هكذا تعامل معي موظف الرماية بالخبر

[باجه 511]

السلام عليكم ورحمة الله وبركاته
اخواني الاعزاء كيف حالكم جميعا
انا لااقصد بهالكلام تشويه صورة محل والله العالم ولكن للاسف اسوأ تعامل مر علي في حياتي اليوم في محل الرماية بالخبر
بعد انتظاري المحل يفتح تقريبا ساعه
دخلت على صاحب المحل ووالله بعد ان رد علي السلام قالي بالحرف الواحد..نعم وش تبي؟؟
قلت وش الي وش ابي انا زبون وجاي اتفرج!
بعد ماقعدت اتفرج فالمحل شوي وانتظرته يخلص من زباينه الي للاسف تعامل معهم بأسلوب اسوا
قلت له يااخوي ممكن تعطيني كتالوج البنادق الهوائية
قالي مافيه مافيه ممنوع.!
قلت وش الي ممنوع هذا محل سواكتين ولا انا مضيع..قالي طيب معاك صور لبطاقة احوالك وفلوس . قلت وشو الي فلوس وصورة بطاقة احوال انا جاي اتفرج ليش تسألني اذا معاي فلوس او لا هذا مهب اسلوب
قالي اصلا الكتالوج ضايع اصبر بدوره ..نقعني ربع ساعه ثم قلت له يااخي خلص علي
قعد يدور شوي ثم طلع لي ورقة ياجماعة الخير والله ماكذبت عليكم بكلمة ورقة مقطوعه ومنكب عليها شاي مدري قهوه ثم قالي هذا هو يللا شوف قلت انت من جدك ولالا
قال والله مافيه الا ذا ..لدرجة ماقدرت امسكها بيدي من كثر وصاختها وخفت انها تنشق ويورطني
قلت له طيب يااخي هذي بكم..قال ايش الي هذي بكم اصلا ماعندنا الا ساكتونين بس واشر لي على سواكتين من امهات الف واربع مية قلت يااخي ماابي ذولي قال مافيه الا هم اصلا..والرخيصات ماابيعهم انا لانهم يخربون بسرعه وانا مااعرف اصلح..قلت ليه مافيه ضمان قال الا ..قلت طيب وش فايدته اذا ماتضمن التصليح ..قال مدري
رجاءا عطوني وجهات نظركم واعتذر عن الاطالة
ترضون احد يعاملكم بالاسلوب ذا وانتم جايين بفلوسكم؟ حسيت اني داخل قسم شرطة والله ماكأنه محل..استغلال لحاجة الناس لانهم عارفين انهم محتكرين اشياء ..الله لايجزا الظالم خير

[a.الخثلان]

اتوقع انه عامل وناوي يترك المحل على قولة المثل اذا كنت رايح كثر الفضايح

[(هزاع)]

اتوقع انه موهو صاحب المحل هذا عامل
ترقب صاحب المحل وعرض موضوعك عليه
اغلب المحلات تفشل بسباب العماله واهمال اصحابها
وتالي للتقبيل
يبي فلوس ونجاح وهو نايم ولا مسافر وتارك الحبل على الغارب

[باجه 511]

يااخوان هذا محل الرماية مستحيل صاحب المحل يبيع ..صعبة يجي ابالحسين ولا واحدن من عياله يبيع اكيد بيوضفون عمال..وعلى فكرة العامل سوداني وقديم عندهم وكل سنه يزيد سوء ادبه وتعامله واهماله
على العموم اشكركم على الردود ووالله ودي برقم المدير الاقليمي حقهم بخليه يأدب هالموظف

[طيور الولع]

القطه بمخماسي وامش عنه هاذا مهايطي

[كاشت وحداني]

