حرمة جتني وأنا في البر تقول الفزعة..هل فزعتي صحيحة

[الدبوس]

السلام عليكم . .
كنت جالساً لوحدي أتقهوى يوم من الأيام كان يوم خميس مضى قبل شهر وشوي ، على أطراف شرق الرياض في البر عابر سبيل وكما يقال (استراحة مقاتل) وتحديداً في الشعيب اللي حول مزرعة خزام والعاذرية من جهة الغرب وكان الوقت المغرب وقد صليت المغرب وعندما غطت الشمس ، إذا بحرمة (إمرأة) تبعد قرابة العشر أمتار وتقول الفزعة يا ولدي ، كان المكان في ذلك الوقت لايوجد به سوى 4 خبر (جماعات) على سيارتين ثلاث متناثرة على بعد 400 متر وزود .
قلت للحرمة أبشري بالفزعة وش العلم . . قالت زوجي مغماً عليه (وهي نوبة صرع تصيبه نادراً يفيق بعد مضي وقت ليس محدد قد يصل إلى ثلاث ساعات أو أقل أو أكثر) وتقول ليس معنا أحد وأخاف أن يظلم الليل ولانلقى من يسعفنا وتطول غيبوبته . .
ما معهم جوال ولايعرفون أرقام علشان أتصل بأقاربهم :( . . المرأة أميه لاتقرأ ولاتكتب وهي تبلغ من العمر 55 عاماً تقريباً على حد تقديري ومن عمر زوجها الذي تجاوز الستين والمشكلة ماتعرف البيت وينه فيه تعرف أنه في الحي الفلاني (...) فقط .
حقيقة تشتت أفكاري لعدة أسباب أولها أن الموضوع كان مفاجىء والثاني أنه كان مساءاً والثالث ما كان معي أحد وربما يكون فخاً لي والرابع أنه من الصعب تقييم الوضع هل الحرمة صادقه - طبعاً قبل ما أشوف الرجال - ، وكيف يخرجون وحيدين بعيداً عن المدينة وزوجها بهذه الحالة ، لأنه يمكن تجيه الحالة وهو يسوق السيارة ، كان لابد لي من فعل شيء حتى لايظلم الليل ويتأزم الوضع أكثر بالنسبة لي ومرة تتلني الملائكة :) ومرة يتلني الشيطان :mad: .
يوم تلتني الملائكة :D :) . . قلت للمرأة أبروح للناس اللي متشطرين هناك وأبشوف إن كان معهم واحد يسوق سيارة يلحقني بسيارتي وبعدين إذا وصلّتكم أرده - ماكان قصدي السيارة ولكن كان قصدي أن رجال يشهد بالواقعة لا أكثر سبحان الله يصير العلم علمين - . . الحاصل رحت للناس . . سلام . . عليكم السلام الطريقة كذا وكذا وأبغى رجال يفزع ويسوق سيارتي ، الربع تشككوا مني - يمكن علشان الدقن :D - ولكن بعد أقنعتهم ووريتهم بطاقتي ورخصتي وبطاقة العمل اطمئنوا ووافقوا يطلع واحد منهم ولكن بشرط يروح على سيارته الشخصية هو . . قلت مافيه مشكلة . .
أنا أعلم خطورة ترك سيارتي :no: ولكن اللي حصل .
رجعت للحرمه بعد ربع ساعة . . نزلت من سيارتي وقفلتها وخليت النور الصغير والع علشان أحدد موقعها إذا رجعت . .
شلت الرجال المريض وركبته في مرتبة الخوي بسيارتهم الهونداي وحرمته وراه مباشرة في المرتبة الخلفية . . مشيت ولحقني الرجال اللي فزّعته . . وصلنا بوابة المطار اللي في منتصف طريق مزرعة خزام حاول الحارس يردنا :no2: وعلمته بالقصة وخلانا نمر مع البوابة . . يوم تعديت الإشارة المرورية اللي تودي للصالات يوم صحاء الرجال المريض وأنا أصفط يمين كني مبشر بالجنة . . عرفته بأسمي والقصة اللي صارت شكرني الرجال ورجعت مع (راعي الفزعة) لسيارتي .


