مؤشر الكشتات ينخفض من (الكليجا) إلى التوست

[حفرلوجيا]

سلام يامكشاتيين غايبين حاضرين بمستضيف (قرنبع) أو (جديد)
------------
<O:p</O:pلو سألت أحد (الشباب الكبار)- ممن قارب سن الأربعين- :) عن رحلاتهم وكشتاتهم في زمن كانت فيه مكونات أرقى و ( أوذف أو أكشخ ) عدة طبخ لا تخرج عن:

قدر مطعوج ما يركد على الأرض, أما على المركاب فالله المستعان.
وملاس (مغراف) بدون عروة تخلي اللي يستخدمه عند ( نكب) الكبسة يحس بـ (النكبة) ويحلف ما يغرف بغير يديه حتى لو كان العشاء عصيد أو جريش باقي عليه خمس درجات ويصل درجة الغليان.
وتبسي(صحن) غرش مقشع يسلي ويوسع الصدر بالبوية اللي تتناقز منه كلما تعرض للطقطقة < (بالمناسبةإذا لم تكن قد شاهدت مناقز البوية من أواني الغرش المتقشعة فـ اسأل شاب أربعيني عاش بالمدن وإن لم تجد فـ دور لك ثنين قراوى من ابو عشرين).
والأناقة في عدة الطبخ هذه, أنها محشورة بكرتون موز, مسدود من تحت بقرطاس إسمنت, عليه دم أضحية عام الأول. وربما لا تخلو زوايا الكرتون من (بقايا كليجا) اختلط به الدبس مع رمل النفود منذ كشتة قبل عام الأول, ولم ينتبه لها أحد. والسعيد من يحظى بهذه الغنيمة في كشتة العام القادم. أما القهوة والشاهي وأوانيها فخل الطابق أو كرتون الموز مستور.:(
أقول لو طلبت من هذا (الشاب الخمسيني) :) < إذا كنت أيها القارئ ستسأل لماذا زادت عشر سنوات في ظرف عشرة أسطر, فهذا لضرورة سوالف الكشتات الحالية التي سيطرت عليها النقاشات ومتابعات سوق الأسهم التي قلبت أو ستقلب حياة الناس الاجتماعية رأسا على عقب
ماعلينا, لو طلبت منه أن يعيد شريط الذكريات ويصف رحلة أو كشتة أيام عمر العشرينات ؟ < انهار المؤشر:)
ربما يجيب بالقول : كنا يوم خميس قبل عشرين سنة أنا وصديقي دحيم نتمشى على ددسن الوالد وكان معنا عشرين ريال وطاري علينا نفسق ونشتري مطبق وفول قلابة من مطعم الزلابة عبده قايد ونطلع ناكلهن على طريق المطار (يعني نتفرج على الطيارات):D
وعندما وصلنا المطعم لمحنا ابو سعد جد جيراننا عند الخباز اللي جنبه , وهذا الذي جعلنا (ننحاش).:rolleyes:

لماذا ؟

-------------- يتبع<O:p</O:p

[حفرلوجيا]

