يا جماعة أفيدوني قبل لا أتحسف على الفلوس اللي دفعتها فيها

[سلفرادو2012]

السلام عليكم ورحمة الله وبركاته

يا جماعة الخير انا نويت أشتري سلفرادو ٢٠١٢ و رحت للتوكيلات العالمية في جدة و حجزت لي وحدة ودفعت فلوسها غمارتين ls و المكينة V8 حجمها 4800 و السيارة بدون دبل لأن استعمالاتي لها في المدينة و الخطوط فقط، قريت عن السيارة و لقيت اغلب الناس يقولون ان محرك 4.8 مب زين مرة و ان السيارة بطيئة!! وانا يوم قال لي انها ٨ سلندر قلت اكيد ان عزمها زين، و المشكلة اني ما لقيت غير هالمحرك عندهم، ما ادري هل السيارة بطيئة ما تمشي والا عزمها ممتاز؟؟! اخاف آخذها و اتحسف، تكفون اللي قد جرب هالمحرك على الغمارتين يفيدني او اي احد عنده خبره الله يجزاكم خير..

[0أبو عبدالله1]

السلام عليكم ورحمة الله وبركاته .

عن تجربة لي مع جي إم سي سوبربان 4800 فورتيك ( دفع رباعي ) ,

الموتر رائع جداً ما شاء الله سواءً في الخطوط و المدن و ( الصحاري ) , عزم رائع , تسارع ممتاز ( بالنسبة لحجم السارة الكبير ) .

مجمل السالفة : الموتر يحط على الجرح ويبرأ ما عليه خلاف .

ملاحظة مهمة جداً : من الأفضل لك تجربة السيارة . وبالنهاية الرأي الأول والأخير رأيك .

دمتم بود .

[قناص2000]

يفدوك الاخوان

[FORD1969]

اذا كنت تقدر تسحب عربونك افضل لك تآخذ 5300 بدبل

والمحرك 4800 ماعليه طلعنا للصمان وخويي معه واحد وعليه شد وعزبه وتوانك مويه ومشيه طيب ماعليه لكن الــ5300 يفرق في العزم والقوة والأداء

غالبا السلفرادو ا مكاينه 4800 سي سي لحجم 1500


موفق خير اختيارك للسيارة موفق الله يهنيك

[سلفرادو2012]

السلام عليكم ورحمة الله وبركاته .

عن تجربة لي مع جي إم سي سوبربان 4800 فورتيك ( دفع رباعي ) ,

الموتر رائع جداً ما شاء الله سواءً في الخطوط و المدن و ( الصحاري ) , عزم رائع , تسارع ممتاز ( بالنسبة لحجم السارة الكبير ) .

مجمل السالفة : الموتر يحط على الجرح ويبرأ ما عليه خلاف .

ملاحظة مهمة جداً : من الأفضل لك تجربة السيارة . وبالنهاية الرأي الأول والأخير رأيك .

دمتم بود .




الله يسلمك ما قصرت، و الصراحة ما فيه سيارة من نفس النوع تجربة عندهم و الا كان جربتها، مشكور.

[سلفرادو2012]

اذا كنت تقدر تسحب عربونك افضل لك تآخذ 5300 بدبل

والمحرك 4800 ماعليه طلعنا للصمان وخويي معه واحد وعليه شد وعزبه وتوانك مويه ومشيه طيب ماعليه لكن الــ5300 يفرق في العزم والقوة والأداء

غالبا السلفرادو ا مكاينه 4800 سي سي لحجم 1500


موفق خير اختيارك للسيارة موفق الله يهنيك

المشكلة ما عندهم غمارتين 5.3 ما فيه الا ذا و الدبل ما احتاجه عندنا فكسار يكفي و يوفي هذا ابيه عشان في السفر نحمل العفش شناط و كذا فما ادري هل هو ثقيل خاصة ممشاه في الخط او لا، يعني يوصل لسرعة عالية بالراحة والا يجهد؟ و انا منب راعي مقاومات و خرابيط واللي اخترته 1500 V8 4.8 بدون دبل غمارتين

[سلفرادو2012]

للرفع.......

[0أبو عبدالله1]

هل هو ثقيل خاصة ممشاه في الخط او لا، يعني يوصل لسرعة عالية بالراحة والا يجهد؟


والله ياخوي بالنسبة للسوبربان ياصل لسرعة عالية بالراحة .

