الشاهين مايخالط الحووووم وفرط الكراوين

[بوغلب]

السلام عليكم ...
يالربع ... الشاهين بكر و وافي .. وطياره فارط ماشاء الله ... ورصيده بالكراوين واجد
ولكن هاليومين من دخل علينا الحر بين علينا الحوم و اعتفس الشاهين
لقينا كراوين الفجر وهدينا على اول واحد ولحقه لحوق عاصي والله عانه وعلقه
وهدينا عالثاني عقب شوي ولحقه ... يوم انه واحد من الربع لز الموتر طارت عقبان وحقبيه من الأرض ... صفح الشاهين عن الكروان!! أفااااا!!!
ولكن الحمدالله على كل حال ..
لقينا كراوين عقب كم يوم بس والله الوقت ضحى .. عال 8 او 9 الصبح ... وهدينا الشاهين ونسينا سالفة الحوم الأولية .. يوم لحق الكروان .. شوي ويصفح عنه!! يالله دخيلك!!! اطالع وإلا الشاهين يقلب فوق .. إلا الحوم فووووووووووووووووووووق ... طيب بعيد عنك يالشاهين .. خلص عالكروان بسرعه وأنزل الأرض!
ويوم والله ضاق صدري وهدينا حمام دحل العصييييير قبل مغيب الشمس بشوف صملة الشاهين ... وتلحقه ماشاء الله ..
زين .. الدبره يالربع .. شرايكم .. السواة .. نعلم الشاهين انه يصير طراد علشان يجرأ عالحوم وإلا شالدبرة ؟

[صقار المملكة]

مافيه دبرة هذي الطيور اخر الوقت المربط المبرط المربط المربط

[فيصل الذيب]

حياك الله يبو غلب
اضن والله العالم ان الطير عديد نزل عدته خله من يوم يشوف الكروان وهو ميت عليه
مايطالع الحوم

[سيف الهواء]

اخوي هذا طبع بالصقور ماراح تقدر تعدله بعض الصقور مايهاب الحوم يصيد لو فوقه كوم عقبان
وبعضهم يخاف لو العقاب موقع.....(فرخ العقاب يشاركه في حقوقه)

[راعي الخريب]

الله العالم
انه رامك
يبي المربط

[بوخالد الكعبي]

خذ المعلومه مني

الوقت هذا للشاهين و هو عديد يحوم اقصر عيله شووي و شوفه

حلات شاهين عديد لو الجو بارد يطربك اما اذا حار يحوم يالغالي

تحمل لاتضيع طيرك

[سلطان 1]

طيرك مافيه الا العده.
طيرك عديد اقصر عليه وبتشوووووف طياااار طيرك الاول.
اغلب الطيور هالوقت من يحتر الجو وهو علي عده يختلف.

[عبدالله هدد]

اخوي هذا طبع بالصقور ماراح تقدر تعدله بعض الصقور مايهاب الحوم يصيد لو فوقه كوم عقبان
وبعضهم يخاف لو العقاب موقع.....(فرخ العقاب يشاركه في حقوقه)

اشهد بالله ان علمك علم الصقار

[حمد العذبي]

صباح الخير بو غلب

طال عمرك وغيرك المعلم الصقاقير اثنين واحد يصقر الطير والثاني الطير يصقره!!

ذا الوقت يختلف عن الايام الي طافت وجايز انك مخليها على وزنه ايام البرد
يمكن الطير عديد او ما شنذرته!!

عندنا الشياهين اهدها الى نهايه شهر 4 وفي قطر اغلبهم مايربط الشاهين يدعيه ويهده طول الموسم ومع هذا ما تحوم لانهم يختارون الوقت المناسب للهدد وخصوصاً ايام الصيف
والله يوفقك وآسف على الاطاله

[وزاري]

الشياهين معروفة انها تنكر الهدد وراعيها بتالى الوقت

خلك على الجير مايعرف ها الأمور

[عبدالله بن الشيخ]

أنا أرى أن أكثر الشباب يردون وهم غير فاهمين الموضوع

وهذا نتيجة عدم قراءة الموضوع قراءة جيدة

يا أخوان المقصود بالحوم / حوم العقبان بالسما , وليس حوم الشاهين نفسه
يعني وش دخل العدة , وش دخل الرمكة .

ثانيا / الشاهين لا شاف العقبان ميح عن الصيدة .

أخي الكريم / أنا أشوف أن الموضوع طبيعي جدا جدا جدا , والطير ذكي ويخاف على نفسه , والطيور شخصيات وأنا أخوك , بعضها يهد ولا عليه , وبعضها مايهد ويحاتي هللي فوقه يمكن يخر عليه , وهلم جرا .

