المساعد الشخصي الرقمي

مشاهدة النسخة كاملة : راعي العجراء و اااااااه يازمان اول


راعي العجراء
20/12/2011, 01:49 PM
السلام عليكم ورحمة الله وبركاته
اليكم هذه السالفه القديمه وبالصراحه ماهي سالفه سويليفه
خذ وخل
المهم نشارك قدر المستطاع في اسعادتك وانتم ان شالله سعيدين من غير راعي العجراء وكشرته
وعنوان هذه السالفه ااااااا هـ يازمان اول
واعقد انها في نهايه السبيعينات هجريه
الله على ذيك الايام المبطيات كان عمري ست سنين والمشبك معلق بالضهر عباره عن عصاء كبوت والمنديل المربوط فوق الكتف في مشبك لمسح العادم الكيربوهدريكي هولجين ثالث اكسيد الكربون اعزكم الله
وكان تفكيري بالمدرسه ان رحت عند امي الله يرحمها وقلت متى ادرس قالت لاطاح المشبك من ضهرك وان رحت عند ابوي الله يرحمه وقلت متى ادرس قال لا لمست ايدك اليمنى اذنك اليسرى من فوق راسك طبعا من اول لاشهاده عيد ميلاد ولابطاقه احوال
اسمك ولمس اذنك وادخل الفصل تحديد العمر بلمس الاذن يعرفون ان الواحد تم السبع سنين
انا من حرصي على الدراسه ماغير امغط ايدي ابيها تطول واصفق هامة الراس بالجدران ابيه تصغر واطول اذني
ايبله عاد هاللي بيتخرج دختور ولا كبتن طياره تخرجت من الابتدائي بعد احدى عشر سنه دراسيه والتحقت بمعهد الشاحنات وصرت سواق تريلا نخب اول
ياحليلهم من اول مايقولون شي يخط شارب الواحد وهو بثالث ابتدائي
ماهو مثل اليوم تسقط مرتين اقضب الباب
المهم يوم صار عقب سنه اشوى طالت ايدي وصرت المس حنكي ماعاد به اذني وانا ادخل المدرسه لابس ثوب خام وقحفيه مزكرشه لونها احمر وابيض مشجره ومنديل مشبوك بالكتف يعني ولد دلع وهذا المنديل لو يطيح مني ويزلقبه مدرس طاح وانكسرت رجله؟؟؟؟؟؟؟
المهم درست لي شهر ماعندي اخلاف الامور زينه والفسحه سندويش طحينيه ابو تاج
كانت تجي بعلبه مدوره مصنوعه من حديد تنك مدوره اكيد الشيبان عارفينها بس مايبينون انفسهم وبعدين وين اللي فسحته طحينيه بس انا ذاك الحين ولد نعمه مدري مزنه قمة الرفاهيه والدلال
المهم صار ذاك اليوم ودخلت البيت قالت امي الله يرحمها انت رايح للمدرسه والا معزوم على مرقوق وانا مدري وش تقصد من باكر جيت من المدرسه وتقول نفس الكلام وانا مدري وش تقصد لعل ثيابي فيها اثر مرقه قالت منين لك هذه المرقه قلت من السندويش اللي تصلحون لي قالت الطحينيه مابه مرق قلت لا لي ثلاثة ايام وانتم تحطون لي سندويش قرعه
واكل منه شوي واجدعها ماكملها قال انا حاطه لك طحينيه قلت سندوشتي قرعه
اثر فيه واحد من العيال ياخذ سندوشتي ياكله ويحط لي سندوش قرعه هذا اللي اهله يقدرون عليه من الفقر وابدا اراقبه ذاك اليوم قلت ثاني مره اعلم الاستاد قال خلاص اتوب ماتعوده
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له
وين عيال اليوم يشوفون الحياة من اول والفقر حتى يحسون بالنعمه اللي هم فيها الان
عيال هالوقت
سندتوش همبرقع وذاك الطويل اللي كنه ذراع مولود اللي يسمونه هردق وعشرين ريال بالمخباة وكبك بالثوب وانا ثوبي ذاك الوقت خام والا ابوتفاحه ومفصلته عمتي
مره تحط المخباة الللي بالصدر يسار ومره ايمين وزرار اسود والثاني اخضر
اما المخباة التحتيه الكبيره تدوره ماتلقاه الا بالوصف والتلمس عند (الشط ؟؟؟) يعني صارت المخباة مثل لمس الاذن ماتطوله الا بعد سبع سنين قدام
انتهت السالفه والله يحفظ الجميع
وقبل الختام سبحانك اللهم وبحمدك لااله الانت استغفرك واتوب اليك
مع تحيات اخوكم
راعي العجراء
سليمان الربيعان
20/12/2011, 02:00 PM
ههههههههههههههههههه الله يرحم الحال والحمد لله على النعمه
والله يغفر لوالدينك ويسكنهم فسيح جناته
وجزاه الله خير امك الله يرحمه على انه تسويس فسحتين لك ولرفيقك
والله يديم النعمه علينا والواحد عليه شكر النعمه
تقبل تحياتي....
FORD1969
20/12/2011, 02:09 PM
يه واحد من العيال ياخذ سندوشتي ياكله ويحط لي سندوش قرعه هذا اللي اهله يقدرون عليه من الفقر وابدا اراقبه ذاك اليوم قلت ثاني مره اعلم الاستاد قال خلاص اتوب ماتعوده
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له
وين عيال اليوم يشوفون الحياة من اول والفقر حتى يحسون بالنعمه اللي هم فيها الان

