من هو الشاعر اللي من وجهة نظرك بدع في وصف الطير

[ابشر بسعدك]

سلام على اهل الحرار الصواريم وحيالله كلا بسمه نبي نطرح اليوم تساؤل القصد منه اثراء الخمية بكل ماهو قيم فيما يخص الطيور

سؤال ؟ من الشاعر المتمكن في نظرك في وصف الطير وصف دقيق وبدع بذلك مع كتابة شى من شعره بهذا الخصوص...

ولكم جزيل شكري وسلمتوا مقدماااا....

[قرناس شماالي]

وعليكم وسلام ورحمة الله وبركاتة

الصرحه موضوعك مميز والطيور امراء وشعار تكلمو فيها

ومن ناحيتي عندي شاعرين الي هم بدر الحويفي و مشعل حمود الحبيني

وهذي قصيدة الشاعر مشعل حمود الحبيني بوصف الطير

http://www.youtube.com/watch?v=ZylwoirJ5Kk

وهذي قصيدة الشاعر بدر الحويفي

http://www.youtube.com/watch?v=afOQ9q4GDnE

وتقبل تحياتي

ابوجهاد

[الفيتو]

بسم الله الرحمن الرحيم
السلام عليكم ورحمة الله وبركاته
مساء الخير ياخوي / ابشر بسعدك


قريت وسمعت لشعار قالوا في الطير وابدعوا
عبد الله بن عون .. العطاوي .. الخس .. بدر الحويفي
بن ختروش .. بن فطيس .. بن عينان .. مشعل الحنيني .. ومبارك بن شافي
والسراحين الروسان وووووشعار كثير قالوا وابدعوا
كل ما سمعت لشاعر قصيده قلت ااااهـ ابداع سلم بوحك .. وقاضب لهم
جميع قصيد وبيوت
هاك بيتين لبن عون وصف الهدد وتكفي
الطير ماله مقعدن عنك ياســـعود *** ان رحت رح بالطير وإن جيـت هاته
خله خوي لك عن النقص والزود *** عن عيـلـتن ياسعود تــدقــم شــباته
كــوده ليــامنــه تبـين له الــعـود *** مثل الفـحــل لا حال دون امهــاتــــه
كـوبر تقول مجللن جلد مـفــرود *** يخط بــسـفل طرقــتــن مـن عبــاتــه
يجيه من سابن مع الجو بـركـود *** والايا تــساواله على القرب شـاتـــه
اما يصيبه والعطب منه موكــود *** ولا يــــزمه زمتن بلتـفــاتـــــــــــــه
بيمن علو شعاب جدلا ومسعود *** في خـــايعن زرق الـغـلـب دايســاتـــه
في خايعن نبته له ارقاب وفنود *** عقب المــــطر يادوب زمــت نبـاتـــه
*
والسلام
الفيتو
الحجاز
19-12-1432هـ

[راعي جلمود]

مبارك بن عينان الهاجري
الاولى في وصف بارود
والثانيه ياربعنا ياللي تقنصون الشعيبين

تحياتي

[حمود الصعيبي]

عبدالله بن عون و محمد الخس والابداع بالوصف مشعل حمود الحبيني

[falcon 1]

انا مع اخوي قرناس
مشعل حمود الحبيني
وبدر الحويفي

[ولد مساكن]