والسبب في الفركة, حتى لا يشوفنا الشايب– والسالفة لا زالت لمخاوي دحيم –عند المطعم ويفشلنا ويقول : ما عندكم بيوت تضفكم ياللي ما تستحون وتاكلون بالمطاعم.
ورحنا لحارة صديقنا أبو خريطة < بالمناسبة لا تتوهق وتعتقد أن الخريطة اشارة لقارمن أو خرايط طبغرافية التي اصبحت من ضروريات الرحلات مؤخرا, إنما هذا لقب أطلقه أفراد الشلة عليه , وفي نهاية الموضع سيكشف دحيم سر اللقب.
ثم سيقول (مخاوي الذيب دحيم): أخبرنا ابو خريطة ان جارهم رجع البارح من الشعيب ويقولون إنه يصفق من الجال للجال. وليش ما تخلونا نكشت هناك؟ ونسبح ونطافش على شان (نلق) ونكون نظيفين يوم العيد اللي قرب وما بقى عليه إلا شهر.
وهذا الذي تم , وصلوا الشعيب ورأوا العوائل منتشرة ومحتشمة بالمكان , وهذا ما جعلهم ينحرفون بوجهتهم لإحدى الشغايا, لأنهم جبلوا على احترام المحارم وعدم مضايقتها,:good: رغم أن أبو خريطة له سوابق سيئة حول موضوع البصبصة.. حيث يشاع إنه شوهد قبل شهر يتفرج على (مجلة الشبكة ومجلة الموعد) عند البقال زكي حشمت.<بالمناسبة إن كنت من الأجيال الحديثة جدا ولا تعرف تلك المجلات السرية آنذاك , فسنقول لك: الله المستعان ..هذه مجلات سادت ثم بادت , وكانت معروفة بنشر صور نجوم الفن والرقص اللي كما قالوا لابسين من غير هدوم, وهو لبس أو صور محتشمة ومؤدبة بمقاييس الفضائحيات الحالية ومجلات الهشك بشك التي تصبح بشاكيرا وتمسي بنانسي عجرم وبينهن ألوان من (الموت الحمر) أو (الأبيض).:mad:
ماعلينا, نرجح (لمخاوي الذيب الامعط دحيم) < (يبدو أن اسم دحيم سيكون في آخر الموضوع سطر كامل).
المهم , سيقول بلغة هذا الوقت : تصدق على شح الأدوات وضيق ذات اليد, و(القيود) المبالغ بها, والبلاهة في ذاك الحين , كنا نستمتع بمنتهى البراءة, وكان وقت الرحلة يذهب بين المطارح والسباق وأحيانا نتعلم الرماية على بندق جد دحيم الذيب التاسع عشر, وألوان أخرى من اللهو البريء لم تكن مرتبة سلفا. لا تخلو من تعميق القيم التي نتوارثها حتى لو لم ندرك معناها أو قيمتها.
أما الآن فخذ من ألوان وأشكال (المتعة) الشيء الكثير ابتداء من فطور الصباح بقطع من خبز (توست) مدهون (بزبدة) إلى أشكال وألوان من المأكولات والعدد والأجهزة والأدوات المتطورة بحيث صارت الرحلات عبارة عن (كشتات ديجتل), ولكنها بلا ضوابط اجتماعية, وفوقها ترجع من الكشتة معفول ونفسك بطرف خشمك إذا قابلت أهلك.
أما الأوضاع الاجتماعية في النزهات العائلية فـ(شف روضة خريم والتنهاة وغيرها) واحلب (ضيقة صدر) إلا ما ندر .<O:p</O:p
انتهى
وسلامتكم
--------------<O:p</O:p
لم يفصح دحيَم عن سبب لقب (أبو خريطة), ويقول تذكروا ثيابكم (التترو) أيام المرحلة الابتدائية وانتم تعرفون . < إن لم تفهمها فخلك مع ( الديجتل ).<O:p></O:p>:D

[أبو مفلح]

والله يا أنت مأجر
الله لا يهينك كثر من ذي المواضيع

[خشم الحصان]

الاخ الغالي
خفرلوجيا
السلام عليكم
الله يغفر لنا ولك امين
اخيي احححححححححححححح وطيت (السمه)* الله يانت خليتني قش متنثر في العاير
ياخيي وش جابك لها الموضوع
اقو خشم غدا خشمه (احمر) سنه واحد مزكم مغير نشق وتمسيح في طرف الثوب(تيجان) مهوب تترو
من السفطه* الي نهاية السم من البسا والحسره علي ذيك الايام
ياخيي نسيت الشعور منول اذا اقبل عليك الوحد تقول سنه قاضبه سلك كهرب او مطلعينه من غسالة بابطين ام عمود ولا نشفوه او سووه
يعني لو تطمر شرره قبس الرجال
وسيزان انوع الخطوط الكنوريه والتضاريس واصابع منها لي غادي سنه راس ضب علي نثيله وارم
او تلقاه رابطه بخرزه (طريده) او سن اصابعه مهيب اخوات متفرقه لئنه يومه صغير يشوت حصي
لئنه اذا شات كورة الصب قلع معها حصاة
والثوب خذ وخل الوحد طول يوم واقف لئن الثوب يابس تقول سنه كرتون ثلاجه 18 قدم واذا جاء ينام سهلوه علي جنب وطلع من الثوب
والشماغ ومادرك ماشماغ
1- لبس من قبل............. يعني المرزام ابيض
2- معلوج طرفه
3- منديل القرويه وخاصه اذا كنت جنب النار
4- صديق لعيار الزيت
وهنالك اشياء كثيره
ومنها ان اكثر لي معك في الرحله حربثيه يعني مكنيكا حفر ضببه تقليع حرمل بني رجوم
يعني يدين الوحد سنها صنفرة جدران لو يلمس خد حدا هالبزران صب دم
اخوي حفر لوجيا ذكرتني بهاك البيت لي يقول
(مريت بيت للمحبين مصكوك.................وجابتني القدره لي حد بيته)
اخيي الله يحسن الينا وليك خله مصكوك لا تفتحه ترا معاد بزي كثر ماراح
ولكن مقارنك بين صحن امي نوره الغظار وصحون تالي فرق
منول الصحن تقول سن واحد فيه دق جدري من كثر التقشيع
والتاليه تلق سنها مرايه
خشم معاد فيه شده يكتب الله ينت جبتها في الحشاء
اخوك
خشم الحصان
خنقتني العبره مره ثانيه
..........................
نغزه............ شهر يتفرج على (مجلة الشبكة ومجلة الموعد) .......... الله يرجك ترا منول اشد من شرب التتن شوفتها مغير الواحد سنه مروحه قعادي مره يشوف ومره يتلفت لاحد يشوفه زود علي الطمه سنه فدائي
دقشه......... ترا الجربيع كثرة ومنول اذا صلينا لعشاء ولم عسيبك وكربك للمطارد الحين خذ تسدح وعطني علي وقفك مويه الله لا يهينك سنك طالع مع محرولين اللهم ياكافي
صدمه علي قول الله يعفو عنا وعنه........دنيا تدور ايام.............. ذكراك بهموم )
................
السفطه........ منول السم يسفطونه علشان اذا قصرت سمومه يفتقونها وتطول .........تفكير مستقبلي
السمه........ هو الجرح اذا استشم يعني ماطاب حت لو حطيت عليه بصل منتفخ وادنا شي يطقه خذ تلوي وتسدح سنك واحد مستنزل في سامري ابحلوبه