السؤال : هل عملي اللي سويته صحيح ؟ وهل فيه ثغرات في سواتي؟ ولو فيه أحد مكاني وش كان يسوي ؟



http://www.mekshat.com/pix/upload/sign/images/mk26824.gif

[ميم ون]

بيض الله وجهك

وكفيت ووفيت

وما قصرت وعملك صحيح ميه بالمية والله لا يخلي منك ومن امثالك .. ولا فيه اي ثغره في سواتك حسب معرفتي

[ابو اماسي]

لا والله راعي أصول ،،


طريقتك قمة في التصرف ،، يوم أستفزعت بغيرك علشان يساعدك ..


بيّض الله وجهك ، وعسانا ما نشوف مكروه حنا وأياك ..

[صوح الجبل]

فعلا الحكمه واتخاذ الطريقه الصحيحه فضل الله يؤتيه من يشاء ..... فعلا ماشاء الله وفقت للحكمه والطريقه الصحيحه التي تدل على معقولية ....... والنيه الطيبه ....... سلمك ربي .....

[المرقاب]

بيّض الله وجهك وتصرفك موفق ولله الحمد خاصة أنه كن في الأمكان الأستعانه بالغير مع التأكيد على كلام أخوي صوح الجبل

[عاشق الضلعان]

الله يجزاك خير

وإنشالله في موازين حسناتك

ماشالله عليك فزعه مع حذر

لو إنه أنا أفزع لكن يفوتني الحذر(لأنه فعلا يمكن تكون خطه أو حيله لشيء ما )

واللهم اقمع الفئه الضاله عاجلا إذا لم ترد الهدايه لهم

لأنهم خلوا الناس يشكون بأهل الدين الحقيقين

[مدالنظر]

وجهك ابيض أنت وراعي الهوندا

وكلكم كفو يالنشامى

وماقصرت سويت اللي عليك .........
تحياتي للـــــــــنشـــــــــامـــــــــــــــــــا

[القماري]

يعطيك العافية وكفو يالنشمي وتصرفك بإشراك الشباب الآخرين طيب وخصوصا التعريف الشخصي (بالبطاقة)
أسمع مني هالقصة والجميع وودي بجواب أن أمكن
الأسبوع الماضي يوم الخميس ليلة الجمعة 20 أبريل 2006
بعد ما أنتهينا من (القهوة والشاي ) ونوينا نطلع من الكثبان الرملية (كنا خمسة أشخاص وثلاث سيارات كلها رباعية) كانت الساعة بحدود 9:30 م وعند آخر طعس وحنا جالسين ننفخ الكفرات وإلا بقدوم سيارة (كامري - سيدان بيضاء) بها شابين أحدهم متلثم والآخر حاسر (سلام - عليكم السلام ) تفضل خدمات (قال أيه نعم ) عندنا سيارة مغرزة وودنا أنكم تفزعون وتساعدونا ( تعرفون ليل وماودنا نترك آدمي في ذي المنطقة المقطوعة نوعا ما) وين سيارتك يالحبيب قال داخل البر وآشر على داخل لطعوس (قلنا تم) أفتكرنا أن أحدهم سيركب معنا حتى نصل للموقع ، لكن المفاجأة أنهم ركبو سيارتهم وأنطلقوا مسرعين (قلنا يمكن مستعجلين) ويطلعون من طعس وينزلون لآخر ويصلون لمكان بعيد عنا ثم يشعلون مصابيح الخطر حتى نصل لمكانهم وهذا من طعس لآخر ( بالمناسبة تركنا أحد أخويانا في نفس الموقع للإنتظار وتحسب لأي طاري) حتى أنهم وبسرعتهم قطعوا مسافة تعدت الـ 3 كيلومتر فتوقفنا وقلنا (من غير المعقول شخص متعطل وفي آخر الليل وبحاجة لمساعدة وهكذا يتصرف - ينطلق عنا بعيد ومسرع ويرقى من طعس لآخر كأنه يعرف الدرب جيد ولا يستبعد ان يكون مسلح ويضمر شر لنا) فأتفقت مع خوينا الآخر بالرجوع وترك المساعدة وكلمنا خوينا الثالث ومن كان ينتظر وقلنا له فليكن تلاقينا على الخط العام (ننفخ الكفرات ونكون بمأمن)
بعدها ونحن على الخط العام ننفخ الكفرات ونستوضح عن هذا الأمر ، وإذا بنفس صاحب الكامري يأتي خارجا من البر وبسرعة وهو يضرب بوري السيارة وأنطلق كالبرق حتى إنا لم نستطع تسجيل لوحته.
السؤال (ماذا كانت النية لمثل هؤلاء - وكيف هو التصرف السليم مع مثل هكذا أمر)؟

