راعي العجراء والعسيب

[راعي العجراء]

http://www.miraatzubair.com/pics/Aseeb%20Game


السلام عليكم ورحمة الله وبركاته
اليكم هذه السالفه القديمه
ما اذكر تاريخها بالضبط بس الوكاد من خمسين سنه اوحولها
يوم كنت شايب ذاك الحين قبل ماصير شباب
كنت مع مجموعه وراعين نلعب على عسبان النخل مثل الصوره ونركض بها بالشرع
على شكل خيل وحنا ماغير نركض ولا نتعب والعسيب من قطع قلبه من المراكض
لو تشوف صدره وشلون يتنفس ان ترحم صدره ماغير يتسفط ونفسه يغبر بالارض
من التعب ولا شاف ماء كرع فيه ساعتين وهو يشرب ريقه ناشف وحنا مثل اللي يقول تونا بالبدايه الواحد منا ريته رئة (سلو؟؟؟)
بس الحين اتعجب كيف يقدر يركض الواحد والعسيب بين رجوله اللي كلها مشق
المهم فيه جار لنا عنده نخل بحوش قريب من البيت يوم صار ذاك اليوم وهو يطلع من هالعسبان الاخضر واليابس يوم شفناهن وانجيك محولين من الخضيرا( شلو ) من الفرحه وكل واحد اخذله عسيب وقام يعسفه هلى هواه
واخذ ينضف فيه عن الشوك (الشيف) قبل الاستعمال وانت عارفين من اول الواحد ماعليه الا ثوب لافنيله ولا (سرو)
اخذنا العسبان وماغير مطامر بهالشرع لعل واحد من العسبان توه اخضر مثل قلب راعي العجراء وفيه شوكه
(شيف)طولها عشره سم واحد من العيال مانتبه لها والظاهر ان الخيل (العسيب) اللي مع الولد نشيط صار يركض فيه المهم انه وقف فجئه وهي تدخل الشوكه بالفخذ من قدام ويطلع راسها من وراء الفخذ وهو يزعق ذيك الزعقه وحنا نلتم عليه وهو ماسك العسيب وكل ماسحبنا العسيب صرخ وماندري عن الشوكه ونحرك ويصيح حنا نحسبه مايبي ناخذ خيله وهو بلش بالشوكه
اخيرا عرفنا ان فيه شوكه وحنا نرفع الكبوت من وراء قصدي الثوب من وراء وانشوف الشوكه طالعه من الخلف شاتله الفخذ على جنب وحنا نمسكه ونسحبها من وراء نبي ان طلعها هي والعسيب من هالفتحه وهالوريع يزاعق مادرينا ان الشوكه ماسكه بالعسيب
مانطلقت منه شفناها من وراء ومن قدام ماندري عنها
حتى ان واحد من العيال يحاول يسحبها بسنونه يوم عيت تطلع
واخير جاء الفرج لهل الوليد بس وش عقبه يوم انفرت كبده من الصياح وحنا نسحب العسيب من قدام وهي تطلع الشوكه ومعها نقثت لحم وهو يركب عسيبه ويكسر الشوكه
ونواصل الركض بس خيولنا كلها استراحت لها ربع ساعه
بالصراحه ايام لاتنسى والحين باينه في فخذه تقول مخباط خرازه
ايام لم يبقى منها الا الذكريات والحين الواحد يمسك حقات البلاكسيشن حتى اسمه ماعرفه
ويقول ياي اه عورتني ايديني ويمكن مايروح للمدرسه من باكر
ماشاف من اول الواحد ينقطع اصبعه ويقعد ساعات وهو مايدري عنه الا لا قالت امه وين اصبعك ياوليدي
الله المستعان ايام وعدت في حلوها ومرها
انتهت السالفه
ارجوا ان تحوز على رضاكم والسموحه على التقصير
وقبل الختام سبحانك اللهم وبحمدك لا اله الا انت استغفرك اللهم واتوب اليك
دمتم بخير

[محمد الظاهري]

الله الله عليك ياراعي العجراء
دائماً تتحفنا في روائعك
وذكرياتك الحلوه
سجيت في صوره على راس وكني اشاهدك واشاهد ذكراك
اشكرك يا مبدعنا جزيل الشكر
تحياتي وودي
اخوك

[قوافي ( أم نهار )]

حياك ربي اخوي
اجل ريحتو خيولكم لحين انتهاء العمليه الجراحيه واستخراج الشوكه
عيال الحين ما ودي اقول شي ويزعلون
بس مابقى ألا تزم الواحد لفراشه تعبان من اللف والدوران بالبلاي ستيشن ..الله يخلف بس
سالفه جميله من حقيبة الذكريات الجميله عساه ماتبلا..
اشكرك ودمت بحفظ الله
تحياتي وتقديري واحترامي
اختك
..قوافي..

