نطلب مشورتكم في هذا الطير جزاكم الله خير ..

[الليل السرمدي]

يااخوان قبل اسبوعين شبكت لي طير ربيب

والطير مافيه لاسبوق ولاحجل ولاجهاز ولا اي شي ولكن الطير نادر بكل شي بلون ريشته وبحجمه وباين انه غالي ولايغالط فيه احد ابد ابد

المهم الطير شودت عليه بالديره عند الصقاقير ولاجاني احد
واشاروا علي الاخوان ونزلت موضوع له بهالمنتدى ومنتديات اخرى ولاحد رد لي خبر .. والطير متعبني بالعلف والمداراه

ابي حل ماليحقني منه اثم من الله

[ســـبــار ربــعـــه]

يفيدونك الاخوان ان شاء الله والمعروف عرفا كالمشروع شرعا.
بعدين وانا اخوك وين طرحت الطير و وش نوعه هو حر تام ولا مثلوث ولا شيهانه بحريه او جبليه.
لان ضياع الطيور واجد. فيجب عليك ان تجتهد في البحث عن صاحب الطير حتى تجده وان عجزت عن ايجاده واقصد بهذا انك لم تتقاعس يوما عن البحث عن صاحبه وجات فترة الربطه وانت ماعينت راعيه اربطه في المقيض واذا جات نقلة الطيور السنه الجايه ولا لقيت راعيه فانت اولى به.
هذا والله اعلم وصلى الله وسلم على نبينا محمد

[الضامي...]

اخوي ديرتك وين

[القنــ أبو تركي ـــاص]

إذا تسمي هذي الطريقة إعلان فانت غلطان
يجب تصوير الطير صور واضحة وتنزلها
واكيد طالما تقول نادر بالريشة والحجم بيتعرفون عليه الرجاجيل ويدلوك على راعية
وتكسب الجميل الطيب والفال الزين

[القصير111]

أنا أقول إنها أمانة حملك الله إياها ويجب أن تتحملها حتى تصل الأمانة لأهلها

وإن شاء الله إنك أهل لتحمل الأمانة

[صقار مبتدئ]

اذا الطير ما فيه لا سبوق و لا ريشه و لا فتخه
كيف يكون ربوب
هذا وحش وعليك بالعافيه
وجهة نظري مدري احد يتفق معي

[أَبوابراهيم]

إذا تسمي هذي الطريقة إعلان فانت غلطان
يجب تصوير الطير صور واضحة وتنزلها
واكيد طالما تقول نادر بالريشة والحجم بيتعرفون عليه الرجاجيل ويدلوك على راعية
وتكسب الجميل الطيب والفال الزين
اذا حط صورة الطير فانا اول واحد بيقول انه لي :D
ترا بليس مايخلي احد

[كاتم الشكوى]

لا تنزل لا صورة ولا يحزنون
ولازم تعرف شئ بالطير ميزة تميزه عن غيره يعني ليا جاك راعيه ذكر هالميزة
وإن شاء الله موضوعك هذا كلن يذكره لأصحاب الطيور الضايعة
وفقك الله وجزاك الله خيرا
أما من ناحية العلف متى ماجاك راعيه ماراح يقصر معك بتكلفة العلف وغيره

[مخاوي الذيب 305]

لا تحط صوره ولا شي بس حاول تنزل اعلانات ب المنتديات \وتقول مثلا ضايع حر نادر وريشته نادره من له الطير يذكر المواصفات
وانت عاد دور واذا ما لقيت اسال المشايخ قول الطير عندي ومن زمان ولا احد جاه يمكن يحلل لك الطير وتبيعه ولا تاخذه لك

والله تعالى اعلم

والسلام واسمحو لنا ب الاطاله

[الـسـاطـع]

جزاك الله خير على هذه الأمانه والصدق والله يرزقك ويوفقك على نيتك الصادقه
لكن انتبه تنزل صورة الطير او ترسلها الى احد او احد يجي ويشوفه
الطير له مواصفات ومميزات تفرق عن باقي الطيور وتفيدك في وجود صاحب الطير
تحياتي وسلامي وخالص دعواتي لك

[الليل السرمدي]

