انا في حيرة من امري [الأرشيف]

بدون مقدمات

07/05/2006, 08:41 PM

يا أخوان انا محتار؟ :(
معي 77000 وابي موتر بر جديد وقيمته فيه؟
مع العلم اني طالب جامعه ( ماابي موتر كبير) :no2:
يعني جيب صغير
اوغمارتين دفرنسين
وش تنصحونني ؟:D

همس الشمال

08/05/2006, 12:33 AM

هلا بك أخوي

أنصحك بربع نيسان باترول أو ددسن دفرنسين

أنا طالب جامعي زيك ولا فكرت أشتري موتر ماراح أخذ غير الأثنين

تدري ليه

التايوتا مهوو مريح مره وبعدين النيسان شكل أحلا

وبالنسبه لي النسيان أقوى وأخف وخاصة الددسن أزين من الهايلكس 2000 مره

والله يرزقك أن شاء الله

همس الشمال

متابع

10/05/2006, 12:25 AM

هلا بك عضو بقراطيسه
من وجهة نظري الباترول الربع الخيار الانسب لك

اكبر زاحف

10/05/2006, 12:55 AM

علاك بالشاص يامال الشحم

ابوشعيل 97

10/05/2006, 01:40 AM

اقول كانك راعي مكاشيت ومقانيص عليك بالشاص وركب توانك ستيل وشد حايل وسحب سست ثنتين ولاتاخذ شاص ابو رفارف وعليك بالتانكيين والطبلون ميتين ويادار ماداخلك شر كان معي شاص 97 بصرحه مسكت ويوم حطيت التوانك راح المطب ومجهز ومطرب

القماري

10/05/2006, 08:21 AM

ربع باترول ستاندر ولا أحسن منه

محمد الزيادي

10/05/2006, 06:08 PM

...............

الشاص وانا بعد انصحك به ولا تشاور احد بعدي...

(تم حذف جزء من المشاركة لمخالفتها)

الدهم

10/05/2006, 06:18 PM

خذ باترول صالون احسن لك

ابوالجازي

10/05/2006, 07:20 PM

خذ لك اسوزو غمارتين دفرنسين ديزل تيربو واذا تخرجت طق لك vxr 2010

مسافر1

10/05/2006, 07:36 PM

الباث فيندر .. في اعتقادي ..

آخر مواضيعي ..
شاهد بئر الحطيئة وآثار منازله وكتابات ثمودية قديمة (مسافر1) http://www.mekshat.com/vb/showthread.php?t=50039
أثر أبو زيد الهلالي ..
http://www.mekshat.com/vb/showthread.php?t=49555

bin7eyey

25/05/2006, 12:36 PM

هايلوكس 2006 2700 والله مافي عليه والله

نمر بن حثلين

25/05/2006, 01:34 PM

باثفايندر 2005 على قد قروشك وموتر فخم ومريح وبر وديره وخط

الأخضر

26/05/2006, 10:30 PM

ما دامك طالب جامعة
وطربقك واجدة .. وتحب الزورقة الخفيفة .. والروحة والجيه ..
ففيه جيب (ن) يصلحلك وقيمته جديد في هالخمسين ألف وشفته مع ولد رفيق لي وجربته وصراحة أستغربت نشاطه ومشيه .
جيب هونداي ( توسان ) قير عادي (ديزل ) سيارة صغيرة وخفيفة في البلد ، وجيب وش حليله في البر ، ويصك الـ 160 في الخط زي الحلاوة .
والقوة اللي في الشاصات وأنا أخوك ، مالك حاجة بها ..

شـهـاب

27/05/2006, 03:16 PM

77 تلقى فيها شاص نضيف مديله 2001 او 2002

والبانزين رخيص الحين

نيشان نجد

28/05/2006, 01:44 PM

خذ لك اسوزو غمارتين دفرنسين ديزل تيربو
أو باترل ربع

ترتر

10/06/2006, 11:59 AM

رايي باثفندر 2005 ب 75 والفين رح للرمايه وكمله عندهم

كبريت

10/06/2006, 12:08 PM

دامك طالب جامعه وقروشك 77 فمالك الا الباث فندر ((مريح - حلو - خفيف - صرفيه معقوووووله جا مقارنه بكل الجيوب ))

اما باترول فا صرفيه على كيف كيفك وانت على ما اعتقد ما راح تقدر على هاالصرفيه لانك طالب جامعه

واما الشاص فهذا موتر واحد عايش في البر

وانت على حسب اعتقادي طلعاتك خفيفه يعني في الشهر 3-4 مرات تطلع لانك طالب جامعه

((على العموم استخر ربك قبل كل شي واشتر اللي يرتاحله بالك ولا عليك في احد ))

الجنيفاوي

10/06/2006, 04:14 PM

شاص 2002 وركب مساعدات جبريال ورى ورانشوا قدام وبواجي رياضيه واسلاك ودبة لكزس وفلتر وجنوط رياضية16 -10 انش وكفرات دنلوب ..........................