ههههههه


أجل كنت تعثى بالقرع وانت ماتدري وش السالفه ياراعي العجراء ولو كنتو متطورين عندكم طحينية انا احسبها من الثمانينات وطالع عرفوها الناس

وما تحته خط وبالأحمر ياليته يصير
الآن تحصله في الأبتدائي
فسحه خمسه ريا ل يومية
شنطه من جرير

كل اسبوع ملاهي

ومعه آي بود وبلاي ستيشن

ومدرس خصوصي
وسيارة توديه ووحده تجيبه
وكل شهر كنادر جديدة الله يكرمكم
وكل صيف متسدحين به اهله في ديره
وان جاء برد قوي عطوهم اجازة
وفي الأخير يسقط

ياليتهم يقدرون ذلك ويفلح ون

اذكر ملابس الرياضة حقت المعارف يوزعونها عليك كل بدايه سنه وتقعد تكدها في البيت والمدرسة وفي البر وفي جميع الحالات الطارئه الل يمايتوفر فيها ثوبك مغسول لن أصلاً ما عندك الا ثوبين ومب اكيد انك بتلقاها دايم نظيفه

شكر لك شيخ العجراء والله يرحم والدتكم ويغفر لها وجميع أموات المسلمين
Al3rands
20/12/2011, 02:10 PM
اااااااااااااااااااااااه ياقلبيييييييييييييه خخخخخخخخخخخخخخخ اما ساندوتش قرع هههههه الله يديم النعمه وسواليفك
من يخاويني
20/12/2011, 02:18 PM
طريقة وصفك رووووووووووووووووووووعه لايعلى عليها
هههههههههههههههههههههههههههههههههههههههههههههههههه ههههههههههههههههههههههههههه
راعي العجراء
20/12/2011, 02:19 PM
ههههههههههههههههههه الله يرحم الحال والحمد لله على النعمه

والله يغفر لوالدينك ويسكنهم فسيح جناته
وجزاه الله خير امك الله يرحمه على انه تسويس فسحتين لك ولرفيقك
والله يديم النعمه علينا والواحد عليه شكر النعمه

تقبل تحياتي....


هلابك ياعم ابوربيعان تشرفت في حضورك
اشكرك على دعواتك الطيبه والله يرحم والدين عقبوك
حفظك الله ودمت غالي ياغالي
راعي العجراء
20/12/2011, 02:24 PM
يه واحد من العيال ياخذ سندوشتي ياكله ويحط لي سندوش قرعه هذا اللي اهله يقدرون عليه من الفقر وابدا اراقبه ذاك اليوم قلت ثاني مره اعلم الاستاد قال خلاص اتوب ماتعوده
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له
وين عيال اليوم يشوفون الحياة من اول والفقر حتى يحسون بالنعمه اللي هم فيها الان

ههههههه


أجل كنت تعثى بالقرع وانت ماتدري وش السالفه ياراعي العجراء ولو كنتو متطورين عندكم طحينية انا احسبها من الثمانينات وطالع عرفوها الناس

وما تحته خط وبالأحمر ياليته يصير
الآن تحصله في الأبتدائي
فسحه خمسه ريا ل يومية
شنطه من جرير

كل اسبوع ملاهي

ومعه آي بود وبلاي ستيشن

ومدرس خصوصي
وسيارة توديه ووحده تجيبه
وكل شهر كنادر جديدة الله يكرمكم
وكل صيف متسدحين به اهله في ديره
وان جاء برد قوي عطوهم اجازة
وفي الأخير يسقط

