سالفت الشيهانة

[هواي البر 2]

السلام عليكم ورحمة الله وبركاته


اليوم حبيت اطرح عليكم سالفت الشيهانة الى لقيتها
من اول الوقت قبل 5 شهور تقريبا كنت رايح للمدعى
ادعي طيري ووصلت بدري شوي كان الجو حار
قلت اريح اشوي لين تبرد الشمس وبعدين ادعي
زين يوم جيت ادعي ولا هذي شيهانه خاره عندين
قضبت الطيره وسقتها وماشاء الله عليه فرج
والطيره كانت تعبانه من الحر وعليها حجل بسم ورقم
راعيها قلت اتصل عليه وابشره ان الطيره معاي
وبافعل اتصلت على راعيها وبشرته وكان مبسوط
وقال لي اليوم المساء اجيك وتفقان ويوم جت الليل والرجال ماجاني قلت يمكن عنده ظرف واكلمه يوم ثاني ويم ثالث
ورابع والرجال يوم يقول انا مشغول ويوم مسافر ويوم مايرد
المهم الطيره الى اليوم وهي عندي من خمس شهور
والطيره ماشاء الله عليها اقنص فيها وصيدناها
قبل كم يوم كراوين ووز والنوارس
وراعيها ماسأل عليها وامس اتصل عليه رد علي وقال بعد اشوي اكلمك ولا دق علي وانتو عارفين وقت الربطه جات
وانا با اربط طيوري ومدري ويش الحل اربطها ولا

وهذا السالفه واسف على الاطاله

[المضحي]

الله العالم انه مطيره بنفسه

لو هو حريص عليه كان جاك بالمدعي

لكن انت اعلفته وبلشت به الحين , قله ياتبيعها علي بملغ رمزي ولا تعال خذه

وحط له مده معينه ... هذا يسمى اهمال.

[فهد الحنيني]

عزالله انك تورطت فيها ههههههههه
اذا الرجال حريص بيجي لكن ٥ شهور هذا اهمال
كلم الرجال يايجي ياخذها أو بمحل ماقضبتها فكها وحط عنده خبر
والله انه يكثر من أمثالك

[(هزاع)]

انا رائيي / لو الطير حر اربطه ماهو خساره 2000 ريال ربط ولاتبين راعيه علمه بقيمة ربطتك للطير
لاكن
الطيرشاهين والربطه 2500 ريال وفحص وتطعيم 200 ريال
والشياهين البيتيه تباع بعد الربط 2500 كاحد اقصى
الناتج (ناقص200)ماتسوى تعبها
الرائي
شهد عليه بان يسمعو بالاسبكر كلامه ثم( بعها) وتصدق عن راعيها ونا اتوقع ان الطيره مبيوعه والحجل بها ولو هي له كان جاك ولو بعيد كان قال بعها لو بي شي ورسل الفلوس (عرف)
ولا اؤيد فكها يستفيد من ثمنها فقير مسكين افضل يدعو لك ولصاحبها
والاستفتاء الشرعي افضل من كلام العرف
اخوك ابومشعل

[هواي البر 2]

مشكورين على الردود
الطيره فرخ شاهين وافيه والطيره شيخه ماشاء الله عليها
اول ماكلت لراعيها كان يبي يبيعها انا شراي 6000 ريال وعيى يبيعها
ويوم اني ابشره بها طار من الفرح الرجال و العلم عند الله

[ســـبــار ربــعـــه]

عسا الله يعينك ويبيض وجهك ويكثر من امثالك.مالك الا الصبر وهي تعد وداعه عندك وعز الله انك تجملت بيض الله وجهك اتصل به وعلمه وقل له تبي تقيضها ارسل فلوسها واول الوقت تعال انقلها من مربطها ولا بعتها بالي تجيب وارسلت دراهمها عليك ولا عطيتها سبوقها ورزقها كافله مولاها.

[صقرالحروب]

حد الرجال بوقت معين يايجي يشيل طيره يامعاد له الحق يسال عنها وشهد عليه

[(هزاع)]

فرخ بحري تام
ذا موصاحي ولا بطران ولا بايع الطير والحجل به
وراه سالفه
حددله وقت بشهود ثم تصرف بما يمليه ظميرك

[mr-r]

والله سالفه غريبه
لا اكن كان الطيره جايزتلك واطربتك بهدد اربطه
واذا راعيها بغاها قله ياطويل العمر ادفع افولس الربطه وافلوس علفها
ولا انك تشريه بالقيمه الي تعجبك

[هاوي بر و صيد]

الله يعينك عز الله انها سالفه

راي

انك تسال الشرع وش الحل بهالحاله

وعسى ربي يهديك لاحسن الحلول


جزاك الله خير

خالص تقديري

[أهم 1]

يارجال الامر سهل وانا اخوك ولا يحتاج زود تعقيد
انت علمت الرجال بيض الله وجهك واتصلت اكثر من خمس مرات
والشيهانه كايفه مقاس و علوم
الحل
شهد عليه رياجيل ثقه واربط الطيره
واذا جا يبي طيرته يدفع مخاسيرك
ولآ الشيهانه عندك الموسم الجاي ان الله احياك وطالعه عليك بقيمة ربطه (ولو جا يبيها بعد -يدفع مخاسيرك )
ان شالله تربطها 10 سنين وش انت خسران مرده لك اذا يبي شيهانته يدفع مخاسيرك
وانت ان شاءالله كاسب العلم الطيب

