استشارة: صيد الچنعد (الكنعد) من سيف الدمام !!!

[xmx202]

السلام عليكم

محتاج خبرة اهل حداق الچنعد من السيف... خصوصا الدمام

اخبر قبل سنين مب بعيده، الچنعد متوفر قريب السيف عن الفنتايم، هل الموقع بعده يزخر بالچنعد في الموسم الحالي بالبرد ??

الطعم الافضل للچنعد، طعم حي والا كذّابه? اذا كذابه اي نوع واي لون ? وهل ينفع الميد ميّت او سلس ??

عندي قصبة جي ام سي حمرا 4 متر ومكينة بانكس 400، هل تنفع لفاح من السيف ?

مركب خيط ابيض 55 برازيلي،،، ينفع للچنعد ??

الوقت الافضل لصيد الچنعد، السقيه والا الثبره??

واذا في افاده الله لا يهينكم لل تقصرون !!

[صياد عماني]

هلا ان شاء الله
بيفيدوك الشباب
ما يقصرو
ويعطيهم الفين عافية
تحيااااتي

[xmx202]

تسلم،

الشباب فهم الخير والبركه

[accentkool]

الكنعد تصيدة بالكناية صغير الدويلمي
او لفاحة راسها احمر وجسمها ابيض
او ساردين والله يرزقك بكنعد عود

[عاشق البحرE]

هلا بك أخوي xmx202 ..


انا اصيد الكنعد داخل البحر.. بس ما أعرف اصيده من على السيف ..


سمعت ان الكنعد متواجد في الدمام .. بس قليل اللي يصيده و لازم تصبر عليه ,,



انا أصيده بطريقة اللفاح داخل البحر .. و استخدم خيط 140 .. و اللفاحه استخدم العظمه البيضاء او العظمة النيكل او الملعقه النيكل ..


في موضوع نازل قبل اسبوعين لأحد الأعضاء .. ارسل لصاحبة رسالة و راح يفيدك ان شاء الله .. و الله يرزقك بالكبير ..


هذا رابط الموضوع للعضو فناوي

http://www.mekshat.com/vb/showthread.php?t=455702

[xmx202]

بارك االه فيكم ماقصرتو

بس باقي مكان التواجد، نشوف اهل الخبرة

[shutter]

هلا بك أخوي xmx202 ..
المكان اللي تقول عليه، شفت ناس تصيد فيه دويلمي مو كنعد. ولا أعرف أحد صاد كنعد فيه.

بالطراد أجدى وأرجى..شرايك في هالتعبيرات :good2:

[عبادي الجبيل]

اخوي


معروف عن الكنعد يوصل ( ينشي ) من على السيف بوقت البرد والكنعد صيده بعدة طرق من على السيف


اولا : التاكد من الموقع بانه في احد صاد كنعد من المنطقة والا لا

الخيط يبغالك من ابو 80 وفوق ....


افضل طعم للكنعد من يرمي على السيف (السلس الحي افضل أو الميت بس طازج، الميد الكبير الحي ،)


الارساليات من على السيف ( مثل ماقالك اخوي اكسنت كول الكناية او دويلمي او ترسل له سلس )


والاماكن اللي يكثر فيها الكنعد في الجبيل ( شاطى الفناتير بالجبيل الصناعية ، كورنيش الجبيل البلد ،) بس يبغالها صبر


الدمام في الفن تايم متواجد كل سنه في عز البرد وبالنسبة للفن تايم يكثر فيها السببيطي والهوامير بعد البرد بكثرة وذلك لكثرة الخبز المرمي من جهة المطعم وافضل طعم مصارين الدجاج او المنجوس للسبيطي والهامور معروف طعمه الخاص وهو الجواف بس ركبله درية محترمة وخيط مقاس 90 او 100


كورنيش راس تنوره يكثر فيها الكنعد بوقت البرد بكثرة .... شك القصبة بسلس حي والرزق على الله


ميناء الدمام ، متواجد الكنعد بكثرة ( بس منعت المنطقة من الصيد فيها )


واهل خبرة الكنعد بيفيدونك اكثر واكثر ....

[moh2050]

صعب تصيد كنعد من السيف

يمكن بالحظ مرة او مرتين انا مرة وحدة على حظي شفت البحر هادي وبدون امواج الا في مكان واحد البحر هايج

ورميت سمكة كذابة لونها برتقالي وعلى طول ما مداها تسقط في البحر يأكلوها على طول

[AbdullahM]

ان شاء الله يفيدك هذا الموضوع
http://www.mekshat.com/vb/showthread.php?t=452938

[مكشات بحراوي]

طعم ميد او سلس بميدار 3 روس