[راعي العجراء]

الله الله عليك ياراعي العجراء

دائماً تتحفنا في روائعك
وذكرياتك الحلوه
سجيت في صوره على راس وكني اشاهدك واشاهد ذكراك
اشكرك يا مبدعنا جزيل الشكر
تحياتي وودي

اخوك


هلابك يااخي محمد الظاهري
حضورك بهذه السالفه
تشريف لراعي العجراء
والحمدلله ان السالفه اعجبتك
اشكرك على ماخصيتني به من كلماتك التشجعيه

[راعي العجراء]

حياك ربي اخوي

اجل ريحتو خيولكم لحين انتهاء العمليه الجراحيه واستخراج الشوكه
عيال الحين ما ودي اقول شي ويزعلون
بس مابقى ألا تزم الواحد لفراشه تعبان من اللف والدوران بالبلاي ستيشن ..الله يخلف بس
سالفه جميله من حقيبة الذكريات الجميله عساه ماتبلا..
اشكرك ودمت بحفظ الله
تحياتي وتقديري واحترامي
اختك

..قوافي..


هلابك ياقوافي
يمكن اخيولنا الى الخين وهي مكرعه تشرب ذابحها الضماء من ذاك الوقت
والبلا استيشن او الفلاش تيشن يقولون انه يجرح اليدين هو صدق ياقوافي
وبالاخير اشكرك ياقوافي على حضورك وعلى كلماتك الراقيه والغنيه بذهب المعاني
والتشجيع فانتي مدرسه
دمتي بخير

[قوافي ( أم نهار )]

يمكن اخيولنا الى الخين وهي مكرعه تشرب ذابحها الضماء من ذاك الوقت
ان كان هي تشرب لين الحين قد انطحلت او جاه استسقا بالبطن صارت خزان ..
والبلا استيشن او الفلاش تيشن يقولون انه يجرح اليدين هو صدق ياقوافي
والله مادري انا ما أعرف العب إلا دبق وأحجي بالتراب عز الله مقامك..
وبالاخير اشكرك ياقوافي على حضورك وعلى كلماتك الراقيه والغنيه بذهب المعاني
والتشجيع فانتي مدرسه


انا من يشكرك لأمتاعنا بسواليفك الجميله والخفيفه على النفس وهذا شي قليل من يتقنه ..
تحياتي لشخصك الكريم

[أبوتركي ومحمد]

حياك الله أخي الغالي
راعي العجراء
أبدعت وأمتعت
تقبل تحيتي وتقديري
أخوك
أبوتركي

[خوي مخباته]

ماجرى قصووور يالنشمي " ياراعي العجراء " ســـــــــالفه في غايه المتعه واخذنا معه سجات وبارك الله فيك
لاكن وين وديتنا الى الزمان الماضي الي له طعمممممم والله كلك خير....و... بركه الله يسعدك اخوي العزيز
{ والظاهرويقولن بوقته ان عسيب السكري يسبق عسيب الخلاص بمسافه حلييله }
........................................ تحياتي لك................................................ ....

[منظر]

راعي العجراء
يعطيك العافيه ولا هنت
انا أحد المعجبين بما تجود به نفسك الطيبه وتسطره يدك من
قصص وسوالف ممتعه
بصراحة لها نكهه وذوق خاص
كم انت مبدع لها
والماضي راح ما ينعاد

تحياتي لك

[راعي العجراء]

يمكن اخيولنا الى الخين وهي مكرعه تشرب ذابحها الضماء من ذاك الوقت

ان كان هي تشرب لين الحين قد انطحلت او جاه استسقا بالبطن صارت خزان ..
والبلا استيشن او الفلاش تيشن يقولون انه يجرح اليدين هو صدق ياقوافي
والله مادري انا ما أعرف العب إلا دبق وأحجي بالتراب عز الله مقامك..
وبالاخير اشكرك ياقوافي على حضورك وعلى كلماتك الراقيه والغنيه بذهب المعاني
والتشجيع فانتي مدرسه


انا من يشكرك لأمتاعنا بسواليفك الجميله والخفيفه على النفس وهذا شي قليل من يتقنه ..


تحياتي لشخصك الكريم


هذا قليل من ماعندك فانا نقطه في بحر ابداعك
يا استاذه قوافي

[راعي العجراء]

حياك الله أخي الغالي

راعي العجراء
أبدعت وأمتعت
تقبل تحيتي وتقديري
أخوك

أبوتركي


اشكرك يابو تركي على كل حرف سطرته
والابداع حضورك لاعدمتك ولا عدمت حضورك
دمت بخير

[عابر الموج]

الله يعطيك العافية لكن هاه نسيت الرسن وين راح اهم شي بالموضوع ماني بعيد من حراويك تقبل تحياتي

[binamerah]

ما شاء الله عليك دقة في الوصف وكأن الواحد عايش القصة
الله يعطيك العافية

[Al3rands]

ههههههههه ام سالفة ان الواحد مايدري ان اصبعه انقطع الين تسأله امه وين اصبعك خخخخخخخخخخخ

[راعي العجراء]

ماجرى قصووور يالنشمي " ياراعي العجراء " ســـــــــالفه في غايه المتعه واخذنا معه سجات وبارك الله فيك

الي له طعمممممم والله كلك خير....و... بركه الله يسعدك اخوي العزيز

........................................ تحياتي لك................................................ ....