انا اتوقع ان هناك خلل في الاداره
احتمال نقصوا رواتب العمال في المحلات
يوم الاربعاء الماضي مريت محل الرمايه اللي بعد كبري جامعه الامام بالرياض
ويوم دخلت شفت ثلاثه متجهين علي كان ودهم ياكلوني " بسم الله علي "
بنقالي واثنين يمنيين
وكل واحد منهم يقول وش تبغا وش تبغا
قلت اهجد انت وياه
سكتوا
جالسين يناظروني كاني ذابح ابوهم
طبعا كان فيه واحد شاري شوي اغراض
ويوم جا يحاسب يكلمونه كانهم مدري وش اوصف لكم
يالله حاسب . طلع البطاقه بيدفع بالشبكه . قال اليماني ما معك كاش
انا نويت المشكله تلقفت وقلت لليماني الرجال عطاك البطاقه يعني بيدفع شبكه وش دخلك معاه كاش ولا مامعاه وكانت لهجتي حاده .قام خلص الزبون وسكت
وتمشيت في المحل شوي وشفت اخلاقهم متدنية جدا .
اتوقع هناك خلل بين العمال وادارة الرمايه وعلشان كذا يشينون اخلاقهم علشان يطيرون الزبائن .والسعودي اذا خسر ما يهم العامل على طول يهرب واذا انمسك من الجوازات وتوصلوا لكفيله بيدفع حق الاعاشه والتذكره .

[جهق//حايل]

اتوقع انه عامل وناوي يترك المحل على قولة المثل اذا كنت رايح كثر الفضايح


صدقت واكيد ماهو مخرب السوق الا هذا اخر شهر ومتخانق مع المسؤل ويبي يخرب السوق

انا العام الماضي رحت لمحل المشراق بحايل وكان العامل سوداني وجاء بنقالي بمكانه لين يرجع السوداني كنت اجي المحل اسلم عليه واطلع من طيبه اما البنقالي دخلت المحل لقيته مولع فلم اظنه هندي او ما ادري رقص ورزف سكت ما اعطيته وجه وكان مطول الصوت صدز
سالته عن الدرابيل قالي مافيه بصوت حاد انا من النوع الهادي اصبر على المهايط شوي دخلت خذيت فره بالمحل ولقيت صفت درآآبيل على الرفوف
وناديته وخانقته قلت له هذولي وشن قال اطلع برآ ودفن
وانا الصه بهاك المخمس وطار لسماهة التلفون يقول انا كلم كفيل (وام اركب لاعبه به)قلت كلم وانا اجلس عنده ربع ساعه ولا جاء احد ومشيت وكنت اتمنى اشوف كفيله يشوف له دواء

وهذي يااخوي ضاهره تقريبا انا اشوفه بكل محلات الصيد الرمايه وصاب
ماشفت الا السنيدي الي ماشاء الله الله لايضر رعيه مهتم بالمحل

اعذرووني على الاطاله

[الشيخ900]

والله لو اني مثلك لااتفل بوجهه انا جاء ابي اشتري وبفلوسي وهذا ينافخ

[منسدح واقف]

لابد أن يمتلك البائع مقومات وأخلاق وحسن تعامل مع الزبون

((( أنت جايهم تشتري مو جاي تسرق ))))

((( سالفه قولته وش تبي ))) مابقا من أصحاب محلات الرحلات إلا يحطون تذاكر للدخول :::: الفرجه بفلوس مو بلاش تقول داخل متحف اللوفر أو متحف مدام تيسود..


كل الغلط يقع على صاحب المحل ومثل الرمايه لديه فروع كبير وأيضاً أسم كبير فلا بد من الأهتمام بزبائنه من خلال أختيار العماله الجيدة التي تحسن التعامل مع الزبون وكل فترة ينزل تخفيضات على معروضاته ويحافظ على جودته ..



سجل مع واحد نفرمقاطع لهذا المحل حتى يحسن معاملة زبائنه ...

