افيدوني عن اللومينا!!!

[برزان]

السلام عليكم/ ياشباب من يفيدني عن هاالسيارة عن مدى جودتها وعيوبها الي هي (لومينا)موديل 2004م


وجزاكم الله خير

[برزان]

ردو علي ياشباب !!!!! الله يجزاكم خير

[شبح الصحراء]

اللومينا صناعة استرالية مثلها مثل الكامري واظن الكامري افضل لك بمراحل من اللومينا ، انا لا اعرف جودة اللومينا وعيوبها ولكن اعرف ان الكامري تتفوق عليها ويكفي ان الكامري تويوتا . ولا تنسى ان اللومينا تتبع الجميح ومعروف اسعار القطع الباهظة عند الجميح .

[كبريت]

والله كل واحد وذوقه

لاكن انا معي لومينا 2004 غيرنالها القير الان وغيرنالها رديتر لنه قد انفقع من قبل واصوات في الفرامل صفير وتروح الوكاله يقولك طبيعي هذا الصوت وتبي الصراحه بعد مهي راسيه في الخط لان تصمميمها يخلي الهوا يلعبها واذا جيت تبيعها سعرها طايح وفي الاول والاخير الراي رايك استخر ربك وشتر اللي بيسره لك ربك

يعني بالعربي ماتستحمل مثل السيارات اليابانيه

هذا اللي عندي واتمنى اني افدتك

[wazan]

السلام عليكم ورحمة الله وبركاته

الأخ السائل أود أن أجيبك لأن معي لومينا م99 فكيتها وكالة من العيسى مشت معي الى الان 3011000 كم خلال 6سنوات ونصف والحقيقة السيارة ماشيه معي زي الحلاوة ما غيرت فيها الا طرمبة البنزين وكمبرسور المكيف بعد أن قطعت 250,000 كم ومشكلتها الوحيده كثرة أستهلاك الفرامل كل 15000 الى 20000 كم
وأحسن ما فيها اذا مسكت خط أو خط سريع خذ دوس ,وعلى فكره قطع غيارها ليست غالية كما يتوفر AC delco أرخص من الوكالة وأذا قارن اللومينا مع الكامري والهوندا أكورد أعتقد شخصيا أنها أفضل من الكامري دون شك وزي الهوندا .وأي سؤال أنا جاهز.

[البرحه]

لسلام عليكم

والله نصيحه من اخو لاخوه

لاتقربها لانها وبكل اختصار دردعه .... وماتسوا من يحط بها ولا قرش

خرابات منا لين بكره ..... تقل متين ال 82

خذ لك هوندا احسن منها ومن الكامري

والراي لك

[ولدالهلالية]

أخي العزيز أنا أبقولك اللي عندي عن اللومينا ......
واحد من أخوياي على وقت موديل 2001 طقله وحده وكالة باسمه جديدة ، ولا جلسة معه إلا ثلاثة شهور ، وباعه مباشرة ، وبخسارة كبيرة ، والمشكلة ( على حسب كلامه طبعا ) إن الفرامل حقه مهب مضبوط ، وإذا جيت مسرع وضربت فرامل ترج السارة كله ، وكأنك تمشي على بطانيج مهب على سفلت .
أما واحد من الأصدقاء آخر : معه لومينا موديل( إس 2005) وإذا ركبته صراحة أتضايق كأني راكب ددسن ، أو بمعنى أصح كأني راكب هايلوكس . وباعه كذلك قبل تقريبا 3 شهور . مع العلم ان موديله 2005 .
أما الشخص الثالث فمعه لومينا موديل( 2004 S) ويقول اني غيرت القير حقه ، حيث انه انخرط علي وانا اتقاوم مع احد السيارات .

فأنا أقول : ابتعد عنه ، ولا تهمك المظاهر ، صحيح ان شكلها جميل ، وجذاب ، وديكورها الداخلي روعة ، وانه سريعة ، وقومته قوية
لكن كل هذا ما يفيدك . وخصوصا اذا احتاجت صيانة ما كلن يعرف يصلحه .

أرجو إني أفدتك ، وشرحت لك الإيجابيات ، والسلبيات .

وعموما ......السيارة اللي تبي تشتريه ( سواء لومينا أو غيرها ) نقولك : الله يطعمك من خيره ، ويكفيك شره .
وانتبه لسرقات أولاد الحرام . لأن لي معاناة شديدة وقاسية معهم .