طخيمان

12/06/2006, 01:26 AM

ما دام انك من الديرة (شقراء) أنصحك تاخذ باث فاندر تبيه ديره أو بر أو خطوط ممتاز .

مسرع

12/06/2006, 09:48 AM

اقول اخوي ترى الوانيت النيسان بيقص ظهرك في الديره ماينفع اسألني انا خذه في روحاتك للبر بس

اما اذا تبي نصيحتي شف جيب الباجيرو الجديد بر وديره على مسؤليتي .

هاوي الله

13/06/2006, 12:59 AM

اتوقع الهايلوكس الغمارتين الدفرنشين البنزين 2006 بتصلحلك وتراني ماجربتها بس مجرد توقع وبالتوفيق @

عمار السفينه

13/06/2006, 02:02 AM

.. لاتفكر ولا تحتار غير الديماكس لاتختار ..

للمعلومية الديماكس (فل كامل - ديزل تيربو - عادي )=73000 فقط لاغير

هاوي الله

13/06/2006, 04:36 AM

نعم نعم نعم الديماكس الديماكس الديماكس اللي فوق أو الهايلوكس الغمارتين الدفرنشين البنزين 2006 وانت حُر @

salehhd

14/06/2006, 02:26 PM

منتعش

14/06/2006, 08:17 PM

أنصحك أخوي الغالي
بالبرادو
وسعره موديل 2003م ونظيف وسته سلندر بحدود فلوسك
ويكفيك بأنه تويوتا وسعره فيه عند البيع .
والله يحفظك

أبو الفارس

14/06/2006, 09:43 PM

أخوي نصيحتي لك ..

اسيزو دي ماكس ..

دفرنسين .. تيربو .. قوته 3000

والله أنه موتر من ناحية الشكل والقوة ..

والله يرزقك الموتر اللي فيه الخير ..

وبالتوفيق إنشاء الله في حياتك الجامعية ..

أخوك / أبو الفارس

غضنفر

14/06/2006, 10:20 PM

باث وبس
رخيص وقوي
الحق عليه قبل لا يخلص من السوق

كبريت

15/06/2006, 02:28 PM

باث وبس
رخيص وقوي
الحق عليه قبل لا يخلص من السوق
الحق 2005 لا يروح

تــــوني

15/06/2006, 10:41 PM

شووووووووووووووووووووفو الطلعة المحترمة

اسمع يا استاذ ابو قراطيس ...
عندك باجيرو ياباني ،،، ياباني // تقول ستيريو
والباث حلو بس صارت الشوارع كلها باثات صارت اكثر من الكوابرس
والا هايلوكس 2006 غمارتين دفع رباعي
وانت ابخص وعليك بالحضرمي

راعي الكيف

16/06/2006, 01:17 AM

والله قبل كل شي استخر ...

وبعدين حدد وش اللي انت تبيه ؟؟ هل انك راعي مكاشيت واجد ؟؟ ولا راعي مشاوير واجد ؟؟ ولا راعي خطوط واجد ؟؟

ترا هالخيارات هي اللي تحدد وجهتك وانا اخوك ...

يعني انا مثلا ... صحيح اني احب المكاشيت ... بس مانيب دايم اطلع ... يعني بالشهر ان كثرت مرة وحدة بس اني اطلع ... بس راعي مشاوير وخطوط ... فعلشان كذا فكيت لي كامري ... صرفية تمام وجودة زينة ورخيصة قطع خيارها ... والكشتة مايقصرون بعض الربع اللي مواترهم مواتر بران

انا ذكرت لك سيارتي كمثال فقط لا للحصر ... انت حدد وش اللي تميل له ... وراح تحس بأنك تلقائيا حددت اللي انت تبيه

وعسى الله يعينك .... ولا تنس الاستخارة

رقبة حاشي

25/06/2006, 04:08 PM

على قد فلوسك تاخذ لك ميتسوبيشي باجيرو جديد بقراطيسه نصف فل والموتر تراه ياباني بنسبة 100% وسياره ولا اروع ولا اقوى منها وتتحمل اقسى الظروف ولا تطلب صيانه دوريه البته وتصرف بانزين نصف صرف الـ GXR وانت بكيفك

باترول 4×4

25/06/2006, 05:36 PM

بما أنك طالب جامعي - الله يوفقك وعقبال الدكتوراه - ففي رأيي الشخصي لا تدور غير الباث فايندر سيارة بر بمواصفات السيارات الصغيرة .

