من اجل الحرارة غيرت كل شيء تكفون الحل؟

[محمد سعود]

السلام عليكم ورحمة الله


اخواني اعضاء مكشات

عندي مشكلة في سيارتي لا ندكروزر جكسار 2007 الاحظ الحرارة اذا مسكت خط خصوصا بالنهار ولايام هذي مثل ما انتم عارفين تصل درجة الحرارة 40 بعد 150 كيلو تقريبا تبدا درجة الحرارة ترتفع وتعدى النص واذا وقفت لقيت القربة تطبخ


غيرت كلتش المروحة
غيرت طرمبة الماء
غيرت غطاء الراديتر وكلها وكالة

والراديتر اسوي له غسيل كل فترة

ولا زالت المشكلة علما بانه لا يوجد عادم

بديت اخاف انه راس المكينة من خلال تجاربكم ماذا توقعون المشكلة

وماهي الورشة اللي تنصحونني بها بالرياض

الله يجزاكم خير ويوفقكم

انتظر ردودكم

[ملقاط بن جمر]

ودي افيدك لكن مامن خبرة ..
لكن في المنتدى عضو اسمه مركز حرارة بإذن الله إنه يقدر يفيدك ويبين لك الإشكالية

وفقك الله ..

[فتى الوادي]

طيب غيرت الأديتر ؟
غيره وخذ لك نوعية ممتازة وجرب .
إذا ما ضبط الله يعينك توظيب للمكينة وتغير الوجيه ودبلها ...

[الدوسري دت كم]

هلا والله بأخوي

العلم عندالله سبحان ابيك تشوف الاديتر لاتقول المانضيف
دور ورشه وسوتنضيف اوتصييخ اديتروتبي تشوف الفرق بأذن الله
شف فيه ورشه الجهني الشايب ابوحسن يمكن بعض الشباب يعرفه
ممتازبلحيل بلحيل مكانه الصناعيه القديمه وانت جاي من طريق الخرج
صح تجيك الاشاره الي به السالم حق القزاز خله على يمينك حتى يجيك
كبري مشاة بعده يجي شارع يمين ادخل معه شفه ثالث ورشه على يسارك
الرجال فنان اديترات مايشتغل الاهن رح لمه وبيقولك الي يبي موترك

[مهزوز]

السلام عليكم اخوي محمد اذا كنت تعبي الاديتر مويه عاديه فهذا غلط لانه مع الحراره العاليه يتكون رواسب داخل السرندل وتبدا الحراره با الارتفاع ولو تغير كل القطع ماتنزل الحراره واكثر الناس ماينتبه لنقطه هاذي مالك توديه مركز متخصص يفحص لك اسباب الحراره ويختبر لك الراس ولاتكتفي بورشه وحده مر كم ورشه وشوف وش تشخيصهم للخلل والله يدلك الى سبب الحراره امين هذا من تجاربي وشكرا

[ربيع مكشات]

اخي انا صارت عندي وغيرت طربه ماء وغيرت كلتش مروحه وغسل الرديتربون فك وبعدها قررت اصيخ الرديتر ولم فكيت الرديترلقيته يالطيف يمكن بقول ثلثين مواسيره مسكره وبعد اتصييخ الحمد لله مايعرف الحرارولو في عز الظهر \\\ اقول صيخه وان شاء الله بترتاح من الحراره

[الوسم2]

أمورك بسيطة أخوي مر قطع الغيار وخذ بلف حرارةأصلي باترول مقاسه 65 o

كان معي جيب GX 2002ركبت له بلف وضبط الحرارة ثبتت على الربع تقريباً

[ابو ودع]

صارت معي يا خوي وبعد عدة محاولات
غيرت بلف الحراره ورجع الجيب وكاله

[يزيد 999]

أخوي غير البلف وكالة وان مانفع صيخ الرديتر وتنحل المشكلة بإذن الله:good2:

[عود الليل]

مثل ماقالوا الشباب ....غير فالف الحرارة ....وانتبة من الفني يقول شيل الفالف ماله داعي .....تراه مهم وشيلته خطيرة على تنظيم الحرارة المبرد ....ممكن ينشعر الراس بسبب الفالف.