دمتم بود .

[يالبى الهلا]

الدبل هو حلاة الموتر موتر بدون دبل وامريكي ؟؟؟؟؟؟
والامريكي ثقيل في الرمل وذا طاح في الرمل انسى يطلع موتر خط ولاتنزل عن الزفت

[سلفرادو2012]

يا جماعة قلت لكم الدبل انا ما احتاجه السيارة بس للمدينة و الخطوط، اللي ابي اعرفه هل هالمحرك 4.8 يشيل السيارة بسهولة و في الخطوط يوصل لسرعة عالية براحة او لا، يعني عزمها كويس او لا؟ خصوصاً انها بدون دبل و قريت معلومة ان محرك 4.8 في سنة 2010 وما بعد سوو له ترقية و صار عزمه 302 حصان، وش رايكم!؟

[التعـ King ـديل]

خذه دبل لك وللزمن

لو جيت تبيع تلاقي زبونه ولو احتجته يوم تلاقيه جنبك

نصيحه لاتاخذه بدون دبل ثم تتورط وتقول ياليتني

[بلحارث]

كلام الكنق صحيح ترى اذا جيت تبيعه والله ماتحصل زبون يوفيه حقه اذا كان بدون دبل انتبه خاصة ان النوع هذا مرغوب بشدة الدبل وبدون دبل ماحد يبيه

[دل البحار]

طيب معاك جيب VXR للسفر وتقول بتاخذ السلفرادو للعفش افرض انكم طلعتوا بر
بيمشي معاك السلفرادوا من غير دبل بأماكن يمشيها ال VXR
صعبه الشغله بتكون
لكن الافضل الدبل وبخصوص المكينه 1500 حصان ضعيفه اقولها لك ومو بالحيل لكن تفرق معاك المكينه القويه بالدعس والمشي وبرضك المكينه 5800 تسحب بانزين ترى بجده ما يرغبوها يرغبوا في 4800
الافضل تاخذ 4800 دبل من غير دبل ما انت محتاج اجابه اذا شغلاتك اسفلت والله يوفقك

[ابونبيل]

عزمه حلو ويجيب طبلونه لاكن 5300 اقوا منه وكلهم فيهم القوه

[ديفون]

يارياجيل الدبل اذا ما استخدمته يخرب ويخر زيت وصيانته مكلفة . واذا انت منت براعي بر لا تاخذ الدبل

[suk]

نصيحه لاتاخذ الا بدبل

[سلفرادو2012]

جزاكم الله خير، بس يا جماعة انا بقول لكم.. انا من سكان مكة علموني وين البر اللي اطلع له ههه تمر السنين تلو السنين ما دخلت البر وش ابي بالدبل هههه والله يعطيكم العافية ما قصرتوووا

[مسير عليهم]

اذا انت راغبه بدون دبل توكل على الله ولاعليك من احد

ترى الناس اجناس

عن نفسي لو تقول لي خذه بنص سعره جديد ماشريته

الونيت وخاصة الجموس ثقيله وانت راعي تحميل وخطوط وسرعه

مكينة 4800 للمدينة ممتازه لكن للتحميل والسرعه ماتصلح لك والسبب ضعف المكينة

لكن دام رغبتك بدون دبل انصحك تاخذ 5300 افضل وفي حاله البيع اهون من اللي مكينته 4800

[ملك الفكتوريا]

يكفي بالشبك علامة GMC



بالمدينة ملك وبالخط هيبه يقطع ولا يقول أح


امريكي يعني يوصل طبلونه بالراحه

[سلفرادو2012]

اذا انت راغبه بدون دبل توكل على الله ولاعليك من احد

ترى الناس اجناس

عن نفسي لو تقول لي خذه بنص سعره جديد ماشريته

الونيت وخاصة الجموس ثقيله وانت راعي تحميل وخطوط وسرعه

مكينة 4800 للمدينة ممتازه لكن للتحميل والسرعه ماتصلح لك والسبب ضعف المكينة

لكن دام رغبتك بدون دبل انصحك تاخذ 5300 افضل وفي حاله البيع اهون من اللي مكينته 4800

تتوقع شناط ملابس تثقل عليه؟!! بس حيرتني كيف 8 سلندر و بيكون ثقيل في الخطوط.