السلام عليكم ورحمة الله وبركاته

مبارك بن عينان الهاجري

89R_CLxYrwI


يا عيد وصيتك علـى فـرخ شاهيـن***يا ظن من هقـوى وصابـت ظنونـه

تراك راعي صنـف في الطيـر وذهين***صقـار والصقـار مــا يغلبـونـه

شافوه في الدوحة على ذمـة حسيـن***والناس في حـي النصـر يذكرونـه

ما صار له في السوق يا عيد يوميـن***مره يا بـو محمـد ولا لـك مهونـه

وكانه مثل بارود يـا حـي ذا العيـن***لي شافـه الصقـار طـارت جنونـه

وحده من الثنتيـن مـا فـي ثنتيـن***هاتـه وعطهـم فيـه مـا يطلبونـه

وعينك عليه يسار يـا عيـد ويميـن***وتـراك راعيـه مكانـي وعـونـه

من قبل لا تصدفه عيون الحسوديـن***شلـه قبـل يـا عيـد لا ينقلـونـه

ودارك عليه اشـوي ببزيـن وببزيـن****وتكفى يا بومحمد من الكفـخ صونـه

هذا شبيه اللـي غـدا قبـل عاميـن***اللي عقـب فرقـاه كثـرت طعونـه

بارود عقبـه مـا نقلـت الشواهيـن***ابطيت من جنسـه وجرمـه ولونـه

طرح الشبك يا عيد ما هـو بتهجيـن***خلطة نمونـه مـن فصيلـة نمونـه

شبك العمودة في اخر الفيـن واثنيـن***جـدام عينـي اليـوم هـم يمهدونـه

له من طلوع سهيل في الجـو ستيـن***ليلة وريشـه بيـن شمـس ولدونـه

وعلى كفوفه من صبخ فارس الطيـن***وفيها من حيـوده وضلعـه خشونـه

ومن يوم شفته قلت ما فيـه راييـن***انـا زبونـه يـا مــدور زبـونـه

ما هي خسارة فيه لا سقـت خمسيـن***الف على اللي لـي عبـر يشبكونـه

غالـي ولا يستاهـل الكـود غالييـن***علينـا بالرشلـي بالـلـي تبـونـه

لو كان يلحقنـي ورى سعـره الديـن***صيـده يسـدد فـي عيونـي ديونـه

وافي وعاري ريش والعرض شبريـن***وطوله مثل عرضـه ولا هـو دونـه

طويل عاتـق مفرعـه حـد سكيـن***دابا على الصيـد يشخـص عيونـه

اسود ذرير الكحل في محجـر العيـن***سـواد ليـلا لـي تضافـت ردونـه

ذيله قصيـر لـي تلاقـى الجناحيـن***ومتفهقـات لـي نطحـتـه متـونـه

ولي قفيتـه كانهـا قـوس رمحيـن***وملامسـه جبـره ولا بـه ليـونـه

معقـل السيقـان سـاقـه بساقـيـن***وساقه جبر ما فيه صخـف ومرونـه

استغفـر الله مـا يكفيـه وكـريـن***واشلـون لـي شافـوه بوصفـونـه

لي فرعـوه وبـرزوا وكـره يزيـن**** برقعـوه يـزيـن ويفرعـونـه

وان برقعوه ودبـروا عنـه مقفيـن***مـا كنهـم فـي البرقـع يبرقعونـه

منيـن مـا حافـوه ومنيـن ومنيـن***زيـد زينـه كـل مـا يدرجـونـه

وصيده في مقنـاص الحنيـة ثلاثيـن***واقصر عددهـا خـوف لا ينضلونـه

كنـه يقـول طيروهـا علـى ويـن***يردهـا والـروض مـا يقطعـونـه

والخرب لاقفى لي السما عقب طيرين***ويشوفهـا الـشـواف ويضيعـونـه

وقاموا هل الجيات واهـل النياسيـن***باسمـه وفعلـه كلـهـم يزهمـونـه

غلوه والعـداد مـن فـوق تسعيـن***ولا عـاد عقبـه طيـر بيلقفـونـه

يرقى يا لين يغـط ويضيـع ويبيـن***واللي يشوفـه فـي السمـا يتبعونـه

واذا استوى يرهي على اللحق يا معين***يلحق يـا بـو محمـد ولا يلحقونـه

راعيه في المقناص طلـق الحجاجيـن***مـا هـو بجرنـاس يربـط بغـونـه

حرا على وكره تقول خيشـة طحيـن***لكنهـم فـي اللحـق مـا يمدحونـه

تلاب للمقفيـن فـي الطلـع نعميـن***ولي صادها في القـاع مـا يعزلونـه

ولي عزمـت ياخـذ معاهـا مرديـن***وعينـه علـى الملـواح لا يحذفونـه

والطير لو ياخذ مـع سنينـه سنيـن***احسب على يوم يجـي فيـه خونـه

اما يموت وساعتـه مـا لهـا حيـن***والا يجـي لـه وقـت ويضيعـونـه


السلام عليكم ورحمة الله وبركاته

[أبوفرحان]

