مشكلة عجييييبة في الباترول ولا احد حلها الى الان؟؟!!

[sgl2002]

انا ياشباب معي باترول ربع 98

يطلع عندي صوت حرة مع احتكاك تحس به تحت الرجلين اكرمكم الله

ويكون مع بداية كل نمرة واذا شديت على الموتر راحت

المهم فكيت العمود الخلفي ومشيت بالدبل الخفيف واختفى الصوت

رحت فحصت العمود قالوا فيه فضاوة ويحتاج تغيير وهذا كلام اكثر من ورشة مختصة بالاعمدة

وغيرته ب2300 جديد

ويوم ركبته الا الصوت موجود


الان وش السواة وش ممكن يطلع منه الخراب
مع ان كراسي القير جديدة والموتر وكالة ماغيرت فيه شي

والمشكلة هذي ماطلعت الا يوم غرزت بطين ولاتطلع الا اذا رجلي على البنزين بنمرة فقط

فهل هناك حاجة ممكن تسبب الحررة والاحتكاك



وكانك يابو زيد ماغزيت<<< 2300 طارت في الهواء

[سليمان 10]

ركز على الصاجه الي تحت القير الواقي من الضربات 000

[وادي النخلة]

انا ياشباب معي باترول ربع 98
يطلع عندي صوت حرة مع احتكاك تحس به تحت الرجلين اكرمكم الله
ويكون مع بداية كل نمرة واذا شديت على الموتر راحت
المهم فكيت العمود الخلفي ومشيت بالدبل الخفيف واختفى الصوت
رحت فحصت العمود قالوا فيه فضاوة ويحتاج تغيير وهذا كلام اكثر من ورشة مختصة بالاعمدة
وغيرته ب2300 جديد
ويوم ركبته الا الصوت موجود

الان وش السواة وش ممكن يطلع منه الخراب
مع ان كراسي القير جديدة والموتر وكالة ماغيرت فيه شي
والمشكلة هذي ماطلعت الا يوم غرزت بطين ولاتطلع الا اذا رجلي على البنزين بنمرة فقط
فهل هناك حاجة ممكن تسبب الحررة والاحتكاك

وكانك يابو زيد ماغزيت<<< 2300 طارت في الهواء



إذا عندك فواتير للصيانة من الورشة.. رح أشتك عند شيخ الصناعية اللي صلحت فيها.

ويرجع لك حقك.. لأن خصصوا العطال بالخطأ.. والقطع اللي نزلتها ما كان فيها شيء.

إذا هي عطلانا كان راح الصوت عندك.. ما لك إلا شيخ الصناعية.. أسأل مجرب.

[ابوسند9]

اخوي
اولا جرب حط الدبل بn اي با الفاضي وجرب عشق وشف هو يطلع الصوت والا لا
ثانيا عندك كذا احتمال يكون منها
تاكد لا تكون مواصير الكنداسه والكندسه منطعجه و تحك او تضرب بالبدى بعد التغريزه او احد ربلات الكندسه مقطوع ونا ارجح ها الاحنمال
وبرضو تاكد من هوب الجلنط لايكون داخل فيه حصى او طين وموقعه بين العمود والقير
الشي الاخر حاول ترفع السياره من الخلف بعفريته وجرب عشق السياره ويمكن يطلع الصوت وتقدر تحدده
وبرضو اغسل السياره بستم
وبالنسبه للعمود الجديد الله يعوض عليك وانا اقترح عليك تفكه وتركب القديم وتعرض الجديد للبيع
والباترول ماشاء الله ما يعرف شي اسمه خراب عمود عكس التايوتا
اتمنى اني افدتك وبلغنا ايش يصير معك

[الا سير]

انت رافع الموتر ياخوي

[sgl2002]

الموتر غير مرفوع

والكنداسه مع الشكمان شيكت عليها كاملة مافيها شي

والهوب اللي بين القير والعمود شليته ونفس الشي

وغسلت الموتر بستم ونفس الطريقة مافيه تغيير

ورفعت الموتر من ورا بعفريته ومشيت وهو واقف ونفس الشي

الموتر مايطلع الصوت الا مع تركيب العمود

حيرني

علما ان بعد التغريزه حصلت بالدفرنس مويه

[قمة افرست]

