في محلات الرحلات..ذبح من الوريد الى الوريد

[ضحية بيشة]

معقوله ياشبااب


نويت اشتري فرشة للبر تكون مبطنة بقماش تنزاني

طبعا رحت لمحلات الكشتات لقيتها بين 200و180ريال تقريبا بحجم 2في 3

وبالصدفه مريت محلات الخيام بالغرابي وانصدمت يوم حصلتها بسعر 120و115ريال

معقوله للدرجه هذي الفرق لايهمكم احد يقول القماش والنوع والخرابيط كلها نفس بعض

يقولك فرشة تركيه وهو وطني اللي بالسوق كله واقوول لاصحاب المحلات اعقلووو وخلو الاستغلال

محلات بنقاليه ارحم منكم ...:mad:

[مكشات 999]

شكرا لكـ ع التنويه .... بارك الله فيكـ ....

[أبو هشام راشد]

اتفق معك في الفرق الشاسع للسعر

وبما انك وصلت للبنقالية اطلب منهم مواصفات خاصة كقماش تنزاني وتدبيل الخياطة ومقاس ٣x٤ ستجد السعر قرب لل ٢٠٠

اخي اشترى ب ١١٥ فرشة مبطنة ومحبوكة وشغل اعجبني وبنفس المقاس اشتريت ب ١٦٥ ولكن لم تحبك ولكن الفرشة تختلف في الخامة

كذلك اشتريت ب ٨٥ شغل معقول ولكن المقاس شوي ما اعجبني بسبب انه ١٧٠x٢٧٠


وشكرا على تنبيهك

[بيت الطين]

الان لو شريت فرشه مقاس 2.5 في 3.5 ورحت لهم هل يفصلون لها شراع وكم التكلفه وهل اجد عندهم مثل هذا المقاس

واتفق معك باستغلال محلات الرحلات بالاسعار

[web]

السلام عليكم

اتفق معاك في جزء رفع الاسعار نفس الخامه الموجود بالغرابي عن سعرها بمحلات الكشتات
واتفق معك بارتفاع اسعار المفارش الي توصل في المحلات فوق ال500 ريال

اختلف معك بان الفرش نفسها وهي بالاصح تختلف واسئل مجرب
خذينا من الغرابي وفصلنا في الغرابي وشرينا المفرش ولبسناه تنزاني بالغرابي بارخص الاسعار بس صدقني تختلف كلها عن مفرش الفصولا الاربعه او الامريكيه المستورده صدقني الي عندنا تطقطق حنوكك من البرد وانت داخل الفراش المفصل في الغرابي
اما الامريكيه فرق السماء عن الارض يارجل من تدخل دفي بس ارخ الريال على قولتهم لان اسعارها شاطحه وفراش الفصول الاربعه قريب من هالمنتجات جداً

[ابورايف]

كلامك صحيح
أشتريت قطعتين كما تفضلت بـ90من أبدع مايكون
لها الآن معي ثلاث سنوات
أشكرك على طرحك للموضوع
تقبل مروري

[ابو طلال .]

الله يعين يارجال الغرابي ارحم منهم

[أبوسعد111]

صدقت أخوي بماذكرت
وترى حتى البنقالية ألي بالغرابي إذا مايعرفك مايعطيك سعر مناسب
وإذا بتجيه بالشتاء ما يعطيك وجة أصلاً لأن عليهم ضغط
ويغشون ألي مايعرف بالاقمشة يعطونه الصيني الخفيف ويقولون له انه تنزاني
وحتى التنزاني درجات وأنواع إذا ماتعرفها بيغشونك
والافضل والاسلم لك
أنك تشتري زل مثل ألي عند محلات التأجير صناعتها سورية ماتتعدى الـ50 ريال
وفصلها من تحت قماش خارجي متين عازل للماء وقوي ما يتشقق بسرعة من الاشواك

وبالتوفيق

[qazx0sw0]

اتمنا ممن يقول ان البنقالي عنده تنزاني ان يذهب للبنقالي وياخذ من قطعه من قماشه التنزاني اللي يقوله لك ولغيرك ويدخل علي السنيدي اللي موجود بنفس الشارع ويطلب نفس الخامة وش رد السنيدي وش راح يكون ( قماشك باكستاني ) وهذا مايقلل من جودته نوعيته حلوة بس فيه فرق بالسعر واسئل وتعرف
السحاب انواع ومقاسات
الفرو انواع وصناعات
الخيط المستخدم انواع
بالنسبه لك ماتفرق لاكن غيرك تفرق معه

[جمس z71]

صدقت والله يالغالي..