مشعل حمود الحبيني

[الحربي أبوذيب]

مثل ماقال اخوي الفيتو والشعار اللي ذكرهم اجادو وصف الطير ولا يحتاجون لشهادة احد يشهدلهم شعرهم

الجزل ويبقى في نظري بدر الحويفي وقصيدته اللي يقول فيها

يامل قلبٍ دق به كل طاري =
طواريٍ باقصى الضماير تتله

***************
وشفقٍ على شوف الفضا والبراري =
لاصار معه مشببٍ مسندٍ له

**************
خطو ابلجٍ لملاقف الصيد ضاري
=جدع الضريبة بالسهم عادةٍ له

*************

قرم بوجهه للمروه شواري
= رايه سديد وكل دربٍ يدله
*********
ماهو حضيبيٍ مزاجه تجاري
= ليا عقدت الراي عوّد يفله

*********
اول نهارك يعجبك مانت بداري
= مار البلا تالي نهارك تمله

*********

ابمدح الطيب ولاني مداري
= واللاش لاخايف ولا حاسبٍ له

**********

الفرق باللي ياصلون المحاري
= والا الردي شرهات مثلي تزله

*********

ابي خويٍ ضاريس بالمساري
=ماهو مهينٍ يرقد الليل كله

***********
ومعنا قطاميٍ يصيد الحباري
= لحّاق لاكوبر له الخرب شله

**********
خطو اشقرٍ جثل من الريش عاري
= افحج مخاليبه سوات الأهله
************
به دق ريشٍ مثل دق الخزاري =-
مهدف ورا مناكبه مستقله

************
منخر وبوز وفيه عدة مواري
= يحتار به راع النظر لافطن له

************

ماهو بكفاخ ٍ طفوقٍ ازعاري
= طلعه حقاق ان شافهن ساوقن له


لاشافهن متطاولات المذاري
= عقّد وحق الطلع والسير تله

ويّحول اللي طار منهن اجباري
=ذباح للي يوم هد اسجدن له

يازين طلعه بالضحى والعصاري
=لامن خشناات الغلب خيشن له

هذيك منوتي واختياري
= لو كل من يطلب لزوم يحصله

ولو ان حظي مع مزاجي يباري
= سجلت له صفحة وفا بالمجله

مالي هدف بالسوق بايع وشاري
= قلبي ذعاذيع الهواء ولعةٍ له

انا غرامي مع فجوج الصحاري
= وشوف الرجوم النايفات المطله

لاشفت بالريضان نقع وخباري
= راح الزعل والبسط حل بمحله

بارضٍ بها لصيد عينه واثاري
= فيها القطا تلقى فروعه محله

مهامل تردم شجرها الذواري
= نبني لنا فيها وناسه وفله

يازين شبة نارنا بالغداري
= والكيف ابو صالح جلس وارتجله

والماء مفوح في نظيف الغواري
= وصفرٍ يجاذبهن على جال مله

وصاحب لهن تقول ماخذ حذاري
= وفنجالهن يجلى عن الكبد عله

واللي على مثلي من الناس زاري
= لاسامعٍىقوله ولا مصغيٍ له

وافخر بحبي لصقارة واماري
= ورزقي على اللي كون الكون كله

[ســـبــار ربــعـــه]

محمد الخس ابوخلف الله يطول عمره وعبدالله بن عون الله يطول عمره.
محمد الخس يقول في وصف الشيهانه:
انا في يدي خرشا تشادي لوجه الداب...لياشافت الحفان تفرا دواغرها
حديدة وجه واحد من وجهها المخلاب...تقص العظم لا ناشته لو بخنصرها.
عليها العيون من الصقاقير تقل حراب...لياشافها الصقار لازم يخازرها.
على الخارم المقفي تفرقع من القضاب....تفرقع من القضاب كنك مبشرها.
ليا شافت الجول ادرعت فيه ماتهاب...عثت في ركونه لين تكثر عثايرها.
ليا منها قامت ترقا ورا السحاب...رقت لين من جو الخضيرا تحدرها.