والسلام .....................؟؟؟؟؟ ولد الهلالية ...............؟؟؟؟؟؟

[wazan]

السلام عليكم
عندي ملاحظة على ردود الأعضاء الأفاضل مشكلتنا نحن السعوديون أن نظرتنا للسيارات سطحية ومستعجلة وهذا اللي يخلي البشرية تطيح بالتويوتا من دون تفكير ,اذا كنت تبغى تشتري سيارة لازم أول تحدد بايش تبغى تستعملها ان كانك حق تفحيط وقومات خذ لك كامري أو كورولا
ولا تقرب اللومينا لانها ماراح تعيش معك الا سنه وحده ان كثرت أما اذا كان استخدامك طبيعي وللسفريات وراح تواظب على الصيانة الروتينية
من زيت وفلاتر وبواجي وخلافه وتبغى سيارة دفع خلفي وقوية ومريحة على الخطوط فخذها وانت مغمض وراح تخدمك بالراحه من 8 الى 10 سنوات انشالله اما حكاية الرجه مع الفرامل فهذا صحيح أول ما تنتهي الفحمات تحتاج فقط تبديل وخرط هوبات وكل الامريكي يستهلك فحمات لان حجم السيارة كبير ووزنها ثقيل وترى سعر الفحمات 120 ريال وأي مركز جنب بيتكم يضبطها لك ,وبالنسبه للومينا اس و اس اس فهي فعلا غير عملية لان الجنط كبير والكفر عريض للشكل ولكنه غير مريح ابدا للمطبات أما ال اس و ال تي زد فهي عمليه ومريحة
جدا , وعلى العموم اذا كنت لاترغب اللومينا فالهوندا خيار جيد جدا ولكن ابعد عن الكامري الحاليه فهي سيارة غير مريحه ولكن راح تتغير تماما موديل 2007 ان نزله ابوجميل عندنا وانصحك لا تسأل الا واحد فاهم.

[العشة]

شف وانا اخوك ان كانك ملزم لاتاخذ الا كابرس لانه قوي الا طياره موب سياره

وثمانيه سلندر ..

[شبح الصحراء]

اسمح لي اقولك يا اخي العزيز wazan كلامك صحيح في اغلبه ولكن اللومينا ليست سيارة امريكية ولكن سيارة استرالية فكلامك اذاً لا ينطبق على اللومينا ولا على الكابرس من موديلات 99 الى الآن وللمعلومية الكابرس الجديد خدعة من الجميح لأن الكابرس الأصلي توقف تصنيعه من عام 96 والكابرس الحالي اسمه اصلاً هولدين وكان منتج قبل عشر سنوات قبل لا يغيرون اسمه ويسمونه كابرس عام 2000 ونفس الشي على اللومينا .
وبالنسبة لكلامك ان الكامري غير مريحة انا اخالفك الرأي فقد وجدت ان الكامري اكثر سيارة سيدان مريحة من اكثر السيارات خصوصاً من موديلات 2003 وجرب تركب الكامري الفل كامل وراح تلاحظ انك راكب BMW من دون مبالغة .

[تــــوني]

والله تبي الحقيقة انا عندي كابرس 2004 ال اس من ناحية استهلاك الوقود ممتاز جداً ومن ناحية استخدام الفرامل لازم تكون داخل البلد تسوق بنمرة D3السبب في ذلك انه طيارة واذا استخدمت الفرامل من فوق سرعة 120كم/س بيرج عليك وتطعج الهوبات عليك أول ما طلعت السيارة واجهت هذي المشكلة وغير كذا مطبها اقشر بحكم الجنوط مقاس كبير والكفرات صغيرة والمشكلة في الكفرات الموجودة للمقاس 225/55/16 كلها رياضي ومزعجة وتوج وج الخيارات انك تغير حجم الجنوط وتركب كفرات عادية وتستغني عن الشكل ولله الحمد ماقابلت الا مشكلة بكرة رمان غيرتها بـ65 ريال وبطارية بعد مضي سنة من الاستخدام والفحمات 3 مرات وماشي 70 الف وبعدين تسمع فيه صوت هوا مو مثل الكامري ما تدري عنها هي تمشي والا واقفة بس لو ما ا خاف من الي ما يخافون الله ها الحرامية كان شريت كامري وما شاورت احد يكفيك لا تعدتك كامري ما تسمع لها صوت تقول كنها طبق طائر ما شاء الله

[ولدالهلالية]

خلو عنكم اللومينا .... وغيرها من السيارات الكسر ؟؟

وأنصحكم بالكامري موديل 2003 ، فما فوق ..
لكن مشكلتها الوحيدة تستهلك فحمات ، يعني ما بين 15ألف الى 18ألف لازم فحمات جديدة . وقيمتها 120ريال .

واللي يشهد ان الكامري موتر : اذا وقفت عند الإشارة التفت يمينا وشمالا ، واماما وخلفا تجد أن الكامري هي الأغلب هذا شيء واحد .

أما الشيء الآخر : إذا مسكت طريق سفر شف السيارات اللي تسقط عليهن ، واللي يسقطن عليك تجد إن الأغلبية من نوع كامري ...

والأفضل اذا كنت تبي تماتيك تاخذ 6 سلندر أفضل ، وأقوى عزم وأنشط ، وكذلك 4 سلندر ناجحة ، وجميلة .

أما المكيف : ما شاء الله تبارك الله ، غني عن التعريف .

ملاحظة : انتبه للاستبنة ، ودائما دخله بالبيت .