في الغالبية الاشياء الللي تستطيع تشتريها من غير محلات البر تكون ارخص بكثير وافضل
يعني مثلا : الاواني من قدور وصحون وغيرها تلقاها في محلات البر جودتها رديئة وبسعر خيالي
واذا رحت محلات الاواني لقيت انواع كثيرة وبجودة عالية وباسعار مناسبة... وكذلك الفرشات وغيرها الكثر..

(( لكن ليس دائما ))

[غانم الوافي]

صـــــــــــــــــادق هذا استغــــلال لابد من محاربة رفع الاسعار

[سليمان الصقر]

البنقالي بالفك بالفك ولا هو جاين علشان يخلص لك ولا هو جاين على شان سواد عيونك جاي على شان هالريال اللي بمخباك اما شبابنا أهل محلات الرحلات والله ما شفنا منهم إلا الصدق والشغل الزين والنصح والكلام السنع وترى شبابنا والله إن همهم الأكبر بياض وجيههم وسمعتهم بين الناس وخلك من هالبنقالية اللي لا يعرفون حلال من حرام وترى كل شي معروف ثمنه والناس ما يخفاها شي ، شف الصين تصنع القطعة الوحدة بخمس أنواع من الجودة مثلا الساعة يصنع لك منها خمس نسخ وكل نسخة مستوى معين من الجودة وكل وحدة لها سعر خاص بحسب جودتها فتلقى الأولى بخمس ريال والثانية بخمسين ......... والخامسة بخمس آلاف وهكذا .
صدقني أسعار محلات الرحلات بمستوى الجودة اللي يقدمونها جدا معقوله ، وش تقول لو تشوف الأسعار عن محطات البانزين اللي في طرق السفر والمنافذ ، أبو يمن وشلته صناعة رديئة وأسعار غالية جدا جدا جدا تخيل لمبة عند السنيدي ب 7 ريال وعند أبو يمن بالمحطة ب 35 ريال يكفيك قاعدة اليمنين المشهورة ( الحلال ما حل في اليد ) الله يرضى على ربيعنا محلات الرحلات والله يكثرهم ويكثر من أمثالهم .

[الشوق بحر]

الله المستعان
لكن ما لاحظته بعد عدة زيارات لاكثر من اربع محلات متخصصة ومتجاوره ان هناك منافسة في الاسعار
واتمنى لهم كل خير

ولكن يمكن انك مريت على محل منفرد وعمالته اجنبيه !
ولك ودي وتقديري

[ضحية بيشة]

ياشباب رجاء لحد يشكك بكلامي بيننا السوق انزل وشف بعينك و انا ماني جمعية خيرية للتجار السعوديين العتب عليهم وعليكم بعض الرجال بحل يالحريم كل شيء يضفه وبأي سعر تقول يكد للكويت وهو راس ماله خريم وطلعه وحده بالسنه...

[مسفر الاكلبي]

يا ضحية بيشه لا تشكك في نفسك انت صدوق وكلامك واقعي والربع الي ردو عليك فوق هم اصحاب محلات ومصالح افهم يافهيم

[لاتكب البيالة]

يا جماعة اذكروا الله
الصدق ان المحلات تقصب في كثير من الاشياء والجودة ردية
والغرابي ارخص بس تبي احد يدور صح
وافضل شي اللي يشري الخامة وويصلحه ويحاسب على شغل اليد كذا اضمن ويسلمن من الغش
كمثال الفرشة 2*3 سعر الجملة له بمستودعات مخرج 17 ب 120 ريال وام نقش ب 130 ريال
الشراع التنزاني سعر متره(عرض 1.3) من السنيدي بالغرابي ب 20 ريال وكان العام يعطيك المتر ب 16
والشغل يبيله 40 او 50 ريال
كذا حصلت على افضل الخامات ولا احد غشك وشغلك بالخياطة بس

[ابا الصلابيخ]

اخوانا السعوديين اللي فاتحين محلات للكشتة

يعتقدون اعتقاد جازم ان بضاعتهم هي الانسب با السوق

ويرفعون الاسعار

اتركهم واترك بضاعتهم لهم غش وتدليس وان كلمته قال وراي ايجار وعمال

وكيف اطلع مربحي الا من مخباتك

[الخولاني]

كلامك صحيح اخي صاحب الموضوع ولا ذبحنا إلا التجار اللي من بني جلدتنا لأن ما يقتنعون بأي مكسب وكل واحد يحسب انه احسن من الثاني

المحلات اللي يديرونها اجانب والله ابرك مكسبهم معقول وشغلهم مضبوط

طبعا إلا من رحم ربي من التجار اللي يهتمون بالعميل قبل المال وهم معدودين على اصابع اليد

[web]

ياشباب رجاء لحد يشكك بكلامي بيننا السوق انزل وشف بعينك و انا ماني جمعية خيرية للتجار السعوديين العتب عليهم وعليكم بعض الرجال بحل يالحريم كل شيء يضفه وبأي سعر تقول يكد للكويت وهو راس ماله خريم وطلعه وحده بالسنه...

