المساعد الشخصي الرقمي

مشاهدة النسخة كاملة : الحرارة زادت وش العمل تكفون..؟


إبن فيصل
22/04/2006, 11:41 PM
أهلين شباب الخيمة المميزة بقيادة المشرف العزيز أيمن..
عندي سؤال يمكن يحير أكثرنا الا وهو الحرارة الزايدة في فترة الصيف الجاية إنشاء الله وأبي أعرف وشي الطرق الي تخلي حرارة السيارة تنزل وشهي الحركات الي نضيفها على السيارة وتبردها وتنزل حرارتها وتخلينا مرتاحين أحب أسمع ردود الاخوة وآرائهم وأكون لهم من الشاكرين إذا دلوني ودلو الاخوان على أحسن وأفضل الطرق والابتكارات في هذا المجال ودمتم..إبن فيصل،،،،
عاشـق القمري
23/04/2006, 12:03 AM
أفضل شيء أخووي لتنزيل حرارة السيارة

إنك تنزل البلف وهو سبب نزول الحرارة في الصيف...
ملاعب الريح
23/04/2006, 04:14 PM
السلام عليكم ورحمة الله وبركاته
أحد الحلول إنك تسقط للموتر مراوح كهرب
المشراق
23/04/2006, 04:24 PM
أخي العزيز أول شيء وش نوع السيارة اللي معك وهذا ضروري جداً حتى يعطونك الشباب تجاربهم وخبراتهم
غالي
23/04/2006, 04:47 PM
كانه شيروكي لاتلمس البلف نصيحه
وانا عانيت كثييييييييييير وصرفت دراهم اكثر على شيروكي كانتري كان معي وربي بعته وهو بحرارته ماخليت شيء الا سويته له بس صناعه دماااااااااار وربي كل ساعه موقف علي بنص الشوارع ماجتك الا الفضيحه هههههههه ذكرى قبيحه للشيروكي الله لايعيدها
والشباب يمكن يفيدونك اكثر طبعا كانه الشيروكي الي بتوقيعك
شكرا لك
إبن فيصل
24/04/2006, 12:08 AM
شكر جزيل للأخوة عاشق القمري وملاعب الريح والمشراق وغالي على المشاركة والمرور ..وكلامكم صحيح الموتر شيروكي نفس الي بالتوقيع..وشكراً
saher911
24/04/2006, 11:31 PM
حبيبي شف اذا معك شيروكي سو اللي اقولك ولا عليك باذن الله
1 غير الخراطيش وسيخ الاديتر
2 حط جركل مويه احمر اي سي ديلكو اصلي ب45ريال والباقي ماء مقطر
3 غير البلف وحط بلف كابرس 70
واذا انت راعي علك وجلد بالرمل ركب حنفية تبرد الموتر وتزود العزم
واي استفسار حاضرين للطيبين
إبن فيصل
25/04/2006, 11:35 AM
شكر جزيل للأخ saher911 على المعلومات القيمة التي أثريتنا بها ...لكن إستفساري الوحيد هو وش الحنفية الي تركب وتزود العزم وش المحل الي يضبط الاشياء هذه..تحياتي،،،
saher911
25/04/2006, 10:12 PM
ابن فيصل الموضوع بسيط جدا ماتتصوره

بكره بصور الحنفية او السدة واحطها لك

وكلنا لك
إبن فيصل
26/04/2006, 01:15 AM
الله يعطيك العافية يا saher911 وهذا العشم والله فيك وفي الاخوان وأنا بإنتظار الصور يالغالي ومشكور جداً على التفاعل الجيد،،،،.
عشانا
26/04/2006, 08:37 AM
انا كان عندي كرسيدا ذابحتني بالحرارة وبعض الاحيان لصرت واقف تصل الحرارة الى الاتش

ذهبت لمحل عبدالرحمن الدريويش ببريدة
1- ثبت مروحة الماكينة
2- غير البلف وحط بلف كابرس
3- جعل فاصل لمراوح المكيف علشان تكون شغالة على طول
4- سيخ الاديتر
5- غير موية الاديتر بموية جي ام
قسم بالله ان الحرارة ونا مشغل المكيف وفي عز الحر لاتتعدى الربع ولصرت ملسك خط تنزل الحرارة الى مادون الربع
إبن فيصل
26/04/2006, 01:59 PM
الله يعطيك العافية يا عشانا وشكراً لك على المرور وما قصرت،،،
أبو يوسف
27/04/2006, 06:11 PM
اخوي ابن فيصل

