رأس أبو قميص

[هلبان]

السلام عليكم ورحمة الله وبركاته
ان ناوي اتوجه انا والشباب الي رحله الى رأس أبو قميص
ودي بفزعتكم في الحداثيات وهل الجو ليام هذي برد ولا حر
وكيف الصيد البحري مناسب هذي الأيام
وجزاكم الله خير

[منصور العاطفي]

هلا بك أخوي هلبان
ونقلت لك هذا الرد من موضوع سابق لعله يفيدك
وتقبل تحياتي


السلام عليكم جميعا

بخصوص راس ابو قمبص كان من افضل الاماكن للصيد
لكن ايامنا هذي الوضع تغير جدا واصبح الذهاب غير مجدي
يعني اذا تفكر تروح لاتحسب على صيد ولا يكون همك الاول
طبعا كل كلامي من واقع تجربه وادمان للذهاب الى ابو قميص
وفي نفس الوقت اقول الرازق رب العالمين ومحد يعرف وشو رزقه

الطريق
من الاحساء متجهه الى دولة قطر او نقول مركز سلوى مركز سلوى مجاور للجمرك حق دخول قطر
تذهب هناك للتصريح للدخول ويكون عندك صور و(اكرر) صور لبطاقة الاحوال المدنيه واستمارات السيارات
ورا تاخذ تصرح لمدة72 ساعه

بعدها تعمل رجوع وكأنك رايح للامارات متجه الى منفذ البطحاء وهذا الطريق مسافته 80 كيلو الى ان تصل الى دخلت راس ابو قميص وتكون على جهة اليسار وراح تشوف لوحه مباشره مقابل الدخله مكتوب عليها راس ابو قميص تدخل معاها وهذا الطريق سيء جدا من كثر الحفريات مسافته 33 كيلو الى ان تصل الى نقطة التفتيش وهنا لازم يطلعون على التصريح ويمكن ويمكن يفتشون السياره وكثير من الاحيان ما يكون تفتيش
بعدها اعتبر نفسك في راس ابو قميص وخير نفسك وين تبي تخيم وتراني ما انصح بالراس شوف لك مدخل 29 وهذا المدخل قبل الراس

طبيعة المنطقه ا
المنطقه صخريه وفيها تغريزات بس لو مشيت على الطرق اللي مرسومه من مرور السيارات مافي مشكله
وكن حذر ياحلات الدبل هناك تمشي وانت مطمئن وانصحك لوكانت هذي اول مره تروح فيها حاول واجتهد تكون بالنهار يعني لايصادفك ليل عشان تعرف وين تروح ولا تنسى انك بتروح اول الشهر يعني يدك ممكن ما تشوفها من الظلام والمنطقه موحشه جدا وفيها الحصني بس ماعندك مشكله
وانتبه من الزواحف

بخصوص السقيه والثبره
انا اعتبر هذه المنطقه ما فيها قانون للثبر او السقيه
مره السقيه عاديه ومره تكون غير عاديه ويوصل الماي الي الزفلت والثبره توصل الى 300 متر واكثر

بخصوص الطعم
انا ما عجبني غير الخثاق واذا ودك تضمن بأذن الله صيد استخدم التطير واذا على السنانير ترى الوضع صعب الا ما شاء ربي

التجهيزات
في مركز للتموين قبل ما توصل الى الجمرك ممكن تقضي مقاضيك وتعبي بانزين
يعنني محطه متكامله ولازم تعرف ان
المنطقه تفتقر الى ابسط الامور
لازم تكون محتاط للثلج والماء والاكل وياريت تاخذ معك جركل بانزين ممكن تصرفون لانك جديد على المنطقه
والاكل وكل شي لازم يكون متوفر

وعسى ربي يوفقكم وتصيدون صيد وفير

واذا ما كان هناك صيد حاولو تروحون الكويفريه
وطريقها وكأنك بتروح البطحاء تبعد عن مدخل بوقميص 42 كيلو بعدها بتشوف رصيف اعمل معاه يو تيرن وكأنك بترجع سلوى 50 متر وتدخل يمين في مبنى والتصريح من عندهم وسريع جدا ياخذ منك بطاقة واحد منكم واذا طلعتو ترجعون تاخذونها
والمنطقه احلى مافيها الجسر لسلاح الحدود
والبحر مفتوح وماعمري رحت الا وربي يزقنا وصيدنا وفير بس المشكله التخيم ممنوع والجلوس على الجسر ممنوع
عندك الى الساعه 6 المغرب فقط
والجسر اذا تعرف احد يمكن يخلونك تصيد لان في وقت سابق كان الصيد مسموح
وانتبه للزواحف لان المنطقه مليانه من الحيات والعقارب

وعسى ربي يحفظكم


ولك مني الف تحيه
واذا بغيت اي استفسار تفضل وانا بالخدمه

[هلبان]

مشكور على المعلومات كفيت ووفيت ياأخ منصور
الله يعطيك ألف عافيه

[هادي العنزي]

الله يعطيك الصحة والعافيه