ياليت توصف المشكلة بشكل اكبر عشان الاخوان يفيدونك

اذا القير عادي احتمال الفحمات لاحقها غبار وتصدر صوت
وشيك على الحذاف ومقدمة القير من اسفل السيارة شوف اذا فيه غطاء ممكن متعرض لضربة
المشكلة مابين القير والحذاف والكلتش
اذا طلع الصوت جرب تدعس بسيط على الكلتش شوف يروح

[sgl2002]

^^^
المشكلة صوت حرة مع اهتزاز زي الجوال لما تكون حاطه صامت على الهزاز
تحسه تحت الرجلين وكن حاجتين تحك بعض او حاجه تدور ماهي بمكانها الصحيح ححححححح واول ما المس الكلتش او ارفع رجلي يروح الصوت

وجربت حطيت الدبل بN وعشقت ومشيت ماطلع صوت ولا شي والعمود فكيته ومشيت بالدبل الخفيف ولاطلع شي

واذا شديت على الموتر تروح بس تسمع لها صوت بسيط بدون اهتزاز

اللي يسمعها يقول عمود بدون شك لكن غيرنا العمود مانفع

وانا قلت لو انه المشكلة القير كان بيطلع يوم فكيت العمود ومشيت لان القير يدور

انا مدري هل المكان اللي يركب فيه العمود من الجهتين له دخل ووش اسمه يمكن العمود مايركب صح

بعدين ماطلعت الا يوم غرزت بطين وماء الين دق بطن الموتر في الارض ودخل الماء بالسيارة بس ماطولت سحبني واحد على طول بس اني قبله قعدت احاول اقدم واوخر عشان اطلع




المهندسين ماعرفوا له وانا شيكت قبلهم على كل شي وماظهر لي شي

[AHMED989]

أنا صار لي نفس الشيء صوت مثل ما تفضلت كان اللي معي باترول2006 سلقة .

غيرت صلبان العمود وخف الصوت الى 80 % ولكنه ماراح نهائي ، وما أدري وش السبب الأكيد ؟!

لأن الصلبان لازم تشحم كل بين فترة وفترة .

[sgl2002]

^^^
غيرت العمود وكالة ومانفع

[راعي طويلات]

^^^
المشكلة صوت حرة مع اهتزاز زي الجوال لما تكون حاطه صامت على الهزاز
تحسه تحت الرجلين وكن حاجتين تحك بعض او حاجه تدور ماهي بمكانها الصحيح ححححححح واول ما المس الكلتش او ارفع رجلي يروح الصوت

وجربت حطيت الدبل بN وعشقت ومشيت ماطلع صوت ولا شي والعمود فكيته ومشيت بالدبل الخفيف ولاطلع شي

واذا شديت على الموتر تروح بس تسمع لها صوت بسيط بدون اهتزاز

اللي يسمعها يقول عمود بدون شك لكن غيرنا العمود مانفع

وانا قلت لو انه المشكلة القير كان بيطلع يوم فكيت العمود ومشيت لان القير يدور

انا مدري هل المكان اللي يركب فيه العمود من الجهتين له دخل ووش اسمه يمكن العمود مايركب صح

بعدين ماطلعت الا يوم غرزت بطين وماء الين دق بطن الموتر في الارض ودخل الماء بالسيارة بس ماطولت سحبني واحد على طول بس اني قبله قعدت احاول اقدم واوخر عشان اطلع




المهندسين ماعرفوا له وانا شيكت قبلهم على كل شي وماظهر لي شي
صوت الفحه من فحمة الكلتش منعطبة عندك والاهتزاز من الحذاف يبي له خرط أو تغيير خل الميكانيكي يفكه ويشوف غير الي ذكرت لك وادع لي

[sgl2002]

^^^
طيب ليش يوم فكيت العمود راح الصوت

اللي اعرفه ان القير يدور حتى لو العمود الخلفي مفكوك

الاهتزاز اذا كان من الحذاف يقوم ينفض السيارة وترج

بس هذا صوت حرة مع هزه ماهي رجه

المشكلة محيرة فعلا

[راعي طويلات]