انا معي شروكي وفكرت اركب مراوح كهرب
لكن قالي واحد مجرب أن الشروكي له حرارة معينة بيوصل لها لو سويت اللي تسوي لذا ما أظن لك حل الا اذا كانت الحرارة توصل للاتش فهذا دور له حل
أما الحرارة الى النصف فهذا حسب ما سمعت طبيعي


تحيتي
الدبوس
27/04/2006, 07:14 PM
المشراق . . صحيح إنك مشراق حق فعلاً الكلام صحيح . .
كان معي شبح موديل 98 420 لارج حرارته النصف طبيعي لكن من اللقافه رحة شلت البلف في صناعية العروبة اللي عند اليورو مارشيه طلعت بس عند إشارة العبيكان . . لاحظوا قصر المسافة . . إلا الموتر حرارة فوق الاتش 120 ومفور مباشرة من بعد ماطلعت من الورشة فأقول أنتبه من نوعية السيارة .
تثبيت المروحة نينزل الحرارة لكن (الصوت) تخيل أنك تمشي بسرعة 80 والسيارة في خامس مريحها واللي يسمع صوت سيارتك يقول ذا حاشرها بثنين وبيرقى طعس .
ولكن :
1 - اديتر أكثر رصات .
2 - غسيل الاديتر وتسييخه إذا كان نص عمره وإذا هو قاضي غيره .
3 - تغيير حساس حرارة المروحة بحيث يشتغل على حرارة متدنية
4- مروحة اضافية في شبك داخل السيارة
5- الكنداسات مهمة إذا كان غير مواصفات سعودية
6 - للحرارة الغير طبيعية أنتبه لاتكون مروحة السيارة مقلوبة بدل ما تسحب الهواء تطرده إذا كانت السيارة مستعمله قبلك أو مركب مروحة عند بعض المليصين والمبلطين والخبازين اللي يقولون أنهم ميكانيكية .
7 - انتبه للديلكو لايكون مغير وزنيته واسلاك البواجي اللتقليد تراها ترفع الحرارة
8- إذا كان فيه شعر (صدع) في راس المكينة تراه يرفع الحرارة
9 - انتبه من الخراطيش لاتكون لينه زيادة عن اللزوم ويستحسن تغييرها إذا كان موديل السيارة مضى عليه خمس سنوات .
إبن فيصل
27/04/2006, 09:53 PM
أشكر تفاعل الاخوة أبو يوسف والدبوس على المرور المشاركة الممتازة بالموضوع والله يعطيكم العافية على المعلومات القيمة وشكراً،،،،
ابرق العزاف
27/04/2006, 10:43 PM
:j اخوي انا اقول صنفر الراس عندالمخرطه خرط او جلخ
والراديتر ركبه طبقات صفر زى ماقالوا العيال
واذا ماصفي بعد ذلك بيعه ولاتتردد000 تحياتى
s3ed
27/04/2006, 11:19 PM
تغير البلااكات (البواجي ) مهم وتغير فلتر الهوا
إبن فيصل
28/04/2006, 12:44 AM
شكراً للأخ باسل وأبو سعيد على المرور وما قصرتوا،،،
ولد المزاحمية
28/04/2006, 04:39 PM
طيب اذا كان باثفندر؟
إبن فيصل
29/04/2006, 04:31 PM
أعتقد أن المشكلة وحده وحلها متشابه لمعظم أنواع السيارات...بس الي عنده أي معلومة يفيد الاخ ولد المزاحمية.
المشراق
29/04/2006, 05:02 PM
أخوتي أطرح لكم تجرية مريت بها في الحرارة :ـ

والاً أشكر اخي في الله الدبوس على الإطراء الذي اللجمني 0

ثانياً التجرية التي مريت بها هي أن عندي كابرس 94 صابونة وحرارته ترتفع وتصوروا في الشتاء اكثر وعندي كهربائي معامله في ورشة صغيرة في السويدي وقلت له المشكلة فقا م وغير حسلس المروحة ووضع حساس مرسيدس وصرت إذا شغلت السيارة على طول تشنغل المروحة ونزلت الحرارة 0
ولما سألته لماذا قال المروحة لاتشتغل إلا على حرارة مرتفعة جداً وحساس المرسيدس دقيق جداً وفي الصيف تشتغل المروحتان واحدة حقة المكيف والثانية للحرارة عسى أن أكون افدتكم 0
إبن فيصل
30/04/2006, 12:11 AM
أشكرك أخي المشراق على المرور وجزاك الله خيراً على المعلومة المفيدة.
سند333
30/04/2006, 04:07 PM
اخوي ابن فيصل انا من هواة الشيروكي ودايم معي جييب شيروكي واقنص فيه من بعد صلاة الفجرلين المغرب في الصيف والشتاء

