صادرو السلاح ولكن !!!

[قااحش الدخل]

السلام عليكم
صادرو السلاح شوزل بيكال ام خمس وام صتمه نقطة الجنادريه وقالو بنروح القسم استفسار عن السلاح وتمشي لاكن يوم رحت لقسم الثمامه قالوا لازم يجلس السلاح عندنا لمدة عشر ايام وندق عليك واحتري ماحولك احد 15 يوم واروح لمهم وقالو السلاح ارسلناه لم الادله الي في مدينة التدريب الامن العام وكل اسبوع اراجعهم ويقولون مابعد جت من عندهم وله شهرين وانا كل اسبوع اراجعهم ونفس الحاله مابعد جت من عندهم
ليش هذا المماطل وفيه احد صارله نفس الحاله
اسعفونا
ملاحظه مصرح والفشق نظامي

[انس الحارثي]

ياخي والله نظام ماله داعي طالما السلاح مصرح ونظامي المفروض مايتصادر
لكن مانقول الاحسبنا الله ونعم الوكيل

[مواطن]

نعم انا اخخذوا السلاح بشهر 2 وقالو شهر وندق عليك ومادقو الا برمضان يعني وسع صدرك

[عناز الحره]

ليه ماطفيت نورك وديورت قبل النقطه يالغالى:no:
عشان ماتدق عليهم ولايدقون عليك:D:good2:

[فرخ قطا]

ليه ماطفيت نورك وديورت قبل النقطه يالغالى:no:
عشان ماتدق عليهم ولايدقون عليك:D:good2:

تبي توديه بداهيه انت!!!
يارجال انا صادرو بارودي داقن عليه رقم ورايح اجدد تصريحه له الحين 5 اشهر
واتوقع انه مافيه امل ترجع لأنه طاحت بيد واحد وعقد المسأله مع العلم اكثر البنادق الرقم مدقوق
لكن الشكوى لله

[الكدري 2]

شفلك مسؤل كبير يخارشهم لك أذا كنت نظامي
واسطه يعني
وبالتوفيق أخوي

[بعيد الهقوة]

مساء الخير

اذا سجلو محضر ضبط سلاح واعطوك صورة منه او شي يثبت المحضر وسلاحك مصرح

تطمن سلاحك بيجيك


واذا قالو تعال وماسجلو محضر ضبط

الله يخلف عليك

النظام الجديد من بعد عيد الفطررينص على التالي :

اذا تم ضبط سلاح ناري او هوائي غير مصرح ... يتم الاستعلام عن اي سلاح لديك سابقا مصرح ويتم مصادرة جميع مالديك

يعني لو يسمكون معك هوائية ب 500 ريال وعندك بالبيت سوبر راح يصادرون السوبر

واذا تم ضبط سلاح مصرح يتم تسجيل تعهد علية في المركز ويتم مراجعة قسم الاسلحة وتمر على الامارة ويجيك سلاحك بعد بهذلة

يعني اللي بيروح لاياخذ شي مو مصرح

والله يستر علينا وعليكم وعلى جميع المسلمين

[قااحش الدخل]

والله يااخوي ماعطوني اوراق بس عطوني التصاريح

[قااحش الدخل]

تكفون دبرونا

[ولد روووق]

اخذة واحد من العسكر شكلها

[قااحش الدخل]

جاني احباط

[جربوع 200]

راحة عليك الله المستعان

[الشقردي 205]

هلابك إخوي كيف حالك . . .


والله اني حاس فيك . . .


لكن صدقني تعوذ من الشيطان ولا تضايق عمرك ولا تهتم . . .


لا تتحسف على كل شي فات حسب تجربه شخصيه . . .


اذا فكرت بالموضوع راح تتضايق اكثر ويصير فيك احباط . . .


هم صادروا سلاحك لكن ماصادروا عزيمتك وإرادتك . . .


لا توسوس والله ان الوسواس مرض وعن تجربه . . .


والله يعوضنا ويعوضك اللهم امين . . .

[فتى ظبيان]

خذ من المركز ورقة فيها ان السلاح برقم كذا وتصريح كذا في المركز وصودر من تاريخ كذا
وكاتب المحضر فلان الفلاني
عشان تضمن حقك وضابطي المحضر يتابعون معاك السلاح ما يرمون القضية ويتركونك رايح جاي

[ابو ناصر88]

هم يبونك تطفش وتهملها ! لا تخليهم

[بواردي الروقه]

ليش الاحباط

راس مالها حديده..!!