ويقول ابن عون.
ياطير ياللي دقاق الزين غاشيك...والجود له في سنا وجهك مواري.
الفرخ راعيه مايقدر يجاريك...واهل القرانيس ماتقدر تماري.
راعيك ركز عليك وقام يغليك...والظاهر انه عن الي فيك داري.
الزين فارق اخوانك واكتمل فيك...مافيك عذروب ياطير الحباري.
مافيك عذروب يارمثان مافيك... الا من الريش والعذروب عاري.
وطويل عاتقك ومقدم ثناديك...ودقاق ريشن مثل ريش القماري.
اشعل ويزهاك شدن في مواسيك...وعليك من ريشة القوبع مواري.

وفيه شاعر لا يحضرني اسمه لكن قديييييم قبل الي انا ذكرت والله واعلم.
لكن يقول.
واطيري اللي ماكره بالمطاره...بين ثهلان وبين روس العراقيب
لا دق في جول الحباري بزاره...مثل الغنم لا دق باطرافها الذيب.
حلفت عقب ادهام ما اجنى الصقاره...والقلب مايسلى بليا هناديب.


اما انا جعلني اسلم :) لو كان ماني حول احد فاقول:
لدوا لشقرن بالبراقع مغطاه...وكلن على يسراه فرع بطيره.
معي ادهمن عدل المناكب نقيناه...طرح الشبك ما حام في هك جيره.
عليه من وصف العقاب وحلاياه...لا دق فيهن بالكفوف الشطيره.
طلعه بعيد وحققه ثم تقفاه....ثم اعتلا لينه وصل للخضيره.
وحول علاه وجز قلبه من اقصاه...ماترمقه بالعين حزة مطيره..
وسلامتك.

[وكري نجد]

مشعل حمود الحبيني العازمي

[الصقار الجديد]

الشاعر = حمود الحبيني العازمي وهذا الرابط


http://www.youtube.com/watch?v=jge5i0xFuh4



تقبل مروري

[حر الشمال]

الشعراء واجد وكل واحد ابدع بوصف الطير
انا بالنسبه لي هالقصيده تعجبني عن الحر
http://www.youtube.com/watch?v=-65D31lo950

[وضااح]

مافي زي الشاعر القدير مسيعيد العلوني في وصف الطير
وهذا مقطع يوصف فيه طير يوم قفى وهو متوقع انه يهاجر للصين
http://www.youtube.com/watch?v=yTlf6sQ5Jpo

[صقار شياهين]

اخوي الفيتو كفى ووفى وانا رأيي انه عبدالله ابن عون بدون منازع
وهذ بعض قصائده:
واطيري اللي ماتحدد طلوعه===لاعتني الفجعه على ضيعته لوع
اخذت عنه وتل سبقه بفوعه===على خريش ناحرت لأيسر القوع
تنحرت مبدأ سهيل بطلوعه==وصارتلي الحره على الطرد قاموع
وقفت بالدربيل اخطف سنوعه==واخفيت شوفه يصعد الجو بطلوع
ابيه يرجع مير صعب رجوعه==اصيح وارمي اللوح في كل مرفوع
لين الدماس اضفى علينا قنوعه=وانكضت مثل اللي له السلم مقطوع
مانيب يم الحكي من حيث نوعه==وان وجهه يمي فلا هوب مسموع
بس اسهف الماء والتوجد قدوعه===لازل قرطوع تليته بقرطوع
ضاعتبه اللي فالمتاقي خدوعه===ربداً صغيره حجمها طايرة شوع
في قلبها قد عقّب الطير روعه===من خلقتي ماشفت لطيارها نوع
الله يلوم الطير مقشر طبوعه===انا اشهد انه خير اساميه مقلوع
لوكان تمشيله برسم المطوعه====فالجو يبديله ثمانين مشروع
لابد مايفجع خويه بلوعه=ويغير=--= الموضوع الاول بموضوع
هذا وانا امشيله بنفس خضوعه=-مثل الحشيم اللي له الامر مطيوع