والمشكله الي عندك بسيطه جدا ولا تبيع اذاكنت تحب السياره والحل

1-يركب بلف حراره حق كابرس

2-يركب مروحه سوبارو

3-يركب حساس على خرطوش المويه


اماتكلفه الشغل والقطع 500ريال وبتدعي لي
إبن فيصل
30/04/2006, 04:33 PM
شكراً لك أخي العزيز سند333 على النصيحة والله يجزاك خير لكن أريد أعرف وين الورشة الي صلحت فيها الحرارة وأكون لك من الشاكرين .
الشاعر العربي
02/05/2006, 05:36 PM
انا راعي شروكيات منذ مبطي الحل
1-تصييخ رديتر
2-مراوح سوبارو
3-غير البلف ركب حق كابرس اسيديلكو لان شد البلد 90 وركب سبعين
4-ركب حساس خارجي يخلي المروحه تفتح على الربع
5-خله يركب لك فاصل داخل السياره عشان لو بغيت تخش البر تشغل الراوح على طول

اما الشغل اذا كنت بالرياض فيه محل خالد بالسلام قدام الدفاع المدني يركبلك مروحتين سوبارو 500
واذا كنت بالقصيم عنيزه محل الاختر باكستانيه يركب مروحه وحده مع شد البلد 280وهذولاء انا مشتغل عندهم واضمنهم لك اذا بغيت اي استفسار انا بالخدمه
إبن فيصل
02/05/2006, 07:39 PM
الله يعطيك العافية يالشاعر العربي وما قصرت،،،
dejjo
08/05/2006, 10:48 PM
السلام عليكم ورحمة الله وبركاته
الحرارة تنتج من عدة عوامل وايضا نوع السياره له دور في ذلك
بخصوص الشيروكي اعتقد الاخوان كفوا ووفوا
لكن عندي شيروكي وكانت الحراره جيده بعد فتره لاحظت الحراره ترتفع وكانت نتيجة
البلف والرديتر ومروحة المكيف واثروا على المكينه مع الوقت وعملت لها توظيب
وغيرت البلف شد وكاله وكذلك الرديتر وماء الرديتر اي سي دلكو
الحراره الى النصف طبيعي والان لها 6 شهور والحراره جيده الى النصف مع المكيف وبدون المكيف
يعني الحراره واقف مع المكيف النصف واذا ماشي تحت النصف بشوي
وجزاكم الله خير جميعا .
ابو سمر
09/05/2006, 09:55 AM
أهلا بالأخ الكريم ابن فيصل

لدي تعقيب حول البلف

كنا قديما نفك البلف نهائيا ، مثل الدادسن القديم والنيسان والجيب وغيرها .. وينفع كثيرا في نزول الحرارة ، وفي حركة المياه بين الراديتر والماكينة ..


أما في السيارات الجديدة التي تحقن الماء في القربة ، فمن الخطر الكبير فك البلف ، ويترك أو يستبدل بواحد أخف وجديد إذا أصابه الصدأ ..


فليحذر الأخوة على سياراتهم الجديدة ، ومثلما أشار أحد الأخوة كيف ارتفعت الحرارة بعد فك البلف مباشرة .

وعلى فكرة اخوي :

درجة الحرارة إذا كانت على النصف فهي طبيعية وضرورية لعمل الماكينة جيدا ، ولا يحصل الإحتراق كاملا إلا إذا إرتفعت درجة الحرارة .

وأذكر ان البي إم دبليو والمرسيدس الجديد ، تصل الحرارة مباشرة للنصف ، ولا تسير جيدا إلا إذا وصلت للنصف ، ولو مشيت عليها مباشرة تجدها تقطع .