[غامد الزناد]

حسبي الله عليهم وانت بعد ليش تسلمهم
لكن في شباب معنا تصارد عليهم ناريه وغير مصرحه وجلسنا نطرد وراها لمده 5 شهور تقريبا وطلعنا بس كل شي بالواسطه

[مطر وسم]

شكل اللي اخذها ناويها له يعني (سرقه) لو انا منك اقف على روسهم وادبر لي واسطه قويه وارجع حلالي



تحياتي لك

[مريتو]

أردى ما تطريه الرجال الحسايف .
لا تحسف يأخ وأنشب في حلوقهم أخاف يأخذها ضعيف النفس مايخاف الله.
وأبشر بالعوض

[سعودي باشا]

خذ ورقه باي طريقه من المركز ان سلاحك عندهم

الظاهر سلاحك اخذه احد العسكر وحطه بجعبته والله يعوضك خير

واذا عطوك ورقه ترا الوضع نظامي واذا رفضوا تعوض الله وتقدم لديوان المظالم الدائره الجزائيه

[ذيب الفاو]

ياحبيبي انت الغلطان دام الدعوى كذا والي يمشي على النظام ينهان ويسحب سلاحه وهو مصرح
المفروض متجاوز النقطه او مديور قبل تاصلها وترى سواها احد الربع وطاردوه بالبر ليلا لين ضيعهم وفك عمره وسلاحه ..

[ابن فاران]

ليه يصادرونه

[صقر20]

الله يكون بعونك شف لك أحد منا ولامنا .....

[بوارق]

غريبة وهذا السلاح مصرح كييييييييييييييييف لو مو مصرح
خلك وراهم وطالب بحقك ...... والله يعينك على الهجولة ......... ويردلك سلاحك سالم
واذا شفت تفتيش طف نورك ولا يشوفون الا غبارك

[صقار شياهين]

نظام عقيم والقصد منه اهانة المواطن ولا المصرح وش يطلبونة يصادرونة انا عن نفسي ماراح اصرح شي مستقبلا لان اللعبة صارت مكشوفة القصد من التصاريح ليس لتنظيم حمل السلاح وانما لمصادرة السلاح فيما بعد

[abdullah_765]

طالما سلاحك مصرح بيرجعونه لك

بس الله يخلف عليه بتلقاه منفلش تفليش

حسبي الله ونعم الوكيل

[ابو صقر 111]

اطمئن مادام يعترفون انه موجود فهو آخذ صفة الرسميه ولكن تابع بسعة صدر حتى ينتهي الوضع اما بتسليمك وهو الأغلب او بمصادرته وأطلاعك على الأسباب وشكرا

[فرخ قطا]

الله يرده لك عاجلا غير عاجل
عليك بالدعاء اخر الليل

[السفير2011]

خذ ورقه باي طريقه من المركز ان سلاحك عندهم

وراجعهم باستمرار

[قااحش الدخل]

الله يعطيكم العافيه على النصائح وراح ابلشهم لين يفرجه ربك
بس عسى مايجحدونا

[5874]

الله يكون بالعون

[قااحش الدخل]

الله يجزاك خير

[hehehe]

واحد من العيال خذو منه شوزله تفتيش عند الجنادرية للاسلحه العام

نفس حكايتك وبعد شهرين راح خذه من مركز الثمامه وحصل كاتبين

على مكينة السلاح رقم وعلى الماصورة نفس الرقم

اعتقد انه اجراء روتيني

لكن تراه دخل فيها واسطه خلصوه بدري ولا كان السلاح بيطول معهم

طبعا سلاحه مرخص

[التعـ King ـديل]

تعرف تسنتر وتنشب لهم .. هذا الحل لك ولا تنازل عن السلاح لهم

[alm7b-01]

اهم شي شيك على القطع الداخلية للسلاح ممكن تكون مغيره

[ابا الصلابيخ]

اخوي اسرد لك تجربتي المليئة با المصائب هههه

انا سبق انه تم مصادرة سلاحي مهوب من نقطة تفتيش من موقع عسكري
وهي مدينة خالد العسكرية

السلاح ام خمس وساكتون هوائية

تخبر كثرة الملحجة وعلى باله مطبق النظام ويوم شافني قدامه احجه با النظام قام اللحجي يدور على اي عذر حتى يتم المخالفة

بعد ابراز التصريح لأم خمس اشوف وجهه من القهر هههههه
وبعد ماشاف معنا تصريح لساكتون الهوائية طارت علومة فوق وكأن يهودي قبض على مسلم

المهم مالك با الطويلة قابلت الصياح با الصياح وشكاوي عليهم

اقسم لك با الله اني قررت اكسر الساكتون ولا يأخذونها الانذال لكن جت با الواسطات غصب عنهم

والنهاية اعطيت نفسي وعد لا اصيد بمواقع ممنوعه نهائياً حتى لا اتعرض لواحدن مايستاهل يتفلسف

[المعايد]