[مكشاتي متابع]

:Dوين المحل فيه اسنعه لك:D

[معزز رماي]

مافي الى السوداني تراه نجس مره وانا بغيت اضربه مره مسوي فيها
انا عنتر بن شداد مادري وش فيه ذا قام ينافخ ويهايط مادري وش قصته
مادري هو بيروح ولا حااقد عليهوم وقام يحط حرتهوم في النااس
بس بجي واااحد بيدبه تأديب وان شاء الله ابسمعبه

[الششو]

الله يخارجنا
عمال اخر زمن هذولا العمال الطيب فيهم 1%
والبقيه لو يتولون عينا كان كلونا اكل

[البعير المغوار]

فيه بدايل للرماية على حسب علمي والله أعلم.

[ياحبي للغطاط]

شف وانا اخوك ماتفرق يكون الرمايه او الرميح اوغيرهم من الذين يحتكرون البضائع في البلد اللي يفرق شي واحد كيف تسمح له انت وغيرك يكلمك بهالطريقه ؟ ماستقوا الاجنبي علينا اوحتى السعودي الا لمن شاف ناس تسكت .الاهانه تبقى اهانه سواء من موظف صغير او ذو مرتبه عاليه شرط ان يكون عاقلا وواعيا لما يقوله فهنا اخوي اسمح لي بالنسبه لي شخصيا والله ثم والله ثم والله لو يقولي نعم وش تبي بهاللهجه مامسك نفسي ابد راح امسح بوجهه البلاط تدري ليه مو عشاني وبس لا عشان غيري مايتجرا عليهم وفي الختام نصيحة اخ لاتسمح لاحد اي كان باهانتك فبعد الاهانه العيش والموت واحد

[راح الأمل]

كان تفلت بين عيونه وعلمته كيف يعامل الزباين هذا تلقاه فسق ولا حاقد ويبي يطلع الحره بأي زبون وزين ماكنت انت الظحيه

[الشرطه]

ياوسع صدرك ... الله لايضرك

.... وصدق رسول الله .. ليس الشديد بالصرعه بل الشديد من يملك نفسه عند الغضب او كما قال عليه افضل صلاه واتم تسليم


..... مره كنت في حفل زفاف ومر عامل بالعصير على المدعوين حتى وصل للشخص الجالس بجانبي وكان يتحدث بالتلفون واثناء نزوله بصينية العصير له اشر له اخينا الذي يجلس بجانبي بانه لايريد فما كان من العامل الا سحب
الصينيه وفي اثناء ذلك اختل توازنه وسقطت على الشخص بكامل محتوياتها بحضنه .. كنت اشاهد كل شي وكانت ردت فعلي انا اني فزيت من مكاني خوفآ على ثيابي من العصير والشخص لازال يواصل مكالمته وكان لم يحدث شي ثم نهض من مكانه والعامل ارتبك حتى ضننت انه سيبكي من شدة الخوف وكان ينتفض والرجل لازال يواصل حديثه بالهاتف مع ابتسامه وياشر بيده للعامل بان لاداعي لذالك ويجيب العامل مناديل ويمسح ملابس الرجل ويعتذر بابا والله بابا مايدري والرجل يحاول ابعاده وهو يبتسم والله يا اخوان صدمت من الرجل وطريقة معاملته الحسنه مع العامل كان لم يحدث شي ....

اقسم بالله لو كنت مكانه لن استطيع التحكم باعصابي وقتها لكن بعد مارايت تصرف ذلك الرجل ماشاء الله عليه
راجعت نفسي واحاول بان اكون مثالي بردة االفعل مستقبلآ ،،

[مأمون]

سبحان الله
فرق في التعامل
قبل شهر مريت على محل الرماية اللي في الدمام في 91 وكان تعاملهم معي بكل رقي واحترام
مع إني ما شريت منهم بريال واحد
سألت عن اشياء كثيرة وتفحصت أشياء كثيرة وجاوبوني بكل طيبة
وودعوني بإبتسامة ويقولوا حياك الله في أي وقت
كانوا من العمالة الهندية أو البنقالية والله ما أميز بالضبط

