مطلوب مساعدة اخوكم يبي يكشت بالرياض

[سيوف العز]

السلام عليكم

شباب كيفكم انا جديد على منتداكم وصراحه عجبني موضوع الطلعات والكشتات

عاد بكون صريح معكم اخوكم ابو فهد من الرياض

ماعمري طلعت وكشت نهائيا فاتمنى منكم تدلوني على الاماكن الزينة في هذا الوقت

شرط تكون قريبه من الرياض يعني ابعد شي 150 كيلو عن الرياض


طبعا انا شفت المواضيع الي تتكلم عن التجهيزات من الى وكلها تقريبا اقدر اوفرها

لكن ينقصني المكان الي اتجهه له طبعا مو لصيد مجرد تمشية وتغيير جو يعني ابي مكان هادي وفيه زرع وخضره ان امكن او اي مكان وياليت لو فيه صور وشكراً


في شي اخير اتمنى يكون المكان اقدر ادخل فيه بالسيارة عشان مااغرز واتوهق وشكرا

[وسيع البنايد]

يا مرحبا يابو فهد
اول كشته اقترحها عليك تكون للتنهات
تطلع من الرياض كانك بتروح للجنادريه خل الجنادريه يمينك وعلى طول سيد لين تجييك محطة بنزيم يسارك ويمين مفرق الرمحيه خلها وسيد على طول بيجيك مفرق يمين خش معه وعلى طول لين يوقف الخط في التنهات وهي على يسارك والله يوفقك وانتبه من الخط الي اول مره تمشي فيه خبرك لفات طلعات نزلات يعني لا تعدى 80

[أبوسعد111]

مرحباً بك يا أبو فهد بين أخوانك
بالنسبة لهذه الايام مالك إلا النفود حول الرياض
و أما أماكن الربيع
فهي كثيرة
ولكن
الله يكتب لنا خير هذه السنة من الامطار :l والغيث :r قل آمين
وبعدها بتحصل الاماكن الزينة والقريبة

دمت بحفظ الرحمن

[* ابو باسل *]

وادي حريملا قريب واشجاره روعه تمشي على طريق صلبوخ القصيم القديم الين تجي حريملا لايفوتك المكان ممتاز وخاصه للي عياله معه الشعيب محمي وعليه حماية والمكان لايفوت وقريب .