مشكلتي مع اليوكن طفى علي بالدايري والدعسة ماتستجيب !

[PATHFINDER 4]

عندي يوكن xl (الحجم الطويل) موديل 2003 امريكي


المشكلة اولا والموتر شغال
(تدعس كل الابنص حق البنزين) لكن ضغط السيارة مايرتفع !!




يعني كانك مطفي السيارة وتدعس ع الابنص ! عداد ضغط المكينة واااقف والمكينة ماله حس مع تدعيس الابنص ..


ثانيا تطفى علي كم مرة في الدايري او اذا مشيت مشوار فجأة الموتر يفصل


اوقف على اليمين انتظر شوي الين يبرد الموتر ثم اشغل يرجع الوضع طبيعي !!



غيرت /
طرمبة بنزين (نزلنا التانكي) كلفتني 1500 ريال
صفاية البنزيت
طرمبة موية
بواجي
فلتر الهواء


فحصته كمبيوتر ولا عطاني المشكلة بالضبط (لكن يقول ظفيرة الدعسة)


انا شاك بشي مدري توافقوني فيها ؟؟

اللي هو حساس الهواء او AIR SENSOR

الموجود قبل قربة الهواء

هل تتوقعون المشكلة منه وكم سعره

هل يكفي تنضيفه ببخاخ AC DELCO

ارجو الرد تكفون الموتر صرت ما اضمنه في المشاوير البسيطة كيف البعيدة عاد !!

واكرر طرمبة البنزين غيرناها مع الصفاية
والموتر تانكي واحد فقط مافيه الا طرمبة وحدة


بانتظاركم الله لايحرمكم الاجر

[ابوماجد-1]

ما اقول الا الله يعينك والله لايضر مسلم

ليس لي معرفه بهذا النوع من السيارات

وان شاء الله يفيدونك الاختصاصيين

[بدون لوحات]

من الطرنبه احتمال الطرنبه المركبه خربانه

[PATHFINDER 4]

كيف تخرب الطرنبة الله يجزاك خير ؟؟؟

شريناها جديدة من بالبيد لا ونوع يااااالله حصلنا ها لان الموتر امريكي

وكلفتني 1500 ريال الله يعوضنا ..

[PATHFINDER 4]

وش رايكم يا اخوان هل المشكلة من البخاخات ولا من الديلكو ولا من حساس الكرنك او حساس الهواء او من دبات البيئة ممكن تكون متكسرة وقافلة على القزوز ولا من الثلاجة يبيلها تنظيف ولا من الثروتل ولا ولا ولا ولا

تكفون وش رايكم ؟؟؟؟

[GM_400]

انا شاك بشي مدري توافقوني فيها ؟؟

اللي هو حساس الهواء او AIR SENSOR


:good::good:

الأحتمال الأكبر منه

جرب ونظفه منت خسران

اذا كان الآربي ام يرتفع وينزل بقوة ويتفتف الموتر مع الدعسه فهو منه
واذا كان كانه ينتع ايضا منه

[خاش عرض]

مشكلتك بسيطه جداً


حساس البخاخ ركبه عدل ويضبط موترك


تبي تعرف بنفسك انه مضبوط او لا ؟؟؟؟؟؟؟؟؟؟؟


فيه 3 حساسات .. الي هو 2 حساس الريس وحساس البخاخ (الهواء)


افصل كل واحد منهم وركبه مرة اخرى .. اذا لاحظت فرق في صوت المكينه وانت فاصل الحساس فهذا الحساس معناته شغال اوكيه ,, واذا فصلته وركبته ولا تغير شيء في الموتر معناه انه مايشتغل اما انه عطلان او يبي له تنظيف


ومشكلتك انت في حساس الهواء واعراضها اذا دعست على الدعسه مايرتفع الريس ويكربن ويطلع صوت تقطيعه وهذا ناتج عن عدم ايصال الامر الى بوابة الهواء لفتحها يعني كانه مفصول عندك او خربان

[Magellan]

يوم غيرت طرمبة البنزين جاي تسأل
المفروض قبل تستشيرنا
على العموم تغيير الطرمبة بدون تغيير الفيش اللي جاي من الظفيرة فأنت ماسويت شيء

[PATHFINDER 4]

انا شاك بشي مدري توافقوني فيها ؟؟

اللي هو حساس الهواء او AIR SENSOR


:good::good:

الأحتمال الأكبر منه

جرب ونظفه منت خسران

اذا كان الآربي ام يرتفع وينزل بقوة ويتفتف الموتر مع الدعسه فهو منه
واذا كان كانه ينتع ايضا منه


هلا اخوي .. الار بي ام تجيه حالات يكون واقف حتى لو تدعس كامل ابنص البنزين !

