ابي اخرب ابوها - بوضب المكينة في البيت

[JJJJJ]

مساء الخير للجميع

يالخوان انا عندي موتر موقف له سنة مكينته مبوشه ماحد يستخدمه وخربان اربعة سلندر , وابي اخرب ابوها واوضب المكينة بنفسي وانا صراحة احب الفكفكة وعندي خبرة شوي بالقطع والحركات من كثر ماروح الصناعية وطبعا اعرف اغير بواجي وصفاية البنزين والخرابيط هذي لكن المرة ذي ابي افك المكينة حتى لوجبت العيد السيارة مابغاها اصلا بس يمكن نقدر نسوي انجاز ونضبطها
و هي خربانة خربانة زبطت خير وبكرة , ماضبطت بحريقه خخخخخخخخخخ:D

الحين وش العدة المطلوبة ؟؟؟ المفكات والخرابيط هذي , ونبي نصائحكم وكيف ابدأ ؟
انا فكيت غطاء المكينة وجيت بفك اللي بعده عمود التيمن و اللي وراها لقت ماعندي المفكات
انا رحت ساكو ولقيت انواع واشكال وش النوع اللي اجيبه معدات خاصة بالمكينة يعني نفس المقاسات
وبرضه لقيت محلات في الصناعية

واذا فكيت المكينة كيف اطلعها ؟ هذيك اللي في الورش التي تشيل المكينة مدري شسمها وين القاها

المهم نبيكم تفيدونا , خلنا نتعلم على الاقل نفتك شوي من العمالة المعفنة , وابشركم بشغل اخوي معاي معاون ههههههههههههههههههههههههه

[ماجد الحايلي]

خير مافعلت واهنيك والله على فعلتك
وودي افيدك بس مااعرف العدة المطلوبة
وانا متأكد وجازم انه راح يضبط معك
التوضيب ومن احسن مايكون
بس يبغى لك طاولة ورافعه ( قنارة )
وإضاءة حلوة وبالتوفيق يااخوي
والله معك ويحميك

[دائرة 11]

اخوي رح خذ طقم حبوب الالماني الاصلي لا تاخذ التجاري .. وراح تغنيك عن جميع المفكات اللي تحتاجها .

وانا اتوقع ماراح تنجح معك اذا من اول ماتعرف غير البواجي والصفايه

بس لا اوصيك خذ السيلكون الاسود بـ 80 ريال ..للوجيه وقابل لزيت

والرافع تحصلها في اقرب ورشه ايجار ..او رح للجناددريه تحصلها عن السودانيين اهل سوق اللبل .

واذا بغيت مساعده انا حاضر

بالتوفيق

[ماجد الحايلي]

على فكرة أنتظر أخبارك أول بأول
وأسم المكيانيكي المغامر لبسك
مثل ثوبك أهني أخوي شداد الرحال
على هالتسمية الرائعة
بانتظار اخر الأخبار وتراني راح أزعجك بالرسايل:D

[أَبوابراهيم]

السلام عليكم
اسمح لي برد بسيط من شخص بسيط

باختصار عملية توضيب المكينة هي:
تغيير القطع الاستهلاكية داخل المكينة او القطع التي من الممكن ان تتضرر لاي سبب من اسباب ضروف القيادة

اكيد انك فاهم القاعده .. خذ الموضوع ببساطة واي قطعه تفكها اعرف اتجاهها وموقعها زين وبامكانك تستعين بكمرة الجوال قبل تفك اي قطعة من اجل معرفة اتجاه تركيبها فيما بعد

وبالنسبة للقطع الاستهلاكية داخل السيارة انصحك ان تغيرها كاملة ولن تكلفك الكثير ان كانت من السيارات التي يتوفر لها قطع غيار في اغلب محلات الصيانة .. ويفيدك في القطع الاستهلاكية داخل المكينة اخواني الخبراء

اقرأ ثم اقرأ ثم اقرأ ثم توكل على الله

http://www.qatarspeed.com/forum/t154333.html

http://www.mnarat-g.com/mnarat/showthread.php?t=7063

[يكفيني نظرة]

انتبه لاتصير مثل واحدن اعرفه راعي حواريف وكل مافك شي (مثل ماطور الكهرب ) يقول تزود عندي الصواميل والقطع :D بس يشتغل الماطور عقبها ويضبط وعدة خوينا تزود من هالقطع الزايده (اللي مالها فايده):D:D:D

[أبـو زهـرهـ]

يبي لك عده كاامله من وإلا وغااليه والشى الثاني يبي لك راافعه والشى الثالث ترااهـ متعبه ويبي لهاا وزنيه بنت حراام

[ولد العويد]

لا ما يحتاج رافعه تلقى عند ساسكو الونش الاحمر (الي مثل البكرة ) تلقاه عند الملحمه يرفعون به الذبايح
اتمنى اني افدتك وشكرا

[تركي الشقاوي]

يكفيني نظره / والله اضكتني طريقت خويك اجل مايركب كل القطع اللي يفك هههههههههههههههههههه
يقول تزود عندي الصواميل والقطع :D

[Abu_abdulaziz]

السلام عليكم ،،

في الحقيقة أنا ما عندي خبرة في هالموضوع ولا قد جربته لكن حبيت أقول الله يوفقك في الي أنت ناوي عليه وعساك عالقوة ،، وكما جاء في الحديث الصحيح عن عائشة رضي الله عنها : "إن أطيب ما أكل الرجل من كسب يده وولده من كسبه" ..
وأيضا عليك بالعزيمة والإصرار وترى الفشل طريق النجاح ..

وأخيرا لا تنسانا من التقارير الطيبة :good2:

وبالتوفيق ،،

[يكفيني نظرة]

يكفيني نظره / والله اضكتني طريقت خويك اجل مايركب كل القطع اللي يفك هههههههههههههههههههه
يقول تزود عندي الصواميل والقطع :D
دوم الضحكه ان شاء الله بس ودي احمس الرجال عشان يدري ان غيره توفق مع ان الصواميل تزود :D:D:D

[سكنان2]

انتبه لاتصير مثل واحدن اعرفه راعي حواريف وكل مافك شي (مثل ماطور الكهرب ) يقول تزود عندي الصواميل والقطع :D بس يشتغل الماطور عقبها ويضبط وعدة خوينا تزود من هالقطع الزايده (اللي مالها فايده):D:D:D

الله يسعدك قسم بالله فطست من الضحك

هههههههههههههههههههههههههههههههههههههههههههههههههه هه

[كاشت وحداني]

الله يوفقك ويسهل امرك
اول شي بحكم انها اول مره
يبي لك زود على ما قالو الاخوان
تعرف الظفيره وفروعها وين يركب كل شي وكل فيش وكل سلك وين يروح
لو تحط عليها شطرطون ابيض وترقمها او تسميها بطريقتك
الثاني الليات تعرف الجاي والرايح واللي يجيب البنزين واللي يرجع الفائض منه
الامر الثالث وهو المهم يجب ان يتوفر لديك مفتاح يسمونه مفتاح القوه او شي زي كذا هذا المفتاح ظروري لتطبيق المكينه
وهو ذراع شبيه بذراع الحبه الالمانيه
لكن يوجد عليه فرار لقوة الشد
اول مره تشد مسامير المكينه تضعه على ٤٠ وتشد جمميع مساميرها وهو يشدها بنفس القوه ٤٠ ثم تزود درجة القوه درجه درجه ولو تستشير ميكانيكي في عملية الشد يكون افضل وتفهم منه الفكره
لان تطبيق المكينه بالمفتاح العادي باليد المجرده ما يجي مظبوط وسيخرج الزيت من اطرافها
موفق خير وبانتظار النتائج اذا عزمت


Sent from my iPhone using Tapatalk

[vza]

هههههههه
بالتوفيق ان شاء الله
لكن اخاف تصير سالفتك مثا سالفة الرجال
(قال منين لك بلشة قال يرزقن الله )

[أحمد محمد1429]

موقعك للمساعده والإشراف على شغلك وتقييمك لمنحك الشهاده
هههههههههههههههههههههههههههههههههههه

[JJJJJ]

الله يعيطكم العافية يااخوان ماقصرتم

والله ماتوقعت التشجيع هذا صراحة وحلوة الميكانكي المغامر ههههههههههههههههههههههههه
وان شاء الله راح اخربها يعني اخربها قصدي اضبطها يعني اضبطها هههههههههه
وماقصرتم وانا بس احاول اجهز العدة و على طووول ببدأ ان شاء الله
وفاتكم اليوم رحت فكيت الكبوت له سنة ماانفتح وانوااااع الغبار ورحت انظف شوي و افكفك الخراطيش والليات وفلتر الهواء الاشياء الثانية استعداد للتوضييييب خخخخخخخخخخ
http://www.addiwannews.com/assets/images/28271_26514.jpg
واول ماابدأ راح اعطيكم خبر , ومانستغني عن مساعدتكم وخبراتكم الحلوة
والله يجزاكم خير

[سندباد البري]

السلام عليكم
خل عندك طشت ديزل تحط راس المكينة والبساتن والصبابات والكرنك والكارتير
وبعظ العلب حط بها بنزين للبراغي والروس والصواميل
وخل شغلك ع فراغة وحجز الكهرباءبحال وخاصة الظفيرة (لأنها مشكلة)
بعدين وناخوك نبي صور للهـظحيه من ألى
أنا كنت مثلك والحين أجفد أو أوظب مكاين البونتياك أترانز وجراند بركس
أهم شي التوكل على ألله والقناعة بما تفعل ... والـهــمــه

[سندباد البري]

السلام عليكم
اللحاق للسابق
ترى فك المكينة شي سهل وللي أسهل منه تركيبها
أعتبرها مثل ( حل وتركيب مافيه قطعة تركب إلا بمحلها )
حاول أنك ماتدف ريال وفكر يمكن عندك قطع ترهم وأهم شي فلش الرفارف الواجهه
الهـيئـه لا أتعرظها نزل المكينه على حامل الثلاجات بو كفرات
دور بلنكوا أو بكرة ... وترى أول مره فيها يأس إلا من رحمة ألله
إذى أمريكي أفيدك بأذن ألله