سؤال مهم بخصوص الطراد

[سلاح]

السلام عليكم ورحمة الله وبركاته


أسعد الله أوقاتكم بالمسرات
إخواني الأعزاء
عندي كم سؤال ودي تجاوبوني عليه

أولاً أنا نويت أشتري لي طراد
وودي أعرف كم شغله عنه
مثل
هل هنالك تصريح معين لقيادة الطراد ؟
ومن أين يستخرج إذا وجد ؟
طيب أنا ودي بطراد يشل من 2 ألى ثلاثة أشخاص كم هو المقاس المطلوب لذلك؟
وأنا ودي نوع يكون رخيص حبتين وزين في نفس الوقت بالنسبة لسعرة كم تتراوح أسعار الطراد الآن؟


أدري أن الموضوع يبيله ترتيب ولكن وضع على عجل
<<<<<<<<<<<<<<<<<<<<<<<<(فيني النوم وعجزان أعدل:d :d )

ولكم جزل الشكر

محبكم ..................
أبو عبدالرحمن

[كبير النواخذه]

اخوي بوعبدالرحمن

هل هنالك تصريح معين لقيادة الطراد ؟
لا ولكن هناك ملكيه للطراد يجب ان تبرزها للاشخاص المسؤؤلين اذا طلب منك ذلك
ولا توجد رخصه لقياده الطراد

طيب أنا ودي بطراد يشل من 2 ألى ثلاثة أشخاص كم هو المقاس المطلوب لذلك؟
انا اشوف ان 17 قدم مناسب جدا لكم..ولكن الحجم يعتمد على عدد البحاره وايضا يعتمد على المكان الي تبي اتروح له ..يعني اذا انت دايم اتحب اتروح غزير ابو 17 قدم ماينفعك..تحتاج اكبر..ايضا يعتمد من وين اتنزل طرادك اذا فيه قريب منكم فرضه فهذا جيد واذا مافيه فرضه ومضطر اتنزل من السيف..فلا تاخذ اكبر من 17 قدم

وأنا ودي نوع يكون رخيص حبتين وزين في نفس الوقت بالنسبة لسعرة كم تتراوح أسعار الطراد الآن؟
هناك انواع كثيره ..ولا اعرف الانواع الموجوده عندكم في منطقتكم ..والسعر يعتمد على الحجم والموديل ونوع الطراد ونوع التيدر وهل هو جديد او قديم ونوع الماكينه وحجمها وموديلها وانا اشوف ان مكينه 40 حصان مناسبه ل 17 قدم..وطبعا افضل المكاين هي الياماها
**نصيحه : لا تاخذ مكينه مفكوكه من قبل
**معلومه : مكاين الطراد يمكن عمل توضيب او (تضبيط او overall) لها ثلاث مرات فقط وبعدها الماكينه ماتنفع بريال..يعني افحص الماكينه قبل ل تاخذها والافضل تاخذ جديده
وبما ان الطراد صغير(17 قدم) فيمكنه ان يشيل مكينه واحده ولذلك يفضل ان تكون جديده

وما وصيك بعده السلامه ودعاء الركوب
وبالسلامه ان شاء الله
ونبي انشوف صيدك

[بدر الزمان]

هلا فيك أخي سلاح وما قصر معك أخونا كبير النواخذه بمعلوماته القيمة وبخصوص سؤالك الأول وبما أنك من السعودية تحتاج إلى رخصه قيادة هذه الأنظمة المعمول بها في السعودية وربما يكون أخونا كبير النوخذه من دوله لا يتوجب وجود رخصة قياده . ولكم تحياتي

[كبير النواخذه]

اخوي بدر الزمان شاكر لك التصحيح
انا من قطر وزين انك لحقت على الرجال قبل لا ايسوون له مشكله
عندنا في قطر لا تحتاج الى رخصه قياده طراد

الله ايوفق الجميع

[مفتون الصمان]

اخوي بوعبدالرحمن
الطراد المناسب حسب خبرتي المتواضعه هو طراد 18 قدم ووعندك طراييد البحرين مثل ( الضاعن ) والكويت ( الاتحاد ) انا الى عندى هو طراد الاتحاد 18 قدم ويشيل اربعة اشخاص ولكن حتى تحدق وانت مرتاح يفضل شخصين فقط اما للنزهة ممكن اربعه وهم مرتاحيين
الماكينه يفضل لهذه النوع من الطراييد ياماها 115 - 140
لكن مثل ما قالوا الاخوان وين راح تنزل الطراد هل هناك مكان تستطيع ان تنزله منه ؟

