الجو فـــــاتــــــح يالربع

[راعي عنيزة]

سلام عليكم ورحمة الله

الجو هذي الايام فاتح بشكل يندر تكراره خلال ايام السنه وذلك يعود للامطار الي هطلت بحمد الله

وهذا يخلي الارسال خصوصا في الليل ينتشر بشكل اكبر ويصل اماكن لم يصلها ارسالك من قبل مثل ما حصل معي وراسلت الخرج وحلبان !!

لذلك لازم نستغل هذي الظروف والي وده يا جماعه الربع يجرب ارساله بكرا - الثلاثا من بعد الساعه 9 يعطينا خبر هنا ويحط المكتب وسلامتكم

[فرد حمزة]

عليكم السلام والرحمة

حياك ربي

أوكي
معك حبه نفر متحرك على سياره ومعه امبي 200 من حايل
علم

المكتب وشو ؟
مكاتب الزقرررررت ؟
146.050
145.850
بشيك على الموضوع قبل الوقت ...:)
أغلى تحيه لراعي عنيزة

[راعي عنيزة]

لا تجيب طاري حبه نفر بخاري ترانا صايمين :o

تم يا فرد بس يبي لك تكون فوق مكان مرتفع عشان يوصل ارسالك وتراي قد راسلت الخبير في الثمامه (قبل ما يعتزل الفن :D المراسلات ) وهو عنده نفس تجهيزاتك ونفس مسافتك عني لكن الله الله بالارتفاع

والوقت 9 مناسب لي اذا يناسبك عطني اوكيك

اما مكتب 146050 فخبرك زباين شقران متسحدين فيه 24 ساعه ;) اخاف يغطون عليك

لذلك 145850 زين ونادر يكون فيه احد

وياليت ابو سليمان يطلع لنا :good:

[طقهاوالحقها]

من ناحية الجو هالايام لك عليه عندنا ...انقرضت الرطوبه :D

لكن البارح فاتح خاصة شمال,جهة الكويت والخفجي والحفر ...

وان شاء الله يساعدنا الجو اليوم ...وابو سليمان يوصل بيننا وبينكم :D

[راعي عنيزة]

هلا والله ابو الحقها :D

انشالله الجو اليوم يكون تمام وقد استقبلت ابو بندر من الشرقيه والجو زفت ذيك الايام
يعني انشالله الجو يساعد اليوم وتطربنا بصوتك الحلو :)

[فرد حمزة]

راعي عنيزة
مشكور يا حبي لك

اسمع بارك الله فيك

أنت خابر عامة حايل 145.000 يعني ابووووووك يالمداخلات التسدح فيها وباللي حولها

لكن شف 146.850

كانك شيكت على الموضوع قبل الموعد

وأنا بشيك على الترددين

وبرسل لك بالخاص الجوال كان الدعوه فيها تشتشه

[راعي عنيزة]

اممممممممممم اخاف يطيح الارسال اذا ارتفعنا فوق :rolleyes:

انا اقول نجرب على 145850 وبيننا الجوال لو حصل شي ولا ماشيات

والي يبي يجرب معنا يالربع حياه الله في تمام الساعه 9 والدعوه عامه وممنوع دخول المغاتير (الشواحط:D )

[فرد حمزة]

راعي عنيزة
انت به ؟

[راعي عنيزة]

به :) ودقايق انشالله وضاف قشي وعلى الجهاز 9 انشالله

[فرد حمزة]

أسمع
سبحان الله
رحت أصلي التراويح الجو ماهنا أحسن منه صافي وراكد

طلعنا من التراويح أعوذ بالله الجو غبار لكن راكد تشوفه تحت أنوار الشوارع

أخاف له تأثير :(

على العموم على الوعد يا راعي عنيزة ...:)
عسى ربك يدز الإرسال :)

[راعي عنيزة]

انشالله ماهنا الا العافيه وعلى وعدنا ونجرب وعلى ما قالو ان لقحت ولا ما ضره الفحل :D

[فرد حمزة]

علم :)
طمعاً وساعه <-----:D سمعاً وطاعه :D

[راعي عنيزة]

طلعنا وذبحنا الغبار والعجاج والجو قافل بست وستين قفل ودون ان نتمكن من سماع صوت الكروان فرد حمزه ;)

لكن استقبلت المحيط من حائل دون ان يستقبلني
والى ان نكرر التجربه في يوم اخر وتكون الظروف احسن انشالله

[فرد حمزة]

أقوووووول
ياهو يتحقط لنا الغبار وقفلت الجو :(

وخيرها في غيرها :)
وماقصر خوينا المحيط طلعناه معانا وأستقبله راعي عنيزة ..:)

[NIGHT STAR]

السلام عليكم ورحمة الله

شباب انا اتابع سوالفكم و مواضيعكم بس عندي سؤل غريب بس لا تشرهون تراني ما افهم فية. اعرف انكم تملكون اجهزة اتصال لاسلكية بس اللي ما اعرفة وش المتعة اللي تلقونها وتبحثون عنها في انكم تسولفون مع بعض من حايل للقصيم و من الرياض للقصيم ومن الرياض لحايل. هل فية متعة حقيقية بخلاف انك اصدقاء وموجودين بنفس المنتدى.

انا اعرف انة فية متعة اذا كنتوا في البر او في المقناص او ان ربعك كاشتين وانت ما تأكدت من مكانهم وتقعد تصوت عليهم لين تلقاهم.
افيدونا افادكم الله وغفر لكم في شهركم.

يا ليتني في الديرة كان صرت منسم مثلكم وقعت اصوت يا فرد حمزة ويا راعي عنيزة بس الشكوى لله.

اسف بس حب استطلاع لا اقل ولا اكثر
تحياتي لكم جميعاً وخصوصاً منسمين المنتدى فرد حمزة و راعي عنيزة ( مخرجين المنتدى )

[راعي عنيزة]

هلا والله بنجم الليل

حياك الله ياخوي ويسعدنا سؤالك وابركها من ساعه
يا غالي هذي هوايه غير مرتبطه بالسواليف او بالاحرى حتى لو بغيت تسولف ما تقدر
لان غالب المراسلات البعيده تكون متقطعه بفعل فتحة الجو وقفلته والصوت يدخل عليه تشويش واضف لذلك انك تكون فريسه سهله جدا لاي مخرب لذلك ما تقدر تاخذ راحتك في السواليف
ولكن متعة هذي الهوايه ياخوي في انك تجرب شي جديد وتوصل مسافات ما قد وصلتها من قبل ونادر الي وصلوها غيرك وتحاول تطور هوايتك وتكتشف بنفسك العوامل الي تساعدك على زيادة ارسالك سواء من الموقع او الاجهزه او استغلال العوامل الجويه والنقطه الاهم هي تعرفك على شباب من مناطق مختلفه يشاطرونك هذي الهوايه تكسب صداقتهم وتستفيد من خبرتهم

واسمح لي اشبه هذي الهوايه بمثال يحوم التسبد :D
هذي الهوايه مثلها مثل انك تكشت بكامري وسط الربع الخالي
انت تقدر تكشت بشاص ولا هامر يوصلك لهدفك بكل سلامه
لكن وصولك بالكامري يعتبر تحدي ومغامره وتخيل نشوتك اذا وصلت هدفك
مثلها مثل هوايتنا فتقدر تسولف مع اي شخص في الكره الارضيه عن طريق النت او عن طريق ال hf ولكن وصولك الى اماكن بعيده بجهاز محدود القدرات مثل اجهزتنا يعتبر تحدي



يا كثر قرقي :)
عموما ياخوي حنا نعتبر مبتدئين ومراسلاتنا محليه ولا نقارن بهوامير 146050 شقران - ابوعبدالله - الراكد هذولا مشالله مراسلاتهم دوليه وتجاوزو دول الخليج

وحياك الله ياخوي :cool:

[القناص]

السلام عليكم

صح لسانك يا راعي عنيزه

مثالك حلو ما يحوم التسبد

وكما قلت في السابق لا يحق لاحد ان يقيم هواية احد اخر وكل واحد حر في هواياته ضمن الحدود الدينيه والاخلاقيه. وبما لا يسيئ للاخرين.

