عزبة طبخ

[عيون الحيران]

مساكم الله بالخير

اولا احب اشكر اخواني الي في منتدى مكشات لما فيه من فايده و نصايحه تفيد الجميع



قررت اشتري عزبة طبخ و طبعا ما راح اشتريها جاهزه كل شي لحاله لاني ادور على الجوده
ولا ابيها تنقص شي فياريت تفيدوني الاشياء المهم وجودها حتى لو كانت غير مهمه لاني زي ما قلت ماابيها تنقص شي

منتظر ردودكم

اخوكم عيون الحيران

[عاشق السيل]

مساك الله بالنور والسرور ،،

أغراض عزبة الطبخ كثيرة جدا ومتعبة بعض الشي وتعتمد على حسب عدد أعضاء الرحلة وعلى نوع الطبخات اللي تفضلها أو تعتمدها دايم برحلاتك ،،

وبقولك أهم شي بالعزبة : عدد 2 قدر كاتم صغير وكبير ، عدد 2 صحون كبيرة ، عدد 2 قدر عادي وسط وصغير ، عدد 3 بوادي متوسطة الحجم أو ما تسمى ( حلة ) ، واحد ملاس مشخل وملعقة كبيرة ، عدد 5 ملاعق أكل ، مشخال لغسل الرز ، علب للملح والبهارات المطحونة والبهارات الصحيحة وعلبة كبيرة للدارسين والليمون الأسود ، وقارورة للزيت ، عدد 4 بيز ، سكين كبيرة للحم وسكين مشرشرة للخضار ، عدد 2 بلاستيك للتقطيع ويفضل اللي يجي معها وعاء !!

بالنسبة للأعداد ممكن تزودها أو تنقصها حسب احتياجك ،،، هذا اللي جا على بالي وأكيد فيه زود وبيطلع معك النقص في كل رحلة .....

[عيون الحيران]

مشكور وما قصرت اخوي عاشق
وننتظر مقترحات بقية الاخوه

[ابو زياد 90]

ماشاء الله كفيت ووفيت اخوي عاشق

وازيد بالمناشف وشطاف الوضوء لغسيل <= لحفظ استهلاك المياة :)

وثلاجة لحفظ اللحم او الدجاج او المشروبات او بالاصح حافظة ثلج :)

هذا الي يحضرني

تحياتي لك :)

[شعاع الصبح]

اهم شي لاتشتري العزبة الا بعد شراء الغراض اللي بتحطه عشان ماتتوهق تصير صغيرة والا كبيرة ,واحرص على القماش التنزاني ويفضل ملبس من الداخل بلاستيك متين عشان لاقدر الله انكب زيت والا اي شي تمسح وخذه نصيحه لاتكثر اغراض اقتصر على الضروري والخفيف والوذف والاصلي دائما ,لانه بتغثك بالشيل والحط لاصارت ثقيله ولاتستعجل واطلع كم من طلعه وشف وش اللي تحتاج ووش اللي ديكور بالعزبة مايستخدم ابد
وتقبل تحياتي:)

[nice path]

بالنسبة لشنطة العزبة
إذا تبي جودة وشكل خذ حقت الرماية

[هاوي 80]

مشكوريه والله اني استفدة منك والله اني اخذة الخبره منكوم ووالله يجزاكم الف خير

[أبو مها]

الاخ عيون الحيران
الرابط التالي لعزبة ممتازة وجودة عالية:
http://mekshat.com/vb/showthread.php?t=226817
ومنذ ان طرحت الموضوع هذا وهي معي لا تفارقني
ويعلم الله اني شحنتها مع بعض الاغراض لمقر اقامتي
بأمريكا وهي لا تفارقني سواء استخدام بيت او مكشات
أخوك أبو مها

[mjd]

عليك بالستيل ... الأصلي .. من قدر وصحن وملاس ...... والشنطة صندوق بلاستيك عند الرماية
والشكر للجميع

[فلة الكيف]

هذه مشورة جدا صعبة ولا أحد يفتيك بما تريد ولكن اجتهد فيما تريد
هل أنت كثير الخروج للبر أم هل أنت راعي طبخ مستمر

[عيون الحيران]

مشكورين وما قصرتو

[البدراني11]

كثير ممن اعرفهم يستعجل ويشتري بعدين استخدام مرة او مرتين وفي المستودع للغبار ، لكن اخوي عيون الحيران مثل ما قال اخونا :


واطلع كم من طلعه وشف وش اللي تحتاج ووش اللي ديكور بالعزبة مايستخدم ابد
وتقبل تحياتي:)
وبعدها المهم عندك غير مهم عند غيرك والعكس

[عيون الحيران]

وانا اخوك اعتمدة على غيري ونسى الرز الله يهديه