وجار بدون مدخنة .. (نبر)على شغل الأولين .. استشارة للخبراء

[البرحه]

السلام عليكم

مساكم \صبحكم الله بالخير

أعاد الله عليكم هالعيد وتقبل منا ومنكم ومن جميع المسلمين وجعلنا من العتقاء من النار

حبيت استشيركم لمن كان له خبره أو تجربه

عندي مجلس 3 * 5 وارتفاعه 3 متر وشوي

وودي احط فيه مشب .. وشاروا علينا رجال شرواكم بأني ما أحط المدخنة المعروفة من الطوب ..

لأنها تآكل الحطب ومكانها ضيق ومن هذا القبيل .. وفكرنا في طريقة مجالس الأولين

وهي اللي تكون بدون مدخنة .. ويكون فوق المشب في السقف فتحة (نبر) ..

وبعضهم قال خل المشب في وسط المجلس .. وبعضهم قال في الوسط لكن يكون لاصق في الجدار ..

وأنا محتار .. اللي في الوسط عملي نوعاً ما .. للتحلق حولها .. ولكن بيضيق المجلس شوي..

بناءاً على مقاسات المجلس أعلاه هل الأفضل يكون بالوسط أو بالجنب أو مدخنة على الشغل العادي وبس ..
أبي منكم الشور .. لا سيما أبوعبدالله سرهيد لتجربته ولا يهونون الرجال كلهم ..

[storm way]

لا تعليق :D

[ولد روووق]

لازم مدخنة عشان بيكتمكم الدخان اجبت حسب فهمي للموضوع ووالله اودي افيدكم اكثر

[جبل غرابة]

عليكم السلام ورحمة الله وبركاته ..
حسب تصوري :
حط مدخنة ويكون مكان الوجار في منتصف الجدار اللي طوله 5 متر
ويكون لاصق فيه
بحيث يكون معك مترين يمين ومترين يسار على الأقل !
في ارتداد 3 متر ..
موفق أن شاء الله ..
وأرجوا أنك تبغلني كم التكلفة اذا خلصت ..

[FORD1969]

يسمونها ايضا كشاف اقصد الفتحه اللي فوق الوجار مباشره في السقف وماشاء الله السقف عندك رفيع وبيساعد نجاح الفكره واجد سويتهافي بيت طين ولها عيوب وقت الأمطار ما تقدر تفتحها ويمكن تهرب مويه اذا ماضبطها صح ويكون لها حبل واصل لحد راس المعزب يتحكم بفتحها على مستويات مختلفه لكن لازم فتحه صغير مثل الوجار على عرضه وتركب فيها مروحه شفط وتستخدم عند الاشعال فقط عشان الدخنه ....

والمكان المناسب لهذا النوع تبعده عن الجدار متر على الأقل وتوسطه في نصف نصف الغرفه اعتقد وصلت لاني ماقدرت اوضح بالضبط

بالتوفيق

[wafi4sa]

وتسمى الفتحة (( سوامه ))

الله يوفقك ياخي بالأصلح لك

[ذيب الفاو]

يارجال لابد من مدخنه الطوب واترك شغل الاولين


والله ليهج ضيوفك وهم يحكحككحكحكحكككحككككحكحكحكحكووون من الدخان
مالك الا مدخنة الطوب وفيها شفاط بعد


لاكن دام المجلس 3*5 اكيد مدخنة الطوب بتاكل عليك قيمة المجلس مرتين عموما الله يعينك

[shaheenoo]

عليك بالمدخنة أفضل شكلا وعملية أكثر من الجلا
بالنسبة لأكل الحطب لا تقربها بالحيل من الحطب
وحتى لو أكلته أزين من أكل الدخان لصدرك

[ابوعبودوحمودى]

وحتى لو أكلته أزين من أكل الدخان لصدرك

انتبه لهذه المعلومه لو تسمح

[Fahad75]

السلام عليكم ورحمة الله وبركاته
انا من مؤيدين الوجار اللي فيه مدخنه لأنه ثبت أن الدخان له أضرار كثيره من ضمنها السرطان. وبالنسبه للحطب واوا أخوك، لا تستخدم حطب فاخر إذا في مدخنه وحط حطب عادي حتى لو تقصه انت بنفسك. لأنك ماراح تشم ريحته وتتطيب فيه، فقط راح تضبط الشاي والقهوه وتتدفى عليه.
وشكرا

[ابو رائد111]

مثل ما قالوا الأخوان سو مشب أجمل وافضل ....