ياليتهم يقدرون ذلك ويفلح ون

اذكر ملابس الرياضة حقت المعارف يوزعونها عليك كل بدايه سنه وتقعد تكدها في البيت والمدرسة وفي البر وفي جميع الحالات الطارئه الل يمايتوفر فيها ثوبك مغسول لن أصلاً ما عندك الا ثوبين ومب اكيد انك بتلقاها دايم نظيفه

شكر لك شيخ العجراء والله يرحم والدتكم ويغفر لها وجميع أموات المسلمين


هلابك يالغالي
الحين اقول دارس الابتدائي بالسبعينات وتصغر خطك وشلون تبين اقراء خطك اول ماشفته حسبته جادة نمل على الشاشه
وبعدين ترا الحبر مايخلص وببلاش جاي مع الكمبيوتر
خوي مخباته
20/12/2011, 02:29 PM
هههههههههههههههههههههههههههههههههههههههههههههههههه ههههههههههههههه
ههههههههههههههههههه الله يجازيك هههههههههههههههههههههههههه الله يجازيك
بالطييب يا "راعي العجراء " والله الدموووع متي اربع اربع واقول الله يرحم الــوالدة رحمــــــهَ واسعــــه ويسكنهــــــــــا فسيح جناتـــــــــــــه اجل تقول لا لا لا تعلم الاســــــــــتاذ ونا امك ابصلح لك وحده ولــــه وحده يما الجنــــــــه البارده والله بنت الرجال الاجاويد صحيح ! بارك الله فيــــــــــــــــك وعوايــــــــــــد الطييب يالطييب ولاهو
مستنكــــــر منك الطييب ســــــــــــالفه في قمت المتعـــــــــــه وذكرتنا ايــــــــــــام الدراســـــــــــــه وايـــــــــام حلوة
مستحيل تنســـــى ابــــــــــــداَ ......... مشكوووووووووووووووررر ابـــــداع منقطع النظييـــــر !
......................... تحيــــــــــــــــــــاتــــــــــــــــــــي وتقدبــــــــــــــــري ............................ لك
راعي العجراء
20/12/2011, 04:31 PM
اااااااااااااااااااااااه ياقلبيييييييييييييه خخخخخخخخخخخخخخخ اما ساندوتش قرع هههههه الله يديم النعمه وسواليفك

هلابك ومرحبابك
ويسلم قلبك يابعد قلبي
لاتنسى ذلك الوقت فيه ناس مايحصلهم لا سندويش القرعه ولا الباميه
تحياتي
راعي العجراء
20/12/2011, 04:34 PM
طريقة وصفك رووووووووووووووووووووعه لايعلى عليها
هههههههههههههههههههههههههههههههههههههههههههههههههه ههههههههههههههههههههههههههه

وطريقة حضورك ارواع من الرائع
انت فاجاتني بهذ الحضور
وادخلت السعاده في نفسي
دمت بخير
قوافي ( أم نهار )
20/12/2011, 05:57 PM
حياك ربي
الله يرحم الوالده ويجزاها خير ويرحم كل غالي
والمنديل المربوط فوق الكتف في مشبك لمسح العادم الكيربوهدريكي هولجين ثالث اكسيد الكربون اعزكم الله
ألله يامناديل الكتف دايم شابصه تقل عصب منصرع ههههههه
بصراحه لازم يسرقونك وانت رايح لابس آخر موديل
تسلم على السالفه الاكثر من مميزه بكل تفاصيلها
دمت بحفظ الله
اختك
..قوافي..
النبهاني
20/12/2011, 11:04 PM
وعليكم السلام ورحمة الله وبركاته
الله يحفظك ياراعي العجراء ويرحم والدينك ويجعل مثواهم الجنه
سالفه رغم مافيها من الفكاهه الا ان فيها معاني جميله وشفقه وذكريات جميله
ولكن الجانب الفكاهي طاغي وانت تدري انه جانن الخصخاص من كثر والله ما ضحكت
حسبي الله على ابليسك ياراعي العجراء انت ومشبك وسندوتشك المبدل لك وقحفيك المزكرشه
الله يحفظك ودمت مبدع ياخي
ناصر العلي
21/12/2011, 12:14 AM
وعليكم السلام ورحمة الله وبركاته
الله قل آمين يرحم والديك ويجعل مثواهم الفردوس الأعلى من الجنان
أستر عليه منديل مشبوك بكالوبه
ترى مايسوى مثلك أول إلا العيال المتمدنين
لا وفسحة طحينية
وآخرتها إحدى عشر سنة بالإبتدائية
كني أشوف شهادك كله دوواير:butt3: حمر:good2:
أه .. بس
http://www.waraqat.net/2010/10/shhadah_zman.jpg (http://www.waraqat.net/15737/)
وسبحان الله تصدق يالغالي
نفس اللي صار معك صار مع أخوي الكبير
كان واحد يسرق فسحته ولايحط شئ لاقرع ولابطيخ
ويوم علّم الوالدة الله يعظم آجره صارت تحط لهم جميع
وأأأأأأأأأأأأأأأأأأأأأأأأأأأأأأأأأأأأأأأأأه يازمن أول
دمت بألف خير يالغالي
أبوعابد 22
21/12/2011, 12:30 AM
هههههههههههههه
يازين حياة من اول صح انها صعبه بس لها طعم
الناس متصافيه والجار لجار والباب حق البيت مفتوح 24 ساعه امن
ولا فيه خوف مثل الحين والناس قلوبها بيض ام الحين اللهم عفنا بس
ولد روووق
21/12/2011, 08:44 AM
الله يرحم الوالدة ويجزاها خير
ابو صفوق
21/12/2011, 08:54 AM
آآآآآآآآآه يازمن ياليته يعود الله يرحم الوالده وين السندويش الحين والعصير و10 ريال ولا هو ب عاجب
يازين البساطه
alrsash911
21/12/2011, 11:11 AM
السلام عليكم ورحمة الله وبركاته