ياخوي ماحد مشكك بكلامك وصادق في بعض المحلات تعرض نفس الي موجود في الغرابي باسعار عاليه
بس انا اقولك فيه خامات وانواع ثانيه لاتلقاها لابلغرابي مثل الفصول الاربعه او الدرويش او المفارش الامريكيه
وحتي الثانيه مبالغ بلاسعار جداً فوق ال500 ريال بس علي الاقل افضل بكثير من الغرابي ولو تسوي استفتاء بالمنتدي عن افضل الفرش او تبحث بالمنتدي تلقي الكلام الي اقوله لك فعلا صحيح من واقع تجربتي وتجربت غيري وياليت نرتقي بالحوار الجاد بدون بعض التشبيهات العقيمه او التعصب

[web]

يا ضحية بيشه لا تشكك في نفسك انت صدوق وكلامك واقعي والربع الي ردو عليك فوق هم اصحاب محلات ومصالح افهم يافهيم

معاهم معاهم عليهم عليهم

ليس لي لاناقه ولا جمل لكني منصح من واقع تجربه وابد عليك بالغربي الطيب :D

والحين نتكلم هنا عن الاستغلال والاسعار المرتفعه ومشكلتنا فينا لو تروح خيمة البيع والشراء تعرف قصدي وافهم يافهيم ابد تراها ماهي بعيد فوق نقره

[ابوخالد6]

الله الله رحت للغرابي أيام الموسم في الشتاء شريت الفرشة ب120 بينما في محلات الرحلات على 180 و200

[web]

هذا احد المواضيع في المنتدي ليس كلامي لكن كلام الي جربو تقدر تاخذ فيه فره

http://www.mekshat.com/vb/showthread.php?t=358557

لك ولزمن

[ضحية بيشة]

اخووي web انا اتكلم عن فرشة للجلوس وليس فرراش النوم ...مشكور

[web]

فرش الجلوس ياحبيب البي اشترها من المستودعات مخرج 17 تلقى ب10 وب20 نفس المعروضه في محلات الرحلات لا وبعضها افضل بكثيررر ولا يردك الا الغرابي لبسها تنزاني. :D

[راعي المقانيص]

وش رايك لو اقولك ان عندي فرشة بر مقاسها 6X4 وماكلفتني الا ( 55 ) خمسه وخمسون ريال فقط لاغير

وفرشه مقاس 3X2 ماكلفتني الا ( 20 ) عشرون ريال فقط لاغير

محد راح يصدق لكن اعلمك انت والاخوان كيف الطريقه

اشتريت ياغالي ثلاث فرشات مقاس 3X2 قيمة الفرشة الوحده 20 ريال الفرشات المشجره الصينية الرخيصة اللي تحصلها عند محلات ابو ريالين ومريت حقين مواد البناء واشتريت الطربال الازرق مقاس كبير بـ 15 ريال
الاجمالي صار عندي 75 ريال فقط لاغير
اخذت فرشتين وخيتطها مع بعض عندي بالبيت وصار مقاسها 6X4 وخيطت الطربال الازرق من تحتها حماية عن الماء والطين ولاتنسى بعد خياطة الاطراف تخيطها مع الوسط مثل علامة X علشان ماتفتح مع النص
والفرشه الثالثه خليتها بمقاسها 3X2 والباقي من الطربال الازرق خيطته تحتها وانتهت القضيه
واذا تقول الفرشه قاسيه في الجلوس تقدر تدخل عليها اسفنج اصفر ونفس الشي رخيص لكن ما اتذكر سعره لاني اشتريته مره انا واحد الزملاء لاننا طبقنا فرشه بنفس النظام ولكن بطناها باسفنج
واللي خلاني اسويها لاني شفت الاستغلال سواء في الغرابي والا غيره من محلات الرحلات
واذا ماتتقبل اللون الازرق للطربال خيط قماش صيني ومتره رخيص لكن والله مدري بكم

[سليمان الصقر]

ضحية بيشة هد اللعب شوي ترى المسألة ما هي شخصية المسألة مسألة حوار حول أسعار محلات الرحلات كما طرحت في موضوعك ولا فيه داعي للتوتر والانفعال و ترى ماحد قال إنك تكذب ولا أحد شكك بكلامك وبالنهاية رأيك محل احترام لكن غير ملزم
مسفر الأكلبي وين جبت أقصاك وقمت تدخل بنوايا الناس وأبي أسألك سؤال يافهيم وأتمنى أن تجاوب جواب واضح ومباشر : كيف عرفت أن اللي ردوا على الموضوع هم أصحاب محلات رحلات ؟