[المغامر2]

اخوي عندي اقتراح لعله يفيد

حط في الجدار الي خلف الوجار شفاط مثل الي بالمطابخ او اصغر ويكون في الوسط مو مرتفع

منها يسحب الدخان اول باول ومنها الفتحه العلويه بتهرب ماء مع المطر

[لاتكب البيالة]

اسلام عليكم
انا اشوف فكرك افضل من الوجار على الاقل الوجار يجلس عنده 4 بالكثير بينما هذي تحلقون حوله
طبعل خله بزاوية المجلس لكن تبعد متر او 80 سم افضل عن كل جدار
اما من ناحية الدخان بالعكس انا اشوفه افضل بالتصريف لان الدخان يصعد لاعلى وهي بالسقف
اما الوجار العادي اللي بالطوب اذا بغيت الدخان يروح لازم تدخل الضو واذا خليته طالع ما استفدت شي الدخان ماهوب رايح مع المدخن ولابيشغلك
غير ان المدخن اذا صار فيه تيار هوائي يصرف الدخان معه بيصرف ايضا الحرارة
ونرجع للمشب العادي انا اذكر دخلت مجلس واحد بحايل حاط فتحه بالسقف تفتح بواير وحاط باعلى الجدار فتحتين تقريبا 20*20 سم والجدار المقابل له نفس الشي فتحتين يقول هالفتحات الصغيره كافيه في حال امطر او الهواء القوي بتصريف الدخان بحيث تصنع تيار هوائي يسحب معه الدخان اللي مرتفع والهواء البارد ما يمر علينا
الزبدة انصحك بمشب عادي والفتحة بالسقف

[العريني1]

عزيزي الكريم البرحه....
عندي في البيت الملحق مثل مجلسك بالضبط 3 * 5 وارتفاعه 3 متر وشوي


الوجار عندي بدون مدخنه
حاط مروحة شفط فوق الوجار بالسقف على الكهرب
من تحت تمديد مروحة اخرى صغيرة للنفخ على الكهرب
لايوجد دخان ولله الحمد....
نصيحتي لك ... جرب بدون مدخنه....
اذا ما أعجبك الوضع بامكانك في المستقبل تحط مدخنه فالامر سهل جدا فتحة في الجدار مقابل الوجار...

[عاشق السيل]

وتسمى الفتحة (( سوامه ))





الله يوفقك ياخي بالأصلح لك


قصدك سماوة !!


أخوي صاحب الموضوع بالنسبة للمدخنة أجمل شكل وأخف دخان وتحافظ على سقف الغرفة من السواد والمروحة فيها تولع النار بسرعة وإذا زانت ضوك طف المروحة وممكن تحط لها تحكم بالسرعة ( ديمر ) <<< أنصحك فيه بقوة ،،

المشب بالنص ميزته الجلسة حوله ممتعة وتشيل أكثر أشخاص ويصير فوقه مباشرة فتحة فيها مروحة شفط وفوقها مظلة مصممة بإحكام علشان المطر ،، لكن الدخان بيحوس عليك السقف والنار تبي من ينفخها علشان تقبس زين !!

ومن ناحية تضييق الغرفة تقدر تخلي المشب سواء اللي بالنص أو اللي عند المدخنة خليه متحرك لا قضى الشتاء شل الوجار وحط الفرشة مكانه وخلااااااص ....