والسلام عليكم

[شقران2000]

اذا كان الطير عدته زينه ومايلحق عليك بالشناذره,يمكن عليه شحيمه او مخزن روباج وبتشوف كلامي صحيح .بس نصيحه شنذره بالطبيه البيضه حقت دبي وبتشوف العلوم.:good2:

[ذراع الذيب]

السلام عليكم ورحمة الله وبركاته,,
صبحت بالخير ياخوي,,

الطير الوحش من طبيعته يحذر من الحوم ولاكن الطيور درجات من ناحية الشجاعه..
وماالوم الوحش يوم يترك صيدته من الحوم القريب منه خايف على نفسه لاكن فيه طيور مرت علي فيها خوف زايد بالحيل مثل طيركم هذا وغالباً تكون طبيعتها كذا ومستحيل انه يترك طبعه,,
ولاكن فيه امل انه راح يتحسن اولاً بتنقيص وزنه وثانياً مثل ماتفضلت تدريبه كطراد وعجبتني بالنقطه هذي تفكيرك تفكير طاروح وصقار:),,
واشبك لك حقبي ودربه عليه كم يوم خله يتعود عليه وخله ينزله من ارتفاع طيب,,
ولاتنسى تحط تيب بكفوف الجارح وتحياتي لك,,

[بوغلب]

السلام عليكم ... شكرا للجميع عالمشاركة ..
وشكرا أخي المدبغ للتنويه ... وكلامك منطقي .. ولكن قلت لعل وعسى يكون أحم من الربع مجربله طريقه تفيدنا ..
وشكرا ذراع الذيب ... وفعلا بديت أنقص عدت الشاهين .. جانا الهوى جنوبي وأحتر علينا الوقت بزود ..
أن شاء الله نوافيكم بأي تغير قد يطرأ على ساحة الهدد :)
ولكم تحياتي

[بوخالد الكعبي]

اعذرني يالغالي اختلط علي الكلام لو انك قايل حوم العقبان فوقه

كان رديت عليك بما افادك غيري
اختلف علي الكلام بالحوم و المقصود منه انا احسب حوم الشاهين بالوقت هذا وليس حوم العقبان

العذر و السموحه لكي لاتسجل علينا في علم الصقاره

[بوغلب]

ياهلا ويامرحبا بوخالد .. مسموح لو ماتعذرت .. يكمن أنا ماوضحت بالكامل ..
وماتلحقنا الشكه فيك بعلم الصقاره .. تحياتي

[قرناس بيتي]

الطير عديد والجو تغير عليه حاول تنزل من وزنه 30 ألى أربعين قرآم وبيضبط ان شاء الله يمكن الطير فسقآن وآنت خآبر الجو تراه تغير والوقت تغير يالربع مآعآد هو جوكم الاول ... قبل ثلاث سنوآت نفس الحاله مرت علي بالشمال وحآم آلطير ومشينآ معآه 60 كم بالجهآز وهو حوم لين ماقطع الحد العراقي وراح على وجهه نفس هالايام بالضبط آنتبه لطيرك اذا هو طير وافي وغالي انصحك لآتهده الا الصبح بدري او مسيآن وألافضل المربط يالغالي وسلآمتك ومن يقرأ

[بوغلب]

الطير عديد والجو تغير عليه حاول تنزل من وزنه 30 ألى أربعين قرآم وبيضبط ان شاء الله يمكن الطير فسقآن وآنت خآبر الجو تراه تغير والوقت تغير يالربع مآعآد هو جوكم الاول ... قبل ثلاث سنوآت نفس الحاله مرت علي بالشمال وحآم آلطير ومشينآ معآه 60 كم بالجهآز وهو حوم لين ماقطع الحد العراقي وراح على وجهه نفس هالايام بالضبط آنتبه لطيرك اذا هو طير وافي وغالي انصحك لآتهده الا الصبح بدري او مسيآن وألافضل المربط يالغالي وسلآمتك ومن يقرأ

الله يسلمك ويعافيك ويعوضك خير الأخيار أن شاء الله .. وفعلا نقصت عدته وصار جدا محترم :)

[ذراع الذيب]

الله يسلمك ويعافيك ويعوضك خير الأخيار أن شاء الله .. وفعلا نقصت عدته وصار جدا محترم :)
هذي بشارة خير ولاهنت على تواصلك..
وتبادل الخبرات بينا يفيدنا ويفيد الجميع لاهنت يالنشمي..