افضل اماكن الصيد في جزيرة ابو علي

[al b r n s]

السلام عليكم
عندي استفسار بسيط
انا طالع انشالله جزيرة ابو على بعد يومين ابي افضل اماكن الصيد فيه
مع صورة احداثيه لاني اول مره اجي الجزيره علمن اني ابي اجلس فيه يومين
وافضل انواع الطعم الي تنفع فيه


وشكرا:)

[كوكتيل سمك]

انشاء الله يفيدونك الاخوان

[ذوالجناح7]

الخبر عند أخونا الجزاااار White_Shark :s


وبعدهااااا عطينا الأخبار :good2:

[White_Shark]

حياك الله أخوي البرنس

بحسب علمي بأن بأن التخييم ممنوع في جزيرة أبو علي إلا إن كانت عندك واسطة .. أو صنادق وحضور .

إن كانك بتروح الخميس القادم .. المد راح يكون تقريباً الساعة 10 الصباح إلى 4 العصر .. ثم يبدأ الجزر من 4 العصر إلى 10 الليل .. والمد الثاني بيكون من 10 الليل الى 4 الفجر ( طبعاً الحساب تقريبي يعني يمكن تزيد أو تنقص ساعة ) على حسب المنطقة اللي بتخيمون فيها .. بالنسبة للطعوم ( ربيان - خثاق ) للشعوم .. ,, .. و ( نغاق - جواف - ربيان كبير ) للسبيطي والسمك الكبير .

بالنسبة لي ماعندي احداثيات لجزيرة ابو علي للأسف .. ولكن افضل منطقة للصيد هي( دريدير ) .. بس ماتنفع للتخيم لأنها مش نظيفة .. وعندك منطقة ( أبو حد ) جميلة للتخييم وصيدها أرزاق .

وإن شاء الله هذي الرسمه المتواضعه تفيدك :D .. رسمتها لك على السريع :

http://im15.gulfup.com/2012-04-30/1335761020441.bmp


وإن شاء الله تفيدك :) .

تقبل تحياتي .

[accentkool]

بجد ابدع وايت شااااااااااارك يعطيك الف عافية على الرسم التوضيحي بارك الله فيك

[بوناجم]

يبغالها جزيرة بو علي...الوايت شارك ما قصر فينا حمسنا تحميس
بس كيف ناخذ التصاريح؟؟
والرحلة يبغالها دفع رباعي ولا كورولا تنفع؟؟

[أبو نوران]

التصاريح تستخرج من مركز سلاح الحدود بالجبيل البلد وخل يكون معك صور بطاقات الاحوال للي تبي تسجلهم بالتصريح والتصريح مدته يمكن شهر او اسبوعين ولا تدخل عليهم إلا بلبس رسمي وأكثر الاماكن هناك السياره العادية توصلها

[عاشق البحرE]

يمسيك بالخير أخوي البرنس ..

ما أتوقع ان في أحد في المنتدى أخبر من العضو القرش الأبيض في جزيره ابو علي من جهة السيف ... ما شاء الله عليه عارف المنطقه صح ..

بالنسبه لي انا عندي طراد بفرضه الدفي بجانب مدخل جزيره بوعلي .. و خبير بجزيره بو علي بس المناطق داخل البحر مو السيف . و عندي احداثيات في داخل البحر و القريبه من جزيرة أبو علي .. انصحك اذا ما وافقوا انك تجلس ليومين في الجزيره خلها يوم صيد سيف و يوم صيد طراد ..