[PATHFINDER 4]

مشكلتك بسيطه جداً


حساس البخاخ ركبه عدل ويضبط موترك


تبي تعرف بنفسك انه مضبوط او لا ؟؟؟؟؟؟؟؟؟؟؟


فيه 3 حساسات .. الي هو 2 حساس الريس وحساس البخاخ (الهواء)


افصل كل واحد منهم وركبه مرة اخرى .. اذا لاحظت فرق في صوت المكينه وانت فاصل الحساس فهذا الحساس معناته شغال اوكيه ,, واذا فصلته وركبته ولا تغير شيء في الموتر معناه انه مايشتغل اما انه عطلان او يبي له تنظيف


ومشكلتك انت في حساس الهواء واعراضها اذا دعست على الدعسه مايرتفع الريس ويكربن ويطلع صوت تقطيعه وهذا ناتج عن عدم ايصال الامر الى بوابة الهواء لفتحها يعني كانه مفصول عندك او خربان



هلا اخوي .. حساس الهواء وعرفناه فكيته ونفخته بالهواء ورجعته لكن ما ادري هل ضبط الوضع او لا لان الحالة تجي فجأة !
وهل يكفي نفخ حساس الهواء بالهواء القوي ثم بخاخ ايسي ديلكو ثم اخليه ينشف ؟؟
ولا لازم اشتري جديد ؟؟

اما حساس الريس ماعرفت وش تقصد ؟! هل تقصد حساس الدعسة ؟؟

[PATHFINDER 4]

يوم غيرت طرمبة البنزين جاي تسأل
المفروض قبل تستشيرنا
على العموم تغيير الطرمبة بدون تغيير الفيش اللي جاي من الظفيرة فأنت ماسويت شيء


لاحول ولاقوة الا بالله .. طيب وش المقصود بالفيش اللي جاي من الظفيرة ؟؟

[خاش عرض]

نعم اقصد حساس الدعسه


عندي سؤال لك , الحين يوم فصلت (حساس الهواء) لاحظ صوت المكينه يتغير او لا ؟
واذا ركبته مرة ثانيه فيه تغيير او لا


الصوت تحس ان المكينه ترتجف


اذا الجواب لا مايتغير شيء فهو خربان ,, وعموماً يتنظف بالايسي ديلكو او يتغير اذا مافاد واكثر شيء انه يتغير والحساس يجي قطعه صغيره السوداء الي تركب فيها الفيش يعني الفيش ماهو الي خربان , الي يخرب القطعه السوداء (الحساس) الي يركب فيها الفيش وشيك على الحساسات الي قريب منها (حساس الدعسه) افصل فيش الحساس وشوف صوت المكينه اذا ترتجف او لا يعني راح تلاحظ في الصوت عند فصلك افياش الحساسات

جرب لكل الافياش الموجوده وقريبه من فيش حساس الهواء


تحياتي لك

[ماجد الشمال 1]

مشكلتك من الدعسه الي داخل
الغمارة الي تحط رجلك عليها
اعزك الله واعز من يقرأ
تجد فيها السلاك وفيش
رش عليها من داخل اي منظف

[شعيب المسمى]

المشكلة مرت علي قبل فترة صارت من حساس الدعسه تلقاه مع الثروتل والافضل تغيره جديد

[عاشق الموطن]

مشكلتك من الدعسه الي داخل
الغمارة الي تحط رجلك عليها
اعزك الله واعز من يقرأ
تجد فيها السلاك
رش عليها من داخل اي منظف



كلام اخونا ماجد سليم
لان الدعسه الكترونيه ان ماخاب ظني واحيانا تخرب اي سياتها ويجب تغييرها او ممكن تتلحم من كهربائي متخصص

[Magellan]

لاحول ولاقوة الا بالله .. طيب وش المقصود بالفيش اللي جاي من الظفيرة ؟؟

اول شيء فيه ابرة تقدر تقيس ضغط البنزين تعرف مقدار ضغط البنزين اللي جاي من الطرمبة
ثانيا:جميع الطرمبات الموجودة في السوق مضروبة بمافيها طرمبات الوكيل والحل طرمبة ديلفي
ثالثا: الطرمبة لابد يكون معها فيش لأن فيش اللي جاي من الظفيرة يحترق ، شف الطرمبة تحت يجي معها فيش لإصلاح الخلل، يعني لازم تغير الفيش
http://www.mekshat.com/pix/upload05/images241/mk11979_f.jpg