[المـهـتوي]

جزاك الله خير

وأنت فعلت الأسباب وما قصرت
ويا ليت كل الناس زيك

[المـهـتوي]

رد علي أخوي القماري

جزاك الله خير على نيتك بالمساعده

وحاول كل ما جاكم شخص يطلب المساعده استشيرو بعض وستخسرو

والله يرزق الجميع على نواياهم

ودمتم

[الدبوس]

شكراً للجميع على المرور والله يسددنا وياكم . . طبعاً اللي حصل حصل ولا أقدر أغيره زين والا شين ولكن نحتاط في الجايات اللي الله يعطينا وياكم خيرها ويكفين شرها .
القماري : المشكلة اليوم من اللي ماهوب صاحي ، واللا الصاحي لاتخاف منه والطيب ماعلا وجه وسم ولكن عط الشي أصوله فلا ضرر ولاضرار .

[صوح الجبل]

اخونا ..... القماري ..... هؤلاء فيه إن ....... والدليل

1- لم تسمعوا منهم .... دعاء ...... ولم يقل لكم اي كلمه جميله ...

2- الشخص المتعطل .... مايستعجل ولايعجل اهل المعروف

[أبو الكشتات]

اي وربي هذا صنيع المعروف

اي وربي هذا صنيع المعروف



اي وربي هذا صنيع المعروف

اي وربي هذا صنيع المعروف

اي وربي هذا صنيع المعروف

[أبو الكشتات]

هناك قصة تدل على صنع المعروف في غير اهله

يقال ان رجل كان يمشي بالطريق على فرس وبينما هو يسير اذ راى اعرابي على الطريق مريضا فاركبه على فرسه وسار به وعندما تمكن على ظهر الفرس واذا ومعه سلاح فقال لصاحب الفرس ان الفرس فرسي وانا قاتلك لامحالة فقال ياهذا اتق الله قال لا لابد من قتلك حتى لاتخبر بي احد فقال اعطيك الامان اني لااخبر بك احد فعفى عنه فقيل له ماحملك على ذالك فقال حتى لايعدم المعروف فربما يكون هناك رجل بنفس موقف الرجل المتظاهر بالمرض ولااحد يقف احد له وهو مريضا حقا

[باترول 4×4]

أخوي الدبوس : بيض الله وجهك عز الله ماقصرت لا في فزعتك ولا في تصرفك السليم والله يكثر من أمثالك .
أخوي القماري : أنت أيضاً ماقصرت وبيض الله وجهك وفعلا ً تصرفكم عين الصواب لما تركتم هذا الرجل اللعاب .
الله لا يحرمنا من الطيبين في هذا الزمن . :good:

[ناجز]

الله يجزيك خير على فعلك
ويجعله في موازين اعمالك
ومن فرج على مؤمن كربةً فرج الله عليه يوم القيامة

[القماري]

الله يسلمكم ويحميكم والمسلمين أجمعين
بس قضايا غريبة وأمور عجيبة أن يتصرف شرار القوم بهدم كل ماهو معروف وخير بين المسلمين.
وصلني أيميل فيه حادثة لرجل تعرض مع عائلته لطلق ناري على أحد الخطوط الطويلة في البلد (إجرام وتعد سافر لايقبله لاعقل ولا منطق ولا دين) وكان بهدف أما سرقة أو غيره ، فكيف لنا أن نحتاط ونحن نرتاد الأماكن البعيدة (كالبراري والصحراء) ولا يمنع ان نصادف مثل هؤلاء الأشرار. وقد نكون بحسن نية غير مسلحين أو غير مستعدين لهكذا مواقف (محيرة)
سلم الله الجميع وأبعد عنهم كل سوء.

[العضيلي]

وهل جزاء الإحسان إلا الإحسان ... ما يضيع الله صنيعك ...ولله الحمد لاتزال الناس فيها خير لكن يحرص الـــــــــــــواحد ...الأمور يبغى لها ذهانة وفطانة ...

