عندي مشكلة ياجماعة الخير أرجوا منكم الدخول لاهنتم!!!!

[هدد اليحيى]

بسم الله الرحمن الرحيم

السلام عليكم ورحمة الله وبركاته... وبعد

تحية طيبة مني للمشرفين والإداريين والأعضاء الكرام

وأرجوا منكم الإفادة جملة وتفصيلا كما عودتونا بيض الله وجيهكم

عندي سيارة لاندكروزر 2006 GX وارد اليحيى

وأعاني من فترة من مشكلة ما أحد أكتشف حلها ولا حول ولا قوة إلا بالله

المشكلة هي شكلها في السويتش أو الكهرباء والله أعلم .. فمثلا:

1- تقدر تفتح وتقفل النوافذ والسيارة طافية؟؟؟؟
2- أغلب الأحيان إذا فتحت الباب ماتطلع نغمة السيارة التحذيرية دندندندن؟؟؟
3- أغلب الأحيان إذا حطيت المفتاح بالسويتش وفتحت السلف قبل لا تشغل مايطلع التنبيه بالطبلون ولا صوته دن دن دن؟؟؟
4- بعض الأحيان إذا ركبت السيارة أكتشف إن فيه صوت طالع من الطبلون زي الصفيرة الخافتة؟؟؟.
5- بعض الأحيان يشتغل الريموت حق السيارة ويقفل أو يفتح البيبان... وأغلب الأحيان لا وكأن السيارة فيها مفتاح أو شغالة !!
6- فجأة وبدون مقدمات ماقامت فتحة السقف تشتغل؟؟

أرجوا منكم يا أهل الفزعة تشيرون علي بالحل لاهنتم..

والله الموفق ولكم مني أجمل تحية

[ابن عكاش]

مشكلتك والله واعلم في الكهرب ونصيحة لاتخلي احد يتعبث في موترك إلا كهربائي فاهم
نتظر ردود المختصين وإن شاء الله تنحل مشكلتك

[خالد الزومان]

فعلاً مشكلتك كهربائية وحساسه لازم لها فني كهربائي محترف او الوكاله
لكن جرب انك تغير مفتاح التشغيل اذا كان عندك واحد ثاني بس قبل لا تجرب افصل البطاريه لمدة ساعه ورجعها يمكن ترجع الكهربا لوضعها الطبيعي ... بس لو كانت لمبة المكينه البرتقاليه مولعه في الطبلون لازم تفحص بالجهاز الخاص بسيارات تويوتا و بالتوفيق ان شاء الله

[ساكن الحنو]

اخوي تاكد من البطارية لايكون فيها ضعف او مقاسها صغير وشيك على الظفيره اللي طالعه من البطاريه او الاصابع مشكلتك سهله يالغالي لكن يبي لك انت تعرف الخلل قبل لاتوديها للورش كل واحد يعطيك فتوى


تحياتي لك

[هدد اليحيى]

إبن عكاش + خالد الزومان + ساكن الحنو...
أشكركم على مروركم الكريم ونصائحكم المفيدة التي لا أتهاون لتجاهلها...
وشكرا أخوي خالد على هذه المعلومة سوف أجرب فصل البطارية مع توقعاتي وتوقعاتكم بالخير إن شاء الله
وأتمنى من كان له نفس المشكلة في سيارته وصلحها بأن لا يبخل علي بالنصيحة والإفادة.
مع المعلومة إن فتحة السقف أشتغلت؟؟؟؟
ودمتم بخير

[الكلاسك]

عندي جيب جديد ما كمل سنه شيروكي تشتغل مروحة المكيف على سرعه وحده ثابته مع دقة السلف !! ولا يشتغل الكومبرسور ولا تطفى المروحه ولا تنقص ولا تزيد !! طبعا الشغله على الظمان بس حتى الظمان بهذله ومشوار وانتظار وغثاء !!
اللي حصل فكيت اصبع البطاريه ولامستهم مع بعض ورجعت الاصبع ورجعت السياره لوظعها الطبيعي !! كيف وليه وش دخل المكيف بالكمبيوتر ما ادري !!
وشكرا