مشكله بالطير يربع [الأرشيف]

سيف العلا

26/02/2012, 09:18 PM

مسيكم بالخير جميـــــــــــــــــــــــــــــــــــــــع

الزبده عندي طير وكري بارد دربته ولا يجي لا على ملواح ولا حمامه حيه ولا ميته

الا بالقوه او اطشه له مره واحد بس يجي وكنت اربطه بسبب طويل قالو امكن عشانه الحبل مربوط فكيت السبب وطار ويالله جبناه غير حذفنا الملواح له سماء وطمرته يومين وضعف الطير ولوحت له ولا جا غير حذفت الملواح ويتفلا ولا كنه شايف احد هاذى الي ذبحني الطير هاذى نفسيه والله يرجال جنني
وبارد الطير يعني ماهو حار ورحة فحصته وخالي من الامراض مافيه غير الفصفصه للعظام عطيته موميان وعطيته سكر نبات ونفس المشكله

يعني اشنذره ولا كيف الي مر عليه الحاله هاذي وعالجها يعلمني الله يجزاه خير

والله منزلت الموضوع هاذى الا ونا شايب راسي من الطير

سيف العلا

26/02/2012, 09:20 PM

صورة الطير المجنني الي بتوقيع اليسر

راعي الحرارر

26/02/2012, 09:30 PM

يا سيف العلا اول شي كيف الطير شره على العلف ولا لا اذا فيه شراها لا تعطيه شنادر لكن اذا علفه ضعيف عطه شناذر .. اما بالنسبه للموميان ماله داعي تعطيه لانه يعطى للملع

قرناس شماالي

26/02/2012, 09:42 PM

انت مشنذر الطير؟؟

وهل هديته على حمامه مندون سبب وتلويح؟

واتوقع الطير مايعرف الملواح نهائي

سيف العلا

26/02/2012, 10:43 PM

الطير معنده مشكله جيبله حمامه حيه وجيبها له يكلها كله مايبقي شي بس هو مايهد ها يعني اقربها له

والطير ماهو مشنذر ابد ابد والملواح اعيونه له بس مايجي وعلفته على الملواح اربع ايام طير نفسيه او يستهب

سيف العلا

26/02/2012, 10:44 PM

عطوني حـــــــــــــــــــــــــــل

////عصويد////

26/02/2012, 11:11 PM

ابشر بالحل الوكري والحر اذا مااهنته والا مايعطيك يعني نزله الى اخر شي لين تشوفه يتمسس وهومبرقع ويدور العلف دواره وبعدين ارفعه شوي شوي لين تطيح على وزنته في الهدد خذالعلم من واحد مجرب والله مايسلك لين تعطيه من الاخر ولاتعامله على انه شيهانه ترا الوكري ماعليه من الجوع يعني لاتخاف عليه لو تطوفه ثلاثه ايام ..

سيف العلا

26/02/2012, 11:44 PM

يعطيك العافيه ياعصويد وجزاك الله الف خير ونا مطوفه امس

عادل العيباني

27/02/2012, 12:37 AM

عطاك العلم دق حاله لين تشوفه يتهبش بالبرقع ويحول من الوكر يدور العلف وشنذر بس تاكد انه سليم من الامراض قبل كذا لا تصنعه ابد لين يطيح اللي براسه

سطام ابو سعود

27/02/2012, 12:53 AM

اذا تبي آلحل وآنآ آخوك عرضه السسسوق وآتعب على طير يستآهل آلمخآسير وسلآمتك

قرناس بيتي

27/02/2012, 01:09 AM

ان طعتني قطع سبوقه وهده .... دور على طيرِ يعوق المخاريش ......... الوكري وآنآ آخوك طول عمره وكري مايسوى ربطته بعد الكراوين هذآ رآيي يالغالي وآتمنى تقبل وجهة نظري

الرقعي

27/02/2012, 01:28 AM

راي انك تشنذره

سيف العلا

27/02/2012, 03:44 AM

يعطيكم العافيه واشكركم على الردود الراقعي شكلي ابي اشنذر

والله ياقرناس بيتي انك صادق بس فيه وكارا العام ياجلدنا عليه من الكروين جلد بس انا على قد حالي

تخبر الحرار الزينه غاليه وسعارها خياليه والرخيصه متخلا من العيوب

محمد المساعد

27/02/2012, 08:00 AM

اسمع ونا أخوك ابيك تجرب معه طريقه وبذن الله تغير نفسيته 3ايام

طوف الطير يوم وبعدها عشه حمامه كامله والصباح قبل الساعة 8 جب مقدار فنجال ماء مخضوض فيه مره

وبالبرواز فى حلق الطير شبعه ولاحظ الطير إذا رد عشاه البارح كامل ممتاز علاطول عطه ماء شرب بس لا تكثر

بعدها بنص ساعة أذبح حمامه وعطه حبتين قلاع مع ثندوه ويكون عندك شراب من الصيدلية البشرية بنزلك صورته
قيمته 39 ريال تسحب 2مل وتحطه بفم الطير ....وخله مكشوف لا تبرقعه

الطريقه هذي ونا اخوك الله دلني عليها بطيري غالي وبغا يروح وبفضل الله قدرت اني اتبع الى كتبته بالحرف وبدون توجيه من احد سواء الشراب

الفضل يعود لله ثم الدكتور البراء بس هو وصاني على حبوب ونا ماحصلتها

وترا جربت الشراب لحله على طيور أخوياي الصقارين واذكر ان فيه طير تعب معه راعيه قرناس

يشهدالله شوف عيني وهي جرعه وحده الى اخذ انه يصخر الحمام تصخير ورجال يدعيلي بعد ماشاف النتيجه

هذي صورة العلاج ووصي جميع الصاقارين فيها وهو علاج لتقوية المناعه عند الانسان
http://im12.gulfup.com/2012-02-27/1330318740951.jpg (http://www.gulfup.com/show/X3clq125m1i7d)

م العجمي

27/02/2012, 08:04 AM

عش الطير عشى طيب عطه الثنادي

والى جاء اليوم الثاني اخذ لك كبسولاات بيض . شناذرا طبيه

وحطها في حلقه الثنتين سوا

وعقبها عشه وخله في دفاء ولا عليه خلاف ان شاء الله

ابوعزيز2007

27/02/2012, 09:44 AM

والله اتوقع انه تبي شنذره وعليك بالشناذر الصحي الكبسولات وبعدين عندك عيادة مكشات مثبته فوق للدكتور البراء مهب مقصر ان شاء الله معك

سيف العلا

27/02/2012, 01:57 PM

محمد المساعد بيض الله وجهك ونشالله ابي اجربه عيه بذان الله وجزاك اله الف خير على المعلومات والله يحفظك

سيف العلا

27/02/2012, 01:58 PM

م العجمي يعطيك العافيه الشناذر الطبيه اوا الشعبيه اعطيه

سيف العلا

27/02/2012, 07:45 PM

للرفععععععععععع

عابر الموج

27/02/2012, 08:08 PM

ماقصرو الاخوان لكن الي اعرفه وعلمونا الصقاقير الي قبلنا اذا الطير صد عن الصيد شنذرة بالشناذر الخام لكن الطير وحش ولا بيتي اذا كان بيتي شف راعيه الاول اذا تعرفه يعلمك بطبوع الطير وترا الطيور التبع دائما اواغلبهن فيهن هالطبع واي شي بخدمتك ج 0556663362 تراي ماني بعيد عن منطقتك تقبل تحياتي

سيف العلا

27/02/2012, 08:19 PM