[بوفايز]

السلام عليكم تأكيداً لكلام اخوي بدر الزمان نعم تحتاج الى رخصة قيادة ومجرد انك تشتري الطراد وتسوي مبايعة تاخذ اوراق الطراد من صاحبها السابق وتاخذ معاك صور وكم نسخة من تعريف العمل وتوديهم وزراة المواصلات وبعد ما تخلص تروح سلاح الحدود وهم يعطونك كتيب في معلومات مفيدة تدرسه وتختبر فيه وتحصل على رخصة الطراد. الموضوع سهل جداً بس شوي يدوخون راسك في الطلبات. صح نسيت ولازم واحد يطلع يكشف على الطراد. كم انت حاط في بالك فلوس؟ يمكن اقدر اساعدك.

بوفايز

[كبير النواخذه]

اخوي مفتون الصمان
الطراد 17 او 18 قدم ...ومكينه 115-140 كبيره جدا عليه
الا اذا كنت تقصد الطراد المريكي مال النزهات فهذا نوعه ثقيل جدا ولا يصلح للرحلات البحريه
ولازم اتكون مكينته كبيره

وسلامتكم

[سلاح]

كبير النواخذة
بدر الزمان
مفتون الصمان
بو فايز
أشكر الجميع شكر جم وكل واحد بإسمة
لما كتبت أناملكم للإجابة على تساؤلاتي

وبالنسبة للسعر أنا ما أعرف أسعارها بالضبط
لذلك أنا أقولكم تعطوني أسعار تقريبية للمستعمل حق الطراد 17 قدم و 18 قدم جديد ومستعمل
للأنواع الضاعن والإتحاد

أدري إني مصختها بس تحملوني يا جماعة الخير
بالنسبة لمكان تنزيل الطراد لأعرف مكان قريب مني
يعني أفضل شئ بالنسبة لي أنه ينزل من السيف

[gulfhunter]

السلام عليكم ورحمة الله وبركاته


حياك الله أخوي ابوعبدالرحمن

ماشاء الله الأخوان ماقصرو عطوك كل اللي تبيه بس حبيت اضيف شغله لك ..... بالنسبه إلى سعر الطراد اخوي لازم تعرف وين تنزل فيه وهل تحتاج تروح إلى اماكن رق او غزر .... وياريت لو تقول كم ميزانيتك عشان الواحد يقدر يقولك ....
اخوي كبير النواخذه الله يمسيك بالخير ... بالنسبه إلى طراد الأتحاد 17 قدم يكون ثقيل والمكينه المناسبه له اهي 85 ياماها زي العسل....

عليك بالظاعن 22 او 24


تحياتي لك وللجميع

اخوكم ابوعبدالله

[سلاح]

يا هلا وغلا والله فيك أخوي أبو عبدالله
والله يا غالي ماقصرت

بس تدري غشيم في هالأشياء
بس ودي أسأل
إيش يفرق في الطراد
بين التنزيل في الرق أو الغزر؟

أنا يوم رحت لمحل المرسى في الأحساء وراعيه وكيل حق القوارب البحرية
وراني صورة لطراد 17 قدم حلو والله وعجبني
وقالي أن له أكثر من 16 سنه يستخدم نفس النوعية هذي وعمرة ما أشتكى منه وقالي سعرة جديد 10000ريال(عشرة آلاف ريال)
ما أدري السعر هذا مناسب
لكن بالنسبة لنوع الطراد بأحاول أسأله عنه وأعلمكم
وهل فيه إمكانية إني أحصل واحد أقل من قيمة العشرة آلاف ريال ويكون حلو بالنسبة لهذا السعر؟


وأصدقكم قولاً أحبتي
يعجر اللسان عن شكركم

محبكم...............
أبو عبدالرحمن

[بو راشـد]

