×××((ذيب الطيور العقاب))×××

[(هزاع)]

((العقاب))


http://up.arab-x.com/Mar12/dr073731.jpg


بسم الله الرحمن الرحيم
السلام عليكم ورحمه الله وبركاته
اسعد الله اوقاتكم جميعا ..
العقاب /ومن منا لايعرفه
ومن منا لم يحصل له موقف مع العقاب
وكم تبلغ سرعه العقاب , وكثيرا مانسمع بـنقضاض العقاب على الصقر سواء كان الصقر حر او شيهان واكثر الناس لديهم فكره بأن العقاب بطيئ الطيران ولايستطيع اللحاق بفريسته وكيف يستطيع قتل شياهين البحر رغم سرعتها الفائقه
وعندما يكون الصقار هاد طيره أكره مايشوف العقاب من جسارته وطلبه وراء فريسته وسرعه انقضاضه .
وآخر ماسمعت قبل أمس من أحد الاخوه ذبح العقاب مثلوثته في أثناء هددها
(موضوع رغبت طرحه للفائده العامه وتجارب الاعضاء الافاضل ومواقفهم ومعلوماتهم عن سرعته)
المداخلات تثري الموضوع وتفيد الجميع .

[انور العنزي]

هلا اخوي ابو مشعل. العقاب. العقاب اللي اعرفه عنه انه غير سريع ولكن اذا كان الهدف اسفل منه الوضع خطير ومن وجهة نظري انه اسرع من نزول الشيهان لانه يستخدم شي واحد في النزول او يعتمد عليه وهو وزنه. والمعروف عنه له دليه وحده يعني له طقه ام يصاد فيها والا افلس. تقبل مروري

[جبار1]

الله يمحقه الله من حبارى فلسنا منها


ماله شغله غير الطير والحباره يجنب عنها


كأنه حسد للجوارح الأخرى


موضوع فعلن يستحق طرحه للأعضاء


يعطيك العافيه اخوي هزاااع

[ذراع الذيب]

السلام عليكم ورحمة الله وبركاته,,
مسيت بالخير يابومشعل..


موضوع جميل وشيق وهذي هي عوايدك دايم تطرح المواضيع المفيده والشيقه..
ومثل ماقالو وسمو الذيب بذيب البل اليوم انت سميته بذيب الطيور


وانشهد والمواقف كثيره اللي حصلت مع الصقاقير..
ياكم طير راح ضحية عقاب والله يكفينا شرها ويعطينا خيرها والعقاب ماهوب بسيط لانزل على صيده..
اخبر انه كان عندنا حمام بالساحل يروج بكبد السما مرتفع بالحيل وهوى عليه شي وقام الحمام يتصافق..
وكان يبي يزبن الصندقه واللي حوله عقاب اشعل


وعزالله انه خم له حمامه شوف سبحان كيف سرعته في النزول,,
ويعلمنا الطاروح الكبير عايض الشيباني(الاسد) انه فيه سنه من السنين صادفه عقاب وكان طالب هدد هالعقاب
وتبعه عايض ماخلاه الين قطعه حول 8 كيلو وانشهد ان عايض ذهين ماشالله عليه ويوم اقبل على هاك الحروه,,
وهو يتبع في العقاب وكانو فيه طواريح يحاولون في طير محد درى عنهم ويتعدى العقاب بموتره ويعطيه سمانه,,
ابعده عن الطير الوحش سبحان الله شفتو كيف هالعقاب فتن على الطير
وننتظر باقي الاعضاء يعطونا سواليف لهالذيب,,
وتحياتي لك,,

[majeed 11]

انا هديت طيري على كروان مانتبهت للحوم والطير يترك الكروان ويطقها حومه وافلس من الصيده والسبب هالعقاب

[ابوماجد6641]

الله يبيض وجهك يابو مشعل مواضيعك دايم طيبه مثل راعيها ًًً قد مره هديت شاهين في الصمان كنا في الصفري وهديتها على سمانه وصادت السمانه ويوم نزلت للشيهان اطمعت وطارت فيها المهم ويحول عليها عقاب والمشكله ما فكت الى معاها طارت وراحت نقطه والله ان العقاب نقط معاها انشهد انه سبوق وضيعتها خفو هي والعقاب وبعد كم ساعه دق على الصقار خالد العطله ابو فارس يبشرني في الطيره الله يبيض وجهه ويرحم والديه وكان ذاك الموقف سبب في معرفت ابو فارس

[المضحي]

يالله حيهم كلن باسمه
موضوع شيق بسراحه

قبل فتره هديت الطير على كروان ويطير الكروان ويرجم الطير قبل يوصله واجي للطير مايتحرك ولقربت له طار

ونطير له الكروان ثانيه ولا كانه يشوف شي

المهم ونناظر فوقنا عقاب يحوم فوق الطير تماما وقريب مره

حقيقة خفنا على الطير ذاك اليوم لكن سلم الله

[قلب ذيب]