شكرا

http://www.riyadhrc.com/

http://www.riyadhrc.com/images/saudi_flag02.jpg

http://www.riyadhrc.com/photogallery/gallery1/404.jpg

[فرد حمزة]

يا عزيزي نجمة الليل

منسمين مره وحده :D

ما ودي أطلع لك مصطلحات التنسيم اللي أستخدمه في منتدى الإقلاع :D هنيا ثقل وأتكانه :D
وعلوم رجال وقنص ومكاشيت وسوالف الربيع

أما عن هذه الهواية فأنا مبتدأ فيها مالي شهر ، وحقيقه ليست هوايه فقط بل أنظر لها من منظور بعيد ;)

لكن أعتقد متعتها في وقت الشتاء والربيع ويكون الجو فاتح ومجموعات الألغاز والشعر فكلاً وما يشتهيه

وفعلاً ذكرتني بهواية حثتنا عليها المدرسة وخصصت لها حصص أثناء فترة دراستي للمتوسطه و كبرتها في راسي مع أنها بدون فائدة حتى أنها تقودك للدخول في مجتمعات خارجيه وعمالة وأجانب مقيمين في بلدك وخصوصاً في مرحلة المتوسطه يعني صغير
ألا وهي هوية ((( جمع الطوابع )) لتجمع الطوابع :( من يذكرها :(
أعتقد أنها من الهوايات العقيمه

أنزل نجمة الليل حدر
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
..
..
.
.
.
.
.
.
انا كنت زيك كذا أنتقد أهل هواية المراسلات أقول ياناس عندكم أنترنت تقدر تكلم اللي تبي في العالم ،، وكنت أذا تذكرتهم أأسف لحالهم
لكن أتضح لي فيما بعد أن الإنترنت ربنا تعزلك عن مجتمعك وتغيير من تقاليدك وتعاملك مع مجتمعك المحيط أو الخارجي :)
لكن هواية المراسلات غالباً تعلمك الجرأة في الكلام وتعلم مصطلحات من محيط مجتمعك وتنمي ثقافتك البدويه <--- حط تحتها عشر طعش خط هذي تعجب أهل مكشات
طبعاً هذه تكون في من يستخدم هواية المراسلات اللاسلكيه على أصولها كما في توقيع أخونا العزيز القناص في الأعلى
وهم كثر ولله الحمد إذا وفقت في تكوين أصدقاء وزدت من مهارتك في فن التعامل مع هذه الهواية

عموماً كتبت هذا الرد على عجل بعد الإفطار لذلك لم أدققه إملائية ، أعتذر عن ذلك

[جــلــمــود]

السلام عليكم

والله زمان يا جهاز

على العموم يا راعي عنيزه وانت يا فرد حمزه تعجبوني صراحه

والى الامام


ويا اخ فرد حمزه كما عرفت من حديثك انك في شبكة حائل

كان فيه شخص يراسل على شبكة حائل من زماااان اكثر من ثلاث سنوات في بداية انتشار الاسلكي في حائل

كان نداه على مااعتقد ( الشمالي ) وكان كبير بالسن تقريبا في الثلاثينات وكان وقور جدا يفوق عمره ونعم الرجل

هل مازال يراسل او انقطع ؟

واعذرني فمن خلال حديثك عرفت انك حديث على الاجهزه ولكن بعد دخولك الشبكه هل مازال موجود وسمعته ؟

اذكر انني قابلته على الجهاز في تلك الايام وكان وقتها في الرياض يقوم بزياره او ماشابه وقضى يومين في الرياض وكنا نتراسل بالساعات خلال هذه اليومين وعاد الى حائل بعدها وكنا على وعد به انه يكرر الزياره لرياض لنقوم بالواجب لانه كان على عجله من امره عندما جاء في المره الاولى :( وبعدها انقطعت اخباره:(

داري صحتو صح :(




مصيحكم /// جــلــمــود

[الخبير]

اعتزلت و لله الحمد
اعتزلت و عدت و العود احمد أن شاء الله

انا جيت
تسمعت يا راعي عنيزة تغيردك فجيت اركض ركض .