لآتسكت عن حقك طالبهم ,,وأنشب لهم
خل الى بالدائره كلهم يعرفون وجهك
ودبرلك واسطه هذولآ مايجون الآ بالواسطاااات
والله يعوض عليك ويهنيك بشوفت سلآحك (المرخص)
أقول ليه مايخلون الناس بحالهم

[ال7ربي]

الله يستر خلك وراهم لا تسيبهم ولو انك تشتري لك سلاح غيره وتمشي حالك فيه
بس المهم لا تسيبهم كان هم ماقنعوك باوراق رسميه وخلها تمشايه ( القسم المنتزه المفضل )
ما تدري يمكن فيه واحد قاعدلك ويوم من الايام تروح و تعين واحد بن حلال يخدمك

[ابو عرعور]

شكهم في محضر وارفعه الى امارت المنطقه قسم يجوك بسلاحك لحد بيتك

[أبوراشد]

الله يردها لك سالمه
والله غثا السلاح مصرح ونتهرب عن التفاتيش نبعد عن المشاكل والحل حمل شوزن روسية من اللي ماعليهن حسافه الين الله يرزقنا بالحاكم العادل

...

[ولد وايل]

اكتب شكوى لامارة الرياااااااااااااااااااااااض

[ابوتركي2002]

الله لا يجزاهم خير

[مقلب الشيصان]

مساااء الخير اخووي ..

الله يعوضك بسلاحك حتى لو اعطوكيه الحين ماراح تستفيد ..

تدري ليه السلاح مايسلمونه لك لين يصدي يمتلي صدأ ..
اعرف كذا واحد ماسلموه اللى بعد ملعنه وفي الأخير مصدي رايح فيها

لا وسوبر بنللي وواحد الى الأن يماطلون فيه ..
اذا مافيه واسطه الله يخلف عليك ..

[أسير قمراي]

واسطه < واسطه < واسطه < الله يقلعهااااااااااااااا

ياخوي اترك عنك انشب بحلوقهم ... وبعدين تراك على حق

رح خذ لك اثبات رسمي من المركز بأسم العسكري الي استلم منك السلاح

واقعد لهم ......

والله أني استغرب وش الفايده من التصريح .... يا زين المهرب ماحد درا عنه ولا احد بسئلك عنه بعدين

[العواد 2]

شكهم في محضر وارفعه الى امارت المنطقه قسم يجوك بسلاحك لحد بيتك

[الشمال الغربي]

مافائدة التصريح اذا
الظاهر مالها غير ترهيم محل للسلاح بشاصي السيارة

[ضرغام ياس]

والله ما يقفون بها وانا اشوف

رح انشب في حلوقهم الين يظهرونها وتصريحك معك ولا قدم خطاب للأماره
ترى بتروح عليك

[باترول2115]

الله يعوضنا ويعوضك بخير ،،،،الله يفرجها وأنا أخوك ،،،حصل ماحصل والعبد يصبر على المقسوم

[دخنآوي]

الله يعوضك
وحاول ماتسسسكت عن حقك ..
ووالله لو عندي واسطة اعرفها هناك لااحاول به يطلعها اليوم قبل بكرهـ

ويآخوآن اللي يقول دبرو واسطه منا ولآ منا
اللي يعرف يزززبدهآ له بالخاص وينفع الرجاال لايروح سلاحه



مااقول الا ياقهر ـالتصريح بس ماادري وشهو له ..




الله يعينك ..

[الثبيتي2]

اذا سجلو محضر عليك في القسم خذ الرقم
واذا ماسجلو حاول تاخذ اسم العسكري الي استلم منك السلاح في القسم
وارسل برقية لوزير الداخلية فيها صورة التصريح وانو حصل كذا وكذا ...........الخ
الاصل لوزير الداخلية وصورة لمدير القسم
ولا الله يعوضك في السلاح راح راح راح

[محترف8800]

الله يعينك

[من يخاويني]

هذا اللي يخلي الواحد يصير عنده وطنيه للغرب ونظامهم اللي يحترم الأجنبي قبل المواطن

[قااحش الدخل]

اليوم انا عندهم وقالو السلاح ماجانا

[sa3d]