[عليان11]

وش رايك لو اقولك ان عندي فرشة بر مقاسها 6X4 وماكلفتني الا ( 55 ) خمسه وخمسون ريال فقط لاغير



وفرشه مقاس 3X2 ماكلفتني الا ( 20 ) عشرون ريال فقط لاغير


محد راح يصدق لكن اعلمك انت والاخوان كيف الطريقه


اشتريت ياغالي ثلاث فرشات مقاس 3X2 قيمة الفرشة الوحده 20 ريال الفرشات المشجره الصينية الرخيصة اللي تحصلها عند محلات ابو ريالين ومريت حقين مواد البناء واشتريت الطربال الازرق مقاس كبير بـ 15 ريال
الاجمالي صار عندي 75 ريال فقط لاغير
اخذت فرشتين وخيتطها مع بعض عندي بالبيت وصار مقاسها 6X4 وخيطت الطربال الازرق من تحتها حماية عن الماء والطين ولاتنسى بعد خياطة الاطراف تخيطها مع الوسط مثل علامة X علشان ماتفتح مع النص
والفرشه الثالثه خليتها بمقاسها 3X2 والباقي من الطربال الازرق خيطته تحتها وانتهت القضيه
واذا تقول الفرشه قاسيه في الجلوس تقدر تدخل عليها اسفنج اصفر ونفس الشي رخيص لكن ما اتذكر سعره لاني اشتريته مره انا واحد الزملاء لاننا طبقنا فرشه بنفس النظام ولكن بطناها باسفنج
واللي خلاني اسويها لاني شفت الاستغلال سواء في الغرابي والا غيره من محلات الرحلات
واذا ماتتقبل اللون الازرق للطربال خيط قماش صيني ومتره رخيص لكن والله مدري بكم


ماشاء الله عليك .. بعدي والله ....

ليت الشباب الي يشاركون يضعون توضيح عن اختلاف الاسعار ( الاختلاف الكبير فقط ) بين المحلات وذلك للأستفادة او الارشاد لمكان او محل يوفر بسعر ارخص ... لأن هذا هو الي يثري الموضوع ،، اما التركيز على الاراء ومناقشتها بشئء من التعصب يغير الموضوع .. ( ومحد مجبور على راي احد ) .

وسلامـــــــــتكم .


:Dصح لسانك :D

[نفداوي]

كلامك سليم
بعض الردود تكلموا عن فرش النوم الرجال يتكلم عن فرشه 3×2 (زوليه)
سعرها في الغرابي من 100 الى 120 وعند اخوانا السعوووووووودييين الي فاتحين علشانا (حسب بعض الردود ) ب 180 الى 200
نصيحه كل واحد يحط باله من مخباته

[عليان11]

كلامك سليم
بعض الردود تكلموا عن فرش النوم الرجال يتكلم عن فرشه 3×2 (زوليه)
سعرها في الغرابي من 100 الى 120 وعند اخوانا السعوووووووودييين الي فاتحين علشانا (حسب بعض الردود ) ب 180 الى 200
نصيحه كل واحد يحط باله من مخباته

كلن له ملى عين بالربح ....

كل تاجر له قناعته في الربح بعضهم يسعى للربح اكثر من غيره وبعضهم يحاول ان ينافس وكسب الاسم بربح اقل .... والسوق مفتوح للجميع .... والرزق من الله ..

في السنوات القادمة سوف يكون السوق مكشوف اكثر بفضل التقنية ، كل محل يستطيع ان يضع بضاعته على النت بالاسعار والزبائن يقارن بين المواقع .. حتى تخرج مواقع بعدها متخصصه في تقييم المنتجات والمحلات ومقارنة الاسعار .
ثم بالنهاية يسيطر عليه المحلات الكبرى التي تستطيع المنافسة بالسعر اقل .

وهذا مايحدث في الخارج وسوف يحدث عندنا قريب ان شاء الله .


يمكن الان رؤية يعض المحلات تعرض بضائعها على النت مثل اكسترا ، جرير (بشكل مختصر ).

[Hamdi_an]

تفاوت الأسعار ظاهرة منتشرة ولا تقتصر على محلات الرحلات. مع انعدام الرقابة صارت المسألة تتبع مزاج البائع. مثال حصل معي من قريب: خلاط باناسونيك، سعره في سوبرماركت بن داود 475، عند إكسترا 437 في سوق الكهربا بالبطحا 320 في محل بشارع فيصل 300 فقط. أخذت واحد، وكان البائع هندي، رجعت بعد كم يوم لقيت بائع يمني وشفت مكتوب على الكرتون 450! خرجت وما كلمته لأنه مهما نزل السعر يمكن يوصله 430 ويمنّ علي بعد!