سندتوش همبرقع




هههههههههههه الله يقطع أبليسك ... سواليفك درر يارعي العجراء .... لاتحرمنا من جديدك
راعي العجراء
21/12/2011, 12:53 PM
هههههههههههههههههههههههههههههههههههههههههههههههههه ههههههههههههههه

ههههههههههههههههههه الله يجازيك هههههههههههههههههههههههههه الله يجازيك
بالطييب يا "راعي العجراء " والله الدموووع متي اربع اربع واقول الله يرحم الــوالدة رحمــــــهَ واسعــــه ويسكنهــــــــــا فسيح جناتـــــــــــــه اجل تقول لا لا لا تعلم الاســــــــــتاذ ونا امك ابصلح لك وحده ولــــه وحده يما الجنــــــــه البارده والله بنت الرجال الاجاويد صحيح ! بارك الله فيــــــــــــــــك وعوايــــــــــــد الطييب يالطييب ولاهو
مستنكــــــر منك الطييب ســــــــــــالفه في قمت المتعـــــــــــه وذكرتنا ايــــــــــــام الدراســـــــــــــه وايـــــــــام حلوة
مستحيل تنســـــى ابــــــــــــداَ ......... مشكوووووووووووووووررر ابـــــداع منقطع النظييـــــر !

......................... تحيــــــــــــــــــــاتــــــــــــــــــــي وتقدبــــــــــــــــري ............................ لك


هلابك ياخوي مخباته واليب عندك نمشي على اثرك
منك تعلمنا الكثير واستفدنا من كتابات وتوجيهاتك
انا تلميذ اكتسب المعرفه من معلمه وانت المعلم
بارك الله فيك يااخي الغالي ودمت غالي ياغالي
راعي العجراء
21/12/2011, 01:51 PM
حياك ربي

الله يرحم الوالده ويجزاها خير ويرحم كل غالي
والمنديل المربوط فوق الكتف في مشبك لمسح العادم الكيربوهدريكي هولجين ثالث اكسيد الكربون اعزكم الله
ألله يامناديل الكتف دايم شابصه تقل عصب منصرع ههههههه
بصراحه لازم يسرقونك وانت رايح لابس آخر موديل
تسلم على السالفه الاكثر من مميزه بكل تفاصيلها
دمت بحفظ الله
اختك
..قوافي..