وهذي احدى روئع الشاعر الكبير عبدالله بن نايف بن عون


ياطير عقبـي كـن خاطـرك شايـن=خاطرك شين وغيبتي عنـك يوميـن
النقـص فيـك مبيـنٍ لـه بـوايـن=في لمعة الريشه وفـي ناظـر العيـن
ياطيـر انـا ويـاك كنّـا خـدايـن=وبيني وبينك ولـف ومعامـلٍ زيـن
يوم نتخاوى مـع وجيـه الضعايـن=ونهمل سبوقك في مناكـب خسيريـن
ولاّ شمـال الهضبتـيـن القـرايـن=شرقّ ( طلال) ومن ( سواحيق) ويمين
ولإ عطينـا سـكّـة ( التابـلايـن )=ولاقـد عطيناهـا عليهـن حراذيـن
نصبح على طارات شهـب المكايـن=بـيـن العراقيـيـن و الأردنيـيـن
في خايـعٍ بـه كـنّ عينـي تعايـن=ربد الحباري به على أربـع وثنتيـن
ونأخـذ لنـا أيـامٍ بذيـك الدفـايـن=مابيـن برقـع والغـدف والبسيتيـن
ونكسر على ماينحـدر مـن ضوايـن=وناخذ هنـاك أسبـوع والاّ سبوعيـن
وننكف نشـاط وسالميـن الصخايـن=ولوّ كـان نتعـب عدنّـا مستريحيـن
قـدّام يطلـع للصـقـاره زبـايـن=ناسٍ تحوش القوبعـه بـأم روحيـن
ليّـا روحـوّ بمشحنّـات الخـزايـن=مافـي نحاهـم ذوّقــوه الأمـريـن
واليـوم مابينـي وبيـنـك مـدايـن=أنا سعودي وأنت جايٍ مـن الصيـن
وأمّـا لقينـا للحـبـاري عـوايـن=والاّ تـوادعـنـا وداع المحـبـيـن
الوقـت ماتالـيـه معـنـا بـزايـن=والبرّ في حادور من حين فـي حيـن
أدنـاه مليـانٍ كراتيـن ( فـايـن )=وأقصاه ضاق وضيّقوه به هل الضين
وضاقت مناهـج طيبيـن الضغايـن=اللّ على المقناص بالطيـر ضاريـن
واليـوم كّـن اللـي يحاكيـك مايـن=هذي سبوقـك وأنتهـض بالجناحيـن
وهاجر مهاجـر مبحـرات السفايـن=للصين والاّ أهبط على ضلع غزويـن
لوّ كان عنـدي مـا فراقـك بهايـن=حنّـا عـزاز ولانهيـن العزيـزيـن
خلّـك تـروح ولاتشـوف الغبايـن=شاملك عفـوٍ مثـل عفـو المساجيـن

وختاما القصائد كثيرة ولكن ماتحضرني الآن وارجو اني افدتكم في هالموضوع

[راشد حسين]

الاول مشعل الحبيني

والثاني مبارك بن عينان الهاجري
ما سمعتله الى قصيده وحده واعجبني الي بالشاهين

[ابوسمرى]

الشعراء واجد وانا اخوك اللي وصفوا الطيور لكن جازت لي هالقصيده لشاعر ثامر الماضي ابو شعلان
وطيري على يمنـاي وجهـه تباشيـر
راكــــد ويـطـلــع ذابـــــحٍ مـاتـعّـلــم
أشـعـل وبــه دقٍ بـريــشٍ مـواخـيـر
ملـمـوم جسـمـه الـلـي كـنّــه مـكــوّم
طولـه يجـي شبريـن لا صـار تقديـر
والعـرض وافـي كانـه المتـر مــا زّم
وراســه كبـيـر واسـعـات المناخـيـر
وجهه عبوس تقول صاطـي ومجـرّم
الـبـوز وافـــي والـثـنـادي مـزابـيـر
والعـيـن عـيـن الـلـي بـغـدفّـه تـلّـثـم
أفـحــج كـفـوفـه كـنـهّـن الشنـاكـيـر
وساقـه قصيـرٍ مـن سراويلـه أقـطـم
يكرم عن اللـي يمدحونـه مـن الجيـر
ويحشـم عـن اللـي فيـه حجـلٍ مختـمّ

