نسمت كفراتي الى عشره وخسرت كفرين

[عاشق الربع313]

السلام عليكم
طلعت البر امس وكفراتي كلها على عيار 10 يوم بغيت امشي حصلت الكفر الامامي اليمين
مافيه هو قلت بروح انفخه وانا طالع بنشر الثاني وانا ماشي تصلخت الكفرين ومادري وين وكيف طار الهوا من الكفرات نوع الكفرات هانكوك245-85-16 ياليت اللي يعرف وش العله يفيدني الله يوفقكم وشكرا

[خطااب]

كفر الهنكوك ( الكوري ) لين جدا و الضغط عندك عشرة مما تسبب بالتهريب

وبالنسبة للتسلخ اكيد الكفر موديله قديم ( محترق )

[عاشق الربع313]

من ناحية لين لين مافيها كلام اما الكفر مركبه في رمضان الله يعطيك العافيه
بس معنى كلامك اني ماعاد انسم اقل من 15 يالغالي

[عـبـود 911]

يمكنك جار على الموتر وانفصخ الكفر

[عاشق الربع313]

ايه والله كنت جار عليه بس انا كنت من الظهر في البر ولا وهو ماانفصخ نسم لو انه انفصخ كان اهون بس الحمدلله على ماكتب الله

[عاشق الربع313]

مانسم الكفر الا العشاء

[اصغراكبرخان]

السلام عليكم ورحمة الله وبركاته
اخوي اول شي شيك علي عيار الهوا الساعه
لانه صارة معي انه يعطيك امازياده ولا ناقص (يعني مخرف)
ثاني شي ممكن تكون الابره حقة البلف سواء لستك اوتيوبلس
شكرا

[شحرور الدهنا]

الهنكوووك عله ركبته وتحسفت كل طلعه بر يجيه شي يا ينفصخ او يدخل في جمبه شوك اما بالزفلت ممتاز والتنسيم ٢٠وبس لاتزل تحت وعيبه ان جمبه لين مره كنه لستك من الرمث ينشق

[عاشق الربع313]

بيض الله وجيهكم الله يجعلني واياكم من اهل الجنه عزالله ان الفايده وصلت الله يعطيكم العافيه

[هويدي]

بعض الجنوط تخلي الكفر يهرب هوا من شفه الجنط ويزود التهريب كل ما قل ضغط الهوا

[خطااب]

الضغط عشرة كثير والله وعلى المقسات أن الجنط 16 و العرض 245 والارتفاع 85


أفضل ضغط له 20 كفايه للهانكوك لانه لين جدا

[dead man]

لما تنسم الكفر اذا طلعت فيه على الزفلت لاتتعدى ال80 واذا جيت تلف بالمواتر لف فيه على شكل انسيابي لانك اذا لفيت فيه وانت مسرع الكفر بينظغط وبيفرغ جزء من الهو ا الي بداخله ويمكن يفصخ عليك.

[سبع الهيجا]

أعانك الله على تكلفة الكفرات الجديدة...

اولا ..لا تنسم الكفر اقل من 20.
ثانيا.... اذا طلعت على الاسفلت انفخ الكفرات 30 اقل شيء.
ثالثا... الاطار صلاحيته من 2 الى 3 سنوات ..فاذا انتهى فقد قوته واصبح سهل الانسلاخ حتى لو كان شكله جيدا.
رابعا... بعض بلوف الكفرات يتأثر بتراب الطعوس ويعلق .... فيخرج الهواء.

والملحوظات الي ذكرها الاخ dead man صحيحة في حالة عدم نفخ الكفر على الاسفلت.

[الكلاسك]

نصيحه من واقع تجربه :
اذا نسمت زياده ولفيت بقوه دخل الرمل بين شفة الجنط والكفر ويبدا التنسيم على طول المنطقه اللي دخل فيها الرمل !! في هذه الحاله وانت في البر ارفع الكفر ونسمه زياده وغسله بالماء وارجع عبه هواء بس ما تنسمه مره مره ( بهذله ) وانت لازم تسوي كذا ( من قالك تنسم زياده ؟ ومن قالك تلف بقوه وهو منسم ؟)
اعتقد افضل شي 15 مع الحرص علمنا بانه يوجد احيانا معيار غير دقيق اما يزود الظغط او ينقصه

[عبقري91]

الله يعوض عليك كفراتك ----من جد واجد واجد واجد 10 الهوا وش بقيت انت نثل الي يقول بنشر ياكفرومايحتاج عيار لتنسيم انت شف بعينك خل الهوا نص الكفر اذا منت مسايف ولا مراقي ومامعك حمل واجد وناس---اذا السياره عليها ناس وحمل والارض اغلبها قشع وشوك نقص ثلث الهوا -----بعدين الرمل ترا يدخل بين الجنط والكفر وينسم على الخفيف وحتا لو معك ماطور وبتعبي مراح يعبي او بيطول وهو يعبي لان به تنسيم بين الكفر والجنط-----ولكم الشكر

[السلوم 2005]

اما البلا من الابره او شفة الكفر او من الكفر نفسه لانه يجي هانكوك صيني

والاسباب اللي قالوها اخوننا فوق كلامهم سليم

[التعـ King ـديل]

الله يهديك ويعوضك بخير منها .. الكفرات بشكل عام والجيوب بشكل خاص لاتنزلها عن 20 بالبر و30 بالزفلت ولا كفرك عليه العوض

[saleh333]

بالبر لاتنسم اقل من عشرين

اما اذا حصلك تغريزه نسم الى 15 او 10 يعني مجبور انك تنسم

وبعد ماتطلع على طول عب ..