يا عرب المساعدة ما خليت ميكانيكي ولا كهربائي خلاص أنا انتهيت وما يلزمني سيارات

[عاشق باجيرو]

السلام عليكم
اخواني تعرفون لما واحد يكره من قلبه كيف يكون الحال

شريت لاند كروزر موديل 99 في إكس آر جير عااادي
وفرحان مين قدي وأركب أشوف الطريق كأنه لي انا بس ولما اعتليت العرش طبعا بعد الشراء والدفع وكل راح لسبيل حاله
قلت يا ولد امتطي صهوة الأند كروزر وأدعس
والله وأدعس وأنا طاااير في عالم السحاااب أكاد أصل لمملكة بلقيس ذات العرش العظيم فصلت دعسة البانزين
يا ولد اش هذا ؟!! وعلى الكهربائي قال معااك البوابة
رحت لواحد ثاني قال الحساس وأشري حساس حتى أصبح جيبي بلا إحساس وأركب وما في فايدة وزادت في قلبي الحساسية وآخذه وأنطلق وعند التعشيقة ولما أرفع رجلي من على الكلتش أسمع دقة وكلما رفعت دقة وأرفع بشويش وما في فايدة دقة وعلى الميكانيكي وقال اذرعة وأغير ولا فايدة
وثاني مرة قال البوشات وأغير ولا فايدة
وقال الرمان حق الكفر وأغير ولا فايدة حتى طلعت لي رمانة في المعدة من القهر
خلاص أنا منتهي
مشكلة الدقة وفصل الدعسة
أرجوكم الحل لإنقاذي

[YUKON_GMC]

فصل الدعسه ماقد مرت علي

لكن الطقه طبيعه في كل الفكسارات ال 8 سلندر القير العادي

وهي صادره من القير او الدبل

وانا سبق وجربت في اكس ار 98 قبل كم سنه يقول راعيه انه نظيف ومسكت ولاردني لا اشتريه الا صوت الطقه اثنا ماارفع رجلي عن الكلتش بعد التعيش وهو يمشيء
ومعروفه عند الشيريطه اسأل اي شريطي جيوب ويعلمك ولكن اصلاحها ما عندي فكره

[الزعيتري]

بنسبه لطقه 90 % تكون طبيعيه
واما الدعسه حسب ماسمعة يكو فيها شريحه عطلانه والله اعلم
وقيمتها من الوكاله حوالي 350 ريل

[جيب ربع]

الطقة علاجها تشحيم العمود بين كل فترة وأخرى
الدعسة فيه حساس تأكد منه لان الدعسة كهرب

[عبدالله المطيري]

الطقه عاديه جداً من يوم هو جديد وهو يطق

فصل الدعسه ياليت تبين اكثر

عموما اذا كان القير يفضي اذا رفعت رجلك عن البنزين هذي سهله

[sgl2002]

الطقه شفها عندي بالباترول وعادية وطبيعية

باكثر الجيوب

[الكلاسك]

حساس الدعسه اللي يجي فوق المكينه يحتاج الى فني يده تتلف بحرير عشان يوزنها

[بدر00]

الدقة ياطويل العمر غير البوشنقات الي تجي في الدفرنش وتكون واصل في الدنقل الامام والثانية تكون في
بداية العامود الامام في الجهه اليمنة اسفل السيارة
ودمت بود

[YUKON_GMC]

الدقة ياطويل العمر غير البوشنقات الي تجي في الدفرنش وتكون واصل في الدنقل الامام والثانية تكون في
بداية العامود الامام في الجهه اليمنة اسفل السيارة
ودمت بود

تقصد الاعمده اللي تمسك الدفرنس بالبدي .. والله احتمال

http://www.mekshat.com/pix/upload05/images233/mk177274_panhard bar.jpg

[أبوعابد 22]

يفدونك الشباب وانشاء الله تلقا حل لموترك

[ماجد الحايلي]

هلا اخوي
يمكن اقدر افيدك بالطقة لكن بالنسبه للدعسه ماادري والله عنها
بس اعتقد انه حساس في غالب الامر
لكن الطقه مع اخوي GX هدد 2007 من وكالته والطقه اذكرها زين
لانه رجعه للوكاله وقالو عاديه والي يومك وهو معه والطقه فيه
لكن يمكن يفرق 6 سلندر عن 8 سلندر
والله يعينك لانه فعلا بعض الخرابات تجيب لك الوسواس

[السبع2]

اخوي الطقه مع التعشيق صارت عندي بالجيب الجكسار وطلع الصليبات غيرته وضبط

[هويدي]

الطقه عاديه اذكر اسمعها بموتر واحد من الربع 2007 تماتيك اذا غير للثاني طق

شحم صليبات بتخف وكتمته الدعسه اتوقع من الحساس اللي على ماصورة فلتر الهوا نظف الحساس ببخاخ تنظيف الحساسات وسوله برمجه إن شاء الله يضبط

