عادة سرقة اجهزة الكراوين ( وحل مشكلتها )

[المنصووووري]

السلام عليكم



بداية يسرني في هذا الصرح الشامخ ان اقدم لكم تحياتي



وموضوعي اليوم عن الناس الي يتجرؤن على سرقة اجهزة الكراوين



مع بداية رجوع الكراوين .. وأحذر كل من يحط الجهاز انه مايبتعد عنه


لان بعض الناس مايعرف الحرام ... من يسمع صوت الجهاز مشى على الصوت


حتى يحصل الجهاز ويسرقه .. لاحول ولا قوة الا بالله


انا صار لي الموقف هذا قبل اسبوع(وسبحان الله الحلال مايضيع)


كنت حاط الجهاز قريب من الديره يبعد خمسة كيلوا متر والجهاز كان له توقيت


يعني تقدر تضبط التوقيت على اي ساعة يشتغل وعلى اي ساعة يطفي


المهم انا حاط التوقيت على الساعة اربع الفجر ويطفي الساعه السابعه صباحا


يوم جيت للجهاز تقريبا الساعه سبع وربع مالقيت الجهاز وصورت جرة السياره


بالجوال وخليته معي وتبعت جرة السياره لكن للاسف جاي مع ازفلت وشال الجهاز


ورجع مع ازفلت ماقدرت اعرف وين وجهة السياره ..


المهم بعد اسبوع جاني ولد عمي زيارة في بيتي وتقهوى بعد ماطلع طلعت معه


وشفت السياره الي معه غريبه قلت له من سيارته هذي قال سيارة
وشفت الكفرات قلت هذي السياره الي شفت جرتها عند جهاز الكراوين ...


قال هذي السياره يداوم فيها اكثر من شخص .. قلت تقدر تطلع لي من


كان يداوم في السياره هذي في اليوم الفلاني ... قال لي نعم قلت خلاص تأكد وكلمني


المهم شوي دق علي قال كان فيها فلان وفلان مستلمين السياره نوبة اخر الليل قلت بس هم الي شايلين الجهاز


وانا اعرفهم شخصيا ... حسبي الله عليهم ..


المهم قال لي الموضوع عندي انا بتفاهم معهم .. هم كانوا نازلين اوف


المهم بطريقته الخاصه ... طلع الجهاز من عندهم .. بس لو اشرح الطريقه بطول عليكم اكثر ...


وبعد تقريبا ساعتين كلمني وقال الجهاز جابه الله ..


(((والغريب)))


أن ولد عمي سأل هذا الي شايل الجهاز


قال له ليش تشيل الجهاز ؟؟


قال والله انا سمعت الجهاز قلت يمكن احد مضيعه


في البر وقلت اشيله وأدور على صاحبه وين :eek::eek:!!!..


ههههههههههههههههههههههه


والله انه مايستحي على وجهه



وعمره 27 سنه


والله غريبه في هذي الايام
في اي بنك تصرف هذي


والان نريد من الشباب يخترعون جهاز تتبع لجهاز الكراوين


لكي لو احد شال الجهاز تقدر تحدد مكانه


مثل جهاز تتبع الصقور بس يكون مسافته قريبه وحجم


الريشة مثلا او القطعه تكون صغيره جدا وتوضع في الجهاز


لكي لايراها السارق ..


وهذي ابسط الحلول ...


سبحان الله وبحمده سبحان الله العظيم

[لعيون مكشات]

ناس لا تحلل ولا تحرم مع ضعافة نفس
في طريقه تربط الجهاز بخيط حق صيد السمك النايلون
وتمده لمحلك وتربط في راسه جرس اذا احد حركة وانت نايم ينبهك
طبعا اذا كنت عنده قريب

[ثويني]

ياخي الحل الوحيد إنك تشغل جهازك وتنام عنده وشوله تشغله وتخليه واذا انت مضطر انك تروح وتخليه ياخي أستودع الله سبحانه وتعالى اللي لاتضيع ودائعه على جهازك وانا أأكدلك إنك راح تلقاه بمكانه بمشيئة الله تعالى.