[عراك نجد2011]

الشاعر عبدالله بن عون

طرح الشبك ماطوشوه الطواويش
ولاقرنسوه اهل العشش في عششها

[أبو فااارس]

انا من وجهة نظري ان الشاعر خالد بن مدعث الخرفاني الدوسري هو الشاعر اللي يطربني
بوصف الطير ولكل رجال ذوق وهاذي قصيد له في وصف الطير الايراني..................


نقـل الحـرار الصيرميـه نواميـس وعماش نقلـه يلحقـه زود نومـاس
حرٍ فـرق بيـن الحـرار القرانيـس فرقه عليهن فرق لولو مـن نحـاس
ابلج نـداوي مـن حـرارٍ فواعيـس يزها بياضٍ فالنحـر مثـل قرطـاس
سلايـل الفـارس مواكيـر فريـس وكل اصلٍ عروقه تعود على السـاس
وعماش مجنا الاصل ساسٍ وتاسيـس مجـذوب من عــرقٍ مغـذيـه قرنــاس
له في بلاد الفرس وكـر ومراميـس وكر الجبل ماخالطه وكر الاطعـاس
ماكـر حـرارٍ مايطولـه مفالـيـس مايـقـدره ياكـود نـاسٍ علـى نـاس
امقيسٍ طولـه مـع العـرض تقييـس ابيض نحر واحمر ظهر كاشف الراس
لاماز عمره للقشـر يسبـق ابليـس كنه معلـق جـاك سابـح وغطـاس
ماهـوب كفـاخٍ تخمـه وسـاويـس اركد من اللـي فالمحاريـب جـلاس
لاتـل سيـره والحبـاري مراويـس يقلط كما يلقط على الحـرب فـراس
واليا طلع مـاراح طلعـه هماليس متوكدٍ لـو دونهـا قطـع الارمـاس
والطيـر ماينقـاه نـاس ٍ هداريـس الطيـر ولعـه والهوايـات مقيـاس
واليـوم يبلـون الصقـاره برابيـس كل ٍ غـدا حجّـام ومقلـع اضـراس
ياعنك نقل الطير عقـب المحابيـس يشفي صدى قلب ٍ من الوقت حسـاس
ويازين هده في خـلا مابعـد ديـس لامن بدا راعي الحطب ينقل الفـاس
وذكر الحيا ماعاد يبغـى عواسيـس الروض فيه النبت من كل الاجنـاس
هذي الحياه اللـي تزيـل الكوابيـس لاناقـل ٍ هـم ٍ ولا فيـه هـوجـاس

</B></I>

[ابوفوز]

بلا منازع شاعرين في نظري يوصوفون الطير في حالة الهداد وفي جميع حالاته
الشاعر الكبير بدر الحويفي
والشاعر الكويتي المميز حمد بن عبدالكريم السعيد

[ابوفوز]

