهتها وجودتها
لأنه مالم تطحن فهي لاتتأثر
وكذلك بالنسبة للهيل يجب حفظه في وعاء زجاجي او معدن ذلك ان الوعاء البلاستيكي لايتحمل قهوة الهيل الحارقة وكذلك تتأثر نكهة الهيل بالمواد البلاستيكية والطحن لفترة طويلة
آمل ان اكون قد قدمت بعض الإضافات
تقبل تحياتي
أخوك / ابو فيصل


كلام صحيح ميه ميه. وش علاج الراس عقب الدوره والتقصص من طلعتها لغيبتها غير بريتن فنجالها كنه خضاب هنوف.:good2::good2:

[ويكو]

حياك الله اخوي الوافي بر بدون قهوة ولا شي بس انت و مزاجك اذا لا ترغب القهوة فانت حر

[الوافي.]

طيب اذا رحت للثمامة او اي مكان فيه تجمع شبابي بالبر مثل المانعية هل تنتقد الشباب بدون قهوة فقط شاهي ويمكن شاهي بترمس مسويتة الخدامة