مثل هذا العامل يا أخي الكريم كثير
لكن الصبر زين وأنا أخوك
ولو إنك استعجلت وتهاوشت معاه فأنت الخسران
شف لك محل ثاني غيره وخله عنك

[قناص2000]

كلامي على محلات الرماية فقط
صارت معي مشكلة اني اشتريت يايات استرالي وموظف الرماية يبي يتفلفس عطاني مقاس انا ماطلبته ويوم اني ركبت شفت الموتر مهب المطلوب ورجعت علية والعن خيره و اخذ الجوال على طول المحل واغسل المصري واتوطاه قام يبرر الموقف انت مرقبها ما ترجع قلت له عطني عمك والا مدير والا ماراح يصير خير ماخذت منه شيء لانه غلط وتنحسب عليه وخصم من الراتب المهم طلت واتصلت على فرع اخر وطلبت مدير الفروع بالمملكة وعطاني اياه وعلمته بالسالفه كان بالبداية غير متجاوب ويم علمته اني راح ابلغ وزارة التجارة بالغش والنصب ويوم شاف الجد غير رايه وقال ابشر اغيرها وفعلا غيرها على طول ورقبها بعد .
يعني الطيبة في بعض الاحيان ما تنفع. واسف على الاطاله
وتقبلوا تحياتي

[شويحط]

كلامك صحيح انا انا اكثر من مره اجي للمحل في اوقات متفاوته واحصل السوداني تقول داخل اطر منه
وكل مره ينرفزني واطلع واخر مره جيته وتهاوشت معه و بردت كبدي فيه
شايف دربيل عند فرع طريق الملك فهد 91 وجازلي المهم ثاني يوم عزمت عليه قلت دام حق الخبر قريب مني امره واخذه جيته اساله عن النوع والمقاس يرد بنفس شينه مافي يطلعلي انواع ثانيه اقوله دق على الفرع الثاني عشان يعطيك معلومات عنه وتعرفه وبكل وقاحه يقول هذا الموجود عجبك او روح للفرع الثاني والي يقهر ان الدربيل وراه
ومطنقر ما يبي يعطيني ايه سفلتبه و طلعت

[ابوريان القحطاني]

يااخوان هذا محل الرماية مستحيل صاحب المحل يبيع ..صعبة يجي ابالحسين ولا واحدن من عياله يبيع اكيد بيوضفون عمال..وعلى فكرة العامل سوداني وقديم عندهم وكل سنه يزيد سوء ادبه وتعامله واهماله
على العموم اشكركم على الردود ووالله ودي برقم المدير الاقليمي حقهم بخليه يأدب هالموظف


صاحب المحل لواء متقاعد من الوزاره الداخليه اسمه سلطان وفاتح المحل باسم ابوه الله يرحمه زيد الحسين والرجال شبعان مادرى عن الرمايه بس انت تقدر تعطي الهندي على عينه اذا قل ادبه وبعدين انت تجي لغرض معين بعض الزباين هداهم الله اسالتهم واجد
ويبي يشوف ويبي ويبي وبعضهم حرامي والعمال انا معك اخلاقهم تجاريه للغايه
للسباب الله اعلم بها يمكن الرواتب ويمقن مايقفلون الظهر عدد الساعه العمل كثيره
المهم فيه سبب والحمد لله على كل حال

[صياد من مصر]