في نظري افضل قصيدة للشاعر / بدر الحويفي
يالـلـي طلبـتـم نـبـذةِ مــن قـصـيـدي ,’,’,’ عن واقع المعقول لا انقص ولا أزيد
أنـاغـرامــي وانـبـسـاطـي وعــيــدي ,’,’,’ تفريعـة القرنـاس بـأرض بهـا صيـد
لاشـطـب الصيـحـان روس الزبـيـدي ,’,’,’ والعـشـب جـالـه بالمثـانـي عنـاقـيـد
والـبـدو مـايـبـدي لـهــم بالـشـديـدي ,’,’,’ تسعيـن ليـلـه مــا حـكـوا بالمـواريـد
ضـيـق بـهـم در الـغـنـم والجـمـيـدي ,’,’,’ مايـشـربـون الا حـلـيــب الـمـجـاديـد
والبـل وبرهـا طــار وأبــدل جـديـدي ,’,’,’ ورودم على الفطـر سـوات المجاليـد
مـن فـضـل ربــي كــل يــوم تـزيـدي ,’,’,’ قـامـت عشايـرهـا تـســن المـفـاريـد
والفـجـر تسـمـع للطـيـور أتـغـريـدي ,’,’,’ ليـل الشتـاء طولـه عليهـن سرامـيـد
هــذيــك والله مـنـوتــي يـاعـضـيـدي ,’,’,’ لا جابهـا الله مـن صـدوق المواعيـد
مـاكـفــه الــديّــر لــرجــم الـمـفـيـدي ,’,’,’ وذوب على خشـم الخـدار ومشاحيـد
مجهـود مــن نــو الجـبـاه السـديـدي ,’,’,’ وحـصـل لـهـا قـبـل الـقـارب تمـاديـد
غثوه علـى روس الشجروالهضيـدي ,’,’,’ وســاق وتسـاقـى للنـفـود وتخـاديـد
وفيـض علـى فيحـان ريـف المعيـدي ,’,’,’ نـبــي لنا بـشـعـاف لـوقــه مـطـاريــد
عـلـى أوســوق مـقـربـات البـعـيـدي ,’,’,’ مـن فوقـهـن يـازيـن مــزح الأوالـيـد
لافرع النـادر وطلعـه وكيـدي وحـوٌل ,’,’,’ عـلـى جــول الـحـبـاري تـقــل حـيــد
وسلط على الخرب النشيـط العنيـدي ,’,’,’ حـاسـه وداســه والحـبـاري مـلابـيـد
يقضـي بـهـا الصـقـار يــوم جـديـدي ,’,’,’ فــي سـاعـة مـابـه وجـيــه مـقـاريـد
هــذا هــوى بـالـي وهـــذا رصـيــدي ,’,’,’ سوق النظـر بيـن السهـال الجراهيـد
نومـي تحـت طـل النـجـوم الجلـيـدي ,’,’,’ عـنــدي كـنــب ومـنـجـد زل نتـجـيـد
لـو لامـنـي خـطـو الغشـيـم البلـيـدي ,’,’,’ طــرد الـولـع مـابــه عـلـيـه منـاقـيـد
وشوف الفياض المخضرة يالحميدي ,’,’,’ وشمـة ذعاذيـع الـهـوا عنـدنـا عـيـد
وللكيـف ذوق ولاستـمـاع النشـيـدي ,’,’,’ لا قـلـطــوا رســـــلان والا بـغــاديــد
ثنـتـيـن هـيــل وثالثـتـهـن عـويــدي ,’,’,’ وكـل علـى مـا تطلـب النفـس وتريـد
وقدوعهن مـن طلـع هـدب الجريـدي ,’,’,’ احسـن نمونـه مـن نمـا شـرع الغيـد
وسـوالـف مــا قـيـل فيـهـا جـحـيـدي ,’,’,’ بـالـصـيــد لا نــمـة ولا هي هــرابــيـد
سـاعـات نقضيـهـا ويـــوم سـعـيـدي ,’,’,’ ولا دامـت الدنـيـا لعـامـر وابــا زيــد
الـــدايـــم الله والــفــنــا لـلـعـبـيــدي ,’,’,’ والــرزق عـنـد مـنـزل الــدر بـالـديـد
محيي الهشيم اللـي عروقـه هميـدي ,’,’,’ رزاق مـا تحـت الصـخـور الجلامـيـد
والله يـدبـرنـا عــلــى مــــا يــريــدي ,’,’,’ وصلوا على اللي وحد الديـن توحيـد
وهي رد على سؤال وغير متعلقه بالموضوع

[اقدم صقار]

السلام عليكم
كل الشعراء فيهم البركه والخير
وكل اللي قلتو شعراء
ولاكن والله من شاعر يوصف الطير ومحد يعرف له ولا بيت

[بركات ت ت]

اقدم صقار انا موافقك بالي قلت وكلامك عين العقل