^^^
طيب ليش يوم فكيت العمود راح الصوت

اللي اعرفه ان القير يدور حتى لو العمود الخلفي مفكوك

الاهتزاز اذا كان من الحذاف يقوم ينفض السيارة وترج

بس هذا صوت حرة مع هزه ماهي رجه

المشكلة محيرة فعلا
القير مايدور الي يدور العمود الأمامي (عمود الدبل) وهو الي يمشي الموتر بما أنك فاك العمود الخلفي والي يسبب الرجه والنفضه هو العمود ماهو الحذاف
ماهي محيره سبق وصارت معي كانت الفحمة تطلع صوت واذا ضغطت ع الكلتش راح الصوت وجت أيام أمطار ونزلت بالموتر بر زاد صوت الفحمة وفيه حرة مثل الاحتكاك والفحه فكيت الكلتش حصلت الفحمة متأكلة والحذاف تعبان غيرت دزق وكلتش وفحمة وحذاف ورجع الموتر مثل ماكان

[محمدالمحيسن]

أضم صوتي لصوت راعي طويلات

عزالله عطاك العلم الوافي

موفق خير أخوي

[sgl2002]

ماقصرتوا ياخوان وانا باخذ براي راعي طويلات واشيك على اللي قال

مع اني قبل سنة غيرت الكلتش جديد

لكن ممكن يوم غرزت دخلها طين وصارت المشكلة

[You Like Me]

بالتوفيق لك اخوي
وعلمنا وش يصير معاك

[أحمد محمد1429]

شيك على جلب عمود التوازن اللي يركبن من الدفرنس إلى الشاصي

[sgl2002]

^^^
اذا تقصد الشيال حق الدفرنس فهذي مغيرها برمضان اللي راح

لكن انا ويا الصوت والزمن طويل

ابشيك على الحذاف وبطن الموتر كامل

[الحنومي]

شيك على كراسي البدي
والدفرنس الخلفي الرباط
وانت تقول غيرت العمود ولا فاد الصلبان مالها علاقه بالعمود لانها لحالها تجي واذا كانت جديده عليك بكلامي اعلاه

[أبو هشام راشد]

وادي النخلة
تقول شيخ الصناعية ! وين هالشيخ أو اسمه

[sgl2002]

اللي ابي اعرفه وش الحاجات اللي ممكن تتاثر على طول بعد التغريز في الطين

[لن أمل من العطاء]

اخوي الغاليsgl2002
السلام عليكم ورحمة الله وبركاته
صبحك الله بخير
بمجرد دخول اكثر من نصف الكفر في ماء او طين يجب عليك فوراً
تغيير سوائل السيارة في الجزاء السفلي من زيت دفرنسات وزيت قير
ما حدث لديك هو دخول الماء إلى الكرونه والدفرنس بشكل عام
وذلك عن طريق بلف التنسيم الموجود في اعلى الدفرنس
ولو تلاحظ خروج زيت الدفرنس ولونه مائل إلى البني لأختلاطه بالماء
فالنصيحة الأولى افحص سوائل السيارة في الأجزاء السفلية منها

[م/عبدالله]

السلام عليكم ورحمة الله وبركاته

اخوي ... الاخ راعي الطويلات ... كلامه مضبوط
اذا شيكت مضبوط على بطن الموتر .. وكل شيء تمام
الكنداسه .. مافيها انحناء ... ومضغوطه الى الاعلى .. ومع التعشيق تلامس البودي
لان المحرك ياخذ وضعية الشد ..
اذا العمود سليم .. ومافيه انحناء
اذا الكراسي .. مضبوطه ومافيها مشكله

لابد .. انك تشيك على الدسك والحذاف .. مع حرارة الاجزاء .. ومع دخلتك في التغريز
وتقول فيه ماء .. ربما الوجه المصقول .. صار فيه التواء .. يعني سطحه غير مستقيم
وكذلك بفعل التراب لانه يعمل عمل الصنفره .. كذلك الفحمه .. ربما اصبح فيها خشونه
واخيرا شيك على عمود الجيربكس .. ورمانه الخلفي ... وزيت الجيربكس

[النسيم العليل]

سو اللي قل لك راعي طويلات وإن شاء الله تنحل مشكلتك

[sgl2002]

بعد الفحص الدقيق من قبل ميكانيكي خبرة اتعامل معه من ٨ سنوات تبين ان الخلل في الكارونة بسبب دخول الماء والطين فيها ومشيت عليها اكثر من شهر والدفرنس مليان موية لين انفقعت الصوفة

وراح يوفر لي كارونة من التشليح وبيركبها ولو ماعرف شغلة كان بدلت الدفرنس كامل لكن قال بجيب لك كارونة مقفله كاملة حقت موديل جديد

الحذاف طلع سليم

والله يعوض علي بقيمة العمود والله قهررررررر

[Messerschmitt]

اخوي مشكلتك من الكارونه والبنيون

شيك عليهن , واذا كانت الكارونه سليمه فالمشكلة

من البنيون.

[راعي طويلات]

بعد الفحص الدقيق من قبل ميكانيكي خبرة اتعامل معه من ٨ سنوات تبين ان الخلل في الكارونة بسبب دخول الماء والطين فيها ومشيت عليها اكثر من شهر والدفرنس مليان موية لين انفقعت الصوفة

وراح يوفر لي كارونة من التشليح وبيركبها ولو ماعرف شغلة كان بدلت الدفرنس كامل لكن قال بجيب لك كارونة مقفله كاملة حقت موديل جديد

الحذاف طلع سليم

والله يعوض علي بقيمة العمود والله قهررررررر
ياخوي من شرحك للمشكلة عطيتك الحل تغير الوصف وعدم تبيين المشكلة الحاصلة بالسيارة بالضبط ماراح يفيدك
وللمعلومية الكارونة يجي لها صوت ونه وصوتها مستمر ويزيد مع دعستك للبنزين اذا انعطبت ماهو صوت فحة واحتكاك يروح بمجرد ماتضغط ع الكلتش والصوف تهرب زيت وش علاقتها بالصوت الي تقول عنه المسألة فيها خلل يامن وصفك او من تشخيصهم للي بموترك
لاتعطي اذنك لناس ماتفقه بالميكانيكا ذره يتطببون بسيارتك ويخسرونك وتغير حاجات سليمه عندك
بعض الناس تجتهد وتنصحه وتفيده بما عندك من معلومة أو خبره سابقة أو تجربة ماضية ومع هذا يتجاهل كلامك ولا يأخذ نصيحتك ولايعمل بشورك
هذا الشيء العجيب الي ماله حل ;)
بكره بيجيك بيقول غير مكينة وغير قير وغير بدي كامل وغير بطارية وغير لون السيارة وغير وغير وغير لانها سبب المشكلة:D
الله يوفقك وتحل مشكلتك بأقل الخساير ويعتق موترك ويرجع أفضل من ما كان

[sgl2002]

^^^

الله يجزاك خير ياخوي

مسالة الدفرنس واني حصلت فيه مويه واني غرزت بطين هذي كاتبها بموضوعين لي سابقة

صوت الاحتكاك والفحيح هذا اللي يحصل بالضبط
طبعا ياخوك فحمة الكلتش صحيح انك اذا ضغطت الكلتش تروح لكن حتى لو كنت فاك العمود الخلفي يبقى صوت الفحمة والحذاف مايروح لان القير ماشي بشغلة الطبيعي ويدور كان العمود مشبوك
وانا مافكيت العمود الا عشان اميز الخراب هل هو من القير وانت ماشي قدام والا من العمود وانت راجع للخلف

انا كنت خايف من الكارونة واعرف صوتها وهي ونين يروح بمجرد ضغط الكلتش او فك الرجلة من الدعسه
وهي انعطبت بسبب الطين والماء اللي جلس في الدفرنس اكثر من شهر وما عرفت ان الدفرنس مليان ماء الا يوم انفقعت صوفة البنيون بسبب زيادة السائل داخل الدفرنس

لكن يالله اهم شي عرفنا العطل بس اكثر ماقهرني العمود
مع ان العمود الاول كان فيه مشكلة بس ما له دخل بمشكلة الاحتكاك

وصدقني ياخوي ماعرضت المشكلة هنا الا يوم عجزت عن حلها وابغا اخلي احتمال الكارونة اخر شي لاني ماتوقعت انها بتخرب على طول وقلت يمكن فيه حاجات غابت عني ما ادري عنها

بعدين فيه ملاحظة ان صوت الحذاف والفحمة يطلع والسيارة واقفة واذا دعست كلتش يروح

لكن مشكلتي ماتطلع الا بالمشي يعني مع دوران العمود

[الكلاسك]

مشكور على الموضوع والله يعوض عليك
وما قصرت علمتنا وش صار عليك نستفيد من تجربتك ونحذر من تكرارها
شكرا مره اخرى

[اسدهم]

بعد اذن. صاحب الموضوع انا غير الفحمة والكلتش وما تغير شي الي حصلت هو كرسي الشكمان الي تحت المرتبة سواق لقيتة منقطة قلت حلو اكيد راحت ومشي واللة مازينت شي بس اقول ممكن مسمار توازن الامامي

[جيبي جايزلي]

بعد الفحص الدقيق من قبل ميكانيكي خبرة اتعامل معه من ٨ سنوات تبين ان الخلل في الكارونة بسبب دخول الماء والطين فيها ومشيت عليها اكثر من شهر والدفرنس مليان موية لين انفقعت الصوفة

وراح يوفر لي كارونة من التشليح وبيركبها ولو ماعرف شغلة كان بدلت الدفرنس كامل لكن قال بجيب لك كارونة مقفله كاملة حقت موديل جديد

الحذاف طلع سليم

والله يعوض علي بقيمة العمود والله قهررررررر

الله يعطيك العافيه المكانيكي اللي تقول عنه ياليت توصفلي محله اوترسلي رقمه

[ميكا مكشات]

لا يمكن تشخيص اعطال الاصوات الا عند سماع الصوت
ولكن نستطيع ان نخمن ربما الصجه مع احد قفزان الليات او مواسير الفرامل والله يعينك

[كاشت2]

هذا ياطويل العمر مشكلة من الكرونه مافيها كلام غيرها وماجاك عندي والله يعوضك خير في خسارتك

[اسدهم]

طيب مشكلتي انا وياة وحدة انا موتري وكالة غرز في طين في وقتها سحبتة طين بدون موية. شي مسك الموتر ونا امشي وصار رابط ع الكارونة بس. ..ياليت تفزعون لي او مكانيكي يفهم فيها غير ورشة. باترول وتركي شغلهم غالي وقل معرفة ونا اخاف ع موتري في زمنا هذا سرقون الموتر من محتوياتة ودارين انك منت رايح تشتكي.

[اسدهم]

طيب ياصاحب الموضوع لو قلنا نفك صدام مع القاعدة. ومش فية بدون صدام جرب. وعندك شكمان الي علية العازل حق الوكالة ممكن القفزان مرتخية انت جرب تطق شكمان من تحت الكرسي سواق من دعاسة. وعامود اتوازن اطويل الي... يجي من اليمين لليسار

[وسيع البنايد]

شيك كراسي المكينه

[اليوسف2012]

اخوي الله يجزاك خير قبل كل هالخساير فك اول شي عمود الدبل الامامي كلها ثلاثين او خمسين ريال ثم امش عليه بدون عمود اذا اختفت الرجه ركب فرارات وريح راسك ،،،،،،،،، وفقك الله

[تميم2222]

ترا دبه البيئه. اذا طولت يجي فيها مثل الخرفشه. تاكد منها

[sgl2002]

ههههههههههههه

ياشباب جزيتم خيرا لكن الموضوع له سنتين والمشكله مذكورة حلها انها طلعت من الكارونه وغيرناها

والموتر قد بعته واستخدمت بعده ٣ باترولات

[تميم2222]

هههههههههههههههههههههههههه العذر والله متحمسين معك