السلام عليكم ورحمة الله وبركاته
حبيت أشارك في الموضوع وقولك يا سلاح أن الفرق بين طراد يصلح للغزير وطراد يصلح للرق الطراد الي يسخدم حق الرق من فوائدة أنه يرقي بسرعة أي إذا كانت الماية ثبر (جزر) يرقة الطراد مع بداية الرش (السقي) وقبل الطراد العود لأنه خفيف الوزن. ولاكن الطراد 17 أو 18 لايكون بجودة الطراد الكبير مثل 24 او 27 في المياة الغزيرة او عندما يصتدم بلأمواج فطراد الكبير أقوى من الطراد لصغير من حيث ثبوته في الماء وختراقة الأمواج.
أما أنا فأنصحك بطراد 24 ومكينتين 40 ويفضل أن تكون المكاين مشبل وسلف فأذا تعطلت عليك البطارية ونت في وسط البحر فلاتكون عندك مشكلة ويمكنك أستخدام المشبل.
وأي سؤال أخر أنا جاهز وممنون............................................ ..

[سلاح]

عداك العيب أخوي بو راشد
وماقصرت ياغالي
بس الطراد 24 بالنسبة لميزانيتي غويلي حبتين
بس إذا صار كذا أصبر وأزيد على الفلوس إلي عندي وآخذ 24 الضاعن أفضل

وماقصرتوا يا جماعة الخير


محبكم ...................
أبو عبدالرحمن

[Commodore]

السلام عليكم جميعاً

أن الفرق بين طراد يصلح للغزير وطراد يصلح للرق الطراد الي يسخدم حق الرق من فوائدة أنه يرقي بسرعة أي إذا كانت الماية ثبر (جزر) يرقة الطراد مع بداية الرش (السقي) وقبل الطراد العود لأنه خفيف الوزن. ولاكن الطراد 17 أو 18 لايكون بجودة الطراد الكبير مثل 24 او 27 في المياة الغزيرة او عندما يصتدم بلأمواج فطراد الكبير أقوى من الطراد لصغير من حيث ثبوته في الماء وختراقة الأمواج.


هذا والله الكلام يا بو راشد

مشكورين جميعا على المعلومات هذي - مدري انشاء الله تكون لقيت مطلوبك يا بو عبدالرحمن ؟ هو اللي يحدد ترى حاجتك من ورى إستخدام الطراد - يعني الشباب كلهم فيهم الخير و البركه عطوك تصور كامل عن الموضوع.

بس عذراً على اسؤال يا بو عبدالرحمن ... وين محل المرسى هذا مكانه بالحسا ؟ اي صوب يعني .. لأني آخر مره رحت الحسا دورت اماكن طراريد و لوازم صيد ما حصلت ... لو تدلنا الله يعافيك

[سلاح]

يا هلا وغلا والله فيك أخوي Commodore

وأنا أشهد معاك حق
الشباب كل واحد فيهم ماقصر جاب المعلومات إلي عنده وزود
ويعجز اللسان عن شكرهم بصراحة

ومرحباً بك أخ عزيز وغالي معنا في المنتدى
وإنشاء الله تفيد وتستفيد

وشيك على الرسائل الخاصة
بتلقى جوابي على سؤالك

[كبير النواخذه]

اخوي سلاح بالنسبه ل..
بس ودي أسأل
إيش يفرق في الطراد
بين التنزيل في الرق أو الغزر؟

طال عمرك اذا اتنزل من فرضه يعني ماعندك مشكله ..لان الفرضه غزيره ومافيه مشكله مع الطراد الكبير او الصغير لان المكان غزير
اما اذا بتنزل من السيف لازم اتدخل السياره داخل البحر الى ان يستطيع الطراد ان يطفو فوق الماء ..لانه على السيف الطراد سوف يحتك بالقاع ولن تستطيع تحريكه ..ولذلك سوف تضطر ان تدخل بالسياره الى ان تصل لمستوى عمق يمكن للطراد ان يطفو عنده(يرقى)

اتمنى اكون وصلت المعلومه
وجزاكم الله خير

[سلاح]

السلام عليكم ورحمة الله وبركاته

لا هنت أخوي كبير النواخذة
ماقصرت ياغالي

يعني بالنسبة لكل الأعضاء إلي شاركوا معنا
أقول
الطراد 24 قدم الضاعن
ومكينتين 40 ويفضل أن تكون المكاين مشبل وسلف
هذا أحسن شئ

الله يكتب إلي فيه الخير للجميع

محبكم................
أبو عبدالرحمن