[الوهاج]

وجهك ابيض أنت وراعي الهوندا

وكلكم كفو يالنشامى

وماقصرت سويت اللي عليك .........
تحياتي للـــــــــنشـــــــــامـــــــــــــــــــا

الفزعة مع الحذر مطلوب
تحياتي ،،،

[ذيب حضن]

يامال العافيه

[جو الصمان]

بيض الله وجهك

[المحمول]

الله يكثر جنسك وهذا تسخير لهالعايله ونيك الطيبه وتلقاه قدامك

[وحيد الدرب]

فعلا الحكمه واتخاذ الطريقه الصحيحه فضل الله يؤتيه من يشاء ..... فعلا ماشاء الله وفقت للحكمه والطريقه الصحيحه التي تدل على معقولية ....... والنيه الطيبه ....... سلمك ربي .....:good:
<!-- / message --><!-- sig -->

[محمد التمامي]

بيض الله وجهك

[الجنوبي2000]

بيض الله وجهك وهذا إن دل فإنما يدل على إن فيك نخوة وشهامة العربي الأصيل إللي يغيث الملهوف .
أسأل الله العلي القدير أن يجزاك خير.

[عقيلات]

جزاك الله خيرا على فزعتك مع الناس

[* ولد الديمن *]

تصرفك تصرف حكيم

خاصه طلبك للمساعده من اشخاص اخرين

[الفتى المجازف]

ماقصرت .. وفيت وكفيت بارك الله فيك .. فموقفك تؤجر عليه وتصرفك ينم عن حكمة وبعد نظر.


وهذا موقف حصل في هذا المكان الذي اصبح وللأسف موبؤا :

اذكر انه في مرة من المرات كنت عائدا من دعوة في احد المخيمات وكان معي صاحبي واقترح علي ان ناخذ الطريق قطوع مع النفود المهم لقينا واحد معه هايلكس ويصوت ويأشر بيديه وشماغه حقيقة ترددنا في التوقف نظرا لتأخر الوقت المهم تشاورنا ووقفنا واذا هو بشباب في العشرينات يقول تكفون الفزعه يقول السياره مغرزه وخويي نايم فيها رحنا للسياره لقين تغريزتها بسيطه وسهله يعني ماتحتاج دعم من سياره اخرى حاولنا فيها وطلعت بسهولة ماتتصورونها المهم ان الشباب يوم اخرجناهم ماوقفو مشوا على طول حتى كلمة شكرا استخسروها فينا وماشفنا الاغبرتهم بعد خروجهم اخيرا عدنا الى سيارتنا ووجدناها مبعثرة ومحيوسة وفيه محاولات لسرقة المسجل والدرج مكسور والاشرطه محيوسه ولذلك عندما ترى السياره بهذه الحاله تشعر انه كان هناك محاولة يائسة لسرقة السيارة ولكن الله سلم وستر وفشل مخطط اولئك الحرامية.
لذااقول انتبهو من المراهقين في الثمامة عندما يطلبون المساعدة كونو على حذر شديد فهم يدبرون لأمر قد رسموه.


هذه القصة كانت ضمن موضوعي :
رحلتي الى الثمامة ذلك المكان المقلق للراحة
في خيمة الرحلات.

[الكونترولCONTROL]

ما شاء الله تبارك الله ....!!!!!!!!!! ما يسويها الا الدبوس !!!!!
====================================
لا تضيع اجرك ان كانت القصة صحيحة !!!

[هاوي خلا]

أخوي الدبوس والله انك عملت الصح والطريقة المثالية في تأدية الواجب والفزعة والنخوة المعروفة والمزروعة ولله الحمد بالانسان العربي وبالذات البدوي الاصيل وصراحة اعجبني عملك جعله الله في موازين أعمالك .
ولكن ((لازم احط فيها ولكن)) لو حاولتوا اسعافه قبل اما برشه بالماء البارد او بعطر ((مثل التمثيليات المصرية )) او حتة بصل او قمتوا بتدليك رقبته وصدره وفتح فمه حتى لا يعض لسانه بسنونه في بعض حالات الصرع ثم تجلسه بوضع جالس وتمد رجليه وتحاول ترفع ايديه وتحط ايديك تحت اباطه كأنك تبي تشيله شوي ويصحى ان شاء الله تعالى واللي سويته فيه الخير والبركة وجزاء الله خير مرة أخرى وترى وصفي شفته كم مره في حالات اسعاف المرضى بالصرع شفاهم الله وجميع مرضى المسلمين عن طريق التلفزيون ومرة كنت بالشارع ولقيت حقيت الاسعاف يعملون نفس الطريقة وهي محاولة ايقافه ويشله تدخل ايدينك من ورلى ظهره وتحت ايديه وترفعه برفق ويقوم ان شاء الله تعالى بالعافية .
اخوك - هاوي خلا