الله يكون بعونك وانا اخوك.....
في الشتاء العام الماضي كنت كاشت ومعي مسدس المهم وقفت عند التفتيش وسالني العسكري هل معك سلاح قلت اي نعم ومعي تصريح قال ممكن اشوف السلاح والتصريح قلت ابشر والسلاح كان في مكان انسى انهم يحصلونه لكن من باب التعاون مع الاجهزه الامنيه قلت الصدق المهم وخذوالسلاح والتصريح وقالو بنطابقه وبعدها تاخذه واروح للمركز ويكتبون محضرقالو لازم يروح للادله ونكشف عليه يعني المساله مطوله وانا وياهم شيل وحط وكبرت المساله وروح لاول واحد الي مسك السلاح وتكلمت معه وقلت انا الغلطان الي قلت لك اي معي سلاح وجلس يبرر موقفه حنا عندنا تعليمات لازم نطبقها المهم وانا وياهم شيل وحط يوم شافوني ناشب لهم وواقولهم اني انا الغلطان تعاونت معكم وقلت اي معي السلاح واطلعه لكم المهم في الاخيرسجلو محضر بتسلمي لسلاح وخذته ..
ونصيحه ياشباب ااذا وقفت عند تفتيش وسالك معك سلاح اجحد وقل لا مامعي شي حتى لو معك تــصـــريـــــح. لانه مصادر مصادر في كلا الحالتين.

[yhossen]

اخوي قاحش الدخل
وش صار عليك . اخر شيء هل استلمت سلاحك؟؟؟

الموضوع قديم شوي
لكن امس صارلي نفس الموقف عند نفس المركز وقالوا بعد اسبوعين تاخذ سلاحك
وانا خايف على البندق الصراحة سوبر بنلي ولي معها عشره طويلة

كان معي ايضا ناس نفس وضعي ممسوكين معهم اسلحة
وانا ثامن محضر يسجل في ذلك اليوم ورأيت كثير من الاسلحه في المركز ومن ضمنهن ام صتمات
ويقولون الغير مصرح يصادر والمصرح يرجع بعد اسبوعين

ومادري وضعهم مايطمن .

[قناص مزاجي]

ياخوان اي سلاح مصرح او غير مصرح يصادر هذي هي الحقيقه

هناك تعليمات بمصادرت الاسلحه واذا عليها تصاريح تسلم مع تصريحها لشئون الامنيه

لهم الان 7 شهور



يستثنى الامراء من تسليم اسلحتهم الشخصيه

[تربة الشمال]

طيب وش الحل في مثل هذه الامور يعني لازم ناخذوره من العسكري

[الحربي حاتم]

لاحول ولا قوة إلا بالله العظيم
حسبنا الله ونعم الوكيل عليهم الله لايوفقهم ولا يعافيهم ولا يرحمهم
يعني حتى السلاح بهذلونا فيه الله يعوضك ويخلف عليك ولا يخلف عليهم بخير

[راهي المسيلم]

اويلي بيكال ويبوني اوقف والله ماقف حرام اقرب مخرج الهجه

[ابولفه]

بخصوص الكلام هذا ..!
..
هل عندك صوره من التعميم . ؟ من وين جايب الكلام هذا ..المصدر ،،

الله لايجلعناا في محلك .. بصراحه سلاحي مصراح والله وماايسحبه لو ينطبع .

وانا اطلع واروح .بالسلاح المصرح في اي مكان جنوب شمال .

ولا صار الشي هذا معناا .

ايش الفايده من التصريح اذا يسحب السلاح منى في اي نقطه . بعدين بالرياض سبحان الله .
اول تسرح العالم رايحه جايه باسلاح الصيد ولا احد يقولهاا عينك في راسك .

الظاهر كل منطقه عندهاا نظام...

شوفلك واسطه ...وان شاء الله يطلع قريب ..يمكن بيومك تستلم السلاح .

تقبل تحيااتي

[ابولفه]

مساء الخير

اذا سجلو محضر ضبط سلاح واعطوك صورة منه او شي يثبت المحضر وسلاحك مصرح

تطمن سلاحك بيجيك


واذا قالو تعال وماسجلو محضر ضبط

الله يخلف عليك

النظام الجديد من بعد عيد الفطررينص على التالي :

اذا تم ضبط سلاح ناري او هوائي غير مصرح ... يتم الاستعلام عن اي سلاح لديك سابقا مصرح ويتم مصادرة جميع مالديك

يعني لو يسمكون معك هوائية ب 500 ريال وعندك بالبيت سوبر راح يصادرون السوبر

واذا تم ضبط سلاح مصرح يتم تسجيل تعهد علية في المركز ويتم مراجعة قسم الاسلحة وتمر على الامارة ويجيك سلاحك بعد بهذلة

يعني اللي بيروح لاياخذ شي مو مصرح

والله يستر علينا وعليكم وعلى جميع المسلمين

االمقصود الكلام هدا ...خطا في الاقتباس

[عصويد2]

انت معك ورقه. مصادر خله عندك


النظام ثلاث شهور وتسلم

[محمد ابن عيد]

ليه ماطفيت نورك وديورت قبل النقطه يالغالى:no:
عشان ماتدق عليهم ولايدقون عليك:D:good2:


-

هذا الكلام و بسس