هلابك ياقوافي هلابك ومليون هلابك
حضورك تشريف وتكريم لراعي العجراء ومشتقاته
والله يرحم امواتنا واموات المسلمين
المنديل ذاك الوقت شي ضروري
مثل ترصيصة الكفر هذا الوقت كل جنط توجد فيه لو كان جديد
تحيتي لشخصك
binamerah
21/12/2011, 02:13 PM
الله يرحم والديك ويغفر لجميع موتى المسلمين
ذكرتني بقصة واحد الظاهر من جيل الزمن الجميل يقول ايام البرد كانت امه رحمها الله من خوفها عليه من البرد وهو رايح المدرسة تربط له العمامة وما تنفك العمامة غير بعد المدرسة وامه اللي تفكها له ويقول نص الشرح ما اسمعه من قوة الربط .
حسن الشمالي
21/12/2011, 06:18 PM
الله يغفرلك ولوالديك وللمسلمين

ايه سقى الله زمان مضى...
اما حنا يالجيل التالي مانعرف هالسوالف الا منكم يالعوده...
راعي العجراء
22/12/2011, 06:36 PM
وعليكم السلام ورحمة الله وبركاته

الله يحفظك ياراعي العجراء ويرحم والدينك ويجعل مثواهم الجنه
سالفه رغم مافيها من الفكاهه الا ان فيها معاني جميله وشفقه وذكريات جميله
ولكن الجانب الفكاهي طاغي وانت تدري انه جانن الخصخاص من كثر والله ما ضحكت
حسبي الله على ابليسك ياراعي العجراء انت ومشبك وسندوتشك المبدل لك وقحفيك المزكرشه
الله يحفظك ودمت مبدع ياخي


هلابك يانبهاني والله يجزاك الجنه
على دعواتك الطيبه
والحمدلله ان السالفه اعجبتك
وانت اخذت حقك من هاك الزمن يوم الريال له عراوي من ثقله
يتقابلون عليه اربعه يشيلونه
الددسن جديده ب7000 ويعطونك بعد هديه
واحتفالات داخل الشركه يصفقون لك بحراره واشتياق
ومحبه ايه العاشق المبجل
فقد اخذ الحب منك ماخذ ايه الفتى
اشكرك يالنبهاني على هذا الحضور
wafi4sa
23/12/2011, 11:10 PM
الله يرحم امك شف كيف عالجت الموضوع
وحنت على المسيكين
الله يرحمها رحمة واسعة
شكرا على سرد هذة القصة الجميلة
وتذكرنا بعض من سواليف الأولين
بارك الله فيك ياراعي العجراء
حمد69
24/12/2011, 08:34 AM
وعليكم السلام ورحمة الله وبركاته
هلا بالأستاذ الكبير راعي العجراء المبدع المتميز
ما شاءالله تبارك الرحمن قصص جميلة وذاكرة خصبة متعك الله بها وحفظك من كل سؤا
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له.. والله هذه الجملة لها اثر بليغ في النفس غفر الله لمن قالها وأسكنها أعلى جنان الخلد،، شوف الرحمة والعاطفة والله إنها بنت أجواد وليس بمستغرب في من نشاء في مثل هذا المجتع الكريم المتعاطف.
شكراً لك أخي الكريم
راعي العجراء
24/12/2011, 10:39 AM
وعليكم السلام ورحمة الله وبركاته

الله قل آمين يرحم والديك ويجعل مثواهم الفردوس الأعلى من الجنان
أستر عليه منديل مشبوك بكالوبه
ترى مايسوى مثلك أول إلا العيال المتمدنين
لا وفسحة طحينية
وآخرتها إحدى عشر سنة بالإبتدائية
كني أشوف شهادك كله دوواير:butt3: حمر:good2:
أه .. بس
http://www.waraqat.net/2010/10/shhadah_zman.jpg (http://www.waraqat.net/15737/)
وسبحان الله تصدق يالغالي
نفس اللي صار معك صار مع أخوي الكبير
كان واحد يسرق فسحته ولايحط شئ لاقرع ولابطيخ
ويوم علّم الوالدة الله يعظم آجره صارت تحط لهم جميع
وأأأأأأأأأأأأأأأأأأأأأأأأأأأأأأأأأأأأأأأأأه يازمن أول

دمت بألف خير يالغالي


هلا بك يابو علي حيالله راعي السوالف الزينه
والرمعات القاتله
اشكرك على حضورك المتميز
وبعدين منوين حصلت على صورة شهاداتنا يالولين فضحتبنا الله يجزاك خير
تدري ليه يحطون عليها دوائره حمر
علشان اهلنا لايكتبون ولا يقرون يعرفون يس يعدون
وبهذه الطريقه يعرفون يعدون الدوائر الحمر ويدرون بكم ساقط ولدهم من درس
ويوم كنت صغير كل شهادتي دواوير حمر ماعدا التربيه الرياضيه ناجح فيها
بتقدير ممتاز والباقي يفتح الله
والله يرحم امواتنا واموات المسلمين راحوا الطيبين يابو علي
ابن هويشل
24/12/2011, 10:48 AM
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له