اخوانى
قليل جداا من محلات السلاح من يتعامل مع الزبائن بوجة بشوش....قليل جدااااااا لماذا ؟؟؟لا اعلم؟فهنا بمصر نفس المشكلة فهم لديهم كبر و غطرسة فى التعامل مع الزبائن علما انهم بدونك لم و لن يبيعوا شىء...ولكن هذا هو الحال و هذا ليس بجديد فاكتشافى هو عند دخولك لاى محل لبيع السلاح لابد ان تكون واثق من نفسك و تكون على دراية و علم بما تنوى شرائة و تكون قليل السؤال مع صاحب المحل و تظهر لة ان ما يبيعة من الزمن البائد و هو ليس مدرك لما هو جديد بالاسواق.. و تعاملهم بنفس الاسلوب قبل ان يبداء معك باسلوبهم المعتاد و بهذا ستجد ان المعاملة تغيرت مائة بالمئة.. و بذلك تتحاشى اى اسلوب لا يعجبك و كذلك تستطيع ان تقلل من السعر...فهذة هى تجربتى مع محلات السلاح...و بعد خروجى من المحل اتحول مرة اخرى الى طبيعتى و اعود متواضع مرة اخرى و تقبلوا مرورى و تجربتى

[ابوباسل النمر]

الله يجزاك خير على والله كنت ناوي احط موضوع عن تعاملهم علشاني دقيت على محل الرماية وسالتة كم سوال عن الساكتون الي كنت ناوي اشتريها واذا بالعامل يلج علي يحسبن اصغر اعياله الصراحة كنت اتمنا اني عندة
عشان اعلموة وشلون يتكلم زين جيدن بالجوال يلج ولاهي اول مرة ولا اول فرع دقيت على كذا فرع نفس الاسلوب

[ابو سفيان]

الحل موجود يالربع ونجحت
في محل فتح عندنا وكان فيه يمنين المهم دخلنا المحل تفرجنا في المحل صراحه ممتاز لكن العمال تعامل صفر نسالهم
مثال دبه او دله او اي شي تبي مكانها وين يقول اليماني مافي ونمشي بين الرفوف ونحصلها وناخذ منها ٢ او ثلاثه ونجي طالعين من المحل ولا نحاسب ويلحقنا واحد منهم يقول الحساب ياسيد نرد عليه انه مافي عندكم تقول توكل على الله مدام مي عندكم وشلون طلعت هذي المهم نجننهم شويتين برى المحل ويترجونا نرجعها لهم واحنا معين عليها وبعد ساعه من الحوار وعلمناهم الاحترام ورجعنا البريمس والله من يوم يشوفونا الابتسامه في الوجه من عند الباب حق المحل
الزول اليشايف نفسه بسيطه اي واحد قرى الموضوع انه من يوم يدخل المحل اي واحد اول شي وريه العين الحمراء يقلك وش تبي قله شي ما يخصك اذا سالتك تجاوب وخليك محترم نحترمك بتقول لا الكفوف بتشتغل وكمل تفرجه واطلع من المحل ولا تطالع فيه لو كل واحد جاء وسوى هذي الشغله بيحس انه بيروح فيها من كثر الزباين الي يورونه العين الحمراء يضطر يغير معاملته

[allo]

اللهم الهمنا الصبر عند مثل هذه المواقف باالنسبه لي والله ما اتحمل يا انسحب من المحل وابلعها وللا اسحبه معي لخارج المحل وامرمطه قلة ادب جاي اشحذ منك انا.

[صياد من مصر]

طبعاااا تاريخ تجار الاسلحة معلوم للكافة من كانوا .....وهم على نفس المتيرة منذ أكثر من 1400 عام

[حكمة الصمت]

موضوع جيد

اولاً: بإمكانك تغير تعاملهم معك من اسلوبك انت معهم اول ماتدخل بإبتسامة وكيف الحال

ثانياً: ترا يصير عليهم ظغط عمل مثلهم مثل غيرهم من الاوادم وعندك السعودي مع ان دوامه
7 ساعات اتكلم عن الموظف الحكومي تحصل اخلاقه زفت ويزلل العمل ويصرفك راجعنا بكره
فما بالك ب إلي دوامه من الصباح الى الساعه 11 ليلاً

