استفسار ضروري عن عزم التاهو 2005 Z71

[تاهو 2005 Z71]

بسم الله الرحمن الرحيم

السلام عليكم ورحمة الله وبركاته ..

وأسعد الله أوقاتكم بكل خير أحبتي في الله .. وأسأل الله لنا ولكم التوفيق والسداد في القول والعمل ..

أحبتي وتاج رأسي الغالين ..

سيارتي تاهو 2005 Z71 دبل استخدام أمريكي .. وما شاء الله السيارة ممتازة بصفة عامة .. وعندما اشتريتها غيرت لها أسلاك البواجي والبواجي والسيور والفلاتر والزيوت وكل القطع الاستهلاكية ..

لكن مشكلتي مع السيارة هي إن عزمها ضعيف جداً في الطلعات خصوصاً في المناطق الجبلية مثل المناطق الجنوبية من المملكة .. فإن السيارة يضعف عزمها بشكل واضح لدرجة إنك تحس إنها راح توقف عليك في الطلعة على الرغم من إني داعس البنزين إلى الآخر تقريباً .. وترتفع درجة الحرارة بشكل ملحوظ وعندما أصل إلى أعلى المنطقة الجبلية أشم رائحة مثل رائحة الحرق أو شيء من هذا القبيل ..

مع أن السيارة في الطرق المنبسطة مع فيها أي إشكال قوي .. ما عدا إني إذا دعست دعسة عادية للتجاوز ما تستجيب السيارة كما ينبغي إلا إذا دعست الدعسة الثانية ..

مع العلم إن السيارة ماشية أكثر من 240.000 كيلو متر ..

حبذا يا أحبة لو تفيدوني في الموضوع لأنه مقلقني ولأني أثق فيكم وفقكم الله لكل خير ..

[قمة افرست]

مع الطلوع طبيعي اي سيارة بيقل عزمها ولاهو مقياس لوجود خلل او مشكلة
وهنا بسالك اش نوع البنزين الي تستخدم ونوع الزيت
اذا بنزين 95 هذا معروف بسرعة التجاوب بالخط الاخضر يعطي ثقل للسيارة
الزيت 10دبليو 30 يعطي خفه للمكينة عكس الاخر 20-50 ثقيل
اخيرا اذا كنت تستخدم زيت خفيف وبنزين 95
قم بتنظيف بوابة الثروتل
وحساس الهواء وانتبه لازم عند مختص
فروع الجميح الخدمة السريعة يقومون بالتنظيف ب100 ريال

[تاهو 2005 Z71]

بارك الله فيك ونفع بك يا قمة افرست ..

أخي الحبيب السيارة ليس فقط يقل عزمها بل يضعف لدرجة إن كأنها بتوقف في الطلعة ..

بالنسبة لبنزين السيارة فهو 95 دائماً ..

بالنسبة للزيت فهو كاسترول 50/20 .. وهذا بناء على نصيحة البنشري لأن السيارة تجاوزت 240.000 كيلو متر .. وإن الزيت الثقيل أفضل لها من الخفيف في هذه الحالة ..

لكن السؤال أخي الكريم .. ليش ما يكون السبب هو الكلتشات خصوصاً إني أشم ريحة بعد أن أصل إلى قمة المرتفعات ؟؟!! ..

بالنسبة للتنظيف راح أسوي اللي قلت عليه أخي الكريم .. لكن ما أدري هل يقبلون بسيارتي اللي استخدام أمريكي ؟؟؟

يعطيك العافية يا غالي

[قمة افرست]

مع الطلوع طبيعي ينقص العزم حتى لو 2011 ونا عن تجربة اقولك في بعض العقبات
تدوس للاخر ويالله يطلع حتى انك تقول ماهو مكمل
والكلتش يطلع ريحته من الشد عادي وارتفاع الحرارة كلها امور طبيعية
حتى في بعض العقبات يرجع الى النمرة 2 او 1

[تاهو 2005 Z71]

بارك الله فيك يا غالي ..