Sent from my GT-I9100 using Tapatalk 2

[حبـران]

شف يالحبيب

اذا جيت من مشوار حامي انزل وشف الخرطوش العلوي للاديتر اذا منتفخ ولا تستطيع ضغطه بيدك
هذا معناته الراس رايح فيها لانه مليان هواء خارجي وستجد جوانب الراس سوداء على الحواف مثل الخط
في المنطقة الفاصلة بين الجرم والراس

[السفيررر]

لااااتخاف المكينه سليمه ان شاالله

لكن نظف شبك الرديتر حق المكيف الي قدام الرديتر

لانه يمسك غبار ورمل وعيدان صغيره من الاشجار وتسكر فتحات الشبك ويصعب عبووور الهواااء

نظفه بهواء قوي وبعدين بالماء

والله يوفق

<<طبعاً عن تجربه

[(((.ابوتميم .))))]

اول شي شف فيه تهريب منا والا منا
غير بلف الحرارة اذا نفع والا ماضر لانه قطعة استهلاكية تقريبا
اذا مانفع صيخ الرديتر وحط موية اصليه
اتوقع انا من البلف
سو الي قالولك الشباب وعلمنا با النتايج

[محمد سعود]

اشكركم اخواني الكرام على تفاعلكم السريع ومعلوماتكم القيمة وهذا العشم فيكم جزاكم الله خير ووفقكم لما يحبه ويرضاه

لكن انا بسألكم هل اتساخ الاديتر يسبب تفوير؟ لان السيارة تفور في الحالة اللي ذكرت لكم فوق

اما الخراطيش فهي بحالة ممتازة

وولمعلومية المشكلة هذي بدت معي وانا جاي من قطر واجهتنا عاصفة رملية يمكن اثرت على الرديتر

[ارواف]

اخوي مساك الله بالخير دق علي ونا اعلمك 0502916753

[aooa]

اخوي المشكله قد تكون من الرديتر او من بلف الحراره .. وانا افضل تغير بلف الحراره مثل ماذكر احد الاخوان حق باترول 65 درجه وشف اذا نفع والا ما قدامك الا الرديتر يا تضيخه يا تغيره ... وترى فيه رديترات اردنيه المنيوم ممتازه وسعرها رخيص اعتقد ما تعدى 500 ريال وعمليه عن تجربه ...

[ابوسند9]

اخوي جرب وغير البلف حتى لو قالك المختص انه كويس لانه ممكن انه يتاخر ما يفتح
اما مسئلة تغيير الاديتر انتبه تغيره لان السياره موديله جديد وانت واضح انك محافظ على اليساره
وانت الحين غيرت كل شي
جرب غير البلف وصيخ الاديتر
اذا ما تغير شي شيك على طرمبة المويه
بس انصحك انك تشوف ورشة كويسه لان بعض الورش يبغى يغير كل شي على حساب جيبك

[يكفيني نظرة]

المسأله بلف ان شاء الله فقط

[الدوادمي506]

يمكن المشكله من راس المكينه وعاير الزيت يمكن خالط

[vxr 1998]

اغلب الي تفضلو فيه الاخوان مايكلفلك شي وانا مع الي قال نضف اديتر المكيف من الخارج لانه هو معبر الهوا لتبريد المكينه وانت تقول المشكله طلعتلك بعد ماجيت من السفر وكان فيه بالطريق عج وبعدين البلف مهم مثل ماذكرولك الاخوان وبعدين انت تقول المويه تنقص تاكد انهمافيه اي تهريب مويه اذا كويس مافيه مشاكل تهريب يلزم انك تغير غطا الاديتر وتراه مهم لانه اذا كان السبرنق فيه ضعف بيسبب ان المويه تنقص بسبب التفوير حتى لو ان الحراره طبيعيه ارجو اني افدتك واسف علا الاطاله.