انا م ابرئهم ولاكن شف اسلوبك مع الغير قبل تلومه على اسلوبه

تقبل مروري

[باجه 511]

موضوع جيد

اولاً: بإمكانك تغير تعاملهم معك من اسلوبك انت معهم اول ماتدخل بإبتسامة وكيف الحال

ثانياً: ترا يصير عليهم ظغط عمل مثلهم مثل غيرهم من الاوادم وعندك السعودي مع ان دوامه
7 ساعات اتكلم عن الموظف الحكومي تحصل اخلاقه زفت ويزلل العمل ويصرفك راجعنا بكره
فما بالك ب إلي دوامه من الصباح الى الساعه 11 ليلاً

انا م ابرئهم ولاكن شف اسلوبك مع الغير قبل تلومه على اسلوبه

تقبل مروري
انا والله ماابي امدح نفسي يااخوي لكن والله ان تعاملي خصوصا مع الاجانب تعامل طيب جدا اسلم وابتسم وكل شي ومن ضمنهم هذا انا اول مادخلت كنت مبتسم وسلمت وسألته عن حاله..رد السلام بدون ماحتى يقول انا بخير
وانا على فكرة اعذرهم ياخوي مثلا لو مايبتسم اما يقولي الكتالوج مب فيه ممنوع!! بالله يااخوي ذي تدخل العقل؟ محل بنادق ممنوع فيه يوريني الكتالوج؟ ويقولي انت معاك فلوس ولالا..!! وانا لو مااعرف تعامل موظفين الدوائر الحكومية ولا ماكان شبهت تعامل الاخ السوداني بتعاملهم

[صياد حباري]

بارك الله فيكم جميعاً
الله يوفقك على حسن تعاملك وتراك لقنته درس خير من لو أنك خاصمته
وأقول والله المستعان
نحن لا نعلم عن ظروف العامل النفسية أو المالية أو العائلية شيء ومن الصعب نحكم علية كون كل العوامل السابقة تؤثر على كل إنسان .
وترى بعض الشركات لا تصرف رواتب العمال وتتركهم عدة أشهر .
والله يا إخواني الشركات شوهة صورة السعوديين في كل مكان وكذلك الكفلاء إلا من رحم ربي .
كره العمال لنا أصله من تعامل الكفلاء معهم والشركات التي تفرض عليهم أشياء ما أنزل الله
بها من سلطان .
وأنا لا أعذر العامل ايضاَ فمفترض أن يتعامل بخلق الإسلام مهما كان الأمر

ولك يا أخي العزيز
روحك الطيبة وتعاملك الطيب وقدرتك على تمالك نفسك عند الغضب هو الشجاعة الحقيقية
بيض الله وجهك ونور الله قلبك وبارك علمك وعملك .

ملاحظة :
مفترض منأصحاب الشركات وضع ورق للشكواى أو إنشاء صفحات على الإنترنت لتلقى شكاوى
الزبائن
ولا ماهم فالحين إلا في أخذ فلوس المواطنين الله أكبرعليهم
بعديعن عندنا شركات كثير تبيع الأسلحة وأدوات الرحلات والصيد ما هي المشاريع التي قدموها لخدمة البيئة
بماأنهم من يستورد الأسلحة ويشجع على الصيد .

[باجه 511]

بارك الله فيكم جميعاً
الله يوفقك على حسن تعاملك وتراك لقنته درس خير من لو أنك خاصمته
وأقول والله المستعان
نحن لا نعلم عن ظروف العامل النفسية أو المالية أو العائلية شيء ومن الصعب نحكم علية كون كل العوامل السابقة تؤثر على كل إنسان .
وترى بعض الشركات لا تصرف رواتب العمال وتتركهم عدة أشهر .
والله يا إخواني الشركات شوهة صورة السعوديين في كل مكان وكذلك الكفلاء إلا من رحم ربي .
كره العمال لنا أصله من تعامل الكفلاء معهم والشركات التي تفرض عليهم أشياء ما أنزل الله
بها من سلطان .
وأنا لا أعذر العامل ايضاَ فمفترض أن يتعامل بخلق الإسلام مهما كان الأمر

ولك يا أخي العزيز
روحك الطيبة وتعاملك الطيب وقدرتك على تمالك نفسك عند الغضب هو الشجاعة الحقيقية
بيض الله وجهك ونور الله قلبك وبارك علمك وعملك .