انا اعتزلت الاني وصلت للي ابي ، وصلت 300 كلم بسيارة ، تمت ولله الحمد بمساعدتك انت و شقران .

اشوف فرد حمزة صار مثلي يوم سلكت السيارة و عدلت فيها ، تكفى علمني كم وصل إرسالك؟؟؟؟؟؟؟؟؟

راعي عنيزة يبي يساعدك لانه الان صار دايركشن دار ما دار متى ما طلع جاب معه الكوش كرافت.

لكن الله يوفقكم و عساكم تراسلون اوفر :good:
========================

http://nobody.jeeran.com/jkduhpma1.gif

[راعي عنيزة]

القناص
صح لسانك ياخوي وما عليك زود


فرد حمزه :D
منتب عاقل ياللبناني جمع طوابع اجل :p
وحسب ما اسمع عن شبكتكم انه شبكه رجال خصوصا عقب ما سمعت الشواحط الي طلعت اصواتهم من جهازك :p
لا صدز شبكتكم محترمه واستعمالهم للجهاز بعقل بعكس شبكتنا غالبها مراهقين والمكاتب الي عليها العلم تعد بالاصابع
وتوي واعي ولقيت رقك انتظر مني الو في الليل



جلمود :( :( <== هذا انا اصيح عقب ذا الفلم الهندي الحزين :D



المحترف المعتزل (الخبير )
الديركشن الي خبرك بلشه في البر وثبته في البيت وابشرك ابعد مكان راسله هو بيت الجيران :rolleyes:
وش ازين قدر الله علينا وصار البيت بحفره وتحط دايموند ولا عشر دايركشنات هي هي منتب مستقبل احد :mad:




وباذن الله بطلع على الجهاز الليله من بعد الساعه 9 الي وده يجرب حياه الله يالربع

[شقران]

احجزو لنا معكم يالربع الليله الخميس 10 رمضان 9 مساء على 146050/145850

اخوكم شقران

[طقهاوالحقها]

الحين الساعه حسب توقيت حارتنا تسع الا دقايق ..

لكن الجو مايساعد ...اذا اذاعه قطر على البيزي :( وعلى الله يتجمل الجو علينا وينسم علينا الهوا ونسمعكم لو تشويش :D

[فرد حمزة]

أفى

شقراااااااان معنا طالع

ليتكم معطينا خبر :(

اللحين 10.9 دقايق يمدي عليكم :(

ماهي سالفة عنطرنط بدق عليكم جوال :D

[راعي عنيزة]

بحمد الله الجو امس كان فويتح (يعني فاتح نص فتحه :D ) وتواجد على المكتب من الرياض : نجم الحفله المزكم شقران:) - الراكد (سعلو منفوحه:D ) - الشقاوي
ومن القصيم - راعي عنيزه - ياسر (الفويلق)
ومن حائل - فرد حمزه واستقبلناه دبل اوفر (في الجوال :D اما في الجهاز ما سمعنا له ولا تشتشه :p هاردلك )
والمحيط ايضا من حائل استقبلته انا وياسر اما شباب الرياض ما اعتقد انهم سمعوه

والمعذره كاني نسيت احد

[الخبير]

السلام عليكم
انا كنت موجود على الموجه
موقعي عند نادي الشباب ، للاسف ما سمعت صوت راعي عنيزة ، لكن شقران و الراكد كانوا مشعللين.
اقصى مدى وصلته ما ادري هو الزلفي من واحد يقال له 33 او 31 او راعي عنيزة في عنيزة ( لا ياشيخ )

راعي عنيزة يقول اني كنت اسمعك بشكل واضح لكن الهوامير كانوا يقطعون علي.
الله يعين و خيرها في غيرها.
=========================

http://nobody.jeeran.com/jkduhpma1.gif

[راعي عنيزة]

هلا والله بالخبير
ياخوك كاني منيب واهم اني سمعتك وانت تراسل الراكد لكن مش مشكله الخميس الجاي انشالله نقطع الشك باليقين ;)