الله واكبر حريم أول غير
الله يرفع قدرك قصصك تضحك وتبكي بنفس الوقت
راعي العجراء
24/12/2011, 10:51 AM
هههههههههههههه
يازين حياة من اول صح انها صعبه بس لها طعم
الناس متصافيه والجار لجار والباب حق البيت مفتوح 24 ساعه امن
ولا فيه خوف مثل الحين والناس قلوبها بيض ام الحين اللهم عفنا بس

هلابك يابو عابد هلا بخلف جدي
الحياة زينه منول لاهموم ولاغموم حياة سهله وقلوب لاتعرف الحقد والحسد
الواحد من راحة البال ينام قبل ماياصل فراشه
مهوب مثل الحين الواحد ماينام
من الهواجيس
الا و تصفق راسه في مرزبه ويغمى عليه ويمكن ينام له ساعه
ثم يقوم نقل جني عليه قل صح تالي هالليل
ويازين حياة اول الجبران مع بعض
حرمة الجيران تدخل البيت وتاخذ اللي ناقصها طماط بصل رز ملح صلصه
طحين اتقول هي راعية البيت وكل شي تدل محله
واحيان تروح ولدها يدخل بالبيت وبقول تسلم عليكم امي واتقول كان عندهم بصل
وشوي سمن والامر عادي غير مستغرب
اقول يكفي يابوعابد ترى دمعت عيني لاتذكرني تراي حنيت للماضي ودي ارجع له وسلم على اهله
وحب خشم الوغد قبل الشايب
وحط لدجاجهم عيش وحلب المعيزا وارجع
وان غبت لاتسالون عني تراي مستانس عندهم لاتباطوني
اشكرك يااخي الغالي
راعي العجراء
24/12/2011, 04:52 PM
الله يرحم الوالدة ويجزاها خير

هلابك ياولد روق
اسعدك الله دنيا واخره
على دعواتك الطيبه
دمت بخير
راعي العجراء
24/12/2011, 05:06 PM
آآآآآآآآآه يازمن ياليته يعود الله يرحم الوالده وين السندويش الحين والعصير و10 ريال ولا هو ب عاجب
يازين البساطه

هلابك يابو صفوق ويالله حيوه
هه ماتبينا نتماسك اليدين لنا يوم ونرجع وراء انا وانت وانسير عليهم
وناخذ العلوم الغانمه منهم والسوالف الزينه من شيبانهم ولاغابت الشمس
نرجع
بس بشرط ابروح الى ام الجيران واقول تسلم عليكم امي وتقول يعطونا شوي هيل
وبصل وحبتين طماط
وانت تروح للجيران الثانين وتقول تسلم عليكم امي وتقول يعطونا
http://uaesm.maktoob.com/up/uploads/7f727101a5.jpg
قهوه ورز وسمن
راعي العجراء
24/12/2011, 05:16 PM
الله يرحم والديك ويغفر لجميع موتى المسلمين


ذكرتني بقصة واحد الظاهر من جيل الزمن الجميل يقول ايام البرد كانت امه رحمها الله من خوفها عليه من البرد وهو رايح المدرسة تربط له العمامة وما تنفك العمامة غير بعد المدرسة وامه اللي تفكها له ويقول نص الشرح ما اسمعه من قوة الربط .


هذا شغل من اول عمامه والاقحفيه
ولاصار مطر تحط كيس خيش على راسه عن المطر
وبعض الحريمات حريصه بزود على ولدها تربط عليه بقوه لما تناقز عيونه
واتقول ايه الحين يدفى زين ماتدري انها غايلته وملصمتن اذانه
http://www.imuae.com/vb/imgcache2/42606.gif
اهم شي يدفى
راعي العجراء
24/12/2011, 05:28 PM
الله يغفرلك ولوالديك وللمسلمين

ايه سقى الله زمان مضى...
اما حنا يالجيل التالي مانعرف هالسوالف الا منكم يالعوده...