ملاحظة :
مفترض منأصحاب الشركات وضع ورق للشكواى أو إنشاء صفحات على الإنترنت لتلقى شكاوى
الزبائن
ولا ماهم فالحين إلا في أخذ فلوس المواطنين الله أكبرعليهم
بعديعن عندنا شركات كثير تبيع الأسلحة وأدوات الرحلات والصيد ما هي المشاريع التي قدموها لخدمة البيئة
بماأنهم من يستورد الأسلحة ويشجع على الصيد .
بارك الله فيك على حسن ظنك فيني
فعلا فيه ظروف خفية تأثر على العامل الله يكون في عونه بس
انا قصدي يااخوي اهمال الشركة نفسها..انت الحين لو تروح لمطعم وجبات سريعة مثلا ماكدونالدز تلاحظ ان تعامل الموظفين الي فيه غالباً يكون جيد وهذا يرجع للأدارة بس مثلا تروح لمطعم شاورما بتلقا الاخ التركي الي داخل ماله نفس غالباً والسبب الادارة واهمالها
اما من ناحية محافظتهم على البيئة فمدري اضحك ولا ابكي..يااخوي هذولا مايهمهم شي الا الفلوس يبون يشفطون كل الي بجيبك وبس فمبالك فالبيئة والقهر اني يوم ادخل النت واشوف بنادق الصيد الهوائية اعرف ان ربعنا جابو لنا اردأ واسوأ وابيخ شي مدري هي نجاسة ولا حسد وفوق ذا اسعارهم مرتفعة لانهم عارفين انك محدود عليهم غصب
شاكر لك

[صاروخ الغطغط]

السلام عليكم انا شريت ساكتون من الرمايه من الرياض شارع التخصصي الي يبيع سوداني شريت منه ساكتون ونا مستعجل بروح اقنص وبعد ماجيت في البر وطلعت الساكتون من الجراب لقيت النيشان طايحات الانوار الي في النيشان ورجعتها وضمانها سنتين ضمان شامل جيت للمحل قال السوداني النيشان ب50 ريال اغيره لك قلت عليعا ضمان شامل قال الضمان للقطع الداخليه شفته لعاب ونشبت في حلقه وبدله بجديد بدون فلوس لنهم يستغلون الطيب في الغش

[سيف الظفير]

أسمح لي هو تمادى كثير بسببكم انتم ... بعض العمال ما ينعطى وجه لو لقى من يخزم عينه ما رفع راسه وحكى


ولكن كل هذا الشئ يكون اذا لك حق فقط ماهي نعارة ولعانة من الراس

[فايروخ80]

يالله لك الحمد العامل عندنا بتبوك لدخلت المحل يتشحدك عشان تشتري والسوداني اللي تقول عنه يمكن راعي المحل مقصر معه

[باجه 511]

يالله لك الحمد العامل عندنا بتبوك لدخلت المحل يتشحدك عشان تشتري والسوداني اللي تقول عنه يمكن راعي المحل مقصر معه
ههههههههه ياولد شكله من قل الزباين

[( شميريخ )]

والله ياولد دبلت تسبد يجيك من ديرته ماهو شبعاان خبز ويقووم ينافخ
لو العامل يوطى خشمه يصحي ويقدر اهل الديره وتعلم الادب بس حنا نعاملهم بطيبه وتقوى عيونهم .

[llonely]

معنا واحد مثله عندنا في ابن حميد في جدة الله يعينا عليهم بس