و 31 موقعه الداودمي 240 كيلو ومدامك سمعته فمن المنطقي جدا اني سامعك

الا على فكره ماخبرت حول نادي الشباب مكان مرتفع عشان تراسل فيه الا كانك متعلق بكشافات المعلب

:D

[فرد حمزة]

كاتب الرسالة الأصلية جــلــمــود
السلام عليكم

والله زمان يا جهاز

على العموم يا راعي عنيزه وانت يا فرد حمزه تعجبوني صراحه

والى الامام


ويا اخ فرد حمزه كما عرفت من حديثك انك في شبكة حائل

كان فيه شخص يراسل على شبكة حائل من زماااان اكثر من ثلاث سنوات في بداية انتشار الاسلكي في حائل

كان نداه على مااعتقد ( الشمالي ) وكان كبير بالسن تقريبا في الثلاثينات وكان وقور جدا يفوق عمره ونعم الرجل

هل مازال يراسل او انقطع ؟

واعذرني فمن خلال حديثك عرفت انك حديث على الاجهزه ولكن بعد دخولك الشبكه هل مازال موجود وسمعته ؟

اذكر انني قابلته على الجهاز في تلك الايام وكان وقتها في الرياض يقوم بزياره او ماشابه وقضى يومين في الرياض وكنا نتراسل بالساعات خلال هذه اليومين وعاد الى حائل بعدها وكنا على وعد به انه يكرر الزياره لرياض لنقوم بالواجب لانه كان على عجله من امره عندما جاء في المره الاولى :( وبعدها انقطعت اخباره:(

داري صحتو صح :(




مصيحكم /// جــلــمــود

الأخ /// جــلــمــود

وعليكم السلام والرحمة
حياك الله ...
وأنا من شفت ردك قلت ماني راد إلين أجيب لك خبر الرجال
لكن طالت النشده عنه
والمصيبه أن فيه أكثر من واحد نداه الشمالي فيه واحد بالشنان واحد بمدينة حائل واحد بالعدوة
من خلال سؤالي عن الأوصاف التي ذكرتها عزيزي جــلــمــود
فالأرجح أن أنها أقرب ما تكون إلى الشمالي راعي العدوة
لكن الرجال قليل طلعاته ...
بس فيه من شبكة حائل البركان والتشويش وابو خالد يبخصونه بالحيل إن واجهتهم خذيت العلم منهم

وياليتك توصف لنا أكثر وتذكر لنا بعض المواقف والسوالف بينهم تسان هي عالقه بالذاكره
وابشر وأتمنى أن نكون حلقة وصل بينكم وعسى الله يوصلنا واياكم للجنة

أخوك ... فرد حمزة

[فرد حمزة]

كاتب الرسالة الأصلية راعي عنيزة
بحمد الله الجو امس كان فويتح (يعني فاتح نص فتحه :D ) وتواجد على المكتب من الرياض : نجم الحفله المزكم شقران:) - الراكد (سعلو منفوحه:D ) - الشقاوي
ومن القصيم - راعي عنيزه - ياسر (الفويلق)
ومن حائل - فرد حمزه واستقبلناه دبل اوفر (في الجوال :D اما في الجهاز ما سمعنا له ولا تشتشه :p هاردلك )
والمحيط ايضا من حائل استقبلته انا وياسر اما شباب الرياض ما اعتقد انهم سمعوه

والمعذره كاني نسيت احد

أقووووووول يا راعي عنيزه

والله ما كلها مفلفه إلا انا :(

الجوال ما فيه بث إلا لين أصعد فوق تندة الجمس :( والله يا شلكي بس اسكت ....
ومااااااط الريشه على الآخر الجهاز مثبت بداخل الجمس والريشه بيدي وأنا فوق النتده

النبكه لقالو الزقرررررررت غيروا الموجه وأنزلو وإلا أطلعو تلقاني معاهم أطبق عملي أنزل من التنده وأطلع لها علشان أغير الموجه :(:(:(
لكن متعععععععععععه