[ابوعزيز2007]

احمد ربك يارجال انه جاء الجهاز والحلال مايضيع وانا اخوك لاكن انك ذيب يوم اتصور جرة السياره

[أبو شرين]

أخوي الجهاز هذا وش يستخدم له

وليش يحط في البر

معليش على الأسئلة

[@قرناص@]

حيااك الله ،،

افضل حل ترقد عند الجهاااز ،،

[falcon 1]

لا حول ولا قوة الال بالله
ناس ما تخاف الله

في طريقة باذن الله لكن ماني متاكد
اسال فالموضوع واتاكد وارد عليك ان شاء الله

[(هزاع)]

يعني لو يشتغل بالبلديه ولا الصحه ولا اي قطاع ماراح ياخذه
ليس مهم وين يشتغل هو وذمته ان كانه صادق يحسبه طايح من سياره مايعرف بالصقاره ممكن ليش لا
ونكان انه يعرف فليس من الضروري ذكر مكان عمله
او قبيلته لان السيء سيء في ذاته لاعلاقه لمكان عمله او منهو ولدله
تلاقيهم خوان واحد ونعم والثاني يادافع البلا

[الصحافة 15]

الاجهزة هاذي بتقضي على الكراوين بتطلع كانها حباري من قلها

[شاهين2]

الله المستعان
بسبب هالسرقه قمت انام بالبيت واقعد الساعه 3 الفجر واروح احط الجهاز وابعد عنه 300 متر :)

[حمد العذبي]

وسجل عندك جهازي انسرق قبل كم يوم والمشكله اني عرفت اثر السياره وجاتني في المحل يشتري حمام لاكن تقديراً لشيبانه وقبيلته الي مشهود لهم بالعلم الطيب ماقدرت اقول له شي!!

لاكن مشكلتي اني خايف لا يشك اني ماعرفته ويدنع في السرق ويستمر في السرقات والعياذ بالله

[ابوماجد6641]

الحمدلله على ألعقلان. ونا بعد انصرق على جهاز مع بطريه جديده مايمدني والله رحت عنه ساعه رجعت مالقيته والى راح راح لكن المشكله ونا أخوك الحين أنا أحط جهاز للكراوين في مكان معين وفيه ناس متقعدتلي جاهم خبر اني القا كراوين في المكان الى أحط فيه الجهاز وصارو مايفارقونه ابد يحطون ثلاث أو أربع أجهزه وذا جئت لجهازي أبي افتر عليه إشوي والله مايمديني أخاف ابعد عن جهازي أطيح بجهزتهم والله ثم والله أني إعاني حيل

[احمد الحاسي]

السلام عليكم لاحول ولا قوة الا بالله ناس ماتخاف الله

[صاحب نوماس]

والله لو تحط فية بالعذابين اذا رادلة الله سرقة راح

الطير وهو طير يطبح عندهم ثواني يطفون ريشتة فما بالك بجهاز

[عناز الحره]

الله المستعان

[صقرالحروب]

ماشاء الله عليك اللي ثبت جرة السياره

[أبوراشد42]

وربي دناءة نفس وخساسة وقمة في الحقاره .... وش لك بحلال الناس

ثم يااخواني التوقيت يسبب مشاكل

لان اللي يجي حولك مايدري ان حوله جهاز

شووري عليك انك تشغله من اول ماتحطه

وتحياتي للجميع

[saqr34]

حمد الله على سلامتك جهازك .. وانصح اخواني الاعزاء لجميع من يمتلك جهاز الطيور يجب وضع الجهاز

بعيد عن العربان ويكون بمكان خالي لان صوت الجهاز مزعج وصوته مداه بعيد ..ومن الاخلاق والاحترام

ان تضع جهازك بعيد عن الناس وخوفا ايضا من السرقه .. لكن مهما كان ايضاً لا يجوز لأي شخص يمد يده على

شيء ليس من حقه .. تحياتي

[عاشق البانيلي]

والله انه مشكله كبيره

والحمد لله انك لقيته

لكن صراحه نبي لنا حل ننام وحنا مرتاحين من السرقه

وخصوصا اذا مر احد وسمع الجهاز قعد يدور عنده والا لا اصبحت لقيتهم يقنصون عنده

[قرناس شماالي]

والله يالغالي بحياتي ماسمعت بتخلي الجهاز

والمثل يقول الحلال المسيوب يعلم الناس الصرقه

ومثل ماتشرف ابوخالد بقولت نم عند الجهاز ابركلك

[الرقعي]

الله المستعان عزالله ماهو بخير الي يسرق حلال الناس

[عادل العيباني]

طيب هالحين ما اقدر احط شريحة الجوال داخل الجهاز واخذ رقمها التسلسلي علشان تسهل عملية تحديد موقع الجهاز عندي جهاز والسرق عندنا كثير يادفع البلا ناس يسرقون الورع من بطن امه الله يكفينا شرهم صرت اسهر واسبر الجهاز واذا اصبحت قامت عيوني تغامص ماهي حاله ذي افلسنا من الحبارى والكروان والجهاز ماعاد لنا حاجه بنقلة الطير

[رعد سدير]

مبروك العقلان
علمني وين تحط جهازك علشان احرسه لك ..<<ناوي الزرفه:D
حلات الصيد بدون اجهزه .,والي كاتبه الله بيجيك .,

[The Prince1]

أخوي الجهاز هذا وش يستخدم له

وليش يحط في البر

معليش على الأسئلة

أول مرة أسمع بهالاسم!!!