[اخو شماء]

اخوي انا نفس المشكله بس الموتر 2004 جي اكس ار

غيرت البلف مرتين ونظفت الاديتر وسويت تسييخ وغيرت غطاء الاديتر والمشكله للحين موجوده

ودائما اذا تعديت 120 احصل القربه تغلي ومطلعه مويه برا

بس باقي عندي طرمبة الماء ماغيرتها للحين اتوقع المشكله منها او من الخراطيش لأني جيت ميكانيكي وقال شيك على الخراطيش يمكن تقفل اذا احتر الموتر

وياليت اللي عنده حل يسعفنا

[عصاقيل الدخله]

بلف حراره + تسييخ اديتر وان شاء الله يضبط

[عدووس]

إذا كانت الحرارة كل ماتزيد السرعة ترتفع فالمشكلة عندك من الرديتر 100 % غير الرديتر لا تسوي له تسيخ لأنه ما ينفع . وأتمنى أن أكون أفدتك

[1 أبو يزن 1]

1 / ممكن عندك بلف الحرارة فاتح ركب بلف جيب تايوتا ديزل أو بلف باترول والباترول أبرد
2 / إذا الإديتر جته حرارة عالية كذا مرة أو سبق أو جاه تسييخ فيعتبر تالف فلابد من تغييره

[سامورك]

سلام حسب تجربتى بسيارتى يوجد غالبا مشكلة فى وزن الصمامات بالراس او جلب الكمشفط ،، لك الاحترام .

[هواوي الشمال]

طيب السياره في الليل تسخن معك؟؟
هذا من الاديتر اكيد فيه سدد صيخه وان شاء الله فاله العافيه

[محمد الرميثي]

http://www.mekshat.com/vb/showthread.php?t=504834

المشكلة وحدة ياليت تفيدنا من تجربتك

[فتى الوادي]

يا اخوان لا تنسون عامل حرارة الجو ... الجو حااااااار نااااااار .. شي طبيعي السيارات تسخن معه .
لو سيارتك تسخن في الشتاء او في الأجواء اللطيفة لكانت هي المشكلة .
السيارات وهي مغلقة وواقفة ولها يومين ما اشتغلت وتحت الكبرة في الظل تعال شوف حرارة البدي !!

[عود الليل]

يا اخوان لا تنسون عامل حرارة الجو ... الجو حااااااار نااااااار .. شي طبيعي السيارات تسخن معه .
لو سيارتك تسخن في الشتاء او في الأجواء اللطيفة لكانت هي المشكلة .
السيارات وهي مغلقة وواقفة ولها يومين ما اشتغلت وتحت الكبرة في الظل تعال شوف حرارة البدي !!

صحيح الحرارة الخارجية مؤثرة
لكن تدري كم حرارة الاحتراق للبستم الواحد تقريبا 1000 درجة مؤية طبعاً قبل التبريد لكن شوف الحرارة الف درجة مؤية
لكن البديهي ان الحرارة الخارجية تؤثر فقط على نظام التبريد اذا كان هالنظام اصابة خلل ....
اما في الحالات التبريد مستمر بدون عوائق صدقني ماراح يؤثر ذاك التأثير الواضح على المكينة.

Sent from my GT-I9100 using Tapatalk 2

[النامون]

يالغالي انا كنت مثل حالتك وغيرت كل شيء بقاء شوي وانجن وبعدين غيرت لديتر والله صارت الحرارة مثل ايام الوكاله بس للعلم اللي معي باترول

[صائد الاسماك]

الاخ الفاضل
اذا مشيت ترتفع الحرارة فيكون السبب راس المكينة

[محمد سعود]

اعزائي اعضاء مكشات

اشكرك لكم تفاعلكم المثري وهذا ظني فيكم بيض الله وجيهكم

السيارة غيرت لها بلف حق نيسان درجة حرارته 76 والحمدلله الحرارة هجدت ولله الحمد

اشكرك يا رب

[ابو حمد 2010]

ماشاء الله تبارك الله

الحمدلله الذي يسر لك الامور وفكك من الخساير..