حجزنا الوادي بشعيب صلبوخ

[فهد الغرام]

السلام عليكم

لاهل الخبرة حجزنا الوادي بشعيب صلبوخ
عند الطريق الممهد مع الابراج
وابي ارجع للرياض وما زال الوادي مستمر
متى يوقف الوادي ونقدر نقطع بامان

[فهد الغرام]

اتصلت على الدفاع المدني وقالي يطول الى ١٢ بالليل

هل معلومة صحيحه

[قف ونااظر]

وين مكانك بالظط انا جاي من طريق القصيم ؟؟


ولاتقطع

[احتمال]

اخى فهد اللى طلعك يرجعك ههههه

وانا اخوك الحذر الحذر من الودياااان وخاصة فى الليل

الله يسهل امووووورك ويردك لأهلك سالما

[فهد الغرام]

مكاني بامتداد الطريق الي يقطع الوادي طلعت بالتبه فوق عند الابراج وجالس بموتري لين تزين الامور

[فهد الغرام]

ايه اكيد الحذر لازم عشان كذا منتظر يخف الوادي
ولا موترنا انفنتي يقطع لو نبي نغامر بس وش يحوجنا امورنا زينه

[~ Abo Rashed ~]

كان الله في عونك

تتبع تعليمات الدفاع المدني بحذافيرها فهم أخبر بهذه الأمور

[ناصح]

المهم يا أخي لا تغامر

السلامة هي المهم حتى لو تأخرت على العودة لمنزلك

طالما أنك تستطيع أن تتواصل مع الناس وتخبرهم أنك بخير

[الغاااااطي]

تبي العلم؟؟



نصيحتي لك امرح الليله في مكانك وإذا اصبحت الصبح إن شاء الله على خير اثر الشعيب خاف شوي
وماتسوى باتسر يقولون انتقل إلى رحمة الله فهد الغرام والسبب مغامرة في السيول

[هاوي البر2012]

الصبر جميل واحمد الله انك في جو جميل واتمنى لك العوده بالسلامه

[ابو زياد 90]

الله يعينك اخوي

خلك بمكانك والصباح صباح

اخاف تقطع الشعيب ويحصل شي لا سمح الله

والله يكون في عونك وعون كل مسلم

مودتي لك ,,

[فهد الغرام]

الحمد لله بدا يخف الوادي شوي وبالكثير ساعه ونقطع

[Al-harbe]

كان الله في عونك ونسخت رابط الصفحه والصقته بالاخبار والتوقعات عل ان يكون من يفيدك احد الله يخرجكم بالسلامه

[أبو عبدالله الدوسري]

المهم يا أخي لا تغامر




السلامة هي المهم حتى لو تأخرت على العودة لمنزلك


طالما أنك تستطيع أن تتواصل مع الناس وتخبرهم أنك بخير



ناصح بكل ما تعنيه الكلمة :good2:

ردك الله سالما إلى اهلك

الأنتظار زين و الركادة زينه

ليكن وقت الانتظار بالاستغفار

[فهد الغرام]

والله الاجواء روعه للكشتات وحده بوحده بس شعيب صلبوخ وغيانه تعتبر خطره
بيض الله وجيهكم والامور سهاله وبنقعد لين تهدى الامور

[tawak]

الله يردك لاهلك سالم وغانم

[طيب الفال9]

يقولون ابو قريص مات مكلا قرصه (اترك الحرصه وانا اخوك ومتى مقل السيل اقطع والله يستر عليك)

[فهد الغرام]

والله الاجواء روعه للكشتات وحده بوحده بس شعيب صلبوخ وغيانه تعتبر خطره
بيض الله وجيهكم والامور سهاله وبنقعد لين تهدى الامور

[تركي الهجهوج]

أخي عليك بدعاء الكرب الذي ورد عن الحبيب صلى الله عليه وسلم
دعاء الكرب

عَنِ ابْنِ عَبَّاسٍ رضي اللَّه عنْهُما أَنَّ رسُولَ اللَّه صَلّى اللهُ عَلَيْهِ وسَلَّم كَان يقُولُ عِنْد الكرْبِ : « لا إِلَه إِلاَّ اللَّه العظِيمُ الحلِيمُ ، لا إِله إِلاَّ اللَّه رَبُّ العَرْشِ العظِيمِ ، لا إِلَهَ إِلاَّ اللَّه رَبُّ السمَواتِ ، وربُّ الأَرْض ، ورَبُّ العرشِ الكريمِ » متفقٌ عليه .
اللهم رحمتك أرجو فلا تكلني إلى نفسي طرفة عين ِ وأصلح لي شأني كله لاإله إلا أنت الله ، الله ربي لاأشرك به شيئاً .رواه ابن ماجه .

قال رسول الله صلى الله عليه وسلم :" دعوة النون إذ دعا بها وهو في بطن الحوت :" لاإله إلا أنت سبحانك إني كنت من الظالمين لم يدع بها رجل مسلم في شئ قط إلا استجاب الله له ..صحيح الترمذي

[awid]

مساء الخير أخوي فهد أهم شي الحذر ترى الدنيا ملحوقه
انتبه لاتخابل السيل

[ابو...فهد]

نفس الطريقة كدت ان احتجز بشعيب وراط عصر اليوم
فكنت اتمشى بين الشغايا الصغيرة ومستمتع بها فاذا بالوادي قادم بسرعة والسيل فارش مجراه
لكني تنبهت لخطورة الوضع ولله الحمد استطعت تدارك خطئي ف قمت بقطع الوادي من جهة أخرى قبل وصول السيل لي
والا كنت محتجز فيه الى الآن لأن السحاب توالى عليه عصر اليوم


لذالك انتبهوا من سيول هذه الأيام لأن غالبها يأتي جذيب وأنت غافل عنه


(لدرجة اليوم الساعة 5 العصر كنت جالس في المزرعة أخايل السحاب وكان موقعه جنوب شوي وجانا مطر نقع بالارض تحركت باتجاهها لمسافة 3كم فقط فوجدت سيول قوية يعني الصيف تنبهوا منه يأتيك سيله غفله وانت تعتقد ان المطر خفيف ولكنه يأتيك من أعلى الوادي )


آسف على الاطالة


أتمنى لك السلامة أخي فهد
( الركاده زينه ولا تستعجل واذا خف السيل شف المناطق الى يتعرج فيها السيل بمعنى انه يتدرج واقطع معه
واحذر انك تقطع مع السيل الراكد الي ما فيه تعرجات لأنك ما تدري ما بداخله
وان حصل انك تقطع على رجليك اذا خف وتشوف الطريق الزين الي ما فيه جروف فهو أفضل)

[محمد الخرج]

نصيحه السيل مافيه مغامره الحدلله منتب ميت من الجوع
امرح مكانك والنهار له عيون وعلم اهلك انك بخير ولا تفجعهم
دمت بسلامه يارب

[مب لازم]

اخوي لو تحط احداثياتك يكون افضل لو حصل شيء لا سمح الله او كان احد هناك يقدر يساعدك
وخذ الوضع وناسة في ذا المطر :D

واسمع حط العالي وصور همام بكره نبي تقريرك :good2: