راحت سواليفه وراحـــت لياله .... لو جيت اباصف حزني اليوم ماحيط .

[خالد الوقيت]

ذكرياااااااااااااااات
ـــــــــــــــــــــــــــــــــــــــــــــ



مزنٍ مــــــع المــــــنــــــشى تراكم خياله
................ للبرق في حــــــــــدري ربابه تشاعيط
ساعة لمحـــــــته فزّ قلـــــــــبي وهــــــــاله
................ وعديت من شانه طــويل الشماحيط
في راس ملـــــــــمومٍ تفـــــــرّد لحـــــــاله
................ قمت استخيله والمدامـــــــع مفاريط
ذكّــــــر على قلبي زمـــــــانٍ غـــــــــداله
................ يـــــاما بقلبي ولـــهةٍ له من الشيـــــــــط
عامت ظــــــعونه في مشـــــــــاهيب لاله
................ اتلى خـــــبرها يوم قفـــــــــّت ورا ريط
أوّل وانا امــــــسّس طــــــــــوارف حباله
................ واليوم هفّت من يدي هـــــفّة مقـــيط
راحت ســـــــــواليفه وراحـــــــــت لياله
................ لو جيت اباصف حزني اليوم ما حيط
هيفــــــــيّةٍ هــــــبّت عليـــــــــــــــــنا رماله
................ واخفت معالم ماضـــــــــيات التباسيط
كن الشمــــــال اليـــــــــوم عندي محاله
................ لو كان فــــــــيها للبــــــــــــذيره تباقيط
شــــــــربت كاس الانس حتى الثـــــماله
................ منولٍ واليــــــــــــــوم نشرب تخـــــاليط
مدري هو المــــــاضي تهاوى جمـــــاله
................ في ساقــــــــته واللي بقى نوع تحنيط
ولاّ الفتى لا مدّ عمـــــــــــره ظـــــــــلاله
................ قام يتشوق للســـــــــــــــــنين المناشيط
مهـــــــما يكون الــــــــهم لا كان فـــــاله
................ ربّط ايديّه من غـــــــــــــــــــثاويه تربيط
وخلاّن مثــــــــل اللي عــــليه الـــــكفاله
................ غرّام والمكفول حـــــــــــاله كما الخيط
من عقـــــــب ماني لاتـــــــبيّن هـــــلاله
................ توحي لجيبي مع هكا الدرب تشحيط
كني غــــــــريبٍ ذاق مـــــر الــــــــذلاله
................ في غربةٍ بذّت حواله شمـــــــــــــــاطيط
يومٍ طفح بالكيل خــــــــط اســـــــتقاله
................ وفحّط من الفرحه على الباب تفحيط
واقـــــفى يســـــــــوقه يم داره خــــياله
................ مثل الطخاخ إليا حدته الشـــــواحيط
هذاك مـــــثلي يوم الاشـــــــــواق هاله
................ وريح الشمالي تِنعش القلب وتعيط
امّا تعــــلّيت الـــــذرى مــــــــــن جباله
................ غربي عويرض أو تحدّرت لـــــــصفيط
منازحٍ ياما شــــــــــكـــيت الهـــــوى له
................ ومشّطت سهبانه مع الليل تــــــــمشيط
وياما تكيت بـــــــــــــخاويات السّـــهاله
................ شمال من عرقين شرق الزرابــــــــــيط
وصفّيت في مـــضرم رتمـــــــــها ادلاله
................ وضبّطت فنجالٍ من الكيف تضــبيط
واليوم جاني من زماني رســــــــــــــاله
................ شيٍ يهبّطني عن الـــــــــــــــبعد تهبيط
ولاني اوحدي منهو شكى الضيق باله
................ كلٍّ على الماضي يــــــــصيبه تحابـيط
كلٍّ على المــــــــــــاضي تكدّر حواله
................ شوفة عيوني مالقفــــــــــــــــته تخاميط
كم واحـــدٍ لامن نشــــــــــــــــدته تواله
................ على الشباب وصفّق الكـــــــف تفريط
واكبر شهودي مــــــــدركين الــجماله
................ اللي لهم بالبر رسمٍ وتخـــــــــــــــطيط
العرف واعلوم الـــــــــــــخلا والــدلاله
................ مصفّـــطينه دون الاقوام تــــــــــصفيط
حرار عادتها تنومــــــــــــــــس افعـــــاله
................ ورا الهدد ماهي سواة الشبـــــــــابيط
ياما ذعروا من منـــــــــــكرات الجفاله
................ وياما خذوا نِزْح المهامــــــــيه تمغيط
آثارهم تشـــــــهد بفعل الشــــــــــــكاله
................ رمادهم واقفوش حمر المــــــخابيط
يا سِعْد عين اللي ضـــــــــــــوته الزّماله
................ معهم وقضّى جمــلة ايام تبســـــــــيط
سجّاتهم راحت ســــوالـــــــــــيف قاله
................ يا كــنّها عقب الحقيــــــــــقه خرابيط
واللي بقى منهم تـــــصيبه جــــــــلاله
................ لاقام ينظم ثــــــــوب الاذكار ويخيط
ليتك تــــــــشوفه يوم كــــــــلٍّ رثى له
................ وحرّ البكا يشعط محــــــــــانيه تشعيط
يبــــــــــــكي زمانٍ وادعـــــــه بارتحاله
................ وتقشّـــــــطت عنّه طراويه تقشــــــــيط
معتاش بين الناس كـــــــــــــــــنّه لحاله
................ وْلا رقّـــد النـــــــــــــوام نومه تغاطيط
وْلايدلـــهونه عن همــــــــــــــومه عياله
................ يمضي نهاره باستناده على الحيــط
سحب طراته كاش مــــــن راس ماله
................ واليوم يسدّدها من الهـــــــم تقسيـط
.
.

[ذراع الذيب]

السلام عليكم ورحمة الله وبركاته ..
صبحت بالخير ياخالد الوقيت..

صح لسانك على هالقصيده والله يعطيك العافيه ويبارك فيك ولاهنت يالنشمي..
وتحياتي لك..

[مكرم الضيف]

صح لسانك ياخالد على هالجزله

اتمنى لك التوفيق

[GXR 2006]

عزالله إن قايلها شاعر مصلط

[روعة الالماس]

قصيدة رااائعهـ
يعطيك الف عااافيه يااارب .....

[مقرنس الشيهان]

صح لسانك اخوي خالد وسلامتك من الضيق
مدري هو الماضي تهاوى جماله === في ساقته واللي بقى نوع تحنيط
الماضي لم يتهاوى مدام موجود فيه مثلك وشرواك
لله درك
زادك الله من فضله
تقبل مروري واعجابي بذائقتك

[غيث داورد]

صح لسانك ياخالد
وسجل معك واحد نفس النمونة

[إلقناصه]

ماشاء الله لآقوة إلآبالله
الله لآيضرك
جزاله من اهلها
صح لسانك حتى ترضى
تقديري

[نجم000الشمال]

ما شاء الله تبارك الله

شــــــــربت كاس الانس حتى الثـــــماله
................ منولٍ واليــــــــــــــوم نشرب تخـــــاليط
مدري هو المــــــاضي تهاوى جمـــــاله
................ في ساقــــــــته واللي بقى نوع تحنيط
ولاّ الفتى لا مدّ عمـــــــــــره ظـــــــــلاله
................ قام يتشوق للســـــــــــــــــنين المناشيط

صح لسانك اخوي خالد والقصيدة من اولها الى اخرها نبض قلب شاعر ترك مشاعره تتكلم بحريتها
فاخرجة لنا لوحة جميلة وايام نحن اليها جميعا.
شكري وتقديري اخوي.

[الأديب]

ابدا بذكر الله
ماشاء الله لاقوة الابالله
صح لسانك ياخالد ابداع
ماني شاعر لكن اعتقد ان القافيه صعبه حيل
اتمنى اذا كنت مخطي تصحيح هذه المعلومه
الا من يمتلك بتوفيق الله مفردات يستدعيها متى شاء
لله درك ابيات تطرب

[الشاص]

صح لسانك ياخالد

وعز الله امتعت وابدعت

[خالد الوقيت]

السلام عليكم ورحمة الله وبركاته ..

صبحت بالخير ياخالد الوقيت..


صح لسانك على هالقصيده والله يعطيك العافيه ويبارك فيك ولاهنت يالنشمي..

وتحياتي لك..



ذراع الذيب

هلا بك يالذيب

وصح أبدانك طال عمرك

وشكرا على المرور

تحيتي
.

[خالد الوقيت]

صح لسانك ياخالد على هالجزله




اتمنى لك التوفيق



مكرم

هلا بك يالغالي

صح كلك

وجعلك تسلم
.

[خالد الوقيت]

عزالله إن قايلها شاعر مصلط


GXR

هلا بك اخوي

وتسلم على تشريفك

تحيتي
.