طيب معليش سامحني على تطفلي .. لكن هل ممكن يكون لطرمبة البنزين دور في هذا الأمر ؟؟؟؟؟

[Magellan]

طرمبة البنزين لها عيار ممكن تقيس ضغطها
ومشكلتك اتوقع انها ماهي بعيده عن الكلتشات ، بس حسب بعض الاحيان الواحد محمّل ويرقى عقبه اكيد يضعف عزمه وترتفع الحرارة شوي والمفترض تطفية المكيف واستخدام النمره الثقيلة على 2
الكلتشات ممكن تسحب العيار وتشوف لون الزيت وتشمه ، فإذا كان اسود او نوع ما محروق فهو منه

[قمة افرست]

بارك الله فيك يا غالي ..

طيب معليش سامحني على تطفلي .. لكن هل ممكن يكون لطرمبة البنزين دور في هذا الأمر ؟؟؟؟؟

طرمبة البنزين لوفيها ضعف اذا سخنت تطفي السيارة ويطلع صوتها تسمعه عند الكفر الخلفي

انا اقول لاتخسر نفسك شي الان فقط مر اقرب محل الخدمة السريعه اي سي دلكو الجميح
او اي محل قطع وقل ابغى منظف بخاخات قيمته 16 ريال وبعضها 30
يضاف مع البنزين في التانكي هذا يساعد بتنظيف الكربون من البخاخات والاوساخ ويصفي السيارة
بعد كذا اذا مافيه نتيجة تقوم بتنظيف حساس الهواء الي بالقربه وله طريقة تنظيف سبق شرحناها بالرابطه
تفكه وتقوم بتنظيفه بمنظف اكترونيات الي ينشف بسرعه هذا بيعطي نشاط للسيارة اهم شي اثناء التنظيف لاتلمس الاقطاب الي فيه لانها حساسه
وتفصل اصبع البطارية السالب قبل التنظيف
وعندنا اخر شي تنظيف الثروتل قم بالي ذكرت قبل وبتلاحظ تغير كبير بالسيارة
واخر شي اذا كلها ماجابت نتائج تعجبك نظف الثروتل
القير بعد عنه دام يغير وتمام حتى لوكان الكلتشات فيها ضعف
نتجنب توظيب القير حتى يخرب
وهو فعلا ضعف الكلتشات يضعف العزم -ولاكن نعمل الاشياء الارخص وترفع من اداء السيارة اولا
هنا مقطع لتنظيف حساس الهواء -الاكسجين
vPT8rL0noYg

[تاهو 2005 Z71]

طرمبة البنزين لوفيها ضعف اذا سخنت تطفي السيارة ويطلع صوتها تسمعه عند الكفر الخلفي

انا اقول لاتخسر نفسك شي الان فقط مر اقرب محل الخدمة السريعه اي سي دلكو الجميح
او اي محل قطع وقل ابغى منظف بخاخات قيمته 16 ريال وبعضها 30
يضاف مع البنزين في التانكي هذا يساعد بتنظيف الكربون من البخاخات والاوساخ ويصفي السيارة
بعد كذا اذا مافيه نتيجة تقوم بتنظيف حساس الهواء الي بالقربه وله طريقة تنظيف سبق شرحناها بالرابطه
تفكه وتقوم بتنظيفه بمنظف اكترونيات الي ينشف بسرعه هذا بيعطي نشاط للسيارة اهم شي اثناء التنظيف لاتلمس الاقطاب الي فيه لانها حساسه
وتفصل اصبع البطارية السالب قبل التنظيف
وعندنا اخر شي تنظيف الثروتل قم بالي ذكرت قبل وبتلاحظ تغير كبير بالسيارة
واخر شي اذا كلها ماجابت نتائج تعجبك نظف الثروتل
القير بعد عنه دام يغير وتمام حتى لوكان الكلتشات فيها ضعف
نتجنب توظيب القير حتى يخرب
وهو فعلا ضعف الكلتشات يضعف العزم -ولاكن نعمل الاشياء الارخص وترفع من اداء السيارة اولا
هنا مقطع لتنظيف حساس الهواء -الاكسجين
vPT8rL0noYg



أسعدك الله في الدارين أخي قمة افرست .. ما قصرت وفقك الله ..