[بوسلمان الفارسي]

الله يجزيك خير ويجعلها في ميزان حسناتك

وكثر الله من امثالك في هاذ الزمن

[أبومناحي]

والله عملك كله صحيح في صحيح ولو كنت مكانك بسوي نفس الي سويته الا أني أخلي سيارتي

فالبر لوحدها هذا شيء مستحيل

[ابوالجازي]

السلام عليكم يالدبوس
بيض الله وجهك وماقصرت وكثر الله امثالك

[الرهدن]

أحسن الله إليك وأبشر بالخير

[هاوي نفود]

والله فعلاً الواحد يحتار في تقديم المساعدة للغير

لكن تصرفك اللي أشوفه إنه أفضل شي والحمد لله اللي هداك لهالأسلوب

بصراحة لو كنت مكانك يمكن ألخبط وأغلط إما في الثقه الزايدة وتقديم المساعدة بدون أخذ أي إحتياط أو عدم تقديم أي مساعدة لهم

لكن أسلوبك مشالله تبارك الرحمن

لا إفراط ولا تفريط

[لبرتي]

جزاك الله عني كل خير أخي الدبوس وتذكر حديث رسول الله صلى الله علية وسلم ( من فرج عن مؤمن كربة من كرب الدنيا فرج الله عنة كربة من كرب يوم القيامة)


لكن عندي ملاحظة للجميع:
وهو أنه يوجد مركز العاذرية الطبي بالقرب منكم أتمنى من الجميع أن لا ينساه

[ذرب المعاني]

فعل طيب من وجه طيب
والحذر والخوف اللي جاك شي طبيعي خصوا في هالزمن . والمواقف اللي تصير

لكن مهما كان مانبي النخوه والفزعه تمنحي من صفاتنا .. لانها ضروريه .. وهي من الصفات اللي نفخر بها

بيض الله وجهك

[ابو درع]

جزاك الله خير وبيض الله وجهك .. وحقيقي تصرفك تصرف سليم

همه وحذر بنفس الوقت ..

[الترفي]

الله يجزاك خير على تصرفك النبيل يالدبوس اما القماري الله يستر عليك اما انا قد صار لي موقف مشابه لكن مع بنقالي:)
قبل فتره نزلت بمنطقه يقالها الساجي تتبع للنعيريه وحنا ننصب الخيام الا بهالبنقالي اللي يتسحب ويتكي بعصى يوم وصل لمنا انسدح على الارض وكان الدم مغطي ثيابه ويبكي والعصى اللي كان ماسكها طرفها مشبع بالدم المهم ان الدنيا تشابكت على والسبب الافكار اللي تداخلت والسبب انه كان يردد(اسود سوداني كلب كلب )يوم قربت منه سالته وش فيك كان يردد نفس الكلام وكانت سيقانه بها طعون بشبريه (سكين) صغيره مالكم بالطويله على طول جاني اعتقاد انه متهاوش مع سوداني وصار اللي صار في البدايه جاني شور اني ابلغ لكن خفت ان انتكب معهم وتروح علي الكشته:) وتحقيق وقلق خاصه لو انه ذبح السوداني لان طرف العجره كانت مليانه دم يوم شاورت الشباب قلت وش رايكم واحد منهم قال ما عليك وش لك بالمشاكل المهم اتفقت انا وخويي الثالث ان نشوف وش الموضوع اول شي سالناه عن كفيله وخذنا منه الرقم واسعفناه اسعافات اوليه وبغينا نروح ونحاول نسعف السوداني ان كان به حيه لكن ما توقعت اني اشوفه حي من الدم اللي بالعجره دقيت على الكفيل وقلتله عن اللي شفته قال بالحرف الواحد انه مافي راعي ثاني هو الوحيد اللي عنده قلتله عجل وتعال .....
يوم ركبناه معنا وطمرنا للموقع اول ماوصلنا اشر لنا بمكان المعركه لقيت معافر بالرمل وشبريه مليانه دم بالارض وراس شيول (العجره كانت عصاة الشيول) لكن اثر السوداني كانت غريبه كنها جرة طفل وسالته عن السوداني قالي انه جاي يبي يذبح معزه!!!!!!!!!!!!!!!!!!!!!!!!!!! سالته وبعدين قال هوشت عليه (طبعا بالاشارات وكلام مكسر (شكله جديد))وهاجمني وقبست وهذا اللي صار تدرون وش كان يقصد بالسوداني ضرمبول(الضربان ) لكن الشي العجيب بالحيوان هذا اللي تحمل شيول وكم طعنه وتم حي لا ومشى هو ويا المعزه وغير عضاته اللي كنها طعون بساق البنقالي سبحان الله.
وصل الكفيل وكان منهبل لكن بعد ما شرحنا له القصه ابتسم وقال ماله اللا العافيه لكن اصرينا عليه ان يوديه مستشفى النعيريه كود يكون تسمم ولا داء كلب وغير المهم ارجو اني ما اطلت عليكم

