نصيحة الي يدور لاندكروزر لايشتري موقف فية زود 20%

[مخطط 2008]

القصة واحد من الزملاء راح يدور في اكس ار في 2007 ويكون نظيف ممشاة قليل واللون مهو مهم شهر 2حصل واحد ماشي 170الف تزود تنقص ونظيف بالحيل المهم كم يسام يارعي المعرض يسام 150 الف وحادة راعية ب 155 الف فل كامل قالة مايحصل بس ب 140 الف قال نشاور راعية عطنا جوالك عطة رقم الجوال من بكرة يدق المصري الي بالمعرض من ت المعرض يقول اخوي 153 الف اخر المهم يقول وانا اسولف مع واحد من الزملاء بالعمل بعد شهر يعني ب شهر 3 هجري الزبدة قلت انا ادور في اكس ار 2007 يكون نظيف والى اخرةة قال فية جارنا لة 4 شهور موقف موترة في معرض الفلان اسئلة وارد لك ومن بكرة يسئلة يقولة نفس الموتر الي بالمعرض صار صاحب ال في اكس ار وانة يقول حادة ب 142 الف ويسام 138 الف وموصفاتة كذا وكذا وموقف بالمعارض من فترة قالة تراي شريت ب 142 الف قال نكتب معرض فلان الي موقف فية المتر بكرة العصر ماحصل راعي المعرض حصل المصري وتقول المصري مرشوش وجة بماء بارداتصل على كفيلة يقول صاحب السيارة جب زبون ويبي يكتب قال خلاص سجل السيارة وخذ سعي 2000ريال قال صاحب السيارة انا الي بيعها وانتم كذا والرجال جاء يبي الموتر ب 140 وتقولون حادة راعية ب 155 وانا حادة ب 142 المهم شغل الموتر وطلع وكتب عند واحد ب 100 ريال
وسلملي على الامانة من بعض اصحاب المعارض هداهم الله

[ولد ام الساهك]

ايه والله ادمه وسيعه الحين ؟ والجشع والطمع زايد يا اخوي ولا يهمهم الاخره فقط الدنيا ....
حسبي الله ونعم الوكيل

الله يوفقك يا اخوي واغلب لمعارض فيها خش وخذاع حتى في الطبلون الآن يتم تنزيلة العلم ما خلى شي ما دام ادمه وسيعه

[بحرالقلزم]

حسبي الله ونعم الوكيل على كل حرامي غشاش ما يخاف الله

[نبض نجد11]

اخوي ياريت ترتب اسم موضوعك لكي يفهم بشكل صحيح

[مافيه]

حسبي الله على كل شريطي مايخاف ربه

المشكله مالك الا هم في السيارات المستعمله

وانا من الناس الي جلس يعاني 6 شهور بشكل شبه يومي في المعارض وانا ادور لي جيب جديد او اخو الجديد بسعر معقول وماحددت نوع معين راضي بالمقسوم

اذا لقيت شي سعره مناسب طلع مغشوش يا ملعوب بمواصفاته او بطنه يخلي الواحد غصب يشك فيه او بديه مهوب على كلام راعيه

في الاخير اضطريت اشتري جديد و اريح راسي وياليتني ارتحت ((خلها على ربك))

المشكله وانا اخوك كل الي بالساحه تبع المعارض لدرجة انك ماتفرق بين البياع و الشريطي و الاسعار على قفا من يشيل نار

[sgl2002]

السيارات اللي واقفه بالمعارض هذي نصيحه ابتعدوا عنها تراها غالية ومغشوشة
والمشكلة الشريطيه يعطون عياالهم والا احد ثاني وينزلها البرحه

وانواع تنقيص العدادات والكذب وووو

يعني اشتر من واحد تعرفه او جديد

[ff34d]

ازيدك من الشعر بيت قبل تقرباً سنتين
ولد عم لي عارض جيب جي اجس ار 2007 خليجي وطلب فيه 140 الف اخذ الموتر 6 اشهر ما بيع وين المشكله ما احد يعرف
راعي المعرض ما اعرفه ولا يعفني
رحت وسئلت صاحب المعرض عن الجيب كم محدود وهل عليه سوم
قالي محدود ب160 الف ومسيوم 155 الف
على طول اتصلت على ولد عمي وسئلته عن الجيب كم عليه قالي 140 الف وللصامل ما نختلف قلتله ليش ما بعته الى الان قال ماجاه زبونه
الحاصل عطيته السالفه وبسكات سحب الجيب وحطه بمعرض ثاني اسبوعين وتم البيع
الي ابي اعرفه
هل يجوز بيع سلعه بسعر اكثر من السعر المطلوب دون علم صاحبها وما مصير الفلوس الزايده هل هي حرام ام حلال ؟
عند كتابة العقد هل يكتب المبلغ المدفوع ام المبلغ المطلوب من صاحب السلعه ؟

[شطااااب]

الله يعين على الدنيا
صااااااار جشع ونصب وغش وندعي انا مسلمووووووووووووون ؟
والغريب من يعيش خارج المملكه يجد عكس ماعندنا من صدق وامانه وهم غير مسلمووون؟
اليس نحن احق بهذا ؟

[الشهابة]

السلام عليكم ..

وش رايك باللي يوقف سياره في معرض و هو واثق فيهم .. و بعد فتره يكتشف ان راعي المعرض و عياله يكشتون عليها ؟؟!!!

حسبي الله و نعم الوكيل .. الله لا يوفق كل من غش مسلم !!!

[مخطط 2008]

السلام عليكم ..

