هبلت بي وش السوات

[حفيد وايل]

السلام عليكم
عندي استفسار بخصوص السلقه الخواااافه
اول شي هي تجي بعض الأحيان اذا ناديتها بسمها
واذا بغيتها تركب فهي تركب ماعندها مشكله لكن اذا جيتها (ناصيها) خافت وركظت والصيد هي سبوق ماشاء الله اولهن بس ماتمسك ترد عنه ؟؟؟
عمرها داخله الثلاث سنين
وش السوات فيها
انتظر ردكم

[ابن برقاء]

اكيد فيه واحد يطقها حاول تكون ملازم الها لاتجيها مسرع خلك عادي معها

[أبونايف--]

ماقصر أخوي ابن برقا
لكن أمسح على راسها ولا أحد يضربها وحاول تخليها مع سلق مدربه عشان تصيد صح
والاخوان مايقصرون

[هاوي بندق]

اخوي الاخوان ماقصر لاك ابزيد لك شوي
اكله بيدك خلك دايم عنده وانت جالس تاكله ناده بسمه وانت تمسح ناده بسمه
والصيد فك لك ارنب بحوش واربطه بحبل وامسكه وخلك وراه لاجت تتمسكه
جر الحبل خله يبعد شوي ثمن على هالطريقه عشان تحتر وتمسكه انشالله
وثمن هده مع سلق مدربه 100%100 ووتاخذ من علومهن

[حفيد وايل]

بيظ الله وجيهكم ولا قصرتو
بس هي مع سلق مدربه ويصيدن تتميز عنهم هي انها اسبقهم بس المشكله ماتمسك اذا مسكو هم هي تحوم حولهم
الشي الثاني فعلااا هي كانت عند واحد الله يهديه يجلدها
((ونصحني واحد اني اجوعها وش رايكم )) ؟؟

[ابو فارس 700]

هلا ومسهلا يا حفيد وايل الشباب الله يعطيهم الف عافيه عز الله انهم وافيين ولا قصرو كلن طرح ما عنده وانا بخبرتي المحدوده بعطيك كم شغله وابيك تسويها واسالك بالله انك ترد لي خبر عن طريق المنتدى وبنفس الموضوع هدا وابيك تسوي الشغلات ذي لمده 15 يوم بس وبعدها ابنتظر ردك

اول شي بعطيك شي انا مجربه وكثير والحمد لله زانت امور كم سلقه وكم ذيخ وصلو عندي كانو بنفس المشكله فيهم شراده وفيهم خوف ووالله كان عندي ذيخ ما امدح ولا بيفيد المدح لانه مات مدعوس من خباله لكن قبل الرجه والحراره اللي كانت فيه كان شرود وجبان وخواف لكنه حار ومواريه وتفصيل جسمه ممتاز لكن طاح بيد بزران طايحين فيه ضرب وتعقد المهم بقولك حركه والله ما تندم ان شاء الله وبتدعي لي

اول شي لازم تركز على شغله الاكل سوها مثل ما اقولك وان شاء الله تضبط طلع السلقه واربطها بسلسله او حبل قصير ابو متر بذي الحدود وجيب الاكل وانت رايح لها قل اسمها ونزل الاكل عندها ولا تتحرك خلك عندها ولاهو شرط تطول بس ابو خمس دقايق او اقل بس كثر من مقاردك وحكك على راسها ولا تلمس اذنها وكثر من كلمه اكل وقول اسمها مثل ((نجمه تعال اكل اكل يالله هاه نجمه اكل اكل تعال هنا اكل مثل كذا)) وحليب خلفات والا حليب ماعز وباذن الله باذن الله ما تندم وانك تشوفها تلازمك ولا تتركك

ثاني شي على الصيد والهدد اذا ركبتها على حوض الموتر او داخل السياره اهم شي تكون بمكان تشوف فيه وبشكل واضح بحيث انها تنهبل بس بشرط تكون مربوطه ولا تخليها تنزل وبين كل طرد وطرد تفكها يعني مرتين لا تخليها تحول من الموتر ومره خلها تحول ولا تكثر معها سلقان خلها هي وذيخ طبعه زين او سلقه طبعها زين يعني ما تكوش او تجخر عليها عشان ما تخاف وخلك على التوليف ذا لمده 15 يوم وانا انتظر ردك وباذن واحد احد انك تلقى الحل وكل مشكله ولها مليون حل بس انت طول بالك وان شاء الله تزين السلقه والشباب ما قصرو كفوو ووفوو وتحياتي لك يا غالي

ابو فارس 700

[م.م.مذهب]

والله انا من رايي إنك ماتجوعها إربط السلقه ولا يفكها إلا انت عند العيشه وإعزل لها العيشه ومشها معك بالسلسله لين توالف عليك وبعدين تراها ميزه زينه لان الكلب الشرود يوالفك ماعاد احد يغير طبعه عليك وحاول ماتجيها إلابحاجه مثل تمره ولابسكوت وانصحك يالتمر لو تمره وحده واول الوقت عطها تمره على طول من يوم تجيها وبعدين لعبها ونادها بإسمها واخر التمره غلى شوي شوي وبإذن الله تقوم تلعب معك من يوم تقبل اوبعد على صوتك احيان

(ارجو إني افدتك وتقبل مروري)

[سهم الزود]

السلام عليكم ..
الاخوان ماقصرو معك بيض الله اوجيهم