بخصوص العزبه ................

[مستشار القنص]

سلام عليكم ورحمة الله وبركاته
تحيه لجميع الاعضاء والزوار والمشرفين في المنتدى
شباب معي اكسبلورر 2007 ومرفعه وحاطه
خزان ماء وقد نزلته له موضوع في الخيمه
لاكن عندي شنطه عزبه كبيرة وفيها ادوات الطبخ وادوات الشاهي والقهوة
لاكن ودي اسوي استشارة اش افضل شنطتين وحده للشاهي والقهوه ووحده للطبخ ورايكم ......:D
:good2:

[رِجم]

افضل لك شنتطين شنطه صغيره للقهوه والشاي مع موقد صغير دبات غاز استخدام مره وحده



انا مسوي كذا بعزبة الشاهي والقهوه ومحتواها


ست بيالات وست فناجيل بجراب خاص فيهم


ذرايه صغيره علشان الموقد


ابريق ستيل كوري 1.2 لتر


دله عسافيه


دلة تفويح قهوه


جراب للشاهي وجراب للقهوه والسكر وعلبة ستيل حلوه مره اخذتها من المرباع بعنيزه فيها 2 غطا للهيل
وطاحونة مولينكس
وجوانب شنطة عزبة الشاهي فيها 3 سحابات سحاب لقاذف اللهب وسحاب لمفك الصلصه السحاب الامامي للسكاكين احتاجهم احيانا


العزبه الكبيره فيها ما يلي :


قدر كاتم سب 10 لتر


قدر تيفال عادي 10 لتر


قلاية تيفال كبيره


شخال للرز وله استخدامات اخرى


وقدر صغير لغسيل الرز وخلافه


القطاعه العجيبه


صحن يكفي 6 اشخاص


السحابات فيها سكاكين وملاعق خشب للكشنه

طبعا الدبه 10 رطل لحالها

وفرن بريموس الاحمر له شنطه خاصه


هذا مالدي واستخدمه بكشتاتي


والعزبه الصغيره ما تنزل من السياره

[شمالات نجد]

ما شاء الله

الحين اذا بغيت تطلع تشرب الشاهي في مكان حولك تاخذ العزبه الكبيره وفيها اغراض الطبخ وانت ما تحتاج الا براد شاهي يكيفك او فنجال قهوه يصمد راسك..!! (للأسف هذا شغلي أول) :)

والمشكله تضطر تتنازل عن بعض المواعين والاغراض أو تصغر حجم القدر والابريق عشان تحشر الطبخ والشاهي مع بعض وكل ما شفت غرض اعجبك في السوق تخليه (ماله مكان في العزبة!!)

يا زينها شنطة الطبخ لحالها وفيها كل شي (تقول داخل مطبخ)

والشاهي والقهوه لحالها تصير صغيره وذربه تشيلها معك حتى لو تمشي على رجليك واجد

الشنطتين أفضل وأنا أخوك وان حصل شنطه ثالثه للشاهي لحاله عاد هذي على حسب :)

وفقك الله والجميع