وش رايك باللي يوقف سياره في معرض و هو واثق فيهم .. و بعد فتره يكتشف ان راعي المعرض و عياله يكشتون عليها ؟؟!!!

حسبي الله و نعم الوكيل .. الله لا يوفق كل من غش مسلم !!!
حسبي الله على كل من غش واكل اموال الناس بالباطل

[مخطط 2008]

ايه والله ادمه وسيعه الحين ؟ والجشع والطمع زايد يا اخوي ولا يهمهم الاخره فقط الدنيا ....
حسبي الله ونعم الوكيل

الله يوفقك يا اخوي واغلب لمعارض فيها خش وخذاع حتى في الطبلون الآن يتم تنزيلة العلم ما خلى شي ما دام ادمه وسيعه
قريت كتاب عن التابعين ان رجلاً يبي يبيع حمار اعزكم الله سئلة واحد هل فية عيب قال نعم لو مافية عيب مابعتة

[ابوالفهد]

سلم لي علي مسلمين اليهود يعلمك بالي في السياره اما يهود المسمين شر يهود يخفي عليك كل شيء ويكذب عليك كفنا الله شر من كان فيه شر حسبنا الله ونعم الوكيل والقصص كثيره

[ابوو عبدالله]

يا كثر اللي لا يحرمولا يحلل هناك
لذلك انتبهو ولا تاخذكم النيه الزينه فيهم

[مخطط 2008]

يا كثر اللي لا يحرمولا يحلل هناك


لذلك انتبهو ولا تاخذكم النيه الزينه فيهم

اكل الحرام مصايبة في الدنياء

[s3ed]

من كثر ما اسمع عن بلاوي الشريطية قلت بخذ لي كورس معاهم والله شفت البلاوي وشفت الكذب والغش بانواعة
والحلف والقسم عادي عندهم عشان أمن شرهم

اغرب حركة شفتها

رجال شاف سيارة تويوتا تسوى تقريبا 140 الف سال الولد الشغال في العرض بكم قالة ب 100 الشراي ماصدق وقال لة خلاص انا شراي وقبل عن يكتبون ورقة المبايعة دخل صاحبةالمعرض وسال الولد بكم بعت السيارة قالة ب 100 صاح وصرخ علية كيف ياغبي هذا السيارة معروضة ب 140 الشراي قال خلاص انا متفق معاهم وخلاص
صاحب المعرض يسوي نفسة زعلان وخسران ويوافق على السعر عشان كلمة الشرف ويشتري المسكين السيارة بسرعة وبدون فحص عشان صاحب المعرض مايغير كلامة

وفي الاخير اكتشف انة السيارة شاصيها ملحووم من تحت والسيارة ماتسوي فلس


القصة هذة في سوق الشارقة

الشرطة رجعت السيارة وخذ المشتري حقة وتعاقب صاحب المعرض


لاحظ الخداع عندهم خطط حتى ابليس مايفكر فيها ×

[مروايح الصيف]

قصص الاحتيال في المعارض كثيرة

عليك بالجديد وريح بالك

[سوبر مكشات]

الي صارت عليه مشكله لا يسكت يروح للشرطه يشتكي وللمحاكم
ولا يخلي مكان ما يفضح فييه راعين المعارض

وعلشان حنا شعب سبيكه مب طيب مانروح نشتكي

[ابو ف]

الله حسبي على اللي مايخاف الله

دخلت جيب لأحد المعارض حديت الموتر ورحت

انشغلت والمعرض ماهو قريب والموتر ادري انه

يبي يروح لكن استغربت ماكلمني المعرض ولاشي مريت عليهم يوم جيت الموتر والين الدبل مجيم على الفاضي

ولايتحرك بتاتا المهم كلمته وتناقشت معه واخذ وعطا وانهاية المشوار صلحه ومن يومه اطلعه وابيعه في الوقت نفسه

خارج معرضه وانقله في معرض ثاني ،،

سبحانه الله

[رقبة حاشي]

انا صارت لي نفس المشكله وهي كالتالي :
سيارتي وقفتها بالمعرض وكنت حادها ب 215 ألف
وتاخرت السياره ما بيعت حوالي شهرين
واكتشفت بطريقتي انهم حادينها ب 235 ألف
طبعا تهاوشت مع المحاسب المصري وقال انا ماعرفش وانا وانا
وانا قالولي سعرها كذا
المهم سحبت السياره ولحقني الشريطي اللي شغال بالمعرض وقال بعني ب 205 الف
وقلنا لا ب 10
قال خذ رقمي وفكر ....
الاستنتاجيه :
هم لادين السياره لد (من حد لد )
عشان كان ماجاها زبون ثم انت ترضخ للسعر اللي بيعرضونه عليك وتبيع
والله من وراء القصد .... وانشالله اني مازليت ولا بكلمه والله يشهد

[الربذي]

ماعليش يامخطط 2008 تصدق تعبت عشان افهم قصتك قريتها 5مرات او اكثر
بس فهمت بعدين ابشرك يوم قريت الردود
لكن هولا يتربحون من ظهور غيرهم الله يخسرهم الي خانو الامانه والثقة

[مخطط 2008]

ماعليش يامخطط 2008 تصدق تعبت عشان افهم قصتك قريتها 5مرات او اكثر
بس فهمت بعدين ابشرك يوم قريت الردود
لكن هولا يتربحون من ظهور غيرهم الله يخسرهم الي خانو الامانه والثقة
اكيد تاسيسك في المدرسة ضعيف ايا الابتدائي