[مسير عليهم]

مهوب كل 8 سلندر قوتها وحده

عندك احجام منها 4800 و 5300 و 6000 ومعي ابو 6000

انت ذكرت شناط ملابس لكن اللي فيها كم وزنها + وزن الركاب + اغراض اخرى

مانقول انه بيكون ثقيل ومايمشي لكن اذا بغيت تسقط على سيارة وتبي تزود السرعة هنا المشكلة بو 4800 مايعطيك القوة لتجاوز السيارة مثل جمس حجم 5300 او 6000


مشكلة شعبنا فاهم ان كل 8 سلندر قوي وكلها بقوة وحده وماتفرق بين بعض

[المساهر]

خذ وانا اوك تندرا مكينه كبيره 5,7 والله لتنس الخط قوه وراحه وبدون دبل بعد لكن جبار

[سلفرادو2012]

عندنا لاندكروزر 2010 VX-R و مكينته 8 سلندر و حجمها 4700 و معجبني عزمه مرة فأتوقع هذا بيكون عزمه مناسب..

[نفود بريدة]

أول شي أسأل الله ان يوفقك لما هو خير لك ..

ثاني أمر .. بالنسبة لمكينة 4800 تراها قوية وفيها حقها .. وللمعلومية تراها أقوى من مكينة الفكسار اللي عندكم وإذا الله كتب لك وشريت السلفرادوا بتلاحظ هالشي بنفسك .. ;)
لكنها مقارنة من 5300 فـ طبعا أضعف منها ..


أما بالنسبة لسالفة الدبل .. الشباب هنا نصحوك بالدبل لأسباب منها :
- ممكن يجي يوم من الأيام وتحتاجه .. وهنا تتمنى لو إنك أخذت دبل .:(
- الدبل مرغوب عند البيع أكثر .

إذا كانت ما تهمك هالأسباب فـ توكل على الله وخذ اللي يناسبك بعد الإستخارة ولا تلتفت لأحد ..:good2:


وحياك ربي ..

[رحال7]

انصحك 5300 على الاقل وانت لست ملزم بوكيل واحد اتصل بالجميح والتوكيلات والعيسى وال.. واصبر وانتظر حتى لو عشر سنوات...وانصحك ايضا تطلبه طلبيه خاصه من التوكيلات سيلفرادو Z71 وانتظار كم شهر ومزترك عندك باذن الله...واستخر اولا واخرا

[سلفرادو2012]

أول شي أسأل الله ان يوفقك لما هو خير لك ..

ثاني أمر .. بالنسبة لمكينة 4800 تراها قوية وفيها حقها .. وللمعلومية تراها أقوى من مكينة الفكسار اللي عندكم وإذا الله كتب لك وشريت السلفرادوا بتلاحظ هالشي بنفسك .. ;)
لكنها مقارنة من 5300 فـ طبعا أضعف منها ..


أما بالنسبة لسالفة الدبل .. الشباب هنا نصحوك بالدبل لأسباب منها :
- ممكن يجي يوم من الأيام وتحتاجه .. وهنا تتمنى لو إنك أخذت دبل .:(
- الدبل مرغوب عند البيع أكثر .

إذا كانت ما تهمك هالأسباب فـ توكل على الله وخذ اللي يناسبك بعد الإستخارة ولا تلتفت لأحد ..:good2:


وحياك ربي ..

تسلم والله و ما قصرت يالذيب، و بالنسبة للدبل كان عندنا جمس 96 2500 اتش دي بدبل و ما كنا نستخدم الدبل فجأة صار يخر زيت و معد يشتغل، فقلت دامي مب راعي بر وش ابي بالدبل يثقل السيارة و ما استفيد منه، و بالنسبة للبيع ان شاء الله منب بايعه لأنه للبيت.

[سلفرادو2012]

انصحك 5300 على الاقل وانت لست ملزم بوكيل واحد اتصل بالجميح والتوكيلات والعيسى وال.. واصبر وانتظر حتى لو عشر سنوات...وانصحك ايضا تطلبه طلبيه خاصه من التوكيلات سيلفرادو Z71 وانتظار كم شهر ومزترك عندك باذن الله...واستخر اولا واخرا

يا رجال لي عشرين يوم احتريه و بيطق لي عرق تقول 10 سنواااات!! و اصلا عندهم غمارة و نص z71 بس ما احتاج لمواصفاته كسيارة للبيت..