الأخضر

25/06/2006, 09:33 PM

أخوي المحتار
إذا بغيت المركب الطيب
اللي يـشـــد ويـــمــد ولا يغربلك ويتعبك بالمتابعة والصيانه
وكثر الوقفات والتردد على المحطات
فعليك بأم الشحم أمتونه اللي
وخلك وأنا أخوك صديق للبيئة
لا تصير عدو .

شبح الصحراء

26/06/2006, 01:37 AM

اظن والله اعلم الهايلوكس دفرنسين موديل 2007 افضل خيار لك للأسباب التالية :

1-جودة شركة تويوتا المعروفة .
2-يحافظ على سعره ولا ينزل كثيراً عندما تبيعه بعد التخرج ان شاء الله .
3-قطع غياره رخيصه .
4-إقتصادي بالبنزين .
5-مريح ( بشهادة من جربه على عكس الموديلات السابقة ) .
6-ممكن استخدام الحوض لنقل العفش بعد التخرج والتوظف ان شاء الله .
7-منظره جميل خصوصاً مع الجنوط الكروم العريضه .

ولكن يجب أن تتأكد قبل كل شئ من انه في موديل 2007 تم تلافي جميع مشاكل موديل 2006 لأن الكثير أشتكى من موديل 2006 الجديد .

http://www.privatefleet.com.au/images/upload/Hilux.jpg

أخيراً اتمنى لك التوفيق :) .

تــــوني

26/06/2006, 05:19 AM

حياك عمنا شبح الصحراء
والله ياخوي هذا هو عندي هايلوكس غمارتين دبل 2006 ومابه الا العافية ولا قد شكيت منه ابد !!!!

وبعدين ها الي في الصورة ماهو خليجي بل اوروبي وتماتيك ماجانا تماتيك الى الحين ومافيه امل

شبح الصحراء

26/06/2006, 07:05 PM

عسى الله يطعمك من خيره ويكفيك شره يا توني ولكن انت عارف مشكلة احتراق الموديل الجديد والمكتوب في الجرائد وقصة سيارة الشخص اللي ساكن في وادي الدواسر واحتراق سيارته وحسب تحليل المرور ان الخطأ مصنعي كما سجل احتراق اكثر من 16 سيارة إلى الآن وكذلك مشاكل الهرقلة والتي كتب عنها احد اعضاء مكشات حينما جرب الهايلوكس الجديدة من احد مكاتب التأجير وانا سمعت كثير اشتكى من هذا الموديل خصوصاً انه اول مرة يصنع خارج اليابان في تايلاند ومعروف ان اي موديل جديد تصير فيه مشاكل مثل اللاند كروزر موديل 90 مشكلة المحرك والهيلوكس موديل 98 مشكلة الجير والفولكس واجن ومشكلة المكيف ولكن كل هذه المشاكل تم تلافيها في الموديلات اللاحقة فمعروف ان اي موديل جديد هو موديل تجريبي .

تــــوني

01/07/2006, 12:56 AM

والله مانتمنى انه يصير فيه مشاكل في هذا الموديل ولو حصل مشاكل في التصنيع لتم طلب الموديلات الحديثة من قبل الوكالات على مستوى العالم بما فيه الخليج العربي ,,,,, لكن في مقولة صادقة تقول أن الانسان عدو ما يجهل ,,,, ومقولة الي مايطول العنب .... يقول عنه حلبة

الجرائد تقول أن التظليل مسموح ورجل المرور في الشارع يقول لك أن التظليل ممنوع فهل تصدق المصدر أم الجرائد؟
الجريدة تنشر الاخبار دون تحقق وبخط عريض وفي حالة عدم مصداقية الخبر تنزل خبر صغير ينفي ما نشر وبس هذي الجرايد باختصار
شف السوق واحكم .

مصلحة الأرصاد

01/07/2006, 02:05 AM

السلام عليكم ورحمة الله وبركاته

والله ياطويل العمر مشكلتك مثل مشكلتي انا عندي زود عن مبلغك شوي وابغا جيب يكون جديد محد طلعة قبلي ويكون موديل السنة وكامل المواصفات ومولازم يكون للبر لاني ماطلع البر كثير وانا طالب جامعي
وماخليت معرض ولا شركة الا رحتها المهم لقيت سيارة فيها كل المواصفات الي ابغاها .

