المساعد الشخصي الرقمي

مشاهدة النسخة كاملة : تكفون يا أهل التجاريب تكفون


aserkm
11/12/2011, 01:59 PM
شريت أرض زراعية قديمة بديارنا

طبعا الأرض لورثة مهملينها ,,,

الأرض فيها بئرين يدوية حفر يد والماء تشوفه ما هو بعيد تقريبا من 12 إلى 17 متر


المهم ودي اسحب الماء الموجود فيها واسقي النخل لأن قلوبه خضر........


حبيت استفسر من عنده خبر يعطينا إياه ولكم جزيل الشكر
المغامر2
11/12/2011, 08:53 PM
اذا فيها كهرب شف دنمو من الغانم حقت المزارع واذا مافيها كهرب سف محلات الزراعه عندهم مكاين سحب بالديزل
Zizo_1977
11/12/2011, 11:45 PM
موفق باذن الله الله يبارك لكم ويطرح بها الخير والبركه
aserkm
11/12/2011, 11:58 PM
إخواني جزاكم الله خير الكهرب ما فيه

وبالنسبة للمكاين الهنديه السحب ثقيلة اسياخ وطرمبه ........ ووجع راس خابرها

ولكن مدري عن المكاين الديزل اللي تقول يا اخوي المغامر ,,,,,,,,,



ترى الديرة بها طيور وبعض الحيونات اللي والله ودي اكسب أجرها و

اجعلكم معي شركاء بالأجر إن شاء الله




لقيت بالصدفة قبل قليل غطاس يقاله شمنج صيني - يمدحونه اللي استخدموه -يسحب الماء على بعد 35 متر بالراحة والبئر عندي 30 متر فقط وفيها والله الحمد ماء

ولكن يبيله مولد كهربائي 2 كيلو ,,,,,,,,,,,,

ويش رأيكم ,,,,,,,,,,,,,
عاشق السيل
12/12/2011, 06:58 AM
الله يبارك لك بالأرض ويطعمك من خيرها ويكفيك شرها ،،

طيب مواطير السحب اللي على البنزين مثل اللي يستخدمونها الوايتات ... ماتنفع ؟؟

أو جب ماطور كهرب حق الرحلات واشبك عليه الغطاس الصيني اللي تقول !!!!
هلبان
12/12/2011, 07:49 AM
الله يبارك لك في الارض لكن اسأل عن مكاين بلاكستون كبدايه لين ياصلك الكهرب
الدهريز
12/12/2011, 07:54 AM
اول شي وانا خوك جب لك افغانية الي يحفرون القلبان وخلهم ينظفون لك القليب لأنه اذا طول الماء فيها يكون له ريحة وما تسلم من وقوع الخشاش فيها وبعض القلبان يكون ساقط فيها اما خشب او مجدوع فيها كفرات او او او ....
والإفغانية يكون معهم معدات كاملة من حفر ومضخات شفط المياه . وسبق ان نظفوا عندي قليب حتى التراب بوجه العدو اللي طلعوه منها كان لونه اسود.
والله يبارك لك ..
ودمت بحفظ الرحمن .
aserkm
14/12/2011, 02:38 PM
الله يجزاكم جميع خير الجزاء

بارك الله فيكم ونفع بكم
Red falcon
14/12/2011, 07:38 PM
حط غطاس اذا فيها كهرباء
أو جب مولد كهرباء يشغل الغطاس

الدعوى ماتستاهل ماكينه وديزل وغثى
FORD1969
14/12/2011, 09:06 PM
تنظيف الزليب القليب ضرررررررررررروري مثل ماقالوا الاخوان اذا كان من مده ماسحب منه مويه

ولو قدرت تعمقه كم متر أطيب له لن عروق المياه الجوفيه تتسكر مع الوقت ويبيلها نفس مستنفس

ركب عليه غطاس هنغاري هنقاري 3 حصان يكفيك بــ1200 ريال تقريبا وماصورة بيب (لي ) 2 بوصه تصب في بركه تجمع المويه فيها
اشتغل على مهلك أرضك ان شاء الله لحقها خير من المطره الأخيره بفضل من الله والنخل عمره طويل جعل عمرك طويل

اشتر لك ماطور ينمار ديزل لايقل عن 6000 شمعه بسعر 2500 ريا ل مستعمل بيشغله لك + لمبات الغرفه

الأرض يبيلها أهلها حولها عشان تعيش وتنتعش أقصد لازم تصلح لك ملفى فيها توسع صدرك وتشوف شغلك على ركاده
والله يعينك على فعل الخير
زايد بن بدران
14/12/2011, 09:18 PM
اول شي عندك كهرب ولا لا
وان حصل صوره للقليب عشان نفيدك اكثر ولا خوان مايقصرون
aserkm
15/12/2011, 01:16 PM
بارك الله بكم وأشكر كل من مر على هالصفحة ,,,,, عسى الله يكتب له الأجر

البئر قديمة وقطرها 5 متر حفر يد ,,, بوسط قطرها دامر كبير قاسمها ,,,, الكهرب ما فيه

والمكينة الهندية من سنين مسروقة,, لبعد الديرة عنا , وسكانها قليل جدا

والديار بعيدة يبيلنا كل اسبوع نطلعلها مرة

,, وصدق من قال الأرض يحيونها أهلها ولكن العمل ومشاغل الحياة

ومثلكم عارفين ,,,, والصبيان قليل من به خير



مهم

وأبشركم الغطاس شريته حصان ونص ولكن محتار مابين مولدات الكهرب مابين 3200ك ماطور هوندا أو 6800ك ماطور

أظنه NTG صيني .,,,,,,,,,,,, وبيني وبينكم ما أدري أخذ الهوندا الأصلي الياباني أو الصيني المعروف بخرابه

مع إنكم تلاحظون الفرق بين الكيلوات 3200الهوندا وذاك بس إنه صيني 6800

أغلب من استشرتهم قالوا خذ هوندا خرابه قليل بعكس الصيني كل شوي

بيخرب عليك ويتعبك لو كيلواته أكثر




رأيكم يهمني خص هلحين
الواهج
16/12/2011, 02:07 AM
لاتشاور ياخوي هذي مايبيلها شور الهوندا افضل بكثير من الصيني

على قولتك **مهم **
اشتر من الوكيل بواجي للماطور لاتشتري من برا لان مره كان عندي وركبت بواجي للماطور الهوندا وضرب البستن لانه بواجي الهوندا قصيره شوي


والخيره فيما اختاره الله لك موفق خير
aserkm
16/12/2011, 03:28 AM
يسعدك ربي يالواهج