[قرناس الجنوب 2011]

السالفة غريبة بس تدري مثل مااقالو الربع لك كلم الرجال وقلة طيرتك تجي تاخذها
في اليوم الفلاني واذا مااجيت تراء مالك عندي طير وشهد علية ولا اوصيك حط الجوال سبيكر وسجل
كلامكم ليكون اثبات شرعي 0000 هذا مابو خير ولا كان جاك واعطاك بشارة ولا قال الطيرة لك مالي فيها نصيب

[صقر الفاج]

الله يجزاك خير

[THE SNIPER H]

اخي العزيز
اذا كان ماقلت صحيح ( وانا لا اكذبك )
فرأيي من رأي الاخوان
توكل علي الله واربطها وكلم راعي الطير وحد له ميعاد يأتي ليأخذ فيه الطير ويدفع نفقاتها من خمس شهور وابلغه انه ان لم يأتي ليأخذها في الميعاد فليس له حق فيها ولكن عليك ان ترسل قيمتها علي حسابه البنكي بعد ان تنقص منه ما صرفته عليها من علف اوي اي مصاريف اخري حتي لا تظلمه او تأخذ حرام
ولكن يجب ان تشهد عيه شهود وقم بتسجيل المكالمه التي تجري بينك وبينه حتي تكون دليلا وحجه عليه
والله يكثر من مثالك ويجعله في ميزان حسناتك

[هواي البر 2]

الله يعطيكم الف عافيه على الافاده
قبل ساعه كلمت الرجال بحضرت ارجال مثلكم وشرواكم واشهد عليه على ان الليله 8.30 مساء
نتقابل ونشوف العلم والموعد هو الي اختاره يكون الليله. وانشاء الله اوافيكم بالعلوم بكره انشاء الله

[للر اميير قه]

يارجال انت والله انك ذيبان
لو انا الي ماسك الطيره وملطعي
خمس شهور والله مايحلم بها

[أبو فااارس]

اقول يالغالي إذا ماجاك الرجال فهو كذاب والطير ماهو له بس متورط بالحجل اللي فيه يمكن مسروق الله وأعلم ولكن انت لو سألته عن اسمه وسألت عقب عنه هل الشيهانه له أو فيه لبس بالموضوع وبالنسبه لك انت وجهك ابيض ولك الحق قضابة الطير وخسايرك عليها حول 3000 واعتقد انه ماراح يجيك لأنه عارف انه بينق القريشات ههههه

[راعي الفزعه.]

صدقني الطيره مسروقه وهو حاط فيها الحجل وراحت منه وخايف انك انت تكون صاحب الطيره من قبل
او خايف ان احد مسوي له كمين عشان يمسكه او شيء زي كذا ولا مستحيل تلقى احد يترك طيره 5 شهور ولا يجي يأخذه

[هواي البر 2]

مشكورين على التفاعل الطيب بس مايصير نضن في الرجال ضن السوء
وابشركم ليلة البارح تواجهنا مع الرجال بحضور رجال امثالكم وقلطنى عنده في البيت
وبعد ماتقهوينى نشدناه عن السالفه ووضح لنا السالفه وعذرناه . وحاول يعطيني دراهم لكن انا عيييت
ورديت الطيره عليه سالمة غانمة وصايده وانشاء الله بانزل لكم صور مقانيصنا ومن ضمن الصور صوره
الشاهينه (ضايعه) اسم الطيره

[THE SNIPER H]

الله يكثر من مثالك
ويجزاك خبر علي خلقك الراقي

[أبو فااارس]

هذا بياض وجه بس مع ذلك الرجال مقصر حيل حيل المفروض مايتأخر اكثر من سبوع اسبوعين اقصى حد اما خمس شهور كارثه

[عبدالرحمن بن ذياب]

بيض الله وجهك يا ذيب

[مدور مهره]

الرجال مايبيها لو يبيها بوقتها جاء وخذاها وهدها وقنص فيها وستاانس

انا لو مكاانك ادق عليه اذا مارد اقوله اسبوع معك اذا ماخذت شيهاانتك بعدها لاتطالبني بها اطيرها ابيعها هو مايبيها

[BO-SALEM]

الرجال يمكن عنده ظروف اهم من الطير وكومة الريش
وان بعض الظن اثم والناس ماتحكم بظروفها ظروفهم هي اللي تحكم فيهم

وانت الله يجزاك كل خير ويطرح فيك البرك وبيض الله وجهك

[ســـبــار ربــعـــه]

وش صار على موضوع الشيهانه.

[ذراع الذيب]

السلام عليكم ورحمة الله وبركاته,,
مسيت بالخير ياخوي,,

بيض الله وجهك يالنشمي ولاهنت وبأنتظار تقرير صيدكم وصور الشيهانه ضايعه,,
وتحياتي لك,,

[هاوي بر و صيد]

ما شاء الله لا قوة الا بالله
ربي يجزاك خير

وربي يعوضك الابرك

[عواد الشمري2]

اقول بيض الله وجهك خمس شهور وبعد الخمس شهور رجعت عليه الشيهانه الله يعطيك العافيه عز الله ماقصرت

[ابوماجد6641]

الله يبيض وجهك ونا أخوك علمك غانم

[رعد سدير]

علمك غانم يالذيب ..والله يكثر من أمثالك ...