الله يحييك .
العقاب شيخ الطيور , تحول الطيور من الوكور خضوعا له وقد دهله بعض العرب في ماضي الزمان , ويقول البعض ان له صيده واحده بعد تعليمه وتدهيله , لكن نشوف الخواجات تدربه وتهده على الثعالب !؟
..... لكن الصقاقير لايميلون الى العقاب كتدريب وتدهيل وقناصه , لكبر حجمه وخطورة التعامل معه وقلة صيده
وهو مزعج للقوانيص عندما يهد على طيورهم ويخافه الشاهين ويهرب منه وفي أكثر الحالات يضيع الطير بسبب العقاب . وكم مره هد على طيورنا وحنا قانصين , ويستخدم القعاب ضلاله في البحث عن الفريسه خاصه الارنب فهي تحترك مع ظل العقاب ويهوي عليها بسرعه فائقه .
... والعقاب رمز الحريه والسمو والشجاعه وتحمل صورته اعلام بعض الدول فهو دلاله على القوه والنخوه والشجاعه . وهو انواع واكبر انواعه مانراه وقت البرد القارس ويكون أكبر من الشاه حالك السواد تقيل الطيران
ينقض على صغار الشياه وفي واقعه مأساويه انقض على طفل رضيع وحمله من هداه وطار به عاليا الطفل يصرخ وقلب امه يتقطع واباه مغمى عليه !! وتلك القصه حدثت في السعوديه منذ سنوات وكانت افضع وابشع حدث حصل لتلك العائله المكلوبه والتي خرجت
في رحله بريه وتركت الولد يلعب في منزه تحت ظلال شجره فأنقض عليه العقاب وطار به ....انا لو وجدت العقاب لقتلته .

[تميم2222]

اما عن السبق .. ما اعتقد انه سريع .. الا في حاله واحده اذا كان منقض من فوق ونازل نزووول .. مثل ما قالو الاخوان في هالحاله يمكن تقدر سرعته اكثر من الشاهين بسبب الوزن الزايد ... يعني هي نزله وحده اما غانه الذيب ولا فقره ... يا يصيب ويعطب ولا يفلس من صيدته ....تقبل مروري

[مربي الصقور]

السلام عليكم سلمك الله العقاب له انواع منه:العقاب الذهبي/الفلبيني/الاصلع وهو من الطيور الجارحه اللي مايعرف الموت واللي اقوى النسر اللي لو تجيب له طفل عمره سنه خطفه وهو من الطيور االضخمه واللي يهتمون بالعقاب بلده عند الصين يهدونه على ذيابه وتدريب العقاب اصعب من االصقر وهو يتغذى على الحيات واللحوم
والسلام خير ختام...

[(هزاع)]

يقول الفيزيائيون /يعتمد صقوط الاشياء على الارض (للجاذبيه)
ليس للثقل زياده بسرعة الصقوط علميا
وئنما سرعة السقوط تعتمد على انسيابية الجسم الصاقط وختراقه للهواء (مثل العبرود)
ويزيد بالسرعه بالسقوط ايظن رفرفة الطيرالطبيعيه لتعديل الاتجاه الصحيح وسحب الاجنحه للخلف ومد المنسر للامام
اما خطورة العقاب فتتمثل بنقضاضه المفاجيء من علوشاهق جدا حيث يرى اكبر مساحه والجساره والشجاعه عنصران هامان لايستهان بهما ولا يعتمد على السرعه وليس العقاب بالبطيء جدا وائنما ابتعاده عن الارض وجاذبيتها تعطيه خف لوزنه وراحه لعضلاته فتعطيه بامر الله السرعه المطلوبه
هذا والله اعلم

[ســـبــار ربــعـــه]

السلام عليكم ورحمة الله وبركاته.


روعتني الصوره قبل الكتابه ولا الوم الطير لا راغ قلبه من البليه هذا :).وقد احببت مشاركت اخواني بهذا المقطع وهو مقناص احد الشيوخ وهدد العقاب على طيره فقد كان الطير مطلب ورا الحبارى والعقاب طقهم بلحوق وسلم الله الطير من وردة العقاب وخطف الحبارى وعلقها. والطير من قو جسارته عود يشابط العقاب. ويدل المقطع على سرعة العقاب حيث قدر يلحق حبارى يطردها جير.
واشكر اخوي الكبير ابو مشعل على الموضوع الشيق فلا يوجد راعي طير ماصادفه موقف مع العقاب وانا شخصيا حصل لي موقفين او ثلاثه ولكن كلها تعدي سلامات ياربي لك الحمد.
المقطع موجود ادناه.
انظر الدقيقه 1:10
http://www.youtube.com/watch?v=VKHXqNMlso0&feature=relmfu (http://www.youtube.com/watch?v=VKHXqNMlso0&feature=relmfu)


تقبل تحيات اخوك /سبار ربعه.

[صقرالحروب]

الله يعطيك العافيه يابو مشعل ومن وجه نظري ان العقاب يعد من اخطر الطيور على الطير نفسه خصوصا اذا كان مرتفع وهي نقطة قوته واذا طب الطير بين كفوفه مايسلم ابد واذكر في طير عند واحد من الشباب لاشاف العقاب وقت الحوم ينزل من الوكر ويربظ بالارض مثل السمانه ويقوم يصايح عرفنا وقتها ان هالطير صارله موقف مع العقاب ماينساه ابد

[صقار المملكة]

مشكور على الموضوع يابو مشعل ومرة ربع لنا كانو في الرملة وهادين سلقهم على ارنب ويخطفها العقاب قدامهم وهم يرمونه بالرشاش يعني مااخذ ثواني بس ويفك الارنب ولا لقو منها الا رجلينها بس الباقي قد اكله في هالثواني وهذا يدل على شراسته وبالنسبة للسرعة مهوب سريع بطيء جدا حتى الطير اذا هد عليه العقاب حاومه الين يرقى فوقه وخلاص

[ابو سالم3000]

العقاب فلسنا من شيهانه وحش حذفنالها النقل وقام تلاعب الباشق وتخمه وبطرفة عين الا خلت النقل وطقتها حومه وحنا ما ندري وش السبب وثواني الا يوم العقاب خم الباشق وصار الباشق الضعيف هو ونقليته نقل بكف العقاب وما نقول الا الله يعوضنا بخير منها