[احب البر]

احيي فيك شهامتك وحسن تدبيرك للامور ماشاء الله تبارك الله



الرد رقم 29 غريب وماله داعي .. وسوء ظن ينم عن نفسية مريضة

[دغيم]

لا والله راعي أصول ،،


طريقتك قمة في التصرف ،، يوم أستفزعت بغيرك علشان يساعدك ..


بيّض الله وجهك ، وعسانا ما نشوف مكروه حنا وأياك .. جزاك الله خير

[b2005]

أحسنت الدبوس على هالتصرف وانا اشوف انه حكيم لان الحذر واجب خصوصا في مثل هالحالات
الله يرزقنا واياكم الحكمه والتوفيق والسداد .

[الشاب]

والله دبوس طيب جزاك الله خير ولا يهون الي استفزعت فيه الي مامشى معك الا يوم طلب معلومات عنك ولا يلام

[سواق الوايت]

بيض الله وجهك يوم فزعت مع هالحرمه

والله يكثر من أمثالك

[مهتوي الكشتة]

بيض الله وجهك ماقصرت وصراحة الإحتياط واجب
قال رسوال الله صلى الله عليه وسلم
الواحد شيطان والاثنان شيطانا والثلاثة ركب
أو كما قال صالى الله عليه وسلم

[1400]

اخوي الدبوس انت ولد رجال رجال من ظهر رجال وافعالك تدل على رجولتك وشهامتك ونخوتك العربية الإسلامية الاصيلة....




اخوي القماري انت ولد رجال رجال من ظهر رجال وافعالك تدل على رجولتك وشهامتك ونخوتك العربية الإسلامية الاصيلة....
ولكن تصرف هؤلاء الاشخاص ادخل في قلوبكم الريبه والشك وتصرفكم هو الصواب بعينه

اذا اردت السفر او النزهه لالالالالالالالالالالالالالالالاتنسى سلاحك من الورد اليومي فهو الحافظ بإذن الله ولايمنع اخذ مسدس اوماشابه..



اتابع مكشات ولو في الصين


مراسل مؤقت لمكشات في الصين

[البيـرق]

هذا الشغل بارك الله فيك
ولوكل الناس فكر انه يمكن فخ محد ساعد الثاني
والناس لبعضها....................

[وضح النقى]

[quote=هاوي نفود]والله فعلاً الواحد يحتار في تقديم المساعدة للغير

لكن تصرفك اللي أشوفه إنه أفضل شي والحمد لله اللي هداك لهالأسلوب

بصراحة لو كنت مكانك يمكن ألخبط وأغلط إما في الثقه الزايدة وتقديم المساعدة بدون أخذ أي إحتياط أو عدم تقديم أي مساعدة لهم

لكن أسلوبك مشالله تبارك الرحمن

لا إفراط ولا تفريط[

الله يعطيك العافية ويكثر من أمثالك ( عيال الحرام ما خلوا لعيال الحلال شيئ )/quote]

[الشاقي]

بيض الله وجهك وفعلك فعل المناعير يالذيب