سؤال لزوار الدهناء -هام جداً-

[عبدالله 102]

صبحكم الله بالخير جميعاً
تذكرون يا أخوان العام الماضي منع دخول الدهناء سواء للرعيان او المحتطبين او الكشاتة
أحد يدري عن هالسنة فيه منع عن الدهناء ولا لا ؟

[فيصل الشنيفي]

الدهنا محميه حاليا ويفكون الحما للرعي في 1/1/1433 ان شا الله واما بالنسبة للكشاته فما اتوقع فيها مشاكل هالايام انا كنت فيها قبل اسبوع ولا جانا ولا شفنا احد.

[فيصل التميمي]

ماهيب ممنوعة من الكشاتة شد عزبك وتوكل على الله

[أبوجواهر]

طيب ينفع الواحد يروح للدهنا بسيارات مثل اليوكن والتاهو. والا خطر بسبب العروق والتغاريز. طبعا السيارات دبل اتوقع لزم جيوب او شاص.

[مقناص 20]

العام كشتنا وحطبنا منها ولافيه اي مشاكل ولله الحمد
واذا تبي تكشت توكل على الله وان شاء الله مافيه اي مشاكل
وبالتوفيق لك

[عاشق الفلوات]

لا توهق اذا رحت للدهناء ادخل عشره كيلو وفوق علشان تسلم من المجاهدين ولاتبين وخلك في مطمن وقسم بالله ان اخواني قبل العيد راحو للدهناء وتعرضوا لمضايقات من المجاهدين وقالوا لهم اطلعوا بس صار واحد معهم يعرف واحد من المجاهدين وتوسط لهم وتركهم

[ذيب البطين]

لاتتوهق ترى فيها حجز للسيارات للحطابه الي اعدموا الشجر والمنع مشدد عليه من الداخلية

[عبدالله 102]

الله يجزاكم خير على تفاعلكم

بالنسبة لك اخوي ابوجواهر

تقدر تدخل لها عادي جداً جداً واليوكن والتاهو مواتر نشيطة وما عليها خلاف×

[أبوجواهر]

الله يجزاكم خير على تفاعلكم

بالنسبة لك اخوي ابوجواهر

تقدر تدخل لها عادي جداً جداً واليوكن والتاهو مواتر نشيطة وما عليها خلاف×

الله يعطيك العافية. لكن تعودنا نسمع فلان راح للصمان او الدهناء لكن اللى معه جيب او هايلوكس لكن ماسمعنا احد كشت. بتاهو مثلا. الخوف انه يغرز ولا يطلع. وآسف طلعنا عن عن موضوع صاحب الموضوع.

[سندباد الخليج]

حياك الله اخوي عبدالله 102

نفس الموضوع الي تسأل عنه ورد بعض الاخوان

سؤأل لاهل الدهنا والي حولها لو تكرمتو بيض الله وجوهكم (http://www.mekshat.com/vb/showthread.php?t=456221)

[عبدالله 102]

ما لقينا الجواب الأكيد أحد يقول محمية و أحد يقول مهيب محمية نبي الخبر الأكيد

[ابو سعد 77]

اسمع الكلام الي يجمد ع الشارب..~

انا وربعي رايحين للدهناء ثلاث العيد الصبح دخلناها وكشتنا فيه يومين وحطبنا منها عشان نشب نار فيها بس ولا ماخذينا معنا شي عشان المجاهدين بيودونك القسم ويصادرون الموتر وغرامه 5000 ريال وانا اتوقع عادي تكشت فيها بس خل معك قارمن عشان تعرف مدخالك ومخراجك وازبن في نقرة عشان محد يشوفك..~

تحيآتي..~

[ابوجود الحربي]

اخوي الكريم
انا يوم الخميس والجمعة مخيم مع العائلة واجو ولا اروع وبالذات مع الصباح الباكر مع وصول الضباب شي خطيييييييييييير ومن ناحية المضايقات ماحد حولك ولا شفنا لا دورية ولا غيرة
بس نتمني من جميع الكشاته المحافظه على النظافه وعدم الاحتطاب حتي يبقي لنا متنفس ونحافظ على البيئه
حرر في 22/12/1432هـ