أخي الحبيب كلامك جميل ومقنع جداً وبإذن راح أسوي كل الخطوات اللي قلتها .. وأنا بدأت بالفعل ورحت أشتري منظف البخاخات من بالبيد لقطع الغيار لكن قالوا لي مخلص ودورت في أكثر من محل ما لقيته .. لكني لقيت منظف من شركة فورد (موتوكرافت) أصلي قيمته (40) ريال واشتريته .. لكن ما أدري ينفع أو لا .. مع أن صاحب المحل قال لي ينفع لأن الفكرة والمادة نفس الشيء ..

لكن لما قرأت المكتوب بالإنجليزي على العلبة يقول لازم تضيف المادة لما يكون في التانكي من سبعة إلى ثمانية لتر بنزين فقط .. وتمشي عليه حتى يقرب ينتهي ثم تعبي بنزين فل .. هل هذه الطريقة آمنة وتنفع لسيارتي أم أنها تنفع للفورد فقط ؟؟ .. وهل هناك مشكلة لو كررت التنظيف أكثر من مرة أو يكفي مرة واحدة فقط ؟؟؟

سامحني أزعتجك وأدوشتك يا غالي لكن أخوك غشيم ويحتاج أمثالكم من أهل الخبرة ..

[قمة افرست]

منظف موتو كرافت ممتاز خل التانكي الربع واضف المادة وامش بالسيارة الى قبل ينتهي التانكي والافضل تشد السيارة بخط بس انتبه لايقطع البنزين عليك
وتكرار العملية مايضر بس بعد فترة

وابد مافيه ازعاج تحت الخدمة وان شاء الله يتحسن الموتر للافضل

[لجلك تعنيت]

كفيت و وفيت اخوي قمه افرست

لكم الشكر

[تاهو 2005 Z71]

الله يعطيك العافية أخي قمة افرست ويجزاك عني كل خير ..

أنا اشتريت منظف البخاخات مثل ما قلت لك وأيضاً اشتريت منظف الثروتل أيه سي ديلكو من بالبيد لكن ما لقيت منظف حساس الهواء حق الالكترونيات .. وإن شاء الله ألقاه وأبدأ تنفيذ الشغل بالسيارة بإذن الله علماً بأني اشتريت أيضاً بواجي أصلية من بالبيد حتى تكون العملية تمام التمام .. وراح أخبرك بالنتيجة إن شاء الله

بارك الله فيك ونفع بك

[قمة افرست]

منظف الالكترونيات اذا محل ساكو قريب منك تلقاه عنده

تنظيف الثروتل لازم والسيارة شغاله وواحد يدوس بنزين اثناء بخ البخاخ لتجنب توسخ البخاخات ويكون البخ واذا زادت التفتفه توقف ويدوس بنزين وسط الين ينظف الثروتل ولاتطفي على طول لين تصفي السيارة
هذا مايخص الثروتل

[تاهو 2005 Z71]

منظف الالكترونيات اذا محل ساكو قريب منك تلقاه عنده

تنظيف الثروتل لازم والسيارة شغاله وواحد يدوس بنزين اثناء بخ البخاخ لتجنب توسخ البخاخات ويكون البخ واذا زادت التفتفه توقف ويدوس بنزين وسط الين ينظف الثروتل ولاتطفي على طول لين تصفي السيارة
هذا مايخص الثروتل

لكن اللي أنا شفته من شروح الأخوان هنا وفي منتديات ثانية وحتى في مقاطع أجنبية أن تنظيف الثروتل يكون والسيارة ليست في وضع التشغيل بل وحتى أصبع البطارية السالب يكون مفصول .. خصوصاً وإني أريد تنظيف الثروتل خارج السيارة وليس وهو راكب ..

وش رأيك ؟؟

[قمة افرست]

اخوي الدعسه عندك اكتروني وفكها وتنظيفها برى يصير ماهو مايصير
لاكن الافضل والسيارة شغاله عشان نتجنب اي خلل ممكن يخسرك
وفك الاصبع ماله علاقة الاذا فكيت الثروتل برى فك الاصبع لاعادة برمجة الدعسه
بعد تنظيف الثروتل احتمال يصير عندك تعليق بالدعسه بسيط ويروح مع الاستخدام