هلابك يا خوي مخباته هلا وليون غلا
السالفه كملت بحضورك وتشحيعك
لاكن وين وديتنا الى الزمان الماضي
نقل فؤلدك حيث شئت من الهواء - فما الحب الا للحبيب الاولي
واللي ماله اول ماله تالي وش احسن من الذكريات
{ والظاهرويقولن بوقته ان عسيب السكري يسبق عسيب الخلاص بمسافه حلييله }

ومثل ماقلت عسيب السكري اقوى ويتحمل وعسيب البرحي اسرع واخف طينه
دمت بخير

[راعي العجراء]

راعي العجراء

يعطيك العافيه ولا هنت
انا أحد المعجبين بما تجود به نفسك الطيبه وتسطره يدك من
قصص وسوالف ممتعه
بصراحة لها نكهه وذوق خاص
كم انت مبدع لها
والماضي راح ما ينعاد


تحياتي لك


هلابك يامنظر
الله يعافيك يالفالي
اعجابك فوق راسي وابشر بسعدك
و السوالف اللي عندي كلها قديمه ونصفها ناسيه
اما السوالف الجديده فهي نادره وبسرعه انساها
دمت غالي ياغالي

[تلميذ]

رفعت الكبوت للتهويه هذي سالفتها سالفه ...:alarm:
برغم الفقر والالم الا أنها طفوله ممتعه وحياه جميله
راعي العجراء
القاص الممتع والجميل في كل حالاتك
تقبل خالص تقديري وامتناني

[النبهاني]

وعليكم السلام ورحمة الله وبركاته
حياك الله يابو جلنبو
الله لا ينكسنا
الشباب شيب والشيب شباب
والشيف بدل ما طلعونه تبون تدخلون معه العسيب
والضعيف صريخه يسمعه اللي وين
حسبي الله على ابليسك
عيال من اول الواحد جلف لو تروح منه اي قطعه ما يهمه ولا يدور قطع غيار
اشكرك ياراعي العجراء مونسنا الله يونسك ويسعدك بالدارين

[ناصر العلي]

وعليكم السلام ورحمة الله وبركاته
حياك ربي يالغالي
ويازين ذيك الأيام وترفيهه
الواحد لاركب:good2: العسيب يشوف مناير أسطنبول
كأنه ملك الدنيا وماعليها
والله أيام مرت علينا
الواحد يبطه مسمار مصدي ومعووج
ويمكعة..وكم ضربة بساجة على مكان البطة لين يطلع الدم وياقف
ويرجع يركض بنشاط وحوية أكثر وكأنه أخذ جرعة منشطة:burnout2:لا كزاز ولاتسمم يالله لك الحمد
وعلى قولك سلط الله على بليسك
ماشاف من اول الواحد ينقطع اصبعه ويقعد ساعات وهو مايدري عنه الا لا قالت امه وين اصبعك ياوليدي
لاجديد يالغالي
مبدع كما هي عاداتك
كل الود

[بنت الأحساء]

السلام عليكم

سالفه حلوه ورائعه واذكر الوالده الله يحفظها كانت تقول لي عن العاب الاولاد ايام البيوت القديمه

احب اسمع قصص عن الماضي اللذي لم اعيش فيه

يعطيك العافيه واتمنى المزيد من القصص الشعبيه

[راعي العجراء]

الله يعطيك العافية لكن هاه نسيت الرسن وين راح اهم شي بالموضوع ماني بعيد من حراويك تقبل تحياتي


هلابك ياعم عابر الموج
يشرفني حضورك
والرسن الى الحين وهو برقبة الخيل اللي مكرع يشرب عقب القلهي والمدابك
شكرا لك شكرا لحضورك
ودمت بخير

[عابر سبيل 1]

سالفة طيبه من وجه طيب ...
لاعدمناك أخوي ...
تحية إعجاب وتقديروموده ...

[راعي العجراء]

ما شاء الله عليك دقة في الوصف وكأن الواحد عايش القصة


الله يعطيك العافية


الاجمل من الوصف حضورك بهذه السالفه
دمت غالي ياغالي

[راعي العجراء]

ههههههههه ام سالفة ان الواحد مايدري ان اصبعه انقطع الين تسأله امه وين اصبعك خخخخخخخخخخخ

صحيح يالعرندس مايدري عن اصبعه مقطوع
من لعب البلاكسيشن مدري البلافستيشن هذاك اللي ينخجرونه العيال بصابعهم
عساك عرفته
دمت بخير

[الزعول]

مكشور يابو عجاري على السالفه ولاتبطي علينا