[سيف وقلم]

تعدم الصدر والعيون دخنة وكحكحة ودموع

[البرحه]

جبل غرابة
جزاك الله خير على مرورك
والتكلفة حسب اقتراحك مع الكمار والرخام انا سعرتها تقريبا 1700

فورد1969
جزاك الله خير
انا شجعني ارتفاع السقف بيني وبينك ، ومشكلة المطر محلوله ، لأني بحط فوق الفتحة اللي بالسقف
مدخنة بارتفاع متر من الطوب وبحط في اعلاها مروحة كهرب ان شاء الله ، وفكرتك وصلت ..لاهنت

وافي
لعلك تقصد سماوه ؟
واياك اخي الكريم

ذيب الفاو
المسألة نوع من التغيير لعيوب المدخنة المعروفة
ومسألة تضييق المجلس ليست مشكلة عندي لأن ممكن أطلع المدخنة في الشارع
جزاك الله خير على مرورك

شاهينو
جزاك الله خير على مرورك

فهد
جزاك الله خير على ردك
اكيد الدخان له اضرار
لكن حتى المدخنة اما ذبحتك بالدخان اذا طلعتها، أو يروح دفاها اذا دخلتها

ابورائد
جزاك الله خير على المرور

المغامر
اخشى انها ما تسحب الدخان 100 %
لأن الدخان بسرعه يروح لفوق
واذا كانت الفتحة فوق فمافيه مشكلة يتجمع شوي ثم يطلع
ومشكلة المطر محلولة كما ذكرت لأني بحط مدخنة فوق الفتحة في سطح الملحق

لاتكب البيالة
جزاك الله خير على نصيحتك ومرورك
مشكلة المطر محلولة
لكن باقي مكان المشب للحين محتار
هل يكون في نصف المجلس ولاصق في الجدار والكمار حوله كأنه مشب عادي بمدخنة
أو كما قلت أنت في الزاوية ، أو في نصف المجلس لكن غير لاصق في الجدار يعني بينه وبين الجدار متر مثلا
شكرا لك طال عمرك

العريني
جزاك الله خير
انت من كنت ابحث عنه
مجرب للفكرة ومثبت نجاحها
لكن وين مكان المشب عندك ؟ في الوسط ؟ او مثل المدخنة ناشب فالجدار؟؟
وان شاء الله اني بطبقها وبيعجبني الوضع :)
لاهنت على ردك

عاشق السيل
جزاك الله خير لمرورك
انا افكر كما قلت اذا ما كان لاصق في الجدار
يعني أحط المشب حفرة واذا بغيت غطيتها بالفرشة وخليت الكمار على حاله يعني ثابت

سيف وقلم
شكرا لك وجزاك الله خير على المرور


نحتاج منكم ياطويلين العمر مزيد من الاقتراحات حول مكان المشب .. وطريقة النبر او السماوة ان شاء الله صامل عليها
وجزاكم الله خير

[سعود الظهيري]

حط المدخنة التقليدية لانها افضل من جميع النواحي واضمن
وجهة نظر

[مكشاتي1]

حط مشب كامل مدخنه ولكن بدون وجار فقط فتحة لسحب الدخان وضع مكان اشعال النار وجار عبارة عن درج على كفرات حديد صغيرة مرتفع شي ما حتى لايحرق الفرشة ويكون الدرج من طبقتين ولو وضعت في الطبقة السفلى بلاطة لحماية الفرشة ويمكن فصل الطبقتين عن بعضهما بحيث تكون الكفرات بالطبقة السفلى ولكي يتسنى لك نزع الطبقة العليا لكب الرماد واعادتة لمكانه فوق الطبقة السفلى وبهذه الطريقة يمكنك سحب الوجار المتحرك بعد أن يكون جمراً لوسط المجلس حيث لايوجد وجار يعوق سحبه ووضعه في أي مكان من المجلس .

[ذرب المعاني]

شب الحطب برا .. واذا جمر .. حط الجمر بالكريك في وجار رسمي .. تلقاه جاهز .. لونه نحاسي وذهبي وفضي .. وحطه في نص المجلس ولا قدامكم .. وحط عليه دلالك ...
لاتشغل الملحق بمشب .. مايشتغل في السنه الا شهرين وياخذ مساحه .. ويدخل معه غبار وغيره

انا ضد فكرة المشب في الملحق

بالنسبه للوجارات تقاها في اسوق العوي ورا زهرة السوسن فيه اشياء قيمتها ألف شكلها فخم

وبالتوفيق