الطير حر وافي حمر ومكان طرحه شمال حفر الباطن
اما اخوي الي يقول نزل له صوره فاذا نزلت له صوره فابليس مايخلي احد كما قال اخوي ابو ابراهيم ..
لاكن انا سألت شيخ وقالي بيعه وتصدق بثمنه او اطلقه وانا ماني مقتنع بفتواه لاكن الله يجيب راعيه يارب

[أَبوابراهيم]

الطير حر وافي حمر ومكان طرحه شمال حفر الباطن
اما اخوي الي يقول نزل له صوره فاذا نزلت له صوره فابليس مايخلي احد كما قال اخوي ابو ابراهيم ..
لاكن انا سألت شيخ وقالي بيعه وتصدق بثمنه او اطلقه وانا ماني مقتنع بفتواه لاكن الله يجيب راعيه يارب
ياغالي .. والله انك مكبر الموضوع واهو ماله داعي
وممكن خوفك على الامانة هو الدافع .. والله يثيبك ويكتب اجرك :)

شف هالموضوع التفصيل عن حكم "اللقطة"
http://www.mekshat.com/vb/showthread.php?t=310098

[اقدم صقار]

السلام عليكم
اخوي دام الطير ماعليه اثر صقار مثل حجل او سبق او صفره او شريحه داخليه فهو انشاء الله لك وحلال عليك ومانيب مفتي ولاكن هذا العرف عند الصقاقير
والمعروف عرفاً كالمشروط شرطاً
ولا تنيه عليه
ولاكن ود الطير للمستشفى واكشف عليه اذا فيه شريحه دق على رقم راعيه
اما اذا ما طلع فيه شي فهو بأذن الله حلالك ولا تنطبق عليه شروط اللقيطه
اسف على الاطاله
تقبل مروري

[الضامي...]

اخووووي رقمك على الخاص بسرررررررررررعه

[البرنس الليبي]

على هونكم يالربع الطير كان لي واهديته على معمر القذافي والظاهر انه فكه يوم مسكوه الثوار ..عموما الطير هديه ماوراها جزيه لك يابن مخلب ..تمقنص وانحش من الضامي هههههههههههه

[دعاس]

اقدم صقار عطاك العلم
والمعروف عند اهل الصنف ان الطير لو فيه حجل وسبوق
وقرنس خلا فهو لك
بمقناصنا هذا قبل شهر شبكت قرناسه بكر بالحفر ومقرنسه خلا
وعليها حجل واحد قطري واللي شراها تاجر من الحفر ودق على راعيها
وخبره انه شراها من الحراج وعطاه القطري مربح 10 الاف ورفض
وباعها بقيمه طيبه
والقطري راعيها وعارف انها غدت العام فرخ وقرنست خلا
اما الطير اللي عندك يمكن فيه مرض واعتقه راعيه وطاب
اما لوه ماقرنس خلا اكيد فيه سبوق وانت تقول مابه سبوق
والطير وحش والعلم عند الله انه من نصيبك
وانت مالقيته ربوي منطلق من مربط وجحدته واخفيته
ولك تحياتي

[abomajed]

السلام عليكم اخواني,,,,قابلت لي رجال بدوي قانص شمال الحفر حول سماح,,,المهم انة مضيع لة طير ,ولا يعرف يعلن في النت,,الاوصاف عند راعي الطير...
اسمة ابو ابراهيم....ورقمة 0501571006
بعد اذن المشرفين

[تميم2222]

اخوي الفاضل جزاك الله خير ... وما قصرت وهذا ان دل على شي فهو طيييب اصلك ..ونا من رايي ان كانك من اهل الرياض..او تعرف به ...يطلع بالطير للمستشفى الطيور وان شالله تكون به شريحه وعلى طول بيطلع اسم الرجال صاحب الطير ولك كل الود

[ولد جدة 2012]

حبيت ارفع لك الموضوع

[عابر المحيطات]

انا اقول ان كان عليه سبوق تغير السبوق الى لون وشكل ثاني
وتنزل الصوره

[قرناس شماالي]

هذى حلالك يالغالي

ومافيه ادله تثبت لشخص اخر

[اقدم صقار]

السلام عليكم
يا الربع وش فيكم
ارجع لنفس كلامي ولا تعرضه ولا يحزنون
تقبل مروري

[السياسي حامد]

فيه بعض الطيور اول ماتشبكها من زود الوحاشة الي فيها تبين كأنها ربيبه 100%

اصبر عليه اسبوع وشوف الوظع تغير ولا