هلابك ياخوي حسن الشمالي
شيباننا ذاك اليوم يقولون لنا انتم ياعيال اليوم
عيال نعمه مالحقتوا على جيل الاجداد
http://www.fesal.net/albumsm/2657.jpgكان ماتعيشون ولايوم
FORD1969
24/12/2011, 08:54 PM
يه واحد من العيال ياخذ سندوشتي ياكله ويحط لي سندوش قرعه هذا اللي اهله يقدرون عليه من الفقر وابدا اراقبه ذاك اليوم قلت ثاني مره اعلم الاستاد قال خلاص اتوب ماتعوده
وانا ارجع للبيت وعلم الوالده قالت لاتعلم الاستاد كل يوم اصلح لك ثنتين وحده لك وحده له
وين عيال اليوم يشوفون الحياة من اول والفقر حتى يحسون بالنعمه اللي هم فيها الان

ههههههه


أجل كنت تعثى بالقرع وانت ماتدري وش السالفه ياراعي العجراء ولو كنتو متطورين عندكم طحينية انا احسبها من الثمانينات وطالع عرفوها الناس

وما تحته خط وبالأحمر ياليته يصير
الآن تحصله في الأبتدائي
فسحه خمسه ريا ل يومية
شنطه من جرير

كل اسبوع ملاهي

ومعه آي بود وبلاي ستيشن

ومدرس خصوصي
وسيارة توديه ووحده تجيبه
وكل شهر كنادر جديدة الله يكرمكم
وكل صيف متسدحين به اهله في ديره
وان جاء برد قوي عطوهم اجازة
وفي الأخير يسقط

ياليتهم يقدرون ذلك ويفلح ون

اذكر ملابس الرياضة حقت المعارف يوزعونها عليك كل بدايه سنه وتقعد تكدها في البيت والمدرسة وفي البر وفي جميع الحالات الطارئه الل يمايتوفر فيها ثوبك مغسول لن أصلاً ما عندك الا ثوبين ومب اكيد انك بتلقاها دايم نظيفه

شكر لك شيخ العجراء والله يرحم والدتكم ويغفر لها وجميع أموات المسلمين


أكبر حجم ماعقبه شي

يالشويب يبيلك مجهر اللي كنه قاع بياله بادريق

يالله الخيره :looney::type:
انا ماني انا
24/12/2011, 10:14 PM
اولا : الله يرحم الوالدة ويسكنها جنات النعيم .
ثانيا : انت متميز في سردك القصصي الممتع والذي تفوح منه رائحة وعبق الماضي
بكل بساطته وشموخه وجمال ايامه ولياليه..
ثالثا : اسمتعت ووجدت ضالتي في هذا المتصفح الجميل وقرأته اكثر من مره لجماله وحلاوته
رابعا: لكم مني كل الحب والتقدير والاحترام .
خامسا: اسال الله ان يرزقنا وإياك من واسع فضله ....
راعي العجراء
26/12/2011, 07:36 PM
السلام عليكم ورحمة الله وبركاته
اشكر جميع الاخوان على تفاعلهم وردوده على هذه السالفه
وارجوا ان تعذوني على هذا الرد الجماعي وذلك لكثرة الردود
وصعوية الكتابه
تقبلوا تحياتي
إلقناصه
26/12/2011, 07:53 PM
الله يرحم الوالده
الله عليك يالراوي والله حسيت نفسي عندكم من دقة وبراعة الوصف
الله على ايامك والله يطول بعمرك وتسعد الجميع وياليت تألف كتاب حكايات زمان
لآهنت
تقديري
ذئب المقانيص
29/12/2011, 12:50 AM
الله يعطيك العافيه ماقصرت مشكور
وجزاك الله كل خير
راعي العجراء
01/01/2012, 11:54 PM
الله يعطيكم العافيه
على حضوركم المتميز وعلى ردودكم التشجيعيه
بارك الله بالجميع
معشي العرجا
02/01/2012, 03:19 AM
راعي العجراء ماعرف امدح واجد لكن جعل شيبانك في الجنة
راعي العجراء
03/01/2012, 12:25 AM
راعي العجراء ماعرف امدح واجد لكن جعل شيبانك في الجنة

هلابك يامعشي العرجا سلام من اخوك راعي العجراء
يااخي حضورك اهم من المدح
والله يجزاك خير والله يرحم شيبان عقبوك
ولدعرعير
03/01/2012, 11:52 AM
ا
لله يرحم والديك واموات المسلمين

الله يزمن مالحقنا عليه بس من السالفه كاننا عشناه
صراحة متخرمات يحبها قلبك
لاتحرمنا من قصصك الابداعيه
راعي العجراء
02/03/2012, 11:29 AM
اولا : الله يرحم الوالدة ويسكنها جنات النعيم .
ثانيا : انت متميز في سردك القصصي الممتع والذي تفوح منه رائحة وعبق الماضي
بكل بساطته وشموخه وجمال ايامه ولياليه..
ثالثا : اسمتعت ووجدت ضالتي في هذا المتصفح الجميل وقرأته اكثر من مره لجماله وحلاوته
رابعا: لكم مني كل الحب والتقدير والاحترام .
خامسا: اسال الله ان يرزقنا وإياك من واسع فضله ....