وشكرا للجميع .
إبن فيصل
09/05/2006, 05:51 PM
أشكر الاخوة دييقو وأبو سمر على المشاركة الفعالة والله يعطيكم العافية،،،
snnar
25/08/2006, 04:43 AM
بالنسبة لاصحاب لاندكروزر gxr & vxr مديل 98 حتى 2006 بنزين غير بلف الحراره حق لاندكروزر صالون ديزل مديل 98 مكتوب علية 87.5 تنزل الحرارة للربع دتماً
القناص
28/08/2006, 05:10 PM
الحراره المفروض تترك عند المستوى الطبيعي اللي يجي من المصنع

لانك ان خفظتها عن المستوى المثالي اللي سبق ظبطه من المصنع فستتسبب في استهلاك المحرك لنفسه بسرعه لانه لايعمل عند درجة حرارة تشغيل مناسبه.

الزبده النقص في الحراره مثل الزود. مضر للمحرك.
وسلامتكم.
راعي الكار
30/08/2006, 11:34 PM
الأخوه اصحاب الشيروكي

انا هذا ثاني شيروكي اشتريه ، السياره عزم ما يحتاج ، والسعر للمستعمل وش تبي 25000 تطق به
كلاسيك على كيفك.
مشكلة الحراره واجهتني بالسيارتين والحل سهل ....:confused:
بس غير الرديتر وحط رديتر المنيوم تلقاه عند محلات باجحزر بالصناعيه القديمه قيمته 500إلى 550 ريال
والحراره مع الطريق على الربع والمكيف لو انك بخريص وزحمته ما تعدى النص.
وبالنسبه للورش خلك من المطيويع اللي يلهف الواحد لهف وعلى مخباتك اشد من حرارة الشيروكي
في ورشه بصناعية الدائري اسمها السعيد مختصه شيروكي واللي يشتغل فيها شباب سعودي اسمه عبدالله
وان شاء الله انه ناصح ويكفي انه منا وفينا.

:no2: وادعو لي.
الكلاسك
31/08/2006, 02:51 AM
بعض الناس فيه من التخلف والثواره انه يفك البلف نهائيا ويرميه :(
رجـ الصدى ـع
01/11/2006, 01:28 AM
ياشباب أنا معي شيروكي وحرارتة نار باستمرار - سجع غير متكلف - المهم عليه مراوح كهرب وكلها شغالة مع السويتش ومركب رديتر ألومنيوم 720 ريال وحطيت بلف كابرس ومع ذلك كل طلعة يا ينشق خرطوش أو ينفك أو يهرب ويكون متحجر من شدة الضغط وحرارة السيارة.
عموما نصحني ميكانيكي أفك البلف وفكيته ،،ولا فايدة ،،

ملاحظة:
- السيارة قبل أشتريها كانت مرهمه وفيها سدة وفلتر هواء رياضي ، م 99 وماشي 290000.
وش الحل مع هالبية ،، دلوني على ورشة أمينة واسعارها معقوله ( الوصف كاملاً).
وهل لطرمبة الموية تأثير كبير على الحرارة وكيف أفحصها ؟

أخوي راعي الكار (( في ورشه بصناعية الدائري اسمها السعيد )) أي دائري ؟ تقصد صناعية العاصمة وإلا القديمة؟

تكفون يالربع شيروا علي .. الله لا يحرمكم الأجر.
إبن فيصل
01/11/2006, 04:33 PM
الاخوة سنار القناص راعي الكار الكلاسك رجع الصدى ...

تشكرون على المرور والاضافة الجيدة .
بالنسبة هناك مشاركات عديدة في هذا المنتدى من كثير من الاخوة وبها تفصيل كثير ومن أحسنها كما أرى مشاركة الاخ /زيزوم في موضوعه الطرق المفيدة في التخلص من حرارة الشيروكي في الرابط التالي.
http://www.mekshat.com/vb/showthread.php?t=56320

أيضاً الحل في رأيي هو يتمثل في الاتي:-
1. غير الرديتر وحط الرديتر الاصلي وتلقاه في محلات قطع الشيروكي بالصناعية باحجزر أو العامودي وقلهم أبي نوع فاليوم قيمته 650ريال.
حطله مويه خضراء وموية مقطرة.
2. ركب بلف حرارة أصلي.
3.ركب غطاء رديتر أصلي.
4.شيك على الخراطيش حقت الموية أي واحد خرباء أو نصف عمر غيره.
وبإذن الله بتنزل الحرارة وتكون وأنت ما سك خط فوك الثلث بشي بسيط وفي الزحمة تحت النص بشعرة ...وبذلك تكون الحرارة أخذت وضعها الطبيعي .
والسلام عليكم ورحمة الله وبركاته.
وتقبلوا تحياتي....إبن فيصل،،،