[الفتى المجازف]

الى هاالدرجه ياحفرلوجيا
الله يغربل شيطانك حركت آهات وآهات
يكفي يكفي دموعي تهلهلن
الله يازين طلعات البر من اول
يازين ذيك النفوس الزكيه الطيبة الطاهرة
يازين ذاك البر وذاك الهواء
تصدق حتى الربيع اللي انت خابر وش حليلهم
يجيبون الحليب لعندك يقولون تفضل عندنا
الغداء ولا العشاء
نفوس طيبه واخلاق عاليه
تدري
خلني اكفكف دموعي
على قولة خشم الحصان
خنقتني العبره استرجعت ذاكرتي
ثلاثين سنه وتسمرت امام الشاشه
مبهوتا لااقوى على الحراك
لقد اسري بي ثلاثين سنة للوراء حينما كان الناس
للناس سواء، حينما كان الجار اعظم من الأخ.
تحيتي ومودتي
وسأسرد قصصي على نفسي
فذاك الوقت مختلف كليا عن هذا الزمان.

[صقر]

الله يبارك بابو خريطة اللي رجعك لنا يابو سليمان.

حقيقة انك رجعتنا للوراء ( وخصوصا حكاية صحن الغرش)

يبدو ان لكل زمان دولة ورجال يابو سليمان ... فالكل مستانس سواء مع مع صحن الغرش أو مع صحن ابو كراسي ومغلف بقصدير.

مشكور يابو سليمان على هذا الطرح الفريد والرائع .... حتى لو لم يفصح دحيَم عن سبب تسمية ابو خريطة ;)

بارك الله فيك.

[حد السيف]

ابو سليمان
توست وكليجا كلهن من الطحين الاول مسويتة مكينة بلا طعم او رائحة
والثانية ام دحيم ابو خريطة مدري هي مرسومة بشكل عجيب على الثوب تكتمل شكلها النهائي من العيد الى العيد او الوجة من كثر المضارب
ذكرتني واحد نظاراتة قوية تقل قيعان فناجيل ( الحقوق محفوظة)من قوة شوفها كان اذا شاف سوادة تمشي قال ضفينا قشنا حولنا عوايل
وين ذيك الايام من الحال اليوم الله المستعان
شبكة وموعد وبشارع الوزير ومكتبة الخزندار كعابي من معكال مرور بشارع الغنم حتى دوار دخنة للوصول الى اقرب طريق للوصول لمشاهدة المجلة وكانت الشوفة تكفي اسبوع حتى موعدها القادم وهي محورحديثك طول الاسبوع حتى تبين انك متمدن
لا ابشرك اليوم الرحلات صار بها كريم كرمل وليتك تشوف بعض الناس وشلون يصير اذا ذاقها ذواقة وما دب فيها
ابو سليمان
الله يرحم الحال
صحن غرش مطبين وصاير نظيف مايحتاج غسيل
لا تبطي علينا
شوقنا لك بدى يبان


محبكم ابو سليمان
حد السيف

[المربد]

را ح علي الموضوع مير الله عقله
حسبي الله على من قطع المنتدى.


ترى العزبه ما هي لشخص واحد ، كل واحد يجيب من بيتهم حاجة واحد يجيب القدر وواحد يجيب البريج وواحد يجيب الملاس والصحن...! وكل واحد يجيب بيالته.

ابو سليمان موضوعك والتعليقات عليه ما يفهمه الشباب امثالي .!!
رجاء تكلموا بكلام مفهوم بعيدا عن الرموز والشفرات حتى نفهمكم ونشارك معكم.

ابو سليمان
الله يرحم والديك

[ابو عمر اللاحم]

السلام عليكم ورحمة الله وبركاته

حفر لوجيا .... اما كرتون العزبه . وما تعرض له من عوامل التعريه والمواعين :d اللي فيه خلان اتصورك وانت في زمن الغرابيل . لكن ضحتن من جد .. وستشعرت النعمه اللي حنا به يا الشباب اللهم و لك الحمد .

تقبل احلى تحيه ،،،،،،،،،،،

[المربد]

165 قائ للموضوع
و 8 تعليقات فقط ؟؟؟

[سحاب1111]

ايــــــــــــــــــــــــــــــــــــــــه ياخوي لكل زمن دولة ورجال.
راحت ذيك اليام بهلها
الله المستعان
عمومن مشكور