الله يرحم الوالده
الله عليك يالراوي والله حسيت نفسي عندكم من دقة وبراعة الوصف
الله على ايامك والله يطول بعمرك وتسعد الجميع وياليت تألف كتاب حكايات زمان
لآهنت
تقديري


الله يعطيك العافيه ماقصرت مشكور
وجزاك الله كل خير


راعي العجراء ماعرف امدح واجد لكن جعل شيبانك في الجنة


ا
لله يرحم والديك واموات المسلمين

الله يزمن مالحقنا عليه بس من السالفه كاننا عشناه
صراحة متخرمات يحبها قلبك
لاتحرمنا من قصصك الابداعيه


اشكركم على حضوركم وردودكم على هذه السالفه
القديمه بارك الله لكم
دمتم بخير
راعي العجراء
29/05/2012, 06:59 PM
راعي العجراء ماعرف امدح واجد لكن جعل شيبانك في الجنة

الله يجزاك خير يامعشي العرجا
يااخي انت بالغت بالثناء
بارك الله يك وجزاك الله كل خير
بنت الأحساء
30/05/2012, 09:06 AM
السلام عليكم

اهلا اخي الكريم

سالفه رائعه جدا فعلا من وصفك حسيت كأني عشت في ذاك الزمن وماشاء الله عليك متحمس للدراسه وتطول اذانك ويدك عشان يقبلونك ههههههه .. والله يرحم الوالده كلها طيبه وكرم الله يسكنها فسيح جناته

يعطيك ألف عافيه وتقبل مروري المتواضع
راعي العجراء
05/09/2013, 03:53 PM
السلام عليكم

اهلا اخي الكريم

سالفه رائعه جدا فعلا من وصفك حسيت كأني عشت في ذاك الزمن وماشاء الله عليك متحمس للدراسه وتطول اذانك ويدك عشان يقبلونك ههههههه .. والله يرحم الوالده كلها طيبه وكرم الله يسكنها فسيح جناته

يعطيك ألف عافيه وتقبل مروري المتواضع


هلا في بتيت الاحساء
اشكرك على حضورك واشكرك على اعجابك بالسالفه
والله يجزاك خير على دعواتك الطيبه
مع السلامه
دلهميز
05/09/2013, 04:42 PM
قل امين

الله يجعلك مستريح بالدنيا

مستريح بالبرزخ

مستريح بالاخرة

اما موقف امك صراحة ,, مؤثر بالحيل يختصر مسافات شرح طويلة من بعد طبايعنا ( يالعرب ) عن البخل والشح والانانية
راعي العجراء
05/09/2013, 04:50 PM
قل امين

الله يجعلك مستريح بالدنيا

مستريح بالبرزخ

مستريح بالاخرة

اما موقف امك صراحة ,, مؤثر بالحيل يختصر مسافات شرح طويلة من بعد طبايعنا ( يالعرب ) عن البخل والشح والانانية


الله يجزاك خير ويبارك بعمرك على دعواتك الطيبه
هذي السالفه اللي تسال عنها
سندوتش بالقرعه والمرقوق بالبشمل والزعتر
دلهميز
05/09/2013, 07:54 PM
قل امين

الله يجعلك مستريح بالدنيا

مستريح بالبرزخ

مستريح بالاخرة

اما موقف امك صراحة ,, مؤثر بالحيل يختصر مسافات شرح طويلة من بعد طبايعنا ( يالعرب ) عن البخل والشح والانانية

( تصحيح ) يختصر مسافات شرح طويلة عن بعد طبايع العرب عن البخل والشح
خي م طاع الله
07/09/2013, 01:31 AM
عليكم السلام ورحمة الله وبركاته
الله يرحم اثنين عقبوك ياراعي العجراء
اقول من يجمع لي سوالف راعي العجراء واشرط له
والله لأشرط له
ابوعدي
07/09/2013, 04:55 AM
تعجز الكلمات عن وصف ابداعك وروعة سردكياولد الججخ منديل وطحينية مانت بسيط لو انا معك في المترسه كان كل يوم خشتي قدامك اتلصق بك لعل يوم تكون مانتب مشتهي الصندويشه حقتك وتعطيني منه جغمه شكرا لك