[بحر الكلام999]

انا عارف الموضوع قديم لكن حبيت اتكلم لكم عن هذي الجزيره انا ادخل لها من سنين بس ندخلها بطراد انا والشباب ومحدقنا ظهر راس ابوعلي ونشوف السيف قدامنا واحنا نحدق بس طبعا حنا بعيد يمكن 2 كيلو مسافه عن السيف لانا قرب السيف ممنوع ولا ودنا تصير لنا مشكله او ناخذ مخالفه طبعا كل ماتقرب من السيف يكون الصيد شي مو معقول والله .... احب اوضح لكم خبرتي البسيطه في مبحر ظهر راس ابوعلي البحر هناك من يوم تعدي الفك العمق يكون مترين الي لونه اخضر فشتوت لونه اخضر وتحتك كله صخور وشعب مرجانيه طبعا المكان هذا الحداق فيه ممنوع لانها منطقه تابعه لارامكوا بس حنا لازم نمر عليها وفي باخره بتواجهكم غرقانه علي اليسار وانت بتعدي راس ابوعلي عند راس ابوعلي شركه ارامكوا البرج الي ينور الطويل تلاقيها تحت طوالي بمحاذاه البرج الوسطي والصغير ارجوا من الاخوان الجدد الانتباه منها لانها احيانا ماتبين في الليل ... ونخلي راس ابوعلي ورا ظهرنا ونمشي بمحاذه السيف يصير علي يسارانا وحنا طوالي لين نوصل للجزيره في نص البحر تقريبا علي شكل قوس الجزيره وفيها اشجار واضحه المعالم وبعدين نخلي الجزيره ورا ظهرنا وندخل داخل البحر شوي علي بعد 10 كيلو

طبعا منطقه راس ابوعلي منطقه غريبه والله سبحان الله من العجائب الي اشوفها فيها من كثر مابحر فيها طبعا كلها موج مايوقف احيانا وجدا نادر الحصول انه مايكون فيه موج طبعا المنطقه خطره جدا لانه لو تخلي الطراد سماري يسحبك الموج لناحيه السيف وفيه صخور هناك رق خطر فلازم تنتبه واحيانا يكون التيار تحت قوي في بعض المباحر حول جزيره ابوعلي طبعا السمك فيها حدث ولا حرج سمك مو طبيعي اقل سمكه نصيدها هناك اقل من 2 كيلو كل انواع السمك حولك حتي الدلافين تشوفهم يسبحون قدامك والقرش شفناه هناك والشعم والهامور صدنا والكنعد قص الخيط علينا والدويلمي عبينا الطراد منه والفسكر موجود احجام عملاقه لكن امانه لله ماقد صدنا سبيطي ولا سكن بس مادامنا صدنا شعم اكيد في مربي سبيطي بس مثل ماتعرفون السبيطي ذكي ولا اي واحد يصيده اما بالنسبه لسيف ماقد حدقنا فيه ولا قد جيته لانه لازم بتصريح واغلب الطرادات مايروحون جزيره ابو علي لانهم يحسبون لها الف حساب من خطوورتها لكن حقيقه جزيره مربي سمك مو معقول والله صت فيها شعري عربي يمكن يجي وزنه 4 كيلو ونص اكبر سمكه شعري عربي شافوها الشباب بحياتهم لما طلعتها ارفعها وسط الطراد عشان اجيبها علي القرف اقسم بالله نقزت بقوه ورجعت للمويه من كبرها وطحت وقتها والله العظيم ياخواني اني ماكذب عليكم اصابعنا تصب دم وتتقطع من السحب فيها الجرح يجلس اسبوعين يالله يبرا ولما تضرب السمكه عندك ماتسمع غير الخيط يون هناك مافي قرمشه بالطعم بس بلع بالعربي احياننا يطلع لك سمك صغير بس الكبير بكثره هناك موفقين

[NOBL3]

ياسلام عليك يا بحر الكلام .. والله اني خشيت جو معاك وسبحت في الخيال

يخوي خذني معك طراد .. بأدفع لك اللي تبي ، شرط نحدق في منطقة الخطر :D

[بحر الكلام999]

ياسلام عليك يا بحر الكلام .. والله اني خشيت جو معاك وسبحت في الخيال

يخوي خذني معك طراد .. بأدفع لك اللي تبي ، شرط نحدق في منطقة الخطر :D


تامر امر والله يالغالي خذ رقمي عندك 0500156644 بعد اذن الاداره اتصل عليك وابشر بسعدك باذن الله