طريقه البرمجه مقتبسه من مشاركات احد الاخوان
( جربتها على جاكوار 2005 كان يفصل الاربي على 3 وضبط ولله الحمد )

طريقة اعادة برمجة كمبيوتر السيارة كالتالي :
1 افتح السويتش بوضع ON يعني انوار الطبلون مولعه
2 افصل اصبع البطارية السالب
3 طلع المفتاح من السويتش
4 بعد 10 الى 15 دقيقة ركب اصبع البطارية السالب
5 سم بالله وشغل السيارة

[مخطور]

اخي العزي عاشق باجيرو
فيه فرق بين طقة و ردعه
القير الاتوماتيك عادي فيه الطقه وشحم العمدان تخف عليك
القير عادي تحس بشي يردع او يرد داخل القير
القير العادي فيكسار 8 سنلدر بيردع وخصوصا اذا غير القير وانت ساحب نمره من الاول الى الثاني وشلت رجلك بسرعه عن الكلتش بيردع معك القير لاكن جرب وغير القير ولاترفع رجلك بسرعه عن الكلتش ماراح تسمع شي
كان معي موديل 98 فيه نفس المشكلة شاريه مستخدم على وقت موديل السيارة ولا فيه الا العافية لا تغير شي ولا تبدل قطع لانه مراح تروح الردعه منه وتحياتي لك

[صالح ابو وليد]

ياخوي اذا كان عندك خراب وماتدري من وين جاي لا تسال المتفقهين والفلاسفه افحص كمبيوتر ويطلعلك الخراب وصلحه وقضت الكشته
بالتوفيق

[عاشق باجيرو]

أولا أشكركم اخواني جميعا لتفاعلكم في الموضوع

لكن بصراحة شيء غير معقول أن الدقة أو الردعة ردعة ثور مالها علاج على كذا والله الشركة فاشلة والله أني كاااره الاندكروزر والله يرحم الباجيروا والله أنه ابن حلال وأمه أصيلة بنت عرب لكن هالموتر أمه شكلها ما ادري
المهم فشلت بالفعل في العلاج تماما
وأما الدعسة والله كمان فشلت قال الكهربائي هاات الحساسالي عند البوابة ورحت أشريه جديد وكااااالة واشتغل يومين والثالث قال والله ما أكمل يا ابن الحلال والي يرحم والديك تراني والله دافع مبلغ فيك وجايبك من الوكالة قال والله أنك تتعب نفسك ورجع أدعس عليه بهدوء يمشي معايا وإذا دعست عليه زيادة يزعل ويفصل وأرجع أراضيه وأتأسف له ويذلني ذل في الشارع قدام الناس الله العالم فيه
وأحيانا ما يقبل اعتذاري فأضطر وأطفي السيارة وأترجاه شوي وأبوس الكبوت حقه ما باقي إلا الكفرات وأشغل يشتغل ويمشي وإذا احتجت أدعس شوي لظروف ولو طارئ يفصل ويقول والله لأهينك وأهين كرامتك قدام الناس أقلك بشويش أقله بس هذا ظرف طارئ ولازم أدعس يعاند ويفصل وأضطر أعتذر له وهاكذا كأني خلقت أعتذر لها الصالون والله لو كان حرمة كان ما طلقتها كان ظاهرتها وقلت أنت حرام علي كظهر جدتي

[العمده911]

افحص كمبيوتر

[salih100]

ياخوي اذا كان عندك خراب وماتدري من وين جاي لا تسال المتفقهين والفلاسفه افحص كمبيوتر ويطلعلك الخراب وصلحه وقضت الكشته
بالتوفيق
متفقهين وفلاسفه ولا ينضحك علينا يا ابووليد بعدين عيب تقول للناس كذا كل ذا احتقار
من يحقر يوحقر

[قمة افرست]

اخوي بالنسبة للدقه لازم فحص عشان تبين واكيد امرها بسيط ان شاء الله
واحتمال كبير تكون فضاوة بالدفرنس يحتاج شد من الفلنجه

اما موضوع الفصله فهي ايضا امرها سهل
وساشرح لك الخلل اذا طابق الي يصير معك غير حساس الدعسه فيه مشكلة حتى لوغيرته

اعطال حساس الدعسه

حساس الدعسه اذا سخن يفصل الدعسه ولاكن تبقى السيارة شغاله وهي واقفه ولاكن لاتقبل دعس

اذا طفيت السيارة وبردت بتلقى السيارة تمشي طبيعي
هذي المشكله اذا نفس الي يصير معك غير حساس الدعسه
اذا سبق غيرته افصل اصبع السالب البطارية 5 دقايق وشبكه احتمال مسجل الكمبيوتر خطاء
اويحتاج التشييك عليه