ما خاب من استشار...تكفون يالنشاما

[رح هس]

السلام عليكم ورحمة الله
اصحاب السعادة والاعضاء ،،تحية طيبة..
موضوعي يتلخص في (فكرة انشاء مخيم عائلي)والمطلوب..التالي:
1. ( افضل موقع للمخيم...) على ان يكون بالقرب من مدينة الرياض في شمالها او غربها تحديداً.
2. (ميزانية المخيم) المقترح(40,000)الف ريال ،،هل تكفي لاعداده.
3. (عدد وكماليات المخيم) اين اجدها.
4. هل يشترط لا قامة مخيم اذن مسبق من البلدية.
5. مقترح او تنبيه يلزم الاخذ به عند انشاء المخيم(لاصحاب الخبرات).
ارجو التكرم بالشور على اخيكم...في ضوء تلك النقاط...
دمتم في خير وعلي خير نلتقي،،،،

[عاليمول]

وين تبي تنشي هالمخيم

[رح هس]

والله الافضل غرب او شمال مدينة الرياض.......زوينكم يالنشما....
افيدوني ماجورين

[مكشاتي مهاجر]

يالغالي الحين مالك الى طريق القصيم اتجه لين يجيك معبر جمال بعد التفتيش

واطلع يسار بتحصل مخيمات هناك الارض حلوه

واربعين الف كافيه انشاء الله

وبالنسبه للأغراض عندك حراج بن قاسم بالعزيزية بتحصل كل شي عندهم

ولاتنسى تعزمنا اذا جهز :D:D:D

[العاذر]

السلام عليكم ورحمة الله
وعليكم السلام ورحمة الله وبركاته
اصحاب السعادة والاعضاء ،،تحية طيبة..
موضوعي يتلخص في (فكرة انشاء مخيم عائلي)والمطلوب..التالي:
1. ( افضل موقع للمخيم...) على ان يكون بالقرب من مدينة الرياض في شمالها او غربها تحديداً.
شمال الرياض عندي أفضل
2. (ميزانية المخيم) المقترح(40,000)الف ريال ،،هل تكفي لاعداده.
كافيه بإذن الله بشرط التخطيط والتدبير الأمثل
3. (عدد وكماليات المخيم) اين اجدها.
على حسب عندك كهرباء سباكة ونحوها لدى المحلات
الفرشات والاواني وهكذا كل حاجة معروف مكانها
ولا يلزم اطلاقا محلات الرحلات ابدا بالعكس ..
4. هل يشترط لا قامة مخيم اذن مسبق من البلدية.
نعم فيه اماكن يقال انها لابد لتصريح ..
ممكن المنطقة مخططه اراضي ..
فلابد تسأل اقرب مكتب عقار ممكن يفيدك
5. مقترح او تنبيه يلزم الاخذ به عند انشاء المخيم(لاصحاب الخبرات).
من خلال تجربتي في اقامة المخيم اهم نقطة ( الأماااان )
بعد ذلك الحارس الأمين .. وامور أخرى ..
ارجو التكرم بالشور على اخيكم...في ضوء تلك النقاط...
دمتم في خير وعلي خير نلتقي،،،،
تحياتي لك

[رح هس]

مشكورين حبايبي،،،،الله لا يحرمكم الاجر
نبي بعد توصيات من الاخوان.....للخروج باكثر نتيجه وحلول

[رح هس]

مامن شور جديد؟؟!!!!

[العاذر]

ايش اللي ما تعرفه بالضبط؟؟

[عاشق السيل]

وعليكم السلام ورحمة الله وبركاته ،،

1 ـ ما أنصحك تسوي مخيم الحين لأن الصيف مقبل !!
2 ـ أنصحك تروح للردمية اللي غرب العاذرية وبعد ما تمشي عليها كيلو أو أكثر شوف المناطق اللي على اليسار رائعة وهادية جدا وبعيدة عن الغبار والدبابات ،،
3 ـ نصيحة لا تكبر مساحة المخيم تراه بتتعبك بأمور كثيرة وأهمها الإنارة ،،
4 ـ لابد من قسمين للرجال والنساء ويكون بينها ساتر لايقل عن مترين ارتفاع ،، قسم الرجال خيمة كبيرة ودكة ودورتين مياه ومغسلتين يدوية ومطبخ مختصر وعند المدخل خيمة للحارس ،، وبالضبط نفس الشي بقسم النساء إضافة لألعاب بسيطة للأطفال وخيمة صغيرة ،،
5 ـ خلف خيمة الحارس غرفة صغيرة لماطور الكهرباء متوسط الحجم ،،
6 ـ تمديد الأسلاك خلها تحت الأرض وتكون متينة والأنوار تكون من الاقتصاديات علشان ماتحمل على الماطور ،،
7 ـ احرص على حارس يكون أمين وثقة وكل فترة ادهن سيره ههههههه
8 ـ خزانات الماء حاول ترفعها علشان ضغط الماء يكون قوي خاصة إذا كنت بتركب سخانات !!
9 ـ الخيام حاول تشتريها مستعملة ونظيفة بتكون أرخص لك بكثييييير ..
10 ـ بالنسبة للمبلغ اللي رصدته يكفي وزيادة وتقدر تتفنن بعد !!!

هذا اللي عندي ولو تذكرت شي ثاني أضيفه بعدين ،، والله يوفقكم ويسهل أموركم .....

[أطلال نجد]

وعليكم السلام ورحمة الله وبركاته
غرب الرياض لا بأس به
لكن كلما أبعت عن الرياض كلما كان المكان أجمل وأهدأ.