مشكلة صوت بمكينة اكسبديشن

[ابو سلطان1234]

السلام عليكم ورحمة الله وبركاته :
لجأت لله ثم انتم يالنشاما يمكن ألقى عند احد منكم حل او احد مرت عليه هالمشكلة
عندي اكسبديشن 2005 له سنة وشهرين معي من أول ماطلعته من الصالة وفيه صوت طقطقة زي طقطقت البلوف بس من جهة اليمين وديته على الضمان قالوا لازم نفك المكينة علشان نشوف ايش المشكلة طبعا وقتها رفضت أنا لأن السيارة توني مطلعها ومابيهم يتعبثون فيها ومشت معي حتى الأن والحمدلله تمام مافي اي مشاكل والصوت لايزال موجود
حدتني الظروف الأن على بيعها وكل ما سمع الزبون الصوت هذا انحاش ومدري ايش اسوي وديته على الضمان قالوا هذا بستم عندك في اليمين ويبيله 20 يوم وتطلع على بال مايجي رد الشركة ويتصلح مريت البيان قالي المهندس احتمال يكون عمود تيمن او جنزير .

تكفون لاتبخلون علي اللي مرت عليه هالمشكلة او عنده حلها .

[عبقري91]

كان معي اكسبلور ٢٠٠٦ ٨سرندل وجديد مطلع من صاله صار عني الصوت يمين وكل شي سويته وفكيت المكينه وعفسوها لي وخسرت قرابت ١٣الف وبعته وخرب مع راعيه نفس المشكله بس قبل كل شي غير زيت خفيف٣٠ ١٠ وغير سيفون ترا اذا الزيت ثقيل يسبب طقطقه بلوف واذا الطرمبه تعبانه نفس الشي حقت الزيت ولا تستعجل يمكن الامر هين وجه قزوز حتى وجه القزوز لازم يطلعون المكينه ورح لموقع فورد وطرح موضوعك ولا تستعجل وحتى الورش بتجيه بصغرلك المشكله واذا نزل المكينه طلع مليون عله وانت تاكلها والله ييسر الامر ولو تردها لضمان افضل ×

[بدوي جنوبي]

شوف يبو سلطان أذا انت نويت البيع
الافضل لا تصلح فيها شيئ لانها راح تكلفك فوق ال 10 الاف
بتلقي زبون يشترى السياره والصوت فيها وانت خبّره ان الصوت
له أكثر من سنه ولم يتضاعف على نفس وضعه .

والصوت ترا صعب تحديد مصدره الا عن طريق واحد خبير في المحركات .

[الرحال تبوك]

السلام عليكم ورحمه الله وبركاته
اخوي عندي نفس سيارتك وجنني الصوت يزود مع البرد ويخف اذا حميت السياره
بعد عنا تبين ان القزوز مشعوره وتم غياره وكان لابد من اخراج المكينه والحمدلله راحت المشكله
طريقت الكشف فك احد البواجي الايمنا وضع زيت عشره مع فتحت البوجي مقدار نصف كاست شاي
وركب البوجي ثم شغل وسكر الشكمان من بعد التشغل مباشره بيدك او رجلك اكرمك الله والسامعين يكون اقوا احكام لابد تكون السياره على حفره حتى يتمكن شخص اخر من مراقبت خروج الدخان من عند القزوز اذا كان فيه دخان فيكون وجه قزوز او قزوز مكسوره اومشعوره ولابد من فك دبت التلوث لاني وجتها مسدوده بالمره وفكيتهامن السيار والحمدلله تمام حتى العزم كويس بعدها
تنبيه لاتسكر الشكمان مره وحدة عطه مجال اكبس شوي ثم فك حتى ماتكتم المكينه
والزيت احسن شي له سوبرجيتي العدي الثقيل لانه عكس الجمس معاه يخف صوت البلوف الصباح من تجربه
واعذرني على الاطاله والاخوان مايقصرون فيهم الخير والبركه
والله اعلم

[ابو سلطان1234]

مشكورين الأخوان اللي ردوا والله يجمل حالكم لكن ما أظن أن المشكلة في تنسيم شكمان والأدهى والأمر ان الزبون اذا عرف الصوت هون وابتلشت لا أنا اللي صلحته ولا أنا اللي بعته وعربون البيت الظاهر بيضيع والسبب هالسيارة الله المستعان بس

[ابوراكان تبوك]

الله يعينك ويعوضك خير

دائم في الامريكي بالذات اذا نسم الكزوز يطلع صوت طقه زي طقة السبيكة تأكد من الكزوز ومن الحدايد اللي تمسك الشكمان يمكن فيه شيء منفك او ماهو مشدود زين


موووووووووووووووووفق

[بدوي جنوبي]

مشكورين الأخوان اللي ردوا والله يجمل حالكم لكن ما أظن أن المشكلة في تنسيم شكمان والأدهى والأمر ان الزبون اذا عرف الصوت هون وابتلشت لا أنا اللي صلحته ولا أنا اللي بعته وعربون البيت الظاهر بيضيع والسبب هالسيارة الله المستعان بس

عربون اجار ولا شراء
رح للمكتب وتفاهم معهم لانه صار لك ظرف طارئ
حاول ترجع لهم وتسحب عربونك أمكن خيرة لك .

الله يكون في عونك