مشكلة بالاديتر غريبة ماادري بالمكينة فتك 2004

[الربذي]

السلام عليكم ورحمة الله وبركاته

ياأخوان انا عندي مشكلة بالمكينة ،قبل سفري فتحت الاديتر الا فاضي شغلت السيارة ابي اعبيه الا يوم امتلا وصار يصب اليوم الصبح شفت ماء الاديتر ولقيته فاضي وعبيته وشغلت وهو فاضي يام قام يصب وبقوه من الاديتر.
شغلت السيارة واذادعست يطلع ماء الاديتر كأنه نافورة ويتناثر كله لين مايبقى الا شوي
ثم يختفي الماء ما ادري وين يروح !!!!!!!!!!وهكذا بالرغم اني مشيت بحمد الله وحفظه اكثرمن 500 كم ولاطفيت السيارة ولا فيه اي حرارة
السيارة سفاري فتك م 2004 ماشية 300 الف قير اوتو وودي الي مرت عليه تخبر ورشنا يتعلمون فينا


أنتظركم يا اهل الخبرة ...

[ابونبيل]

اكيد فيه تهريب وشيك على غطاء الرديتر

بس مو معقوله تمشي بدون ماء وماترتفع الحراره اخاف الساعه حقت الحراره خربانه

شيك على زيت المكينه اذا شفته خفيف معناه اختلط بالماء وخلبطت المكينه الله لا يقوله

[برايدوي عنيد]

هلابك اخوي

معروف ان مكينه الفتك به قربتين القربه الكبيره اللي بجنب عيار الزيت والثانيه بجنب الاديتر يسار جهه السواق

الموتر اذا كان بارد تفتح غطاء الاديتر وهمن تعبي القربه الكبيره الى ان يطلع الماء مع الاديتر بعده اغلق الاديتر وكمل القربه الكبيره وقضينا

بالنسبه للقربه الصغيره اللي جنب الاديتر فهي للزائد ولايصلح انك تعبيه ماء.

اذا كان الماء ينقص كل فتره شيك على الليات والخراطيش و الاديتر لايكون به شق واذا طلع الماء يتبخر مع حراره الاديتر وكذلك تاكد من غطاء الاديتر والقربه

هذا مالدي وتقبل مروري....

[الربذي]

الله يبيض وجهوكم ماقصرتم بس ليه اذا فتحت الاديتر وشغلت كل الماء يطلع ولا طبيعي

[lo8oo8ol]

الله واعلم ان رأس المكينة مشعور (يوجد به تصدع)

شوف عدة ورش اعرض عليهم المشكلة ...؟؟!!!

[مقلع الرمث]

يبيلك تستشير يوسف الخضير ممكن يفيدك

[رفرف83]

وعليكم السلام ورحمة الله وبركاته
اتوقع والله اعلم ان البلف عندك مجيم ما يفتح ومع دورة المكينه يزوع الما
تأكد من البلف وقيمته بسيطه وتركيبه سهل الله يسهل امرك

[مدير الكدري]

السلام عليكم مثل ماقال الزميل واعلم ان رأس المكينة مشعور (يوجد به تصدع

[عاشق الغضا]

اول شي اذا جيت تعبي الاتيتر ماء تعبيه مع القربة الي بجنب العيار الزيت , ثانيا جرب اول ماتشغل الصبح والموتر بارد شف الماء اذا كان الماء يدور فهو البلف فاتح عندك لازم تغير البلف, اما نقص الماء يمكن يكون من طربة الماء فيها تهريب او الاتيتر في نسم او من الخراطيش , واحتمال اخير وهو من الراس يمكن يبي مسح

[.أبوعبدالرحمن]

ينقل للقسم المناسب

[الربذي]

هلابك اخوي

معروف ان مكينه الفتك به قربتين القربه الكبيره اللي بجنب عيار الزيت والثانيه بجنب الاديتر يسار جهه السواق

الموتر اذا كان بارد تفتح غطاء الاديتر وهمن تعبي القربه الكبيره الى ان يطلع الماء مع الاديتر بعده اغلق الاديتر وكمل القربه الكبيره وقضينا

بالنسبه للقربه الصغيره اللي جنب الاديتر فهي للزائد ولايصلح انك تعبيه ماء.

اذا كان الماء ينقص كل فتره شيك على الليات والخراطيش و الاديتر لايكون به شق واذا طلع الماء يتبخر مع حراره الاديتر وكذلك تاكد من غطاء الاديتر والقربه

هذا مالدي وتقبل مروري....

الله يعطيك العافية وماقصرتوا كلكم فعلا لقيت الي الي يجي من المكينه ويركب بالقربه الي جنب عيار الزيت فيه تنسيم وسكرته بمعجون وعبيت السيارة من نفس القربه والحمد لله وحده الامور تمام وطيبه وركد الماء يارجل البعض يقول امسح الراس ولا دور لك راس من التشليح وبفضل الله فقط معجون تجاري ب5 ريال وراحت المشكلة تركدا ولاتصدقون بعض الورشات .

[مركز حراره]

لابد من تغير القربه ماينجح امن بدل القربه لانه فيها ضغط غير عن قربت الماء الزايد