[جمس_454_97]

بحكم خبرتي بالورش وبعد عناء طويل بسبب مشكلتي
فيه متخصص بفحص الجموس وهو شغال بالجميح حسب ماسمعت اسمه عمران مطوع وامين
باكستاني يفحص لك بـ 100 ريال ويعطيك العله 100%100
عنده ورشتين وحده بالروضه والثانيه بالنسيم
الي بالروضه بعد ماتتعدى ممشى الروضه تجيك الورشه على اليمين مركز
قلهم وين عمران متخصص بكشف العله
وورشته الثانيه بالنسيم بالصناعيه وصفها صعب راسلني على الخاص وعلى فكره لو تسئل بيدلونك لانه مشهور
وعلى فكره انا لقيتهم لك الي معاهم كمبيوتر والله مايعرفون بالكمبيوتر شي 90% منهم
مثال هو له الخبره بالخربات ولمن تجيه قالك فحص كمبيوتر 100 ريال
ويشبك الكمبيوتر ويطقطق بالكمبيوتر كنه فاهم وحسب ماقلت له مشكلتك يقولك عندك كذا
او سيارتك سليمه اغلبهم كذا
والله دفعوني لين قلت بس وطحت بواحد ابن حلال قالي كل الي بالصناعيه جايبين اجهزه ومايعرفون يستخدمونها ولا يعرفون يستخدمونه ضحك على الناس قالي بصناعية النسيم فيه ثنين واحد عمران الباكستاني هذا كان شغال بشركة الجميح والثاني فلبيني والباقي حراميه مايفهم شي بالجهاز الي ماسكه
فيه سوري بصناعية النسيم اسمه ابو فراس برضو يمدحونه
وفيه فلبيني بنهاية شارع الكهرباء ممتاز للفورد ومشاكل الكهرباء
اخوي انت ابداء بالرخيص والي ضروري بتغيره مثل دبة البيئه هذي شايلها شايلها سواء بهذي المشكله او بمشاكل جايه لانها تطيح عزم الموتر وتخليه ثقيل وممكن الي عندك متسكره مره

[جمس_454_97]

اول شيء فيه ابرة تقدر تقيس ضغط البنزين تعرف مقدار ضغط البنزين اللي جاي من الطرمبة
ثانيا:جميع الطرمبات الموجودة في السوق مضروبة بمافيها طرمبات الوكيل والحل طرمبة ديلفي
ثالثا: الطرمبة لابد يكون معها فيش لأن فيش اللي جاي من الظفيرة يحترق ، شف الطرمبة تحت يجي معها فيش لإصلاح الخلل، يعني لازم تغير الفيش
http://www.mekshat.com/pix/upload05/images241/mk11979_f.jpg


بعد التركيز بمشكلتك انصحك تتابع اخوي ماجلان فعلاً السلك يسوي المشكله هذي
وعلى فكره هذا خلل مصنعي واخوي ماجلان له الخبره بالموضوع
والفحص يقولك فيه مشكله بالاسلاك

[ابو عاذر]

اخوي تأكد من محرك بوابة الثروتل الكهربائي ( يقوم بغلق وفتح بوابة الثروتل اثناء الدعس على دواسة بنزين ) يا أن تكون فيشه فيه توسع مع الحرارة يفلت او انه يحتاج الى تغيير .

مع تحيات اخوك ابو عاذر

[مضارب سيارات]

السلام عليكم

لديك حساس الكرنك ونظف حساس الهواء والله يسهل امرك

[عبدالرحمن السالم]

ابو سعود ، هذا من الثروتل
يبي له تنظيف ، عاداً اذا جاه كربون يسوى كذا يكتم الموتر ولا يخليه يمشي
وحتى الحساس إلى على القربه زي ماتفضلت نفس الحكايه يسوي كذا ، لكن لا تنظفه بيدسلكو نظفه بحق الالكترونيات

موفق ومبروك ماشريت

[العنقري]

شوف اخوى من خبرتى بالجموس وقرأتى للردود فخراب سيارتك من الطرنبه كما ذكر للك فى الرد رقم 3 بدون لوحات وماجلان
عند شرئك طرمبه اشتر من الجميح مع ضمان 3شهور