اترك مع الصور
http://www.arab-x.com/uploads/Jul-06/4910cc1020.jpg

http://www.arab-x.com/uploads/Jul-06/333e5e5551.jpg

http://www.arab-x.com/uploads/Jul-06/9d19332ce2.jpg

http://www.arab-x.com/uploads/Jul-06/7d21556750.jpg

http://www.arab-x.com/uploads/Jul-06/1db213dee4.jpg

المواصفات..
1- دفع رباعي
2- 6 سلندر 200 حصان
3- فتحت سقف
4- قير تربوتنك (اتمتك وعايدي معاً )
5- مكيف ومشغل اقراص الكتروني
6- ثلاثة صفوف مقاعد
وغيرها من المواصفات

علماً ان سعر السيارة 84 الف والراى اخي العزيز يعود لك اولا واخراً
وانتا استخير والي فية خير راح يتسهل امرة
واي استفسار انا في الخدمة
اخوك
ابو فيصل ....

شبح الصحراء

01/07/2006, 06:47 AM

الأخ المحترم توني الله يوفقك في سيارتك وانا بس حبيت انصح الأخ كاتب الموضوع وأتمنى يطلع كلامي غلط عن موديلات 2006 .

شبح الصحراء

01/07/2006, 06:54 AM

مصلحة الأرصاد

01/07/2006, 01:09 PM

الأخ العزيز مصلحة الأرصاد شركة هيونداي طلعت بقوة واظن الجيب هذا أسمه سانتافي وكان سعر الجديد منه العام الماضي بالخمسينات وهو سعر مقبول أما سعره الحالي 84 الف ريال فهو غالي جداً وغير مقبول لسيارة كورية لأن بهذا السعر سوف تحصل على(جيب فورنر من تويوتا)أو جيب إكستريل من نيسان أو ميتسوبيشي ناتيفا وهن أفضل كثيراً من جيب السانتافي الكوري من ناحية الجودة والمحافظة على السعر .

شكراً لك اخوي شبح الصحراء
اولاً حبيت اسئل عن الجيب الي من تويوتا قصدك الراف فور وال الفورتشنر الجديدة الي محدد بالاحمر فوق؟؟؟
ثانياً في سيارة بهذي المواصفات بنف السعر اذا كان جوابك تعم اكتب اسمائها واسعارها ولا يامر عليك عدو؟؟
ولك مني الشكر مقدماً
اخوك ابو فيصل ...

][ الأصيل ][

01/07/2006, 01:20 PM

امك طالب جامعي

اشتر شاص وسير علينا بحائل يابعد حيي

واللي عقد رؤوس الحبال يحلها

شبح الصحراء

09/07/2006, 03:52 AM

انا اقصد الراف فور يا مصلحة الأرصاد وازيدك من الشعر بيت فيه سيارات صينية بنفس المواصفات اللي ذكرتها بس غير الياباني لا تدور خصوصاً خصوصاً للجيوب لأنه لو كان سيارة سيدان صغيرة كان قلت خذ كوري مثل السوناتا الروعة ولا الأزيرا ولكن هو يدور على جيب وما اظن الكوري يتحمل مطناج ديارنا وحرارتها اللافحة وما راح تنفعه المواصفات المذكورة ولا تنسى انه طالب يعني على قده وما اظن يتحمل صيانة الهيونداي لأنها غالية بعكس التويوتا .

محب النياق

09/07/2006, 04:55 AM

اتا عندي رأي جديد ولم يذكر وهو ....................................

انك تصبر الى2007 لان الددسن يقولون تبي تنزل 6 سرندل

وبعد كذا اتوقع انها انسب سياره

راجح

09/07/2006, 07:41 PM

يا أبو الشباب لاتبعد عن أبوبندر ( الباث فاندر ) بالديرة كنك تسوق أكسنت
وبالبر كنك تسوق شاص ( عاد هذي قوية شوي ):)

ابو ناصر2020

09/07/2006, 11:32 PM

انصح باترول ربع من 2004 الي 2006 لان النيسان زين وماله الاعيب واحد الكربريتر بنسبه لي انا معي هايلكس 2002دفرنسين بس ناوي ابيعة مع اخر عم 2007 وشتري باترول ربع 2006

جيب متشوبيشي

10/07/2006, 05:03 AM

انا انصحك بجيب نيسان ربع ستاندرد لاكن تراه يشرب بنزين شرب موطبيعي اسئل من جربه لاكن لوتزيدها شوي وتوصل الخمسه وثمانين تقريبا خذلك جيب ربع كبسوله تويوتا مافي زيه ابد

النقا

10/07/2006, 09:53 AM

السلام عليكم ..
مرحبا بأخوي عضو بقراطيسة تبي نصيحتي خذلك باث فاندر نصف فل يجي جنوط وفتحه وسعره يتراوح مابين 77000 إلى 78000
ريال طبعا عايدي أفظلك 2005 صغير ووذيف حطلها تناكي داخلي موجود عند السنيدي فيبر وأيضا حطله سله داخلية وش تبي أكثر من كذا يالطيب.
أخوك النقا....