[خالد الوقيت]

قصيدة رااائعهـ
يعطيك الف عااافيه يااارب .....


روعة الالماس

هلا فيك

وربي يسعدك وين ماكنت

.

[خالد الوقيت]

صح لسانك اخوي خالد وسلامتك من الضيق




مدري هو الماضي تهاوى جماله === في ساقته واللي بقى نوع تحنيط
الماضي لم يتهاوى مدام موجود فيه مثلك وشرواك
لله درك
زادك الله من فضله


تقبل مروري واعجابي بذائقتك


مقرنس الشيهان



هلا فيك يالغالي


وصدقني تواجد مثلك شرف لي


وماكتبت يدل على طيبك أكثر من اي شي ثاني


كل الشكر والتقدير لشخصك الكريم
.

[خالد الوقيت]

صح لسانك ياخالد


وسجل معك واحد نفس النمونة



شاعرنا الكبير

يا مرحبا مليون ولا يكفون

نورت يالغالي

واسجلك معي بأول القصيدة او آخره ؟

لأن اولها كتبته عني وشوقي للماضي القريب الجميل :(

وآخرها عن بعض شيباننا من اهل الصيد !!:D

انتظر اختيارك ؟

دمت في أحسن حاال

[خالد الوقيت]

ماشاء الله لآقوة إلآبالله
الله لآيضرك
جزاله من اهلها
صح لسانك حتى ترضى
تقديري


القناصة

شاعرتنا الغالية

ربي يسعدك على تشريفك

دمت كما تحبين

تحيتي
.

[خالد الوقيت]

ما شاء الله تبارك الله


شــــــــربت كاس الانس حتى الثـــــماله
................ منولٍ واليــــــــــــــوم نشرب تخـــــاليط
مدري هو المــــــاضي تهاوى جمـــــاله
................ في ساقــــــــته واللي بقى نوع تحنيط
ولاّ الفتى لا مدّ عمـــــــــــره ظـــــــــلاله
................ قام يتشوق للســـــــــــــــــنين المناشيط


صح لسانك اخوي خالد والقصيدة من اولها الى اخرها نبض قلب شاعر ترك مشاعره تتكلم بحريتها
فاخرجة لنا لوحة جميلة وايام نحن اليها جميعا.

شكري وتقديري اخوي.



نجم الشمال

صح ابدانك على ماسطرت

ورأيك وسااام يالغالي

وكل شكر على مرورك العطر

ربي يسعد ايامك
.

[غيث داورد]

شاعرنا الكبير



يا مرحبا مليون ولا يكفون


نورت يالغالي


واسجلك معي بأول القصيدة او آخره ؟


لأن اولها كتبته عني وشوقي للماضي القريب الجميل :(


وآخرها عن بعض شيباننا من اهل الصيد !!:D


انتظر اختيارك ؟



دمت في أحسن حاال


الله يحييك يالغالي
ومادام خيرتني هذا اختياري

واليوم جاني من زماني رســــــــــــــاله
................ شيٍ يهبّطني عن الـــــــــــــــبعد تهبيط
ولاني اوحدي منهو شكى الضيق باله
................ كلٍّ على الماضي يــــــــصيبه تحابـيط
دمت في حفظ الله

[نديم المجره]

صح لسانك ياخالد
وسجل معك واحد ثاني نفس النمونة
ماشاء الله عليك
منين جمعت كل هالمفردات
دامت لك المسرات
تحياتي

[يوسف الخليفة1]

حياك الله أخي العزيز خالد الوقيت

[مفلح المطيري]

صح لسانك يا خالد وجبتها على الجرح.
اقول:
الله يردلنا زمــــــانً فـــقــدناه = اللي به اهل الطيب تسعى ورا الطيب
فيه الخوي اللي يعزك مخاواه = ............................. انتظروني بعد اكمالها

[محمد الظاهري]

صح لسانك يا اخي خالد
قصيده في قمه الجزاله
ابيات من ذهب لا عدمناك ياغالي
تحياتي وودي
اخوك

[خالد الوقيت]

ابدا بذكر الله

ماشاء الله لاقوة الابالله
صح لسانك ياخالد ابداع
ماني شاعر لكن اعتقد ان القافيه صعبه حيل
اتمنى اذا كنت مخطي تصحيح هذه المعلومه
الا من يمتلك بتوفيق الله مفردات يستدعيها متى شاء
لله درك ابيات تطرب






الاديب

صح قلبك اخوي

واطلالتك مشرفه

لا عدمتك

تحيتي
.