استفسار

[abutuha]

السلام عليكم,

كيف حالكم يا طيبين؟
أنا عضو جديد معكم ومبسوط جدا بمنتداكم الرائع, أنا جديد على الصيد البحري, أبغى طلب منكم تساعدوني يا حيتان.
أنا أمس طلعت كورنيش الدمام جلست بجانب مطعم ليالينا, وحسب علمي هالمنطقه وفيره بالأسماك, بصراحه ما صدت ولا سمكه, يمكن اني غشيم وما عرفت ايش استخدم طعم ويمكن حجم القصبه ما يساعدني للرمي.
استخدمت طعم سمك صغير يسمونه حمام, والثقل كان 1.5 و طول القصبه مترين و 70 سم.
ايش تنصحوني يا أصحاب الخبره؟
اللي جالس جنبي صاد سمكة هامور ماشالله تبارك الله.

أنتظر ردودكم.

تحياتي

[مجنن بحر]

اول حاجه طعمك غيرة استخدم حبار واستخدم سنارة مقاس ١٣ وخيط اربعين

[abutuha]

تسلم يالغالي وشكرآ لمرورك.

ننتظر بقية ردودكم و آراؤكم يا الغاليين.

تحياتي

[Hawwat Yanbu]

الله يرزقك الحوته الي تسر خاطرك

وترى الصيد لزم له صبر

وكلها ارزاق بيد الله

[صايد الحوت]

هلا بيك بين اخوانك المنطقة هذي استخدم فيها الربيان وميد صغير او منكوس وخذ دريتين عشان هناك في السبيطي والهامور واذا حصل طعم حي افضل بكثير

[انفردو]

اولا الله يرزقك وتصيد قـــرش :D (امزح طبعا) انصحك تستخدم الاخطبوط لانه ممتاز جدا وكذلك الحبار وعليك بالصبر (الانتظار) وتحياتي يالغالي

[abutuha]

يسلمو على مروركم الجميل ونصايحكم يا الغاليين.

اليوم طلعت أصيد و رحت 3 أماكن, رحت جزيره بالدمام و رحت عند مطعم ليالينا و رحت منطقه بعد مطعم الكورنيش وما صدت ولا سمكه.
استخدمت الخثاق كطعم و سناره مقاس 13 و خيط 40
حتى ما صار فيه ضرب على السناره,شكله البحر فاضي خخخخخخخخخخخ.
بس بصراحه اليوم كان في هوا الصباح وأتوقع هذا سبب عدم الاصطياد.
انشالله المرات الجايه أصيد

تحياتي لجميع الأعضاء

[accentkool]

غير القصبة وحط قصبة 5 متر
وثقل مقاس 5 دائري
وحركة رداع ثقل فوق وخيط ومدور
وقفل وميدار 8 وطول الرداع متر
وارمي باقوى ماعندك وديها عمق
والطعم ركب حمام كامل اذا صغير
ونص اذا كبير واو منجوس او ميد صغار حيل
والله يرزقك يافسكر ياسبيطي ياهامور يادويلمي

[وحيد الشيخ]

السلام عليكم,

كيف حالكم يا طيبين؟
أنا عضو جديد معكم ومبسوط جدا بمنتداكم الرائع, أنا جديد على الصيد البحري, أبغى طلب منكم تساعدوني يا حيتان.
أنا أمس طلعت كورنيش الدمام جلست بجانب مطعم ليالينا, وحسب علمي هالمنطقه وفيره بالأسماك, بصراحه ما صدت ولا سمكه, يمكن اني غشيم وما عرفت ايش استخدم طعم ويمكن حجم القصبه ما يساعدني للرمي.
استخدمت طعم سمك صغير يسمونه حمام, والثقل كان 1.5 و طول القصبه مترين و 70 سم.
ايش تنصحوني يا أصحاب الخبره؟
اللي جالس جنبي صاد سمكة هامور ماشالله


تحياتي

وعليكم السلام ورحمة الله وبركاته
ـرحلة الميل تبدأ بخطوة, ولتختصر رحلة الميل بسرعة وفائدة وتتعلم يجب أن ترافق شخص ذو خبرة في البحر, أو تنسق رحلة جماعية مع الاخوان وتتعلم منهم
ـ قد تحاول أن تتعلم بنفسك, ولكن يطول هذا الامر, وترتكب أخطاء كثيرة وخطيرة على نفسك.
ـ لا تتردد في السؤال عما يجول في خاطرك
ـ إذا رأيت صياد على البحر , أقترب منه وسلم عليه, وادعو له بالبركة, وتحاور معه عن الصيد ومتعته
ـ إبتعد عن الاماكن التي حركة قوارب , أو سباحة
ـ نوع في طرق الصيد , إستخدم الطعم المناسب لسمك المنطقة,
ـ تأكد أن الارزاق مقسمة سلفاً, ولكن الله سبحانه وتعالى أمرنا بأخذ الاسباب.
ـ لا تيأس ( البحر يعلم الصبر)

[أبوحافظ]

ما قصر الاخوان والاخ وحيد الشيخ اعطاك الزبده

وهذا اللي كانت انصح فيه كثير من المبتدئين لاني وقعت في نفس المشكله

بعد اكتساب المهارات الاساسيه من اهل الخبره

تختصر على نفسك مشوار طوووويل

التنويع بالاساليب مطلوب مثل تنوع الطعم والمقاساات وغيرها

تحياتي

[abutuha]

السلام عليكم,

أسعد الله صباحكم بكل خير,

كلام طيب من ناس طيبه والله, كلامكم يدل على خبره ماشالله عليكم, انا شفت صياد وما حبيت أتلقف عليه خخخخ.
انشالله بحاول أتعرف على أعضاء بالمنطقة الشرقيه(الدمام) وأطلع معهم عشان أستفيد منهم ومن خبرتهم.

تحياتي للجميع

[وليد الغربة]

ان شاء الله تتوفق في الايام القادمة

ولا تياس

اخوك وليد الغربة

[abutuha]

شكرآ لمروركم جميعا,

أمس رحت الكورنيش و طلعتلي سمكه واحده فقط, ضربت معي سمكه كبيره بس دخلت بين الصخور و قطعت الخيط .
شوفوا اللي طلعت معي أمس:

https://fbcdn-sphotos-a.akamaihd.net/hphotos-ak-ash4/429178_10150553329033983_624298982_8968852_2138958 993_n.jpg

[ابو حسان اسحق]

شفت كيف الصبر والممارسة في الصيد هي الا تعلمك بس تصدق انا لي شهور ماصدت غير الصغار استمر في الممارسة

[abutuha]

اي والله, وشكرآ لمرورك أخوي, بس ايش رايك بالمنطقه؟
بس بصراحه الجو أمس ما يساعد, كان هوا شديد و بررررررررررررد.

[ابو ريان111]

الرزق من الله سبحانه وتعالي قبل كل شيئ ثم الاخذ بالاسباب مثل المكان والطعم والمهارة .