ياريت لو تجاوبونا أنا والأخ. وشيطلع هالجهاز؟ واذا في صورة يكون احسن

[راعي الفيوجن]

الله يعينكم
لاكن لاتبعد عن جهازك خلك حوله
وبعدين فيه مناطق تدري من يجيها غيرك عشان كذا احتط منهم

[راعي الحرارر]

لاحول ولا قوة الا بالله

[شاهين2]

أول مرة أسمع بهالاسم!!!

ياريت لو تجاوبونا أنا والأخ. وشيطلع هالجهاز؟ واذا في صورة يكون احسن

اخوي البرنس
الجهاز هذا يطلع صوت مثل صوت الكروان والفري والقطا واغلب الطيور
ويحطونه القوانيص بالبر والصبح يلقون عنده كراويين ويهدون عليها
وسلامتك

[FalConer_Qtr]

حركته مهب ذربـه ... والله يسامحه ..

العام
كنت ممسي الا حروة الساعه 12 ليل اشتغلت عند راسي ورحت سكرتها وكتب على الرمله مايجوز ان تحطها عند رؤوسنا نبي نمسي الله يجزاك خير ..
ويوم صبحت صوايته لقيته كاتب على الرمله ابشر على ذا الخشم ^_^

[شقردي الجبيل]

وعليكم السلام انا كنت في المخيم يوم الجمعة فجر وانا اسمع صوت كروان يصيح وزعجنا طول ليله وهو يصيح الله يهدي راعيه ترى طلع جهاز لمهم انا صحيت من النوم صباح حولي ساعة خمس ونص وصوت مواقف وقال واحد من الربع ترى صوته ازعجنا من ليل وهو يصيح ويوم جات ساعة 8.00 صباح قلت اشوف وين مكانه وفي نفس الوقت اتماشاء علينا غيم ولجو حلو وجيت على صوت جهاز وشفته ماعنده شي من الكروين ترى مانزلت من سيارتي وروح اتماشاء على الجيب انا ولد عمي وعودة مخيم ساعة 11.00 ظهر وهو مسكات ياجمعات الخير راعي الجهاز سولنا ازعاج وهو نايم هذي مشكلة انا اقدر اطفيه وتركته قلت حرم راعيه يجي ويلقه مسكر والله يبعد عنا الحرم ان شاءالله

[ابو وريف 99]

مبروك عقلان الجهاز وما عطيت ولد عمك قضابه للجهاز >>>>> فاهم غلط ههههههههه امزح

والله مشكله بعد تحط الجهاز وتغيب عنه ساعه وترجع ما تحصلـه .. وما تقدر تظلم احد انه سارقه .. ومثل ما قالوا اللي اخذوا الجهاز ما يدرون لمين وسمعوا صوته ويعتبر لهم نادر جهاز وفيه اصوات .. الحل الاكيد انك تنام حوله وحواليـه ..

[رعد البوادي]

لاحول ولا قوة الا بالله

[ALROGY]

اظن فيه حل بسيط لربما ينفع

الان برامج الحماية الخاصة بالجوالات فيه خدمة تحديد الموقع في حال السرقة.
تقولوا كيف.؟
اذا ركبت البرنامج على جوالك وفي حال انسرق ترسل رسالة على الجوال برمز محدد والجوال يرسلك احداثياته على اييميل او على جوالك

الحل:
بالامكان تأخذلك جوال وتثبته داخل جهاز الكراوين اذا هو يستوعب جوال داخله وحط الجوال على الصامت وفي حال انسرق جهازك ارسل رسالة على جوالك الي بداخل الجهاز وتجيك الاحداثيات وسلامتكم
ملاحظة يفضل انه الجوال يكون فيه خدمة الوسائط و gps

وبخصوص البرامج ارشحلكم برنامج Kaspersky حلو جداً وحالياً انا استخدمة لتحديد موقع السيارة لانه فعال في مثل هالحالات .

والله يكفينا واياكم شر عيال الحرام

اخوكم عبدالله الروقي

[غريم]

الحل الوحيد عندي مالكم الا تدفنون من دون الصوايه قضاعة ثعاله خلها تعطب رجل السروق اذا جاها واي واحد بتعين رجله مجبره من اللي انت شاك فيهم بيطلع هههههههههههه السارق على راسه خياله:good2:

[طير طويق]

الحل الوحيد عندي مالكم الا تدفنون من دون الصوايه قضاعة ثعاله خلها تعطب رجل السروق اذا جاها واي واحد بتعين رجله مجبره من اللي انت شاك فيهم بيطلع هههههههههههه السارق على راسه خياله:good